ارامكو، سابك، الشركة الوطنية، ساتورب، مهندس كيميائي؟ أدخل

يعطيك العافية على المعلومات القيمة
ياليت تذكر طبيعة الأسئلة التكنيكال في مقابلة ساتورب ؟

 

مساء الخير حبيبي اولا الله يبارك لك بالوظيفة الجديدة ومنها الى الأعلى يا رب حبيت استفسر منك عن شركة ساتورب انا موظف حاليا SMP مقدم عليهم واتصلوا اخذوا بياناتي وقالوا بيحدوون المقابلة تقريبا صارلهم اكثر من شهرين مدري هل اوقفوا التوظيف او لا وشكرا

 

طيب وش رايك باأيام المهن؟ من واقع تجربتك الشخصية هل يعتمد عليها في الحصول على وظائف؟

 

سابك

على طاري بعض الشركات ماياخذون الا خريجين البترول او امريكا


الله يوفق الجميع لما يحب ويرضى ..

 

يعطيك العافية على مشاركتنا تجربتك، لكن تعليق بسيط على "ملاحظة: لاحظت للاسف في اغلب الشركات اللي ذكرتها يبغون فقط!!! (طلاب مبتعثين او من البترول والمعادن) يعني لو معدلك 5/5 في جامعة الملك سعود، سيتم اسقاطك من المنافسة."
هالكلام غير صحيح، أنا أستغرب من نشر هالمعلومات ومن المستفيد منها، وكيف حكمت إن الغالبية تتبع هالنظام وأنت ما تخرجت من سعود ورفضت ؟، أنا خريج جامعة تعتبر من متوسط الجامعات السعودية (كسمعة) وخريجي الجامعة وأعني المهندسين ممن أعرفهم يعملون في أرامكو وسابك وشركات عالمية زي ABB وماكديرموت وبيكر هيوز والله على ما أقول شهيد، يعني اوك لو كانوا المتقدمين متقاربين في الكفاءة ممكن يفضلون خريج البترول بحكم سمعة الجامعة وتجربتهم مع خريجيها، لكن تتكلم عن ٥/٥ في سعود ويرفض فقط لأنهم يفضلون خريج البترول هذا كلام أبدا غير منطقي، ولو حدث فهو في شركات قلة وليس في أرامكو أو سابك.

وحتى ما يجيني أحد مدرعم تراني من عشاق الجامعة، والمنتدى هذا قدم لي خدمة عظيمة طوال مشوار دراستي، ولكن حتى ما ينتشر الإحباط وتنتشر معلومات مغلوطة علقت على الموضوع.

 

صحيح.... كلامك

أنا طالب كيميكال من البترول ووقت الكواب المشرف تبعي في أرامكو خريج كيميكال من جامعة الملك سعود والمساعد ماله أيضا من جامعة سعود

قد نختلف على الجودة (أطلق البترولي الذي في داخلك )لكن كتواجد متواجدين من جامعات أخرى...

 

أنا ما تكلمت عن جودة جامعة البترول واللي في وجهة نظري الشخصية هي الأفضل في التخصصات الهندسية في المملكة، لكن فقط تعقيب لأن فيه كثير يتابعون المنتدى من طلاب جامعات المملكة وخارج المملكة، فكان تعليقي للتوضيح لا أقل ولا أكثر، والنقاش من أفضل وأقوى جامعة ما راح ينتهي، لكن الأكيد إن جامعة الملك فهد إضافة قوية لسيرتك لكن ليست كل شيء.

 

بعيدًا عن المثالية الزائدة ، بعض طلبات التوظيف الي توصل للموارد البشرية في ارامكو من الأقسام الثانية ينصون على دعوة خريجي البترول فقط للمقابلة .
طبعًا هذا بسبب العنصرية من بعض خريجي الجامعة القدامى لطلاب البترول (أنا خريج الجامعة)

 

انا خريج الفصل الماضي من الملك سعود وبمعدل اقل من 4.5 وسويت 4 مقابلات مع ارامكو وسويت مقابلة مع الشركة الوطنية للأنظمة الميكانيكية

 

اولا الارزاق بيد الله عز وجل

راح زمن "ما نبغى الا خريج البترول" الحين وش معدلك ابوووي



بالعربي راح تلقى واحد دخل جامعة الملك عبدالعزيز وجاب مرتبة شرف ثانية تخصص هندسة ميكانيكة و الوضع كان سهالات جدا ودوام فلة ودراسة فلة

وواحد دخل جامعة الملك فهد للبترول والمعادن انمحط واتمحص وكان ياخذ نص ويكند في بعض الاسابيع عشان يعوض الخطة الدراسية ( صارتلنا ممكن مرتين ) ويختبر يوم الجمعة (صارتلي مرة وحدة ) وضغط نفسي رهييب وعجيييب وجاب معدل 2.1/4 تخصص هندسة ميكانيكة

هذول الاثنين بيقدمون على ارامكو .. ارامكو راح يدخلون اللي تخرج من جامعة الملك عبدالعزيز الانترفيو لان معدله عالي .. وراح يقولون لصاحبنا من KFUPM حاول مرة اخرى بعد 3 سنين لان صاحبنا معدله نازل .. ( في قصص لاصحابنا من ذوي المعدلات المنخفضة اللي سلكت امورهم)

وفي الحقيقة اذا اخذت الاثنين بمقابلة شخصية راح تلقى ان صاحبنا من KFUPM متفوق بلغته الانقليزية ومتمكن من مواد التخصص وكل شي تمام لكن معدله منخفض بسبب الضغوطات اللي يواجهها من قبل الجامعة .. بينما صديقنا صاحب مرتبة الشرف الثانية دراسته سهلة جدا وسهالات ومافي اي صعوبات يواجهها وقريدز بكل سهولة ياخذ .. لكن الواقع المرير خلى المعدل اهم شي

تتوقع اذا جبت خريج امريكا او بريطانيا او جامعة تانية يقدر يحل اسئلة Physics 101 او Physics 102 ؟ انا ماتوقع الا قلييييييل منهم


الواقع ان كان معانا ناس اساسا مانقبلوا ب KFUPM بسبب مستواهم المنخفض اليوم هم ب ارامكو سابك وغيرها بسبب معدلاتهم العالية من جامعات دراستها سهلة
الواقع كان معانا ناس ماتحملوا الاوريا او ماعدوا الانقلش او الماث تبع KFUPM وخرجوا من الترم الاول او الثاني وراحوا جامعات سهلة بأمريكا وبريطانيا وغيرها واليوم هم ب أرامكو وسابك وغيرها
الواقع ان معانا موظفين ارامكو مايدرون وش الطبخة من اصحاب المعدلات العالية بالجامعات السهلة اللطيفة واهتمامتهم متى بطلع تشابتر 8 او تشابتر 14 او متى بطلع اسايمنت برا خليني افل بذا المدرا لو تناقشهم بتخصصهم مافهموا شي لكن مدري كيف عدوا الانترفيو (طبعا مو كلهم)


بكل سهولة ويسر اختارلك جامعة سهلة وجيب معدل عالي .. اطلع امريكا او بريطانيا جامعة سهلة منها بتتعلم انقلش تمام ومعدل عالي وتتمشى وتشوف الدنيا وتجي ارامكو وسابك وغيرها وتنبسط وراح تشوف خريج بترول افضل منك وبكفاءة عالية في وظيفة اقل منك لان معدله مخسوف


اعرف خريج بترول بمعدل 2.1/4 طلع امريكا ماستر جاب 3.8/4 كان يطقطق ويتونس (دراستهم فلة يبووووويا )

زي ماقلت فووووق اول شي الارزاق بيد الله عز وجل


بكل سهولة ادرس بمكان سهل وريح نفسك وجمب اهلك وجيب معدل عالي و ان شاء الله ربنا يعطيك اللي تتمنى



اساسا اش اللي خلانا نفتح الهرجة دي ؟ ماعرف

 

بكل صراحة اقوى جامعة سعودية في التخصصات الهندسية هي البترول.

لكن في جوانب اخرى مهمة لازم تأخذ بعين الاعتبار هو مستوى اللغة, الدورات التخصصية, الثقة وقوة الشخصية بالاضافة الى المعرفة التخصصية او المعدل.

ممكن تحصل شباب من البترول يجمع لك كل هذي الجوانب وممكن لا ونفس الشي ينطبق على الجامعات الاخرى بغض النظر عن اسم الجامعة وقوتها

على سبيل المثال في احد الشركات كان في Assessment day وكان مجموعنا 9 انا محدثكم و معي 2 من البترول وواحد من سعود وواحد من جامعة ولاية اورجن من امريكا وكم واحد من جامعات أخرى

البعض منهم كانت شخصيته ضعيفة واللي يستحي و آخر عنده صعوبة في التحدث بالانجليزي وواحد ماشاء الله طلقه وبلبل وفاهم بتخصصه وواحد مهارات التواصل عنده ضعيفة وو مقاييس أخرى وكثيرة عد واغلط ....

من الـ 9 اخذو 3 وانا منهم خريج كلية التقنية وواحد من البترول والثالث مادري من وين وهذا دليل على انه راح زمان هذا من جامعة امريكية وهذا من جامعة فلانية, والي بياخذ الوظيفة هو الشخص الاجدر بها.

في ناس متخرجين بمراتب شرف وممكن عملو كم مقابلة لكن عاطلين لهم سنة وفي ناس معدلات متوسطة او نازلة وممكن من جامعة عادية توظفو خلال شهر بعد التخرج, هي قسمة ونصيب وتوفيق من رب العالمين ولكن لو نأخذ بالاسباب ممكن يكون احد الاسباب المذكورة غير موجودة في المتفوق وموجودة في صاحب المعدل العادي. ولاننسى فئة معهم واسطة ينسف لك كل المذكورين سابقاً وهو شهادته ثانوي ليلي.

وصحيح توجد شركات كثيرة مايدخلون مقابلاتهم الا طلاب البترول وعادة اجراءاتهم قصيرة, مقابلة او مقابلتين وبعدها عرض وظيفي وهذا من حقهم لان ممكن تهمهم جوانب معينة وماهي موجودة الا فطلاب البترول مثل تحمل الظغوط والمعرفة التخصصية بغض النظر عن المعدل واللغة.

وفي شركات مايهمهم الفهم في التخصص بل تهمهم الجوانب الاخرى الشخصية ولذلك تشوفهم يسوون اجراءات طويلة لاختيار المرشحين تبدأ من اختبارات و مقابلات تصل لـ 4-5 مقابلات ويوم مفتوح واخيراً العرض الوظيفي

 

أتفق معك صحيح طلاب جامعة البترول أقوياء في التكنكل ولكن في الحياة الاجتماعية والتواصل ضعفاء جدا في الغالب.
اعرف واحد دخل اسسمنت داي واخذ الوظيفة من 40شخص اغلبهم من جامعة البترول هذا وهو معدله 2.4 وما عنده ما عند جدتي في التكنكل نولج ولكن بشخصيته واسلوبة استطاع ان يفرض نفسه ويتغلب على جميع الطلاب وياخذ الوظيفة

 

صحيح خريج البترول قوي تكنيكال واتوقع في بعض الاحيان قوي اجتماعيا مثل عمر حسين و ياسر بكر(مؤسس جدة كوميدي كلوب) ..

هذا الجزء خارج عن الموضوع انما مفيد


عتبي على البترول انها ماتخلي طلاب الهندسة يتعرضون كثير على مواضيع البزنس .. بمعنى ان طالب الهندسة يكون تعرضه لمواد البزنس قليل مو ذاك الزود ومافيه ريادة اعمال مطلوبة .. كثير همهم بس الوظيفة انما مافي اي اهتمام على اطلاق بزنس او شركة او كذا .. طبعا في الاونة الاخيرة نلاحظ انطلاق مركز ريادة الاعمال الخاص بالجامعة وفعلا لطيف ومفيد وجميل ..
الكلام في هذا الموضوع يطول وودي اقول كل اللي بخاطري لكن ابثرتكم ادري وقبل اختم اتمنى تشوفون ذا الكتاب " اب غني اب فقير" " Rich Dad Poor Dad "



ومثل ماقلت الارزاق بيد الله عز وجل

 

الموضوع حاد عن غايته يشكل كبييييير !!!

 

اهم شي الفايييدة

 

بعد التحية
عن تجربة شخصية كموظف سابق تحت ادارة مدراء مهندسين خريجي البترول ومن جامعات سعودية ثانية ومن جامعات سباكة دول العالم الثالث في اسيا وافريقيا

يبقى البترولي علامة فارقه ترتاح تشتغل معاه!
بعض المهندسين ماتعرف تشتغل معاه ماتدري هو مهندس او معتوه!

ماني خريج هالجامعة رغم انها كانت حلم لي