أفضل الدكاترة في كل قسم للسؤال عن التخصص

السلام عليكم ورحمة الله وبركاته

كيف حالكم جميعًا، وش مسوين مع المياجر ^_^

المهم يا شباب أنا عندي فكرة جديدة وحبيت أطرحها هنا، وإن شاء الله ألقى تفاعل من الطلاب

السالفة وما فيها إن كثير من طلاب الأوريا والفريشمان يواجهون صعوبة في اختيار التخصص الجامعي المناسب لهم

ولا يعرفون وين يروحون، وهذي الحالة أشوفها في كثير من زملائي كـ فريشمان والأكيد إنها موجودة في الأوريا

وأيضًا من خلال حواري مع عدد ليس بالقليل من زملائي الطلاب، أشوف (البعض) ماخذين فكرة غلط عن التخصص اللي هم مختارين ومتخيلينه بشكل معين بينما الواقع بعيد عن هذا تماماً سواءً دراسيًا أو في سوق العمل.

فلتبديد هذه الأوهام، ولمساعدة الطلاب في إنهم يختاروا التخصص المناسب لهم، جئت بالفكرة الآتية..

فكرة الموضوع بكل بساطة هو طلب بسيط من كل واحد خريج أو سينير أو جونيور (على الأقل)، يكتب لنا أسماء الدكاترة في قسمه اللي ترشحه للطلاب عشان يروحون له ويسألونه عن التخصص.

ومنها تحفيز زملائي لزيارة الأقسام في الجامعة والاطلاع على التخصصات عن قرب ..

طبعاً نعرف كل الدكاترة فيهم الخير والبركة، ما اختلفنا في هالشيء، لكن بعض الدكاترة معروفين إنهم شباب ومرحين وكذا وأقرب للطالب من غيرهم، وهنا فكرة الموضوع.

ياليت كل واحد يكتب على الأقل ثلاثة دكاترة في الرد.

وما يمنع إذا شفت واحد مشارك في الموضوع قبلك إنك تضيف للقائمة، عادي

ومن هنا في هذا الموضوع أشجع زملائي من الفريشمان والأوريا إنهم يروحون الأقسام اللي يحبوها ويسألون، ترا والله الدكاترة ما هم وحوش وراح يجاوبون على أسئلتكم بصدر رحب، أقول هالكلام عن تجربة.

وبس هذهي الفكرة من موضوعي، وإن شاء الله ألقى تفاعل في هذا الموضوع من الأخوة المتخصصين

بالتوفيق للجميع.