جامعة البترول .. قصة المجد الآفل !

أتفق معاك حرفيا في كل كلمة قلتها ..

لكن اجلس مع نفسك وصل ركعتين وفكر جديا في انك تشتغل لنفسك " بزنس حر " بالسبل المتاحة امامك . وربك ما يضيع لك تعب

أخوك خريج : May 2015 ومعدلي 2.1

شوية حركة مع تعب بيدك . بتلاقي حلم راتب ال 15000 شي بسيط قدرت تحققه في اشهر

لا تقولي وش استفدت من الشهادة . الي استفدته انك متعلم نظرتك ما حتكون مثل اي شخص وحتبدع اكثر

>>>>>> على فكرة موقف تقاديم من مبطي و الغيت فكرة الوظيفة نهائيا :o

الله يوفقنا ويوفقكم

 

موضوع بطل الله يرزقنا ويرزقك أخيرا في موضوع يوصل المفهوم اللي نحاول نوصلة من زماااااان الله يعين يارب ويفقك يارب

 

لكن ما نحمل الجامعة المسؤولية. المشكلة قلة الفرص. يعني لو افترضنا السوق طالب 300 موظف من خريجي الجامعة... حتى لو تخرجوا كل الطلاب بمعدلات فوق الجيدة الطلب ما راح يتغير.

 

أسعار البترول تلعب دور مهم جدًا

الله يرزقكم الوظيفة اللي ترضيكم

 

الله يرزقك الوظيفة الزينه في اقرب وقت .

بعيدا عن اسعار البترول و عدد الطلب في يوم المهنة .

بتكلم عن المفاضلة بين خريجين الجامعات بالمعدلات .

صراحة ما اتوقع ان الجامعة تغير طريقتها في تعقيد الاسئلة .

فـ حل مشكلة "فرق المعدلات بين الخريجين" هو انه

على الاقل يحطون الافرج B

مو c+ او بعض الكورسات حتى c !!

 

كلام واقعي جداً .. ومن معرفة بسوق العمل لا فرق بين خريج البترول أو خريج جامعة الخرج

اللهم شركة أو شركتين وتشكي الحين من التكدس

جامعتنا تبيع الوهم

 

في الجامعة يمكن تتعلم أشياء متأكد ماراح تلقاها في جامعات ثانية + تتوفر لك فرص ما راح تلقاها في كل الجامعات مثلا تفضيل بعض الشركات لطلاب الجامعة في برامج المنح الدراسية او التدريب التعاوني لكن بشكل عام الشركات تعتمد بشكل أساسي على المعدل عند التخرج خاصة هذا الوقت مع كثرة الخريجين ...
المشكلة في الجامعة إن عدد مب قليل دخل الجامعة عشان سمعتها + تصوير الجامعة للطلاب إن لهم الاولوية في كل شي فلما يطلع من الجامعة يكتشف الوضع الحقيقي وهي إن التفضيل لطلاب الجامعةهو من جزء بسيط من الشركات وبعض هذي الشركات لها شروطها الخاصة مثل المعدل والتخصص

فالخلاصة لكل شخص ناوي على الجامعة : الجامعة ممكن توفر لك ميزات وفرص خلال دراستك في الجامعة وهذي الفرص ماتوجد في الجامعات الثانية ( في السعودية) لكن في النهاية الي بيحدد اول خطواتك في سوق العمل هو معدلك مب سمعة الجامعة !

أشكرك على هذا الموضوع الرائع و بإذن الله راح تحصل الوظيفة الي تتمناها
بالتوفيق

 

موضوع جاء في غير محله لللخريجين واصحاب المعدلات المضروبة أمثالي :d
جربت تقدم عالشركات وتقولهم اني ادري ان معدلي خايس بس باقبل براتب قليل وباثبتلكم بجهدي اني استحق وكذا ؟
اتوقع عالاقل كدراسة فالجامعة المفروض راتبك فوق 8 الاف .ف حاولت تضحي من ناحية الراتب وغيره عشان تكسب الوظيفة ولا ما تنفع هذه الطريقة ؟
ايش الشركات اللي قدمت عليها لو تكرمت وفي اي مناطق ؟

 

اكاد اجزم ان المشكلة بتنحل لو ان الافرج صار بين b و b+ بدل ما هو على حالته

اقلها حتى لو ما انحلت بشكل كامل ممكن تخلي الواحد يشوف بعض ثمرة جهده بدل ماهو على قد مايتعب ما يشوف شي طالما كل اللي معاه شغالين

 

وعليكم السلام,

ما حبيت أمر ولا ارد أو اعلق ان صح التعبير.

من نظرة شخصية, دخول جامعة البترول أكبر من من مجرد مطاردة وظيفة والتفكير فيها! الجامعة هذي تنمي وتقوي وتبني شخصيتك بطريقة ممكن انت ما تلاحظها مع انك تفضلت وعلقت على هالموضوع وأقريت فيه واشكرك على هالشيء.

أحيانا الشخص ينظر للامور السلبية اللي تصير له في حياته من جانب واحد وهذا ظلم, مثال بسيط, المعدل المنخفض! هو شيء سلبي لا محاله لكن مين فكر فينا وعطاه نظرة ايجابية ولو لوهله؟ (انا عارف اسلوبي مقرف ويدل على ادعاء مثالية لكن "لا والله!").

بعضكم راح يسأل ايش هذي النظرة الايجابية اللي ابلشتنا فيها؟ اقولك ما فكرت قد ايش خلاك هالمعدل النازل تعاني؟ بتقول ايه, بقولك طيب, كل المعاناة اللي واجهتها, على الرغم من سلبيتها وقسوتها الا انها تنمي فيك شيء ما راح تحس فيه الا بعدين لما لا قدر الله تطيح بمصيبة او مشكلة او حتى بوظيفتك او بمشاريعك الخاصة, انا على الصعيد الشخصي تطورت عندي مهارة امتصاص الصدمات النفسية بسبب هذي الجامعة والمواقف الي مريت فيها من بداية السنة التحضيرية الى الان.

السر الوحيد في هذي الجامعة واللي اعتقد كثير منا ما يعرفه هو أن المشكلة مو انك تطيح بمصيبة او معدل نازل أو تخبص بميجر او تجيب العيد في كويز او حتى تدسمس, المصيبة اذا ماعرفت تتعامل مع هالمصايب من بدايتها وحط سبعمية خط على بدايتها, لان اذا اهملتها بتتفاقم عليك وينتهي بك المطاف تعلق على صعوبة الجامعة واسئلتها و و و .... الخ.

موضوعك مفتوح وواضحه تناقضاته الى حد ما من خلال بيانك بسهولة جامعة الملك عبدالعزيز, فكيف لطالب يطرد من "سنة تحضيرية" في جامعة الملك فهد ويحصل على مرتبة شرف في جامعة اخرى, "منطقيا" و "غالبا", هالكلام ما يمشي و بغض النظر عن الجامعة المعنية, إن دل فانه يدل على سوء وضعف هذه الجامعة المعنيه اللي انتقل لها الطالب.

ومن هذا المنطلق أحب اوضح "وجهة نظري" في هذا الموضوع وهو ببساطة وبغض النظر عن جميع الامور والنتائج والمعدلات والمشاكل النفسية والعملية والوظيفية والحياتية, أن جامعة الملك فهد جامعة طلبة بنسبة كبيرة للمميزين فقط, والاختبار في غالب الاحيان بمفهومه العام على قول أحد الاصدقاء "يبين جوهرك الحقيقي", و"لكن" في الجامعة هنا فيه مبالغة مو بصعوبة الاختبارات لانها صراحة مثل ما قلت لك جامعة مميزين واذا سهلو الاختبارات مثل خوينا اللي في "جامعة الملك عبدالعزيز" بتصير مثلها مثل اي جامعة ثانيه اللي متأكد انها تتمنى تصير ربع جامعة البترول, المبالغه في النسبة من 100 على الاختبارات أحيانا تصل نسبة الاختبارات 80ظھ !! والباقي 20 على الهومووركات والحضور ومدري ايش على العكس تماما في الجامعات الاخرى اللي توزعها على البحوث والبرزنتيشنز والاوراق, وبلا شك لو كانت جامعتنا "الله بالخير" كان شفت عدد الطلاب فيها كثير جداً والفوضويه فيها عارمة, بمعنى اخر على لساني ذات مره لاحد الاصدقاء, "البترول هذا نظامها وهذا ديدنها منذ تأسيسها, بغيت ولا الجامعات كثر التراب!!".

بإختصار موجز أكثر, يوم كنت تدري ان جامعة الملك عبدالعزيز مثل البترول في التوظيف وان صاحبك أخذ فيها مرتبة شرف وهو مستبعد من البترول, وراك ما رحت لها؟

ولازم ندرك ان الوظايف والامور هذي ارزاق يوزعها الله عز وجل, والواحد يجتهد وماله الا نصيبه, وكتابتك للموضوع ممكن تأثر على ناس كثير, اذا انت معدلك نازل ولا جتك وظيفه فيه ناس معدلاتها انزل منك وجاتها وظايف ما شاء الله تبارك الله, ولكن كمشرف بخلي الموضوع واترك للاخوه البقية النقاش واسال الله العلي القدير ان يرزقك بالوظيفه اللي تتمناها ويعزك ويرفع شانك.

اتمام لما سبق, انا مو جالس انزه جامعتنا من عيوبها واظهرها بمظهر مثالي, انا جالس اتكلم عن الاصل والجوهر, والحق يقال, ولكن عيوب؟ فيها عيوب ملحوظة الى حد ما وتحتاج فعلا الى تغييرات كثيرة ان جاز لي التقدير, ولكن على الرغم من كل تلك العيوب, تبقى أفضل وأحلى وأقسى وأروع تجربة عاصرتها في حياتي, ال a+ فعلا تتحدث عن ما بداخلها وأيضا ال d يحكي ويروي ما يتركه في نفوسنا.

هذا والله اعلم.







​

 

تفاجئت ذا مرة من طالب في جامعة الملك عبدالعزيز يسألني لماذا الطلاب ينطردون وفي الملك عبدالعزيز يتفوقون علينا؟؟؟؟؟؟

 

حقيقه انا ماحب اناقش في مقارنات الجامعات كثير
لكن اجزم لو معدلك 3.00 راح تتغير نظرتك كثير
ابتعاث داخلي سابك
ابتعاث داخلي ارامكو
ابتعاث داخلي جنرال الكتريك
وقريبا ابتعاث داخلي شركة الكهرب

وترا مهو واحد او اثنين , ياخذون طلاب من هنا بالهبل اكاد اجزم انه عدد طلاب بعثات الجامعات الاخرى هذا اذا فيه مجتمعين ,السبب؟
وفوق هذا "حصلي شخصيا " يدقون عليك كاوست بدون ماتقدم طلب او شي يبونك ماجستير بعثه شي زي كذا وتتوظف بعدها عندهم "ماكنت مهتم ب أكمال الدراسه ف ماهتميت بالموضوع" البنت قالت بالحرف الواحد حنا نبي طلاب من جامعة الملك فهد

موظف HR اعرفه شخصيا قالي بلسانه تجينا توصيات على طلاب البترول اذا كنا نحتاج خريج فريش


ترا حاليا ياخوك عدد الفرص قليله جدا سواء لطالب البترول او غيره شركات كثيره لو هي برا سرحت الموظفين لكن النظام هنا يمنع
فما بالك انها تاخذ خرجين جدد



وفوق هذا تراها توفيق من الله الوظيفه
خش الموضوع هذا بتشوف واحد معدله 2.5 حولها وظيفته افضل من شخص 3.2 واثنينهم خريجين جامعتنا
الى جميع الخريجيين:بعض الاسئلة حول الوظائف
بتشوف العجب العجاب


الله يوفقك يصاحبي وتلقا الوظيفه الزينه بأذن الله