تقـييم مطعم الجامعة [حاليّاً]

انا استخدمه هالايام وما اشوف اي تحسن الا الصحون الجديدة ..
اما بخصوص السلطة الي تمدحها كثير الاقي الخس فيه اثر مأكول من الحشرات والديدان واليرقات
اما الطعم والجودة والتنوع ايام يجي مقبول وايام يجي سيء جدا الله يكرم النعمة
وشكرا

 

انا ما اكذب عيوني شفت الجرجير فيه اثر من اكل وقرض الحشرات والديدان واليرقات واذا مو مصدق روح ودقق يمكن جيت بيوم مسوينها كويس

هذا غير الاكل الي اقل مايقال عنه انه بلا طعم ولا لون ولا رائحه استغفر الله بس


انت تعرف والكل يعرف انه لولا ان المكافأة ماتكفي ماتشوف احد يطب هالمطعم السيء جدا بوجهة نظري

 

مثل ماقلت في موضوع سابق .. انا جربت المطعم قبل اربع سنوات تعشيت فيه وقطعته
الا مرة افطرت فيه

لكن من شهر صاير اتردد عليه من فترة لفترة ولاحظت ان
المطعم تحسن بشكل كبير جدا

وقبل يومين بالذات جربت طبق دجاج في مطعم الدكاترة
بالضبط نفس مطعم الطلاب من ناحية الجودة والطعم .
. الفرق انه كان بنصف السعر في مطعم الطلاب

 

أنا طال عمرك أوريا

ومن أول ما جيت خلال هذي الثلاثة شهور كنت بشكل عام مداوم عليه .. صراحة لاحظت اختلاف واضح جداً خاصة بعد ما رجعت من إجازة عيد الأضحى

في الفترة الأخيرة لاحظت إن الجودة صارت أفضل بشكل كبير جداً .. بس مع الزكام والبرد صرت أفضل أطلب من الخارج

 

صحيح فالفترة الاخيرة تحسن المطعم ونتمنى انه يستمر كذلك ..

 

المطعم في تحسن .. لكن زي ماقال احد الشباب في موضوع سابق " نطمح للأفضل "

ادارة الخدمات الغذائية ماهي مقصرة ويشكرون على اهتمامهم وتواصلهم والله يعطيهم العافية

لكن دائماً في مجال للتطوير والتحسين وفي حالة مطعم الجامعة المجال " برأيي " ما يزال واسع .. صحيح انه في مستوى تقبل ورضى وفي طلاب مرتاحين جداً للمستوى الحالي .. وفعلاً المستوى الحالي مقبول لكن زي ما قلت يبقى هنالك room for Improvement ... أنا شخصياً راضي عن مستوى بعض الأطباق لكن يبقى عندي تحفظ على مستوى بعضها سواء للطعم او المحتوى .

:وجهة نظر:

 

تقييمي للمطعم مختلف من فترة الى فترة ،،، فالاسبوع اللي راح تغديت هناك ،، وحصلت كل مالذ وطاب ،،،، خين نوع الرز البطل والدجاج ،، شفت في السلطة الاشياء التالية ،،
(معكرونة بيضاء ، معكرونة وردية ، رز مسلوق وردي (لذيذ) ، حمص ، سلطة باللبن او زبادي ، سلطة خضراء ، ليمون ، حبوب الذره) ،،،
كل ذولا الحلوين حصلتهم مره وحده وبكمية طيبه ،،،

ومن هنا احب اشكر مدير المطعم عباس على تعاملة الراقي مع الطلاب

 

صراحة انا ما اروح الا بيوم او يومين للغدا بمطعم الدكاترة اما مطعم الطلاب ما جيته الا كم مره ما تتعدا 10 مرات من جيت الجامعة لكم سبب معين ( مو جودة الطعام ) المهم انه مطعم الدكاترة لا يعلى عليه صراحة و اتمنى ان تكون جودة مطعم الطلاب نفسه لأن اللي اعرفه انها تختلف فالجودة .

 

يا شباب حنا قاعدين نتحاور ونلف وندور في دائرة مفرغة للأسف
ممكن نلخص موضوع مطعم الجامعة ومقارنته مع مطعم الدكاترة كالتالي :
1-فيه ناس يشوفون مطعم الطلاب سيء والتنوع فيه قليل والأكل ما فيه طعم .
2-فيه ناس عاجبهم مطعم الطلاب مع إنهم يودون لو يتطور أكثر وأكثر "وهؤلاء هم الأغلبية لو نرجع للإستطلاع"
أنا رح أعطي رأيي بكل صراحة بحكم إني أجي المطعم من سنتين تقريبا بشكل شبه يومي
من ناحية النظافة فما نختلف إن المطعم فيه مخالفات واضحة للذوق العام للنظافة , ما أقول أبغاه يكون "الفور سيزنز " لكن أنا أتكلم عن "الذوق العام" . فمثلا لما نشم الروائح في السير المخصص لوضع الأطباق أكيد ما رح نختلف يا شباب على إنه رائحته كريهة جدا , كمان نفس الشيء مع الحمامات ونظافتها المتدنية وإضاءتها الخافتة و الحنفيات الرديئة ,كمان العاملين في المطعم الله يجزاهم ألف خير لكن القفازات ما أتوقع يلبسها إلا نصف العاملين في المطعم وبعض إللي يلبسونها حتى يلبسونها على يد واحدة فقط
ومن ناحية التنوع فأنا أشوف إنهم ينوعون وفيه أحيان ما تلقى إلا رز ودجاج وسلطة
عموما المطعم كويس من ناحية السعر , متوسط من ناحية نظافة الأكل , سيء من ناحية نظافة المرافق , رائع من ناحية تعامل الموظفين مع المستفيدين
ملاحظة : فطورهم شي خيالي ​

 

سؤال وين مطعم الدكاترة الي تتكلمون عنه ؟

 

على يسار المكتبة

 

مافهمت
يعني داخل بالمكتبة اروح يسار ولا كيف ؟

 

^

بالمبنى الي ع يسار مبنى المكتبه

 

أنا اتغدى من مطعم الجامعة "القسم السفري" شبه يوميّاً !

ترم 132 كانت جودة الأكل افضل بكثير ..... الترم هذا الأكل "الله يديم النعمة" إن صح التعبير

برضو في نقطة ودّي توصل للمسؤولين عن الخدمات الغذائية

يبدو لي ان المسؤولين عن الكاشير اثنين .. واحد يداوم من الظهر للساعة 4 و الثاني من الساعة 4 لآخر الليل

احيانا أجي الساعة 3 الا ربع او الساعة 3 .. ألقى السفري مقفّل .. لأن الكاشير طالع من الساعة 2 و نص تقريبا عشان الصلاة .. و المشكلة انه ما يرجع بعد الصلاة و يتكي في المطعم للساعة 4 !

لازم ننتظر الأخ اللي يجي الساعة 4 و يفتح لنا المطعم !

مرة من المرات انتظرت للساعة 4 ... و لما جاء المسؤول قلت له يا أخي تأخرت علينا ... قال أنا دوامي من الساعة 4 ... الأخ اللي قبلي المفروض ما يطلع لين أجي !


شكرا لك يا أبو راكان .... كعادتك تكون حلقة وصل فعّالة بين الطلاب و الإدارة

 

^^^

معلومة جيده ،،،، شاكر لك على الاضافة

 

مسكين ذا المطعم
كل دقيقتين فاتحين موضوع عنه

المهم المطعم جيد وانا من رأيي وأعيد وادقق في كلمت (رأيي) انه ما يحتاج أي تغير في الاسعار او الطعم او التقديم
والحمد لله على الصحة والنعمه

 

بين مبنى الادارة (21) والمكتبة (8)

 

أنا ماضايقني إلا النفاق اللي صار بعد لقاء المدير للطلاب الأخير عندما أشتكى الطلاب من سوء مطعم الطلاب و أخبروه عن جودة مطعم الدكاترة وأنه أفضل بكثير من مطعم الطلاب فقال لهم المدير أنه بيخلي الدكاترة والموظفين يأكلون في مطعم الطلاب ثم يجتمع فيهم ويأخذ آرائهم عشان يشوف الطلاب صادقين والا يكبرون الأمور.

و النفاق كان كالتالي أن الدكاترة والموظفين كان لهم أطباق خاصة فيهم وليست مثل حقت الطلاب والحقيقة كان الأكل حقهم مغري وماقد شفت مثله في مطعم الطلاب وأنا أتوقع أنه نفس الأكل اللي في مطعم الدكاترة نزلوه لمطعم الطلاب ذيك الفترة للدكاترة والموظفين وهذا شيء يقهر الحقيقة لأن المدير نيته الأصلاح والخدمة الغذائية نيتها تزييف الحقائق وخداع المسؤليين فهذا دليل واضح على عدم الرغبة في التطوير.

وأقل شي ممكن يعملوه أن مطعم الطلاب يكون نفس مطعم الدكاترة بنفس السعر السابق وهو 4 ريال طبعا فرق السعر الجامعة مسؤوله عنه و أتمنى من المسؤولين في الخدمة الغذائية أخذ الأقتراح على محمل الجد وتطبيقه لأن مطعم الطلاب حاليا سيئ ولله الحمد على النعمة .