رايكم في ابتعاث مدينة الملك عبدالله للطاقة الذرية والمتجددة

اللي اعرفه ان اللي مؤهله ماستر الراتب مع البدلات يكون 18000 ريال تقريباً .

على كلام موظف في المدينة يقول الايجابي في المدينة ان بيئة العمل جداً ممتازه ولكن فيه غموض بالنسبة للترقيات والتقييم السنوي والتعديل والامور الاداريه

طبعاً اجازتك السنويه 35 يوم

رأيي الشخصي : اعتقد ان المدينه ما راح تستمر واتوقع تنلغي او تنظم لمدينة الملك عبدالعزيز للعلوم والتقنيه او مركز الملك عبدالله للابحاث البتروليه .

السبب :لان المدينة أنشات عام 2011 يعني 6 سنوات تصرف عليها الحكومه ميزانيات بس ما فيه اي مشاريع او اي شي على الواقع ،، كلها ابحاث ودراسات !

بالتوفيق

 

عندي بعض المعلومات انشاء الله تفيدك:
1- برنامج بعثتك وظيفتك الي انا متاكد منه انه عملية ترقيع (مقلب) على شان مايوقفون برنامج الإبتعاث بشكل عام ويقولون انه ما زالوا يهتمون بالإبتعاث ومافيه ازمة ماليه لأن اصلا فيه مبتعثين عاطلين عن العمل اولى توظيفهم من انك تبعث ناس بعدين توظفهم ويجيبون لك فايده.

2- مع هذا انا من الناس الي قدمت عليه وتم قبولي من جهة الصناعات العسكرية و الحين جالس استنى الملتقى .

3- زميلي بالعمل حظر احد الملتقآت لكن انا ما اعرف ايش جهة ابتعاثة يقول على كلامهم ان يمكن تحصل وظيفة وتوقع مع نفس الجهة بعد ما تخلص واثناء الملتقى
ما ذكروا اي شي عن توقيع عقد حتى لو مبدئي كإجراء من إجراءات الإبتعاث

4- لما عملت المقابلة مع الصناعات العسكرية قالوا لي ان راح احصل على مكافئة بقيمة 2000 دولار من وزارة التعليم اثناء الإبعاث يعني مو من جهة الإبتعاث

5- وهذي نقطة مهمه ان الجامعات الناشئة عندهم شي اسمه إستقطاب إذا انت تكمل دراستك برى (حتى لو على حسابك ) بعد فصل واحد وإذا كان معدلك كويس تقدم عليهم وتصير زي المعيد الى ما تخلص وترجع تعمل عندهم استاذ مساعد.

بالأخير انت امش معهم لأخر شي لكن لا تستقيل مهما حصل حتى لو تاخذ من الشركة اجازة بدون راتب إلى ماتشوف جدية البرنامج لان بعض الشباب الله يهديهم استقال مع بداية التقديمات برمضان وهو جالس الى الان بالبيت, ولاتنسى انه اول دفعة من البرنامج يعني راح يكون فيه مشاكل

الله يوفق

 

أتحفظ بشدة على هذا الكلام، وضع الابتعاث تغير بشكل متعمد من القيادة وليس له علاقة بتغير الوزير، عزام الدخيل كان ينفذ فقط ويستحيل أن يكون هو صاحب هذا المشروع وقام بتطبيقه بعد أقل من 4 أشهر على تسلمه للوزارة! ومما يدل على هذا ان وظيفتك بعثتك مستمر الآن رغم اعفاء الدخيل. شاهدت مبتعثين لديهم قناعه بأن الملك وولي العهد حاولو ضمهم للبعثة لكن عزام الدخيل عرقل هذا! حدث العاقل بما يعقل!

لا أدعي أن النظام الحالي نظام مثالي أو حتى أفضل من السابق لكني متأكد أنه قرار الحكومة ككل وليس قرار الوزير بأي شكل من الأشكال.

بالنسبة لصاحب الموضوع فلا أنصحك بابتعاث مدينة الملك عبدالله للأسباب التالية:
1- الغموض الشديد لديهم
2- العمل كباحث ليس مثل العمل كأستاذ في جامعة، وحسب كلامك أنت ترغب في التدريس قبل الأبحاث

 

بقولك شي انا ماعندي خلفيه صراحه عن مدينة الملك عبدالله بس احساسي يقول انها مجرد هياط بس واتوقع والله العالم مثل ماقالوا الاخوان ما تستمر طويل لان فيها غموض غريب جدا. بعدين ياعزيزي انت مهندس في سابك ليه تترك المضمون وتدخل في شي غامض اكيد انت ودك بالابتعاث بس صدقني فكر اذا رجعت من بعثتك بتكون مجبور تخدم فيها مثل مدة دراستك يعني لو ما صلحت لك الامور ماتقدر تستقيل. انا اقول الي عاطل وتجيه فرصة الابتعاث فيها فيقبله ولا يتردد لان وظع التوظيف مزري هالفتره اما الي ماسك وظيفه وفي شركة جيده مثل سابك انصحه يفكر جيدا قبل يتخذ قرار مثل هذا.

 

بس علشان مايزعل ابو خلدون خذفت اسم الوزير لكن ذكرته لانه هو الواجه للوزارة (لكن انا ماعندي علم هل هذا توجه القيادة مثل ماقلت ولا لا ,لكن تعودنا ان فيه قرارات على السريع )
بالنسبة للغموض فهذا الشي كثير شباب حسوه بكثير من الجهات
بمقابلتي مع المؤسسة الصناعات العسكرية كانوا الي قابلوني ثلاثة,اثنين أكاديميين من خارج المؤسسة وواحد مهندس بالمؤسسة كانوا يسألوني
أسئلة هندسية عادية ولما أسألهم عن طبيعة العمل والراتب كانوا يقولون حنا ما لنا علاقة حنا فقط جايين علشان المقابلة وكان المهندس الي
بالمؤسسة مايتكلم ولا يسالني وكنت اوجه الأسئلة له عن المرتب قالي راح يكون مثل الأكاديمي .

 

رأيك منطقي يا اخوي،
أنا كنت نفسك مقابلتي مع المدينة ولما شفت الوضع كذا ما حضرت المقابلة حتى،
ميزتها الابتعاث ك إبتعاث وشهادة أعلى، وفيها سلبيات
اذا عندك خبرة ب سابك أقل من سنتين، ما أنصحك تروح والرأي لك

 

ياشباب
للآسف مافيه شيء رسمي والحين تحكم ع مستقبلها وكأنك مطلع ع الخطة المستقبلية لهم
خططهم طويلة المدى ماهي سنتين وتطلع ثمارها مثل الشركات البترولية

اللي يقولك الراتب حدود كذا وكذا هم توقع وليس كلام اكيد
وغير كذا اذا ماأعجبتك الوظيفة تقعد عندهم عدد السنوات اللي ابتعثتها وبعدها صحيح فرصتك للشركات شويه ضعيفة واخص بالذكر الشركات الكبيرة
ومن بداية التقديم الكل عارف ان المدينة تعتمد بشكل كبير على الابحاث العلمية
ع الاقل بالخمس سنوات القادمة
فلما ترجع من الابتعاث احتمال تكون مع بداية نشاطها ع ارض الواقع
فهذي فرصة كبيرة انك تكون من اول المهندسين اللي يشتغل فيها
وغير كذا فيه احتمال تكمل دراستك لشهادة أعلى

ومهما حصل وشفت ان الوظيفة ماهي عاجبتك
تقدر تقدم على الجامعات كمحاضر أو دكتور حسب شهادتك
واعتقد لك الافضلية لانك كنت تشتغل بالبحوث العلمية واكيد راح تكون ناشر عدد لابأس فيه

 

يا أخي بالمختصر..
أنت تحب العلم؟ تحب البحث؟ تحب تكون مهندس خبير و مستشار و باحث؟
عندك جلد على الدراسة الأكاديمية في الجامعات القوية؟ عندك جلد أنك تكتب أوراق علمية و تشارك في المؤتمرات العلمية؟

لو فرضنا إجابتك على اللي فوق "نعم" ، طيب لو عندك مليون ريال، هل كنت ستنطلق لتحقق طموحاتك؟ يعني على فرض أن الدراسة تكلف نصف مليون ، و النصف الثاني علشان ترتاح نفسيا أنه عندك سند إلى أن تجد الوظيفة الحلم.

إذا نعم .. طيب يا أخي هذي هي الفرصة جاتك ببلاش. تطلع تدرس في جامعة قوية على بعثة و أنت محفول مكفول مشمول ، و ترجع لوظيفة محفول مكفول مشمول ، و إذا خلصت المدة ، قد إنت تعلمت و أخذت خبرة و كونت علاقات أكاديمية و مهنية ، و صار عندك نضج مهني ، انطلق بعدها للي تبيه .

إذا أنت براسك علم و تحصيل دراسي قوي حقيقي ، و جلد و صبر ، فهذي فرصتك و توكل على الله.

في كل كلامي فوق أنا معتمد على أساس قوي ، اللي هو أهمية الطاقة بالنسبة لنا ، و أتصور أن الدولة لديها خطط و تحولات في هذا الاتجاه.

و أنت أبخص ،، و الله يوفقك

 

يا إخوان، اللي يفرق بين الأبحاث العلمية اللي يقوم فيها مهندس ، و بين العمل في الشركات ، فمع احترامي هو متأثر بالعقلية السائدة اللي عندنا.

حتى في شركاتنا ، هناك إدارات مختصة بالأبحاث ، و إدارات مختصة بالهندسة و التصاميم ، و إدارات مختصة بالمواصفات و المقاييس ، و غيرها ، و هي مليئة بمهندسين أجانب خبراء بكل ما تحمله الكلمة من معنى و لديهم أبحاث علمية و أوراق علمية .

عالميا، يا كثر البروفيسورات اللي أسسوا شركات ناشئة خاصة بهم و في مجال تخصصهم.
أذكر يوم كنت في ورشة عمل تدريبية في أمريكا كانت عن الشبكات الذكية، أحد المهندسين الهنود فاتح شركة في أمريكا من ثلاثين سنة و متخصصة في تصنيع أجهزة قياس فيما أذكر قياس الانحراف في الطور Phase و غيرها من الأجهزة ، و كان معتمد على أبحاث و أظن براءات اختراعات خاصة به .
و الأمثلة كثيرة ..