الدورات التأهيلية

الي يقدم دورات اليومين هذي وبالمجان كمان هي الهيئة السعودية للمهندسين لكنها ما تهتم بقطاع النفط والغاز تهتم اكثر بقطاع التشييد بالبناء
ولكن اذا انت تبغى تعرف وش يحتاجه سوق العمل عندك 3 خيارات وهذا الشي الي تمنيت اعمله لما كنت طالب باول سنة:

1-شف يوم المهنة اسئل الشركات وش المهارات الي يبغونها من المتقدم اهم البرامج الي يشتغلون عليها مجالات عمل الشركات وش مشاريعهم واسئل هل مجالهم تصميم وانتاج او تشغيل وصيانة اوتركيب مثلا شركة سيمنس تصمم وتصنع وتبني محطات الكهرباء وشركة الكهرب تشغلها

2-انك تدعس وتروح للشركات وتطلب تقابل مهندس (وممكن ترى مايعطو وجة يالله يبغون يخلصون شغلهم) وتسألهم الاسئلة الي ذكرتها

3-ايضا تقابل دكتور بالجامعة سبق واشتغل بالشركات واسئلة نفس الاسئلة (وترى هذي مشكلة كبيرة ان بعض الدكاترة اكاديمي بحت مايعرف شي بالشركات)
---
ثم اذا عرفتها الاسئلة الي ذكرتها فوق كحد ادنى تقدر تلقى معلومات بالنت واليوتيوب عنها تغنيك عن الدورات لو ان الدورات ميزتها عندك شهادة للتوثيق لكن لازم يصير فيه طريقة لتوثيق ان الواحد يتعلم من اليوبيوت لان اليوتيوب يعلم!!
---
وانتبه تصدق إذا احد قال لك نبغى وظايف او من هذا القبيل امش معهم وخذ رقمهم ووقع معهم حتى لكن اعمل حساب ممكن مايسئلون عنك اذا تخرجت لان اليومين هذي مافيه وظايف ومادة77 لاعبة لعب بالموظفين
---
اخيرا وهذي ايضا معلومه مهمة والتقصير من الجهة الي باذكرها والي هي هدف صندوق الموارد البشرية انها ماوصلت للطلاب ولاسئلت عنهم لذلك مر عليهم واسئلهم رغم انهم مالهم بالهندسة ولكن لانهم يقدمون خدمات كويسة ودعم مادي ولو ان اوقفو الدعم قبل مدة ولكن مر عليهم واعرف حقوقك ووش برامجهم.
---
موفق

 

نعم المادة 77 تمكن صاحب العمل من فصل الموظف وفق اي ظروف وانا شخصيا انهو نشاطي الشركة ولكن ما اهتميت لانها ماكانت طموحي كنت ماخذها بشكل مؤقت الا ما اخلص اجراءات البعث الي طولت اكثر من سنة ولكن الحمدلله انها جت من الشركة لسببين:
1- انصرف لي ساند وكان مبلغ مش بطال وزميلي استقال لانه جته بعثه وراح عليه ساند (ساند تامين زي تامين السيارات في حال انقطاعك عن العمل يعطونك راتب وف شروط معينه)
2-وانا اراجع معاملتي بساند لان صار على مشكلة معقدة بسبب خطاء موظف حمار بالتامينات وولكن للامانة التامينات نفسها ارسلت لي اني مستحق بعد ماطلعتني الشركة من النظام بعد مدة الاستحقاق مباشرة وللامانة رجعولي جميع المبالغ باثر رجعي (وحتى استمر معي ساند انا خارج المملكة وهذا مخالف) مع ان الموظف الحمار (بالمناسبة كان رئيس قسم) أكد ان إدارة ساند فيها تقاعس ولكني تابعت معهم وكان فيهم اهتمام!
والمهم وانا اراجع المعاملة تعرفت وش هي التامينات ودورها وعرفت هدف وعرف طاقات وبرامجهم عندهم بعض البرامج الكويسة لكن المشكلة من الموظفين والله العظيم دلوخ مايفهمون شي ولا ماتشوف البطالة تزيد كل يوم! فقط شوف مؤهلاتهم والله ماتوظفهم سواقين كيف هذا الشخص يبغى يوفر وظيف لمهندس بتخصص دقيق اتحد موظف طاقات سمع عنه والدليل فضايح الوظايف الي تعلن بموقع طاقات "راعي غنم" ومهندس كهرب يوزع الحلوى بالافراح طلعو مع الشريان مسح فيهم الارض. تحمست شوي نرجع لموضوعنا

وللاسف عرفت برامجهم الكويسة بوقت متأخر وكان في فرص كثيرة كنت اقدر استفيد منها ضاعت علي وهذا بسببهم مايتواصلون مع الطلاب زي ماقلت وغير كذا عندي مشكلة شخصية حتى لاحظتها بكثير من الطلاب والي هي مثلا انا شخصيا الناس الي حولي يعني اهل ومعارفي مافيهم احد يعرف بهذي الامور انا بينهم كأني غريب كلهم موظفين قطاع حكومي(وكثر منهم مدرسين وتعرفون وش يعني مدرس عندنا) وحياتهم روتين مثل الساعة وما احد منهم فادني بشي لذلك ما اعرف وش الحل بصراحه وماينفع اغير اهلي