المدة الزمنية لإجراءات توظيف أرامكو

اولا مبروك لكم جميعا و الله يوفقم للي فيه خير

بعد اذنكم ممكن التخصص و اذا كان في خبره او لا و كيف كانت المقابله و الاسئله

٢- كم هي المده من يوم التقديم لين بدت الاجراءات اللي تكلمتو عنها

٣- اي دفعه متى سنه التخرج / و الجامعه اذا كانت غير البترول

شكرا و موفقين يا رب

 

السلام عليكم ورحمه الله وبركاته

انا تخصصي هندسة كيميائي... كانت المقابلة شخصيه

مثلا عرف بإسمك ،،شنو تخصصك ،،ماهو تخصص الهندسة الكيمائيه ،، عادي تشتغل بره الشرقيه..

 

تخصصي هندسة كيميائية
fresh graduate من جامعة البترول

قدمت عليهم قبل يوم المهنة في الجامعة وسويت المقابلة بيوم المهنة
مع قسم (SAOO (southern area oil operation
وعدت على خير ولله الحمد

أسئلة التكنكال كانت كلها على fluid mechanics
Reynolds number
laminar and turbulent

سويت المقابلة بإبريل وباقي الإجراءات في مايو
والفحص الطبي والأوفر في اغسطس.

الله يوفقنا وياكم لكل خير ...

 

شكرا لكم و الله يوفقكم يا رب

للتو انشأت موضوع بخصوص المقابلات ياليت لو يكون مرجع لنا جميع

اسئله المقابلات الشخصيه من باب تجربتك

 

السلام عليكم ... وصل العرض من ارامكوا وعملت كل الاختبارات .... باقي فقط الفحص الطبي ... اسئلتي فضلا :

انا موظف في الهيئة الملكية هل اقدم استقالة واذهب لارامكوا ام ابقي وماهي المميزات التي تفرق؟
بالنسبة للعرض فقط ١٦ راتب كتب في العرض والعمل يكون في الظهران الشرقية؟ بينما الهيئة الملكية في ينبع قريت من الاهل.. هل يوجد ١٧.٥ راتب ام ١٦ كما موجود في العرض؟
وهل في مقارنة بين ارمكوا والهيئة الملكية ؟

اتمنى الرد اذا امكن

 

عفوا ايضا سؤالين : ايش قصدهم Field Compliance Coord في إدارة power systems
اذا في احد عنده معلومات عن مسمى الوظيفة او الادارة اعلاه؟

 

كما هو واضح من عنوان الموضوع انه النقاش هنا يجب ان يكون حول المده الزمنية التي تستغرقها اجراءات التوظيف في ارامكو ولتبادل الخبرات والاخبار حول هذا الموضوع .. ارجو أن يبقى كذلك حتى يستفيد الجميع ولا تتشتت مشاركات الأعضاء المحترمين وشكرا

 

يااخوان انا سويت مقابلة يوم 4 سبتمبر
والحين 24 سبتمبر ولا جاني اي رد ؟
هل حالتي طبيعيه؟ وهل فيه بصيص امل


لانه اخر مقابله قبل ذي سويتها يوم المهنه وجاني ايميل الرفض بعد اسبوع فقط

 

مع اي قسم سويت المقابلة؟ وهل سويت إجراءات ثانية مثل اختبار الاونلاين والفريفيكيشن تست؟

 

قسم ال Gas operation
سويت اختبار الاونلاين قبل المقابلة باسبوع لكن ماسويت فريفكيشن للان ماطلبوه مني
بالتوفيق لي ولكم

باقي احد يرد على سؤالي؟ وش وضع التاخير بالرد بعد المقابله

 

السلام عليكم

اذا تسمح لي اسألك بعض الاسئلة ؟
كم خبرتك في الهيئة ؟
ارامكو كم حسبوا لك زيادة عن كل سنه اشتغلتها في الهيئة ؟
يعني كم البيسك اللي جاك من ارامكو ؟ اذا ممكن

 

هالفترة فترة اجازات .. وغير اجازة العيد واللي طالعين اجازات قبل العيد مشبوكة ويوم الخميس كانت اجازة يوم وطني وبكرا اجازة لونق ويكند عندهم .. يعني بيرجعون للدوام الطبيعي يوم الاثنين انشالله .. وانشالله تسمع منهم عقب فتره

 

يا شباب الله يعطيكم العافيه
استفسار الله يجزاكم خير
اختبارالاونلاين حق ارامكو هل تسويه بعد ما يطلبونه هم منك والا كيف طريقته سواء هو وباقي الاختبارات اللي ضروري نسويها عشان يكون الملف كامل.
وهل هذا الشيء ينطبق على الخبره والا بس الفريش؟؟؟
وسلامتكم

 

ارمكو راح ترسل لك ايميل يحتوي علي رابط الاختبار. بعدها بفترة يمكن أسبوع او سبوعين أو شهور بيجيك ايميل عشان تجي مكتب التوظيف عشان تسوي فرفكيشن تست.. عشان يتأكدون اذا انت سويت الاختبار بنفسك.. اتوقع الي عنده خبره لازم يسوي الاختبار

 

انا سويت المقابله يوم 6 سبتمبر والى الان ما ردوا علي
ولا طلبوا مني اي اختبار

خبرتي 5 سنوات و5 شهور

 

انا سويت مقابلتين وحدة بتاريخ 1-Sep والثانيه بتاريخ 4-Sep وللحين ما ارسلوا رد ولا اختبار ولا شي !!

وش السالفه ؟

 

صراحة أرمكوا نظامهم غريب جدا جدا جدا في التوظيف بعد أخر مقابلة لي سويتها مع Drilling &Work-over والي جاني الرفض بعدها رغم أنهم قالوا لي راح نرسل لك الأوفر خلال أسبوعين من المقابلة وجاء الرفض بعدها. المهم استخرت والحمد لله أنا حاليا اشتغل في قسم R&D في جامعة كرانفيلد في بريطانيا وأحضر دكتوراة في نفس الجامعة (منحة منهم). اليوم تلقيت اتصال من أرامكو أنه احنا قبلناك تشتغل معنا كــ Drilling Engineer بدل Toolpusher والحين نرسل لك KYC along with the Job Offer المقابلة سويتها بتاريخ 19 MAY 2016 طبعا بيني وبين نفسي أنا رافض أني أرجع و أشتغل بأرامكو وخاصة أنه أخذت على الوضع في بريطانيا وفوق هذا كله جالس أحضر دكتوراه فيها. قلت خليني أشوف وش رايكم؟؟

 

بما ان عندك ماجستير من ستانفورد اكيد شافوك اعلى من شغلة التولبشر .. لو انا بمكانك اقبل العرض والدكتوراه راح يبعثونك لها وفي جامعة اقوى من كرانفيلد بأذن الله .. لكن لا ترجع السعودية لين يعطونك تاريخ مباشرة.

 

عزيزي يعتمد على عمرك وأهدافك المستقبلية .. اذا كنت توك في اول العشرينات وغالبا لا تخطط للعودة للسعودية قريبا ممكن وضعك الحالي (تحضير الدكتوراه) يكون مناسب .. اذا كنت في الثلاثينات وعندك رغبة في الاستقرار والعمل في وظيفة على المدى الطويل قد تكون ارامكو مناسبة اكثر.

اعرف زميل في منتصف الثلاثينات .. عاش في الخارج للدراسة الجامعية ومابعد الجامعية واشتغل برا وكمل حياته لمدة اكثر من ١٥ سنه .. خلال هالسنوات كلموه ارامكو ٣ مرات للحضور المقابلة .. لكن عدم رغبته بالعمل في ارامكو كانت سبب انه يتجاهلهم في كل مره لأسباب متعدده منها انها شركة كبيره والبروز فيها صعب .. لكن حاليا يرغب بالعمل في ارامكو حتى لو براتب متوسط بسبب رغبته بالعوده للمملكة والعودة للأهل.

عزيزي اعتقد انه لديك رغبة ولو بسيطه في ارامكو لكن احساسك بانها جت في توقيت غلط وممكن تسبب لك ربكه هو اللي تاركك متردد. كرانفيلد جامعة ماعليها كلام معروفه، لكن حاول تضع كافة السيناريوهات المستقبلية قدامك .. قارن الفرصتين ماديا .. وقارن الفرصتين نفسيا لك. هل لو جتك فرصة ارامكو قبل كان اخذتها؟ هذا سؤال مهم ايضا. نصيحتي انك تشيل موضوع "بهدلة الاستقالة والنقل من جديد للسعودية" وفكر بالفرصة زين خلال الاجراءات .. KYC راح يطول وبعطيك مهلة جيده للتفكير.

نصيحة للأخوان وانا شخص كبير بالعمر نوعا واشتغلت في ٧ شركات ومسوي مقابلات كثيره جدا .. لا توجد شركة مجبره انها ترد على أي مرشح لأي وظيفة .. أغلب الشركات لن ترد عليك .. راح يقابلون الناس مره وثنتين وثلاث وراح يردون على اللي يبونهم بس.

فقط نصيحة حتى ترتاحون .. مجرد تقديمك على وظيفه ليس معناه اطلاقا انه الشركه مجبره انها تكلمك .. وحتى بعد المقابلة هم ليسو مجبرين انهم يردون عليك بسرعه او بعد فتره. الموضوع يعتمد على هل هم يرغبون بهذا المرشح؟ وهل يرغبون في بأسرع وقت؟ لكن مشاركات الأخوان في هذا الموضوع ممكن تعطي الشباب المتقدمين لوظائف فكره عن المده المتوقعه فقط.

أتمنى لكم التوفيق

 

انت اهم شي مشي اجراءات ارامكو ..لسى الKYC بياخذ معك يمكن حول الشهرين...واحسب عليها الفحص الطبي.

القرار هذا مااحد يقدر يتخذه الا انت ...وضعك في بريطانيا كويس ..والعرض من ارامكو برضك كويس

بس فكر في وضعك بعد عشر سنوات..وشوف بعدها وش تفضل