الويكند المقدس وحقوقنا الضائعة

يارجال الطالب اكثر من يظلم بهالجامعة ضغط نفسي من اول يوم لاخر يوم الواحد يمر اسبوعين ماشاف احد ولا طلع والالتزام بالنظام مانشوفه الا اذا كان باختبارات ولا اجازات ولا شيء على الطالب اما شيء للطالب مانشوف فيه نظام الواحد يعاني بيومه العادي يقوم الصبح بالبرد اللي يجمد المخ بسبب المكيف اللي من ثلاث سنوات كل ماجبنا الصيانة قالوا مانقدر نصلحه ولاتقدر تتحكم بدرجة الحرارة ثم تروح لدورة المياه لتتوضى بالماء ( النقي ) وتتفاجاء بانه ثلج مب ماء بسبب عدم وجود سخانات وبتدخل الحمام اعزكم الله تلقى 3 منها المسدود واللي تفوح رائحته كاننا بزريبة ومن ثم ترجع للكرف وهكذا الله يعديها على خير ونطلع ونفتك

 

بخصوص موضوع اختبار في الويكند، مو كأنه أفضل من ان الاختبار يكون في وقت دوام؟
يعني اذا انت في فترة مياجر أصلاً ما اتخيلك تضيع الويكند، طبيعي راح تجلس تذاكر فيه، فمو كأنه أفضل انك تكون فاضي اليوم كله تراجع و تجهز نفسك؟ لأن المشكلة في اختبارات نص الأسبوع اني ارجع من الكلاس للغرفة مهدود حيلي و عندي اختبار بعد ساعة او ساعتين، شيء يسد النفس.
انا توقعت أكثر ناس يتضررون هم الأخوة الي ساكنين خارج الجامعة، صعبة انه في يوم عطلته في الليل يدق مشوار للجامعة يختبر ثم يطلع. لكن أتوقع العكس صحيح!
معي كم شخص ساكنين خارج الجامعة اشتكوا لدكتور في فترة المياجر الأولى أن دوامهم يخلص الساعة 2 و اختبارهم الساعة 6، يقولون ما فيه وقت نرجع بيوتنا و بكذا نضطر نجلس 4 ساعات في الجامعة + الساعات الي كنا مداومين فيها.
ف وش مشكلتكم بالضبط مع اختبار الويكند؟

 

من المُعيب والمخجل أن تقرأ ألفاظ لطلاب المفترض أن يكونوا نخبةً بالأخلاق قبل العلم.

الإختبارات بأوقات الويكند صحيح لها سلبياتها وأتفهم كون الطالب يريد الراحة (كلنا مرينا بهالمرحلة) لكن هذه أحد الأسباب التي تجعل العديد من خريجي جامعة الملك فهد مطلوبين لدى العديد من الشركات الكبرى، لتحملهم الضغط وإمكانية الإنتاج حتى تحت الضغط وتنظيم الوقت. هذا أمر قد تشتكي منه ببداية مشوارك الجامعي لكن ستعرف قيمته في سوق العمل.

كل التوفيق لكم.

 

اقتراح جيد يا ابو ريناد، فاهٌ مبارك.

بما أن الويكند قد ( اُنتُهِك عرضه بحد تعبيرك) فليش مثلا ما يكون ما فيه ويكند.
بحيث أن هناك 16 إسبوعا دراسيا ، لو انشالت منها الويكند "يومين" بنصير قد وفرنا 32 يوما أي ما يقارب 5 أسابيع !!

وبهذا تكون كل الأطراف راضية :

- سنكون مضغوطين وبالتالي نكون مطلوبين أكثر
- الدكاترة حينجبروا يعطونا الاختبارات في الكلاس
- (الويكند سيتم حِفظُ عرضه)
- أبو ريناد سيحظى بخمسة اسابيع من الويكند بشكل متتالي !!

--------
لا مانع من التعقيب لكن أتمنى عدم الإنتقاد

 

الشركات , KFUPM , الشركات , KFUPM ,الشركت , KFUPM , الشركات .......

ستتخرج وتنصدم بالواقع المرّ

 

حضرت مرة اجتماع عن وثيقة حقوق الطالب , وتكلمت عن موضوع الدسمس وانه مرمطة واجراء تعسفي لا اخلاقي
هذا الكلام من سنتين ,وقالو الترم الجاي بينزلو الوثيقة والى الان ما صدرت !
عموما يا ريت الموضوع يكون شامل لكل اجراءات الجامعة
بصراحة الجامعة لو تقارن نفسها ببقية جامعات السعودية بتضيع , المفروض يقارنو بالتوب 100 على اقل تقدير

 

طيب، نحاول مرة ثانية

القصد وين الضرر في الموضوع بالضبط؟
مسألة "لا يحق لأحد أخذه" تذكرني بمقاطع الأمريكان الي انتشرت قبل فترة، لما يوقف في نقطة تفتيش و اذا طلبوا منه رخصته و استمارته يرفض لأنه ما سوا شيء غلط و قانونياً ما يحق لهم يأخذونها بالغصب. شخص يخلق مشاكل لنفسه عشان يظهر كإنسان عنده مبدأ
ترا سؤالي جدي، ادري الموضوع كله على بعضه مليان اسئلة تهكمية الهدف منها توضح ان اصحابها أذكياء، و أخاف الناس شافوا سؤالي على انه واحد من هالأسئلة كأني أقول "وش مشكلتكم يا نفسيات؟ كل شيء تشتكون منه؟ خلوكم شطار زيي"
أنا فعلياً ابي أعرف السبب الي مضايق الناس من الموضوع، هل فيه جانب أنا كشخص ساكن داخل الجامعة ما أشوفه؟ او أنا شخص مو مرتب عشان كذا أشوف الويكند ضايع ضايع في فترة المياجر و الناس الي مرتبة أوضاعها يخرب عليهم الويكند بسبب الميجر؟

 

جميل اننا صرنا أفضل 3% كنا 2% فقط! هذا يدل على تطور الجامعة ودهاء مديرها

برضه كلامي تهكمي

 

الويكند يا صاحبي فترة نقاهة واسترخاء.. بأي حق تحرمني من هذا عشان اختبار؟!

 

اتفق معك، بس مثل ما قلت فوق حتى لو كان اختباري اثنين او ثلاثاء، طبيعي راح يكون 3 أرباع الويكند مذاكرة، لأن المياجر لا تأتي فرادى. او على الأقل هذا الي يصير معي أنا، و الي اشوفه في الشباب الي حولي، ما أعرف أحد يرتاح ويكند المياجر.

 

بامكانك تقضيه في اللي يناسبك.. هو في الأخير وقتك تملكه انت

 

فيه مشاكل اكبر من الاختبار فالويكند وتستحق النقاش فيها مثل الكلينك ونظام الاعذار وعيادة الاسنان , مشكلة دورات المياه والصيانة , مشكلة ان الافرج (c) لماذا لا يتم وضع الافرج (B) كمثال ,مشكلة الشمس تضرب فراسك الى ان توصل الكلاس ناشف ومهلك يعني لو يتم وضع مظلات فالجبل تتسكر وتفتح وغيرها.

بالعكس اشوف الاختبار فالوينكد اذا كان يخفف ضغط الاختبارات فالاسبوع ميزة كبيرة

 

بإمكانك تناقش المشاكل هذي في مواضيع اخرى.. الموضوع هذا لنقاش مسألة الويكند

 

شخصيا الويكند بالنسبة لي مقدس جدا وما أذاكر فيه أبد

حتى يقرر أحد الدكاترة الكرام أنه مناسب للاختبار

 

انا أقصد لو يتم التركز على السلبيات الكبيره افضل من بذل الجهد في مواضيع غير مفيده وانا ذكرت القضايا الي فوق كمثال لكن انت ما فهمت المقصد

 

ما ادري وش وضعكم لكن راسلت المدير مره ع الامن وجاني رد من المدير بعد اسبوعين ورجع لي حقي

 

لا يا صديقي فاهم قصدك.. وكونك ترى هذا غير مفيد تجاهله لو تكرمت لأنه يعني الكثير لغيرك