نصائح كنت أتمنى أسمعها في بدايتي بالجامعة + روابط مهمة

الموضوع في 'الخبرات والتجارب الشخصية الجامعية' بواسطة شدعوه, بتاريخ ‏17 يناير 2017.

  1. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    #1 شدعوه, ‏17 يناير 2017
    آخر تعديل: ‏27 يناير 2017
    السلام عليكم ورحمة الله وبركاته ,
    أتمنى إن هذا السمستر كان فال خير عليكم وحققتوا أهدافكم . تقريبا بعد 5 سنوات في الجامعة , إستفدت منها الكثير على الجانب الشخصي و و الدراسي , السمستر الجاي 162 راح أتخرج بمرتبة الشرف والفضل بعد الله يرجع لهذا المنتدى وشباب الجامعة ومن باب رد الجميل :
    حبيت أشاركم بعض النصائح والأشياء الي كنت أتمنى أعرفها في بدايتي بالجامعة , بحاول ألخص تجربتي وتجربة الشباب معاي في الجامعة على شكل نصائح أو ملاحظات :

    ( ممكن تكون صحيحة وممكن لا لكن أتمنى إنها تستاهل تقرأها,ممكن تنبهك على بعض الأشياء )

    الموضوع راح ينقسم إلى : ( الموضوع طويل فاقرأه متى مافضيت )

    - نصائح عامة.
    - نصائح دراسية .
    - ملفات مهمة لكل الطلاب ( فريشمان - سينير )
    - الأندية الطلابية & وحساباتها على مواقع التواصل الإجتماعي
    - النشاطات - الدورات - المشاركات خارج / داخل الجامعة
    - مواقع للكورسات الأونلاين .

    _____________________________________________________________________

    1 - نصائح عامة


    - إنسى المدرسة : السنة التحضيرية بتكون هي البداية فحاول تستفيد منها وتأسس نفسك من جديد لو كنت سيئ في المدرسة و تزيد معرفتك لو كنت مميز في المدرسة . الأول على المدرسة مايعني إنك راح تمشي في الجامعة و كونك طالب مستواه عادي مايعني إنك راح تفشل في الجامعة .

    - الهدف من وجودك في الجامعة ؟


    الهدف من هذي الــ 5 سنوات : 1- شهادة بمعدل ممتاز أو جيد 2 - فهم للتخصص 3- شخصية ناضجة

    إذا كنت تبي تتميز وتتخرج وإنت واثق من قدراتك , لاتهمل أي جانب من الثلاثة أمور ^ :
    - لاتكون من النوع ( الأول ) كل وقته مذاكرة وفي النهاية معدل عال لكن مهارات الحياة ( مثل التواصل ) = صفر %
    - لاتكون من النوع ( الثاني ) شغله تلفيق , يفكر نفسه يذاكر وهو قاعد يحفظ ويخدع نفسه , يمكن يطلع بمعدل جيد لكن في النهاية فهمه للتخصص شبه معدوم .
    - لاتكون من النوع ( الثالث ) : للأسف عقليته وتصرفاته مشابهة لتصرفات الأطفال .
    - أسوء نوع هو ( الرابع ) : ماحقق الأهداف الثلاثة كلها و ضيع 5 سنوات بدون مايحقق أي شيئ . اللهم شهادة .

    راح تحس بأهمية هذا الأمور ذي لما تكون على وشك تخرج ومع أي دعوة لمقابلة وظيفية, تبدأ تسأل نفسك :

    - هل أنا فاهم التخصص ( إلي كان همه النجاح وشغله تلفيق راح يتوتر من يسمع إن أسئلة المقابلة متعلقة بالتخصص ) ؟
    - كيف راح أتكلم معاهم ( إلي كان همه الدراسة ومنطوي على نفسه راح يتوتر من المقابلات إلى تعتمد على مهارات التواصل ؟
    والي كان معتبر الجامعة تضييع وقت : أحضر , إختبر , شوف القريد , نجحنا زين , إنسى إلي خذناه : يتوتر من يسمع إن فيه مقابلة .

    الخلاصة : حاول توازن بين حياتك ودراستك وحدد هدف لك واسئل نفسك بين فترة وفترة :

    - بعد 5 سنوات وين راح تكون ؟
    - بعد 5 سنوات هل راح تكون متمكن من تخصصك ؟
    - بعد 5 سنوات , كيف راح أقدر اثبت للشركة أو للجامعة ( الدراسات العليا ) إني أستحق الفرصة المتاحة من بين كل المرشحين لها ؟

    - إسم الجامعة لحاله ماراح يوظفك !

    - راح تسمع من مدير الجامعة هذي الجملة , " لكل خريج 6 وظائف " : ما أشكك في هذي المعلومة لكن طرحتها لأني
    متاكد إنها راح تمر عليك في المستقبل .
    ممكن بعض الشركات تفضل خريجي البترول إما لسمعة الجامعة أو هناك تنسيق بينها وبين الجامعة . لكن كنسبة وتناسب عدد الشركات الي تفضل خريجي الجامعة لو قارنتها بعدد الشركات في سوق العمل فهي نسبة قليلة ونفس الوقت مستحيل إنها تستوعب كل خريجي الجامعة ( المبدع , الأونر , الأفرج , السيئ )

    لكن النقطة الأهم إن في كل الأحوال : الشركة أو جهة التوظيف ماراح توظفك بس عشان إسم جامعتك . في أبسط الشركات بنسبة كبيرة راح تكون فيه مقابلات و إختبارات قبول لبعض الوظائف . فحتى لو فرضنا إن الشركة الفلانية ماتوظف إلا خريجي البترول , فالمنافسة راح تكون مستمرة لأن خريجي الجامعة عددهم كبير . ففي كل الأحوال تخرجك من جامعة لها سمعتها سواء MIT أو هارفارد مايعني إن وظيفتك راح تكون مضمونة بدون أمور مساعدة لها مثل المقابلة وشخصيتك ومعدلك وبدرجة أقل إسم الجامعة ممكن يخدمك .

    - ما أنكر إسم الجامعة له قيمة بين الشركات و حتى بعض الجامعات العالمية لكن لا تعتمد عليه بشكل أساسي في الحصول على وظيفة أو إكمال الدراسات العليا في الجامعات الخاريجية . حاول تدعم نفسك سواء على الجانب الشخصي أو الأكاديمي .

    وهالشي راح يكون واضح لما تسوي أول مقابلة لك وإنت على وشك تخرج وراح يسألك موظف الموارد البشرية

    ? Tell me about yourself

    إذا كنت معتمد على إسم الجامعة ردك ( عدد كبير يردوا بنفس هذا الجواب )

    :مثقف: .... I am flan al flan graduted from KFUPM with 1st honor and aaaaaaa

    بعد الأونر لا إراديا راح توقف !

    و السبب ؟
    إنك أهملت كل الجوانب الثانية وركزت على إسم الجامعة وفكرت إنه راح يوظفك و يوفر لك كل شيئ بدون جهد أو كنت من الأنواع الأربعة فوق ^ .

    إذا مابعد تتخرج أتمنى تحاول تجاوب السؤال السابق بين فتر ة وفترة .
    راح تكتشف إنك ماسويت شيئ بإستثناء إنه صار معاك ورقة إسمها شهادة ! ممكن جو الجامعة يجبرك إن الدراسة تكون شغلك الشاغل لكن في أشياء ثانية ممكن تساعدك وتدعم شخصيتك ومستواك بعضها عن طريق الجامعة وبعضها يعتمد عليك .

    ( الفرص وكيف تستغلها راح اطرحها في نقطة ثانية ) .

    تذكر بعد التخرج راح تدخل في منافسة مع :

    - خريجي الإبتعاث ( النظام القديم ) خاصة خريجي الجامعات القوية .
    - خريجي الجامعات الثانية ( الي ممكن يكون مستواها أقل من البترول لكن تطورت في السنوات الماضية وراح تتحسن في المستقبل )
    - خريجي البترول نفسهم !

    بالإضافة : بعض الفرص في بعض الجهات بتكون محصورة على عدد معين خاصة الجهات المتعاونة مع برنامج الابتعاث الجديد وظيفتك بعثتك .

    بخصوص فهم التخصص حاليا إختبار قياس لمخرجات التعليم للتخصصات الهندسية إختياري والحمدلله جامعتنا متميزة فيه لكن في نفس الوقت فيه شباب للأسف أداؤهم فيه مش و لا بد ( على كلام بعض الدكاترة )ف خذ حذرك ممكن يوم من الأيام يصير إلزامي .

    في النهاية : موضوع الوظيفة يعتمد على أشياء كثيرة بعضها بيدك مثل : المعدل + التخصص + شخصيتك + علاقاتك
    و بعضها لا : وضع التوظيف .



    فلا تعتمد على إسم الجامعة إعتماد كلي وتهمل بقية الجوانب . وهذا الكلام موجه لكل الطلاب حتى لو كان متخرج من MIT و من جامعات عالمية .
    و دايم تذكر هذي الآية ( إِنَّا لَا نُضِيعُ أَجْرَ مَنْ أَحْسَنَ عَمَلًا )

    إنك تسوي الي عليك وماتحصل وظيفة أفضل من إنك ماتستغل هذي الـ 5 سنوات و بعد مدة من تخرجك بدون ما تحصل وظيفة وتنتظر بالأشهر , تبدي تلوم نفسك وتعتقد إنك كنت مقصر .

    الحياة بعد الجامعة هي ماهي مثالية سواء لخريج البترول أو غيرها وممكن الأمور تتييسر معاك وتتوظف قبل لاتتخرج وممكن لا
    فلما تسوي الي عليك هالشي يزيد ثقتك بنفسك وإصرارك إنك تبحث عن الفرصة الي تناسبك مؤهلاتك .


    - المعدل مب كل شيئ !
    هو يساعدك في التقديم على الوظائف والدخول للمقابلات ! يعني هو وسيلة فلا تعطيه أكثر من حقه ونفس الوقت لا تهمله , حاول تبدأ بمعدل عال و تدعم نفسك بفهم تخصصك و تطور نفسك في المهارات الشخصية بحيث لما تتخرج تكون إستعديت للسوق العمل أو الدراسات العليا وإلي يبقى التوفيق من الله . ممكن تتخرج بمعدل عال لكن فهم التخصص و المهارات الشخصية مهمة جداً بدونها المعدل راح يفقد أهميته أو راح تقلل الفرص المتاحة لك في التوظيف وتستبعد منها . فحاول تستغل هذي الـ 5 سنوات , الموضوع مب صعب لكن يحتاج متابعة وإستمرار خاصة إذا كنت متعود على نظام معين وفجأة تغيره . إذا مانجحت على الأقل ماراح تلوم نفسك بعد التخرج وتحس إن ضيعت وقتك وقصرت وما استغليت فرص توفرت لك أيام الدراسة + بعد الجامعة بتكون مشغول بأمور ماتسمح لك تخصص كل وقتك لتطوير نفسك .

    طريقة فعالية جربتها لكن للأسف إنتبهت لها متأخر : إعمل سيرة ذاتية لك حتى لو كنت اوريا و ماعندك أي مهارات أو إنجازات : وحاول تسويها مثل أي سيرة ذاتية . راح تلقاها فاضية وهالشي طبيعي لكن علقها في مكان واضح في غرفتك بحيث هالشي يشجع تكتسب مهارات إضافية وماتقتصر سنواتك ال 5 في الجامعة على الدراسة . وبين فترة وفترة ضيف لها الدورات , مشاركاتك , الجوائز , البرامج إلي تعلمتها , الدورات إلي حضرتها .


    - تصرفاتك تعكس ثقافة البلد و إنطباع سيئ / جيد عن الجامعة ; ممكن تفتح لغيرك فرص كثيرة و ممكن تسبب العكس !

    -- تصرفاتك في المحاضرات , إلتزامك بالوقت , حرصك على الدراسة . وفي المقابل الإهمال , نومك في وقت المحاضرة , اللعب على الجوال , تسليم الهوموركات والمشاريع متأخر كلها راح تأثر على تصور الدكاترة عن الطلاب . في بعض الدكاترة وبصراحة قالوها إنهم يشكوا إن الطلاب هنا هم أفضل 2 % والسبب بعض التصرفات الي ذكرتها فوق . تأكد إن هالدكاترة راح ينقلوا هذي الصورة للجامعات الي راح ينتقلوا لها . لزملائهم في بقية الجامعات خاصة إن نسبة كبيرة من دكاترة الجامعة أجانب + بعضهم يشتغل في شركات مهمة .

    - بعض الدكاترة سمعة الجامعة من معاييره قبوله للوظيفة بعد المزايا المالية . فحاول تعكس صورة طيبة عن البلد وعن الجامعة سواء في الدراسة أو في تدريبك أو برا السعودية .

    - بعض الشركات تنسق مع الجامعات لتدريب الطلاب و يكون بينها تعاون والسبب سمعة الجامعة في السنوات الماضية + تجارب بعض الطلاب فيها . فلا تضيعوا سمعة الجامعة بسبب تصرفات مالها داعي و تأكد كلما عكست صورة طيبة عن الجامعة كلما فتحت فرص لشباب الدفعات الجاية .


    - كل مشكلة ولها حل !
    الجامعة مب بس كورسات وأختبارت : راح تمر عليك مواقف صعبة وبعضها ممكن تأثر عليك مثل : كورس تجتهد فيه لكن النتائج ما توازي مجهودك وتظل إلي آخر لحظة في السمستر خايف من الـ F , مشكلة مع دكتور , تضطر تنزل مع دكتور تعامله سيئ , مرض أو حالة نفسية وغيرها من المشاكل . لكن خل عندك يقين إن لكل مشكلة حل, فلا تضغط على نفسك و تشغل بالك بالتفكير الزايد . سو الي عليك وتوكل على الله واستشير أشخاص تثق فيهم .هـذي الظروف والمشاكل راح تغير شخصيتك للأفضل أو للأسوء لو قررت تستمر على نفس طريقتك و تكرر اخطائك .

    - من أول مايجيك إحساس بالهم او تعب أو تبلد في موضوع الدرجات والخصم والـ DN , حاول تطلع من هذا الجو على طول :

    لأن هذي الأعراض دليل إنك بتدخل في دوامة تفكير وأمور راح تتعبك وتأثر على مستواك وماتنتبه لأثرها إلا بعد فترة طويلة .
     
    • x 17 إعجاب إعجاب
  2. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    #2 شدعوه, ‏17 يناير 2017
    آخر تعديل: ‏3 مارس 2017
    - إبتعد عن السلبيين ( جاور السعيد تسعد ):

    قبل ماتدخل الجامعة راح تواجه نوعين :

    1 - أشخاص يبالغوا في مدح الجامعة ويصوروا لك إن الجامعة خالية من أي سلبية .
    2- النوع الثاني يضخم السلبيات ويحاول يحسسك إنه مايقدر يتنفس بسبب الضغط أو يذم في أنظمة الجامعة و أشياء كثيرة .

    حاول تبتعد عن هالنوعية من الناس :لما شخص يمدح أو يذم لك أي شخص أو شيئ في الجامعة أسأله عن التفاصيل ومن كلامه راح تعرف هل كلامه عقلاني ومنطقي أو عاطفي .

    إبتعد عنهم لأن للأسف أغلبهم يضر نفسه و يعكر مزاجك وأحيانا الأشياء الي دايما يكررها لا إرداياً راح تتحول إلى قناعات بالنسبة لك . بعضهم للأسف طول الوقت يتذمر من وضعه ويشكي الحال وفي النهاية تكتشف إن خريج بمرتبة الشرف ! حاول تحيط نفسك بأشخاص متفائلين أو على الأقل غير متشائمين . مع أي مشكلة لك أو ظروف سيئة راح تحصلهم يساعدونك بأي شيئ يقدروا عليه . نجاحاتهم راح تحفزك إنك تتغير و تشجع إنك تخوض تجارب جديدة وتستفيد من تجاربهم .

    الجامعة مثل أي جهة و مكان في العالم : له سلبيات وله إيجابيات

    حاول تستفيد من الإيجابيات والفرص فيها وتتأقلم مع السلبيات

    وإذا كان بإمكانك تشارك في حل السلبيات يكون أفضل على سبيل المثال ( نظام تسجيل المواد تم تعديله بعد إقتراح من الطلاب – النظام القديم للباصات كان بإقتراح ومساعدة من طلاب الجامعة )


    - كون علاقات من أول يوم :

    - حاول تكون علاقات في الجامعة وهالشي بسيط ممكن بسلام أو محادثة بسيطة أو ملف ترسله لواحد من الي معاك في السكشن أو مساعدة و وفيه طرق كثيرة .
    - هذي العلاقات ماراح تحسسك بالوحدة في الجامعة . خاصة في الاوريا والفريشمان لما تتعرف على أشخاص جدد هالشي راح يسهل عليك التأقلم مع جو الجامعة .

    - مع أي مشكلة أو سؤال بتكون عندك خيارات كثيرة , راح تمر عليك مواقف كثيرة راح تحتاج مساعدة من غيرك .
    - لما تبدأ الفريشمان حاول تكلم طلاب تخصصك وتنضم لقروب التخصص على الواتساب : معرفتك لطلاب تخصصك خاصة السفمور وفوق راح يساعدك كثير : أحيانا ينبهونك على أشياء غايبة عنك مثلا أهمية بعض الكورسات , ملفات لبعض الكورسات , بعض فرص التدريب و التوظيف يمكن توصلك . راح تسفيد من أخطائهم وتجاربهم. هذي العلاقات راح تغير نظرتك لأشياء كثيرة وتجنبك أخطاء الشباب الي سبقوك

    - حاول تستفيد من الي أفضل منك ونفس الوقت تساعد إلي عنده مشاكل ومستواه أقل منك

    وتذكر (أَحَبُّ النَّاسِ إِلَى اللَّهِ أَنْفَعُهُمْ لِلنَّاسِ )

    - حاول تكون علاقة طيبة مع الدكاترة , أحيانا بسبب زيارة لدكتور أو إستشارة في موضوع معين الدكتور يعطيك نصيحة وينبهك على أشياء تختصر عليك سنوات , خاصة في الأمور المتعلقة بالدراسات العليا و التوظيف .

    - تقريبا ً في كل تخصص فيه دكتور على الأقل متعاون و ممكن يفيدك حتى لو إستشرته في أمور غير التخصص على سبيل المثال لا الحصر :
    د.باسم أبو السعود ( هندسة كيميائية )
    د.صالح الشبل ( تسويق )
    د.يحيى عسيس ( هندسة حاسب)

    لأن كل الدكاترة يوم من الأيام كانوا مكانك فعلاقتك معاهم راح تفيدك بأشياء و لاحظت بعض الدكاترة يحب ينقل خبرته للي أصغر منه سواء طالب بكالوريس او ماستر ويختصر عليك سنوات ومعرفة بعض الأشياء الي خذت منه سنوات حتى وصل لها . فكون علاقة طيبة معهم و بتستفيد كثير في أكثر من جانب

    - ملاحظة : ما أقصد بتكوين العلاقات إنك تكون إستغلالي أو ( مصلحجي ) أو تتملق للدكاترة ! الهدف تكوين صداقة وعلاقة طيبة تستمر حتى بعد الجامعة ونفس الوقت تستفيد من تجارب غيرك و تفيد شباب دفعتك + الدفعات الجديدة .

    بعض الأشخاص سبحان الله محادثة بسيطة معاه تشجعك إنك تغير نفسك + يفيدك وينبهك بأشياء ماتعرفها سواء متعلقة بالدراسة أو الأمور الشخصية .


    - لاتستهين بقدراتك ولا تغتر بنفسك :

    تقريبا من لما كنت في الثانوية كنت أشوف شباب يضيعوا فرص على أنفسهم والسبب إنهم مب واثقين من نفسهم ويستهينوا بقدراتهم : إلي يقول أرامكو ماراح تقبلني فما راح إختبار الـ cpc وإلي كان يقول ما راح أقدر أتحمل البعد عن الأهل وظروف الإبتعاث . وبعد فترة لما ناس أقل منهم دخلوا أرامكو و راحوا ابتعاث وحصلوا قبول في جامعات مميزة , إكتشفوا إنهم ضيعوا فرص كانت ممكن تكون فرصة العمر والسبب : إستهانتم بقدراتهم !

    نفس الشيئ تكرر في الجامعة , من الاوريا و تحصل ناس تقول أنا أكثر شيئ أقدر اجيبه C , فيه ناس طموحها معدل 2 أو 2.5 بالكثير ! هالتفكير ضيع فرص كثيرة عليهم وراح يضيع عليهم فرص حتى بعد الجامعة .

    حاول تطمح للأفضل , وش يمنع إن هدفك يكون A+ في الكورس الفلاني ؟! وش المانع إنك تتخرج بأونر ؟! صحيح بتواجه صعوبات والأمر صعب لكن لما توصل لهدفك أو حتى قريب من هدفك كل التعب راح يختفي و تجيك دفعة معنوية إنك تحقق الهدف إلي بعده . في الجانب المقابل , حاول تكون منطقي وعقلاني , قبل لا تتخذ قرار إحسب حساب كل شيئ وهل إنت قادر إنك تحققه فيه أهداف صعبة وفيه أهداف مستحيلة .

    مثلا ً هذا خطأ يتكرر كل سنة خاصة للفريشمان بسبب المبالغة : أول سمستر له بالجبل ينزل 19 ساعة و هذا القرار أخذه على أساس درجاته في الأوريا أو المدرسة ! حاول تكون منطقي وتعرف مستواك وتتدرج مثل في هذي الحالة ابتدي بـ 14 أو 15 ساعة و نهاية السمستر على أساس درجاتك قرر هل 19 ساعة ثقيلة عليك أو لا .


    8 - الوقت ماراح يطورك + الجامعة لتطويرك مب تقييم مستواك في الثانوية :

    إذا عندك ضعف في جانب معين لاتعتقد إن مع الوقت راح تتطور بدون ماتبذل أي جهد . و أقرب مثال هو مستوى بعض الدكاترة إلي لهم على الأقل 20 سنة في مهنة التدريس + 5 سنوات بكالوريس وفي النهاية لغتهم الإنجليزية سيئة !

    هم بذلوا جهد معين و وصلوا لمستوى معين وتوقفوا فمستواهم ظل على ما هو عليه . وماتطور من ذاك الوقت . وللأسف كلما تكبر كلما يصعب عليك موضوع تطوير نفسك في بعض المهارات خاصة إنك بتكون مشغول بأمور كثيرة وماراح يكون عندك فرصة أو وقت مثل فترة دراستك بالجامعة .

    فمثلا إذا :
    - كنت ضعيف في مهارة التواصل مثل ( الإلقاء ) حاول تدرب وتبذل جهد . لا تتخرج و مستواك مثل مستوى طالب في 04 ! مافي أسوء من شعور إنك خريج و إنت مب واثق من قدراتك وماتقدر توصل فكرتك و تتواصل مع الطرف المقابل .

    - لغتك الإنجليزية ضعيفة حاول تطورها , تدرب , الموضوع راح يأخذ وقت لكن أهم شيئ إنك تبذل جهد وتحاول تطور نفسك والتغيير راح تلاحظه بعد فترة لكن أهم شيئ هو الإستمرا حاول تتقنها وتمارسها حتى بعد الأوريا . ممكن توصل للسينير لكن تضل لغتك أقل من مستوى المطلوب فالموضوع مب اختبارات وقريدات بس . حاول تطورها وتأكد إنها راح تميزك في بعض الأمور خاصة المقابلات الي تعتمد على المهارات الشخصية والتواصل أكثر من التكنيكال .

    - حاول تطور الجوانب الضعيفة عندك : فترة الـ 5 سنوات ذي هي الفترة المناسبة لك , راح تتشكل فيها شخصيتك وبيكون عندك الوقت والفرصة تطور نفسك سواء على المستوى العلمي و المستوى الشخصي بعدها وقتك ماراح يكون ملكك .


    9 - إدخل التخصص الي تميل له لكن !

    -تأكد إنك فاهم التخصص صح , مب تدخله على أساس سوالف , أو تدخل تخصص بس لأنك سمعت إن الوظايف مضمونة لخريجي التخصص !

    - اسئل طلاب التخصص عن السلبيات والإيجابيات للتخصصات الي ناوي عليها , لأن الإيجابيات راح تحمسك للتخصص و السلبيات لو ماكنت عارفها , مع أول صعوبة لك أو سلبية في التخصص تواجها راح يجيك تفكير إنك استعجلت بإختيار التخصص وتبدأ تضخم إيجابيات التخصصات الثانية و تتغافل لا إراديا عن السلبيات الي فيها وتفكر تغير التخصص و الموضوع بإختصار ( هروب من الواقع )

    - بعض التخصصات فكرتها جميلة لكن لما تدخل التخصص يتغير رأيك وتكتشف إن أغلب الكورسات في التخصص تختلف عن تصورك للتخصص !

    - لاتحكم على نفسك وعلى تخصصك من الفريشمان . نسبة كبيرة تواجه صعوبة في الفريشمان والسبب إن النظام اختلف عن الأوريا فلا تستعجل بتغيير التخصص وتحكم على التخصص على أساس كورسات عامة مثلا الفزكس والماث . أحيانا المشكلة ماتكون فيك : هذا مثال لواحد أعرفه : اختار اندستريال . بعد اول أسبوع من الفريشمان وبسبب إنه مب جاي يفهم على الفزكس بالرغم إنه يقعد ساعات طويلة في المذاكرة . على طول حول لتخصص مالية . بعد فترة إكتشف إن المشكلة عنده كانت هي التفكير وعدم الثقة و الشي الثاني إكتشف ان المالية ماتناسبه فالسمستر الي بعده رجع لتخصصه القديم وإن شاء الله هذا السمستر راح يتخرج بمرتبة الشرف فالخلاصة تغيير التخصص ماهو الحل الأكيد لمشكلتك لو كان مستواك سيئ , اعرف الأشياء الي اثرت على مستواك تالي قرر لأن الموضوع يمكن ماله علاقة بتخصصك .

    - ادخل تخصص مستعد إنك تقضي أكثر وقتك عليه بدون ماتمل أو تكون كاره الموضوع .

    - تجاهل كلام الأشخاص الي مب فاهمين التخصص + هدفهم التحطيم . ونفس الوقت إهتم بكلام الموظفين خاصة الخريجين من التخصصات الهندسية أو لهم علاقة بأمور التوظيف مثل الموارد البشرية لأنهم كانوا في مكانك + عندهم معرفة بسوق العمل أكثر منك . في النهاية موضوع الوظيفة توفيق ومرتبط بأمور ثانية بالإضافة للتخصص : مثلا تقريبا قبل 6 سنوات أكثر من شخص نصحني بهندسة البترول وكان عليه طلب نوعا ً ما ولكن حاليا ً بعض خريجي التخصص يواجهوا مشاكل في التوظيف .
     
    • x 6 إعجاب إعجاب
  3. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    #3 شدعوه, ‏17 يناير 2017
    آخر تعديل: ‏21 يناير 2017
    - كم ساعة باقي لي وأتخرج !

    إنتبه ثم إنتبه ثم إنتبه من هذي الحالة , بعد كل سمستر تشطب الكورسات الي خلصتها في الكريكيولم وتقعد بالساعات تحسب كم ساعة باقية وكم المعدل الي تقدر تجيبه وفي النهاية هدفك في السمسترات الجاية يصير بس إنك تخلص السمستر والكورسات أما الإستفادة من الكورسات و فهم التخصص بيصير آخر إهتماماتك ! لا إنت الي بتركز على الي الدراسة ولا الي انت بتتخرج !


    - لا تتخذ قرارات مهمة في هذي الفترات ! :
    - بداية السمستر : لأنك غالباً تكون راجع من إجازة وما بعد تدخل في جو الجامعة و تميل إنك ترجع للراحة الي كنت فيها.
    - فترة المياجر والفاينلات : لأن غالبا ً قرارتك بتكون هروب من الواقع أو مب منطقية وتحت ضغط وللأسف ماراح تعرف إن قراراتك كانت خاطئة إلابعد فترة طويلة.

    - حاول تستشير أكثر من شخص قبل لا تتخذ قرار : تغيير التخصص - دروب للسمستر - دروب للكورس لأن غيرك بيكون عارف الوضع ومب تحت ضغط فراح يشرح لك الوضع وعنده نظرة أفضل للوضع وأحيانا تفكر وضعك سيئ جداً لكن في الواقع هو سيئ لكن مب بذاك السوء الي تتصوره .


    - لاتضغط على نفسك لأن النتائج ممكن تكون عكسية :

    حاول ترفه عن نفسك ونفس الوقت تركز على الدراسة , صحيح الدراسة راح تأخذ أغلب وقتك لكن لاتنسى ترفه عن نفسك بحيث توزان بين الدراسة والترفيه . فيه شباب للأسف كانوا يضغطوا على نفسهم بالأسابيع مايطلع من الجامعة والنتيجة أقل من الأفرج !!
    و السبب غالبا إن نفسيته تعبت او طريقته في المذاكرة كانت خطأ .

    تذكر ( وإن لنفسك عليك حقا، ولأهلك عليك حقا، فأعطِ كل ذي حق حقه )

    - لكن لا تزودها ويصير كل يومك على تويتر ويوتيوب ترا ماراح تنبته إلا وانت على نهاية السمستر ومب فاهم شيئ ودرجاتك سيئة . حاول توزع مجهودك وتعرف متى ترفه عن نفسك ومتى تقلل من الأشياء الثانية مثلا النت والألعاب .و تركز على الدراسة أكثر .

    - شبه مستحيل تركز على الدراسة بنفس المستوى طول السمستر . لأن هالشي مرهق وإذا مشت معاك سمستر ,السمستر الي بعده بتكون مرهق وطاقتك أقل .


    - حاول تبدأ بمعدل عال :

    صحيح المعدل ماهو كل شيئ لكن خلال وجودك في الجامعة راح يتيح لك فرص كثيرة لأن تقريبا ً هو المعيار الوحيد لتقييم الطلاب ومن ضمن هذي الفرص :
    - برنامج التبادل الطلابي - Exchange
    - برامج المتابعة الجامعية ( سابك + أرامكو + Ge )
    - التدريب الصيفي / التعاوني ( برا السعودية )
    - الزيارات الدولية
    -
    بالإضافة لبعض البرامج والفعاليات الي ممكن على أساس معدلك يتم ترشيحك لها عن طريق الجامعة مثل Globalink Program

    . ملاحظة : لو لاسمح الله أول سمستر لك جبت معدل سيئ فهذا الشيئ ماهو نهاية العالم . تقدر ترفعه إلى الـ 3 وتتخرج بمرتبة الشرف لكن يحتاج الموضوع لجهد .

    كلما تتقدم في الجامعة كلما يصير أصعب إن ترفع المعدل خاصة إذا وصلت الجونير والسينير .


    - الأندية الطلابية :

    الأندية الطلابية مهمة لكن فيه بعض الملاخظات :
    - لما شخص يشدد على أهمية الأندية على مستقبلك , هذا الشيئ مايعني إن الشركة الفلانية راح توظفك بس لأنك كنت نشيط في النادي الفلاني أو كنت رئيس له . المقصد هو إن الأندية راح تجبرك بطريقة غير مباشرة إنك تكتسب بعض المهارات مثلا التواصل , الإلقاء , التنظيم , القيادة , تساعدك على تنظيم الوقت و تعلمك كيف توزان بين دراستك والنشاطات الثانية .

    - الأندية فيها الكثير , فيها الأوريا , الفريشمان , السينير - بعض الدكاترة يشاركوا في لقاءات الأندية :فالأندية فرصة ومكان تتبادل فيه الخبرات وتستفيد وتتعلم أشياء كثيبرة وبعض الأشخاص في الأندية لهم علاقات برا الجامعة ممكن تساعدك مثلا واحد تعرفت عليه عن طريق النادي و وصلني منه إعلان لفرص تدريب ( لطلاب جامعتنا ) من موظف يعرفه شخصيا وفيه أمثلة و مواقف كثيرة أهم و أوضح من هذا المثال .

    - لا تنسى نفسك في الأندية و تذكر هدفك من الجامعة : ( معدل + شهادة + فهم للتخصص + شخصية ناضجة )
    للأسف لاحظت كثير يتحمس مع النادي وللأسف بالتدريج يتدنى مستواه و بعد فترة تكتشف إن النادي صار بالنسبة له هو الأولوية والنتيجة معدل سيئ و دروب للسمستر بسبب عدم تركيزه على الدراسة !

    - مب كل الأندية فعالة لكن غالبا ً أندية التخصصات تكون فعالة أكثر

    قائمة : حسابات الأندية الطلابية في مواقع التواصل الإجتماعي

    فيه بعض الجهات داخل/خارج الجامعة بعضها مرتبطة بتخصصات معينة وبعضها لا , أنصحكم بالإطلاع عليها

    EE = IEEE KFUPM
    ISE & CISE = The International Society of Automation
    Microsoft Club at King Fahd University of Petroleum & Minerals
    Tech_Bench
    FABLAB
    معهد ريادة الأعمال
    للكيميكال : AIChE Saudi YPC


    النشاطات - الدورات - المشاركات خارج/داخل الجامعة :

    فيه نشاطات ومسابقات تقام والفئة المستهدفة فيها غالبا تكون طلاب الجامعات أنصحكم بالمشاركة فيها , صحيح نظام الجامعة نوعا ما يجبرك إنك تركز على الدراسات لكن إلى لاخظته إن فيه شباب من جامعتنا شاركوا في هذي المسابقات والفعاليات والحمدلله حققوا مراكز متقدمة و بعضها تكون بالتنسيق مع الأندية الطلابية مثل

    المسابقة الوطنية للمهارات
    Unilever - The Quest
    المؤتمر الوطني الأول لكليات الحاسب
    المؤتمر العلمي السادس
    Siemens weekend challenge

    بعض الشركات ممكن تكون سفير أو ممثل لها في الجامعة مثل Unilever , E&Y أو بعض الجهات التعليمية مثل منصة رواق

    أنصحكم بالمشاركة فيها ,ممكن تسأل كيف راح انسق بين المياجر والمذاكرة بين ها . انت سجل والأمور راح تتيسر إن شاء الله .
    الدكاترة والجامعة ممكن تتعاون معاك .

    - الدورات / المحاضرات : الدورات في الجامعة نوعين :
    النوع الأول : دورات للأسف الفايدة فيها محدودة مثلا : كيف تنظم وقتك ؟ كيف تنهض بمعدلك ؟ممكن العناوين تشدك لكن المحتوى غالبا ً أقل من المطلوب و لما تسمع أحد يقولك راح تفيدك في الـ السيرة الذاتية فكلامه مب دقيق . هذا النوع من الدورات خطأ إنك تذكرها في السيرة الذاتية . الشيئ الثاني حتى لو فرضنا إن هذه الدورات المفيدة فهي مالها علاقة بالسيرة الذاتية . ممكن تفيدك من الناحية الشخصية مثلا كيف تنظم وقت لكن مالها علاقة مباشرة بالسيرة الذاتية .

    النوع الثاني : وهي الدورات المتعلقة بالتخصص و المواضيع العلمية أو غيرها من المواضيع المهمة على سبيل المثال
    محاضرات د . صالح الشبل , وأنصح الطلاب خاصة الفريشمان وفوق بالدورات على الأقل دورة وحدة بالسمستر .
    بعض البرامج والمواضيع مب مطلوب منك تتنقنها وتفهمها من دورة قصيرة مدتها ساعتين أو 3 , المطلوب إنك يكون عندك فكرة عن البرنامج . ممكن تستفيد منها في مشاريعك + مع إستخدامك المتكرر لها راح تكون معرفة بالبرامج و نفس الشي مع المواضيع المتعلقة بتخصصك . الدورات هذي غالبا تنظمها الأندية الطلابية + بعض الأقسام وبعض الجهات .

    - حاول لاتحصر نفسك بكورسات تخصصك . احضر دورات بين فترة وفترة اطلع على المقالات المتعلقة بتخصصك ( لو كنت تميل للبحوث وناوي تكمل دراسات عليا ) .وهذا الشيئ شبه مستحيل إنك تقدر تسويه لو كنت داخل تخصصك ما يعجبك او مب مقتنع فيه .

    وأنا أٌفضل بالدورات الأونلاين لأن للأسف أغلب الدورات الي تقيمها الجامعة أوقاتها غير مناسبة أما دورات الأونلاين تقدر تخلصها متى ماتبي و عندك خيارات كثيرة :

    المواقع المناسبة للدورات الاونلاين ( حاول تركز على موقع واحد , عشان لاتتشتت . )
    منصة عربية للتعليم المفتوح تهدف لنشر المعرفة
    الرئيسة | إدراك
    Courses
    Coursera | Online Courses From Top Universities. Join for Free

    نصائح دراسية :

    1 - طريقة المذاكرة : كل كورس وله طريقة مختلفة في المذاكرة , مستحيل تذاكر كورسات الإسلامي مثل مذاكرتك لكورسات الماث . فقبل بداية أي سمستر حاول تعرف طبيعة الكورسات الي ناوي تنزلها وتقدر تقرأ عن الكورسات من مواضييع التقيم في منتتدى الجامعة .

    والمذاكرة مالها علاقة بعدد الساعات الي تقضيها في المذاكرة . إعرف كيف تذاكر وعلى شنو تركز في المذاكرة .

    [​IMG]
    - في بداية أي سمستر سو لك ملف مثلا باسم 162 على جهازك أو google drive وفيه ملفات بأسماء المواد وحاول تحفظ فيه كل الملفات الي تحتاجها مثل : السلوشن مانول – كويزات قديمة – اولداقزام لآخر سمسترين و كل أسبوع تحفظ فيهم ملفاتك لهذا السمستر هالشي راح يفيدك ويختصر عليك الوقت ولو حصلت مشكلة في النت أو البلاكبورد ماراح تتضرر . وفي نهاية السمستر تقدر ترفع ملفاتك ويستفيد منها طلاب الدفعات الجاية .

    - الكويزات : إحرص عليها وحاول تغطي الماتيريال الي داخل في الكويز وتدرب عليه لأنها راح تنبهك على أخطائك والأشياء الي تحتاج مراجعة . وتذكر تغلط في كويز أفضل من تغلط في ميجر .

    - الهوموركات : مهمة لكن على حسب الكورس بس إبتعد عن النسخ من السلوشن مانول بدون فهم , حاول تحل وإذا ماعرفت رح للسلوشن وإفهم السؤال . بعض أفكار الهوموركات تتكرر في المياجر والكويزات إذا تحسبها راح تكتشف إن الدرجات الي نقصتها في المياجر و الكويزات بسبب إنك نسخت من السلوشن راح تكتشف إنها أكثر من الدرجات المخصصة للهوموركات !! فحاول تحلها بفهم وتستفيد منها كإستعداد للمياجر والكويزات . اما اذا بتقعد تنسخ من السلوشن بدون فهم وماكنت مضطر , فأنت قاعد تخدع نفسك و تضيع على نفسك درجات في الكويزات والمياجر + فهمك للكورس .

    الأولداقزام : مهم في الجامعة لكن إبتعد عن حفظه ترا حفظه ماراح يفيدك وإذا فادك فالنتيجة c+ في أحسن الأحوال . حاول تذاكر من المصادر الثانية في الكورس مثلا سلايدات أو نوتة و آخر خطوة هي الأولداقزام و حله بفهم .

    TB=Test Bank = وهو منتشر عند طلاب الإدارة صحيح هو مهم لكن للأسف البعض يحفظ بدون فهم ولا حتى مذاكرة على طول يروح لل tb و النتيجة بعض الكورسات الأساسية في تخصصه مايكون فاهمها صح !

    لاتذاكر بالنظر : أو تقول الحل سهل , في وسط الميجر أو الكويز راح تكتشف أخطاء و أشياء مب واضحة بالنسبة لك . فحاول تدرب قد ماتقدر وتحل أسئلة خاصة في الكورسات العلمية مثل الماث والفزكس .


    2- أول أسبوع في السمستر هو أهم أسبوع !
    أول أسبوع الكثير يسحب عليه , لكن بالنسبة لي أهم أسبوع . خذ التقويم الأكاديمي ( الي يوزعه مستودع الكتب ) و اكتب فيه مواعيد الفاينلات والمياجر وتسليم المشاريع والمواعيد المهمة .
    و هذا التقويم راح يكون معاك يوميا ً الفائدة منه إنه راح ينبهك متى تبتدي تستعد للمياجر وكيف تنظم وقتك وتعرف الأسابيع الي فيها ضغط عليك في السمستر وبكذا تعرف توزان بين دراستك وبين النشطات الثانيةوتعرف متى تقدر تفلها وتريح .
     
    • x 9 إعجاب إعجاب
  4. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    #4 شدعوه, ‏17 يناير 2017
    آخر تعديل: ‏18 يونيو 2017
    - الحضور حتى مع الدكتور السيئ أفضل من الغياب :

    الحضور مهم , مع أول غياب راح يصير الغياب بالنسبة لك شيئ عادي فبعده يمكن لأتفه الأسباب تبتدي تغيب . احضر حتى مع الدكتور السيئ لأن حضورك راح يحسسك إنك مب ضايع وعارف وين وصلتوا هذا لو فرضنا إن الدكتور سيئ . أما لو كان الدكتور ممتاز فتأكد غيابك راح يأثر عليك كثير وحضورك راح يفيدك : على سبيل المثال في كورس EE203 في الميجر الأول حليت تقريبا 3 أسئلة ( كونسبت ) كلها بسبب جملة قالها الدكتور في الكلاس مع العلم الاسئلة ماكانت موجودة في النوتة ! فتصور لو كنت غايب ذاك اليوم ! ونفس الموقف تكرر لي مع كورسات ثانية .

    ملاحظة : الحضور مب مقصود فيه إنك تخلي أحد يحضرك وتنحاش أو تحضر بعد 10 دقايق ! أو إنك تحضر وتنام أو تقعد في آخر الكلاس وتشتغل على الجوال إذا هذا هو مفهوم الحضور عندك فالأفضل إنك ماتحضر وتكبر المخدة على الأقل تستفيد من وقتك بدل ماتضيعه في الكلاس !


    - ملفات راح تفيدك حتى التخرج :
    هذا الروابط في الأساس لملفات بعض التخصصات لكن راح تحصل فيها أغلب الكورسات سواء كانت عامة مثلا الإسلامي /ماث أو كورس تخصص مثلا ME 203 , EE200 , ISE 205 and etc ..

    EE= Electrical Engineering
    EE LEGACY - Google Drive

    ME = Mechanical Engineering
    ME Heroes - Google Drive

    ISE = Industrial System Engineering
    ISE Zalt - Google Drive

    KFUPM Resources


    يمكن تلاحظ أشياء كثيرة ذكرتها في الموضوع شبه متأكد إنك صعب تطبقها كلها مرة وحدة , لكن تقدر تغير نفسك للأفضل بالتدريج وممكن ماتنجح في البداية وهالشي طبيعي لأنك متعود على نظام قديم . لكن في كل الأحوال تأكد إن هذا هو الوقت المناسب لتغيير شخصيتك وتطويرها . بعد 5 سنوات راح تكون مشغول بأشياء ثانية ممكن تمنعك من تطوير نفسك أو تخلي أغلب وقتك ملك لغيرك .

    المقصد من موضوعي :

    لا تتخرج من الجامعة بعقلية ومعلومات طالب في الثانوية اللهم معاك شهادة في البكالوريس !
    إذا تبي تتغير للأفضل فهذي الـ 5 سنوات هي فرصتك للتغيير .

    موضوع الوظيفة بعد التخرج مرتبط بأمور كثير :فحاول تجتهد في الأمور إلي بيدك أما الأمور الثانية مثل وضع التوظيف أو قلة المشاريع ماتقدر تأثر عليها وتفائل حتى لو الظروف كلها تجبرك إنك تتشائم سواء في موضوع الوظيفة أو غيرها .

    الله يوفقكم وآسف على الإطالة لكن عزمت أكتبه لأني شفت كثير من أصحابي طلعوا من الجامعة خصوصا أول سنتين أو مستواهم كان سيئ في البداية وللأسف ما انتبهوا لأخطائهم إلا متأخر . و ما ودي هالشي يتكرر مع الدفعات الجديدة .

    بالتوفيق ولاتنسونا من دعواتكم وإذا تحس الموضوع مفيد نشره للشباب الي معاك في الدفعة وإذا لا ( استر على ما واجهت ) :blushing:


    وإذا أحد عنده نصيحة أو ملاحظة على الموضوع ياليت يشاركنا رأيه .


    &
    هذا الرابط فيه نصائح مهمة جداً جداً من د.هاني سندي
    هاني سندي on Twitter
    زبدة الزبدة ؛ الطريق الى مراتب الشرف
    طريقك للتفوق في الفريشمان + ملفات لأغلب الكورسات
     
    • x 15 إعجاب إعجاب
  5. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    #5 شدعوه, ‏17 يناير 2017
    آخر تعديل: ‏17 يناير 2017
    ^^^^
    كنت مرتب الموضوع لكن الظاهر صار فيه خطأ فبحاول أعدل عليه عشان يكون أوضح واسهل في القرآءة .
    -----
    الظاهر المشكلة عندي ما قدرت أضيف كل التعديلات فخليت الموضوع على شكل صور في المرفقات
    وآسف على الاخطاء الإملائية لكن كتبته على السريع وبالعامية + ما أقدر أعدل على الموضوع .
     

    الملفات المرفقة:

    • s1.JPG
      s1.JPG
      حجم الملف:
      106 ك. ب
      المشاهدات:
      2,608
    • s2.JPG
      s2.JPG
      حجم الملف:
      123.4 ك. ب
      المشاهدات:
      1,883
    • s3.JPG
      s3.JPG
      حجم الملف:
      119.7 ك. ب
      المشاهدات:
      2,504
    • s4.JPG
      s4.JPG
      حجم الملف:
      125.6 ك. ب
      المشاهدات:
      3,280
    • s5.JPG
      s5.JPG
      حجم الملف:
      151.2 ك. ب
      المشاهدات:
      2,622
    • s6.JPG
      s6.JPG
      حجم الملف:
      131.6 ك. ب
      المشاهدات:
      2,453
    • s7.JPG
      s7.JPG
      حجم الملف:
      113.6 ك. ب
      المشاهدات:
      2,756
    • s8.JPG
      s8.JPG
      حجم الملف:
      137.4 ك. ب
      المشاهدات:
      2,582
    • s9.JPG
      s9.JPG
      حجم الملف:
      104.6 ك. ب
      المشاهدات:
      2,224
    • s10.JPG
      s10.JPG
      حجم الملف:
      132.4 ك. ب
      المشاهدات:
      1,619
    • x 6 إعجاب إعجاب
  6. Krooom

    Krooom عضو

    انضم:
    ‏17 يونيو 2016
    المشاركات:
    174
    التخصص:
    coe
    الجامعة:
    kfupm
    سنة التخرج:
    2018
    التقييمات:
    +80 / 0 / -5
    الف الف مبروك التخرج ومرتبة الشرف تستاهلها بكل جدارة

    وانت من الناس المبدعين والمتساعدين بالمنتدى فتستاهل كل خير

    نصايح درر و فعلا بعضها تواجهني حاليا فاعتبرني من أوائل المستفيدين

    اتمنى لك التوفيق من كل قلبي
     
    • x 2 إعجاب إعجاب
  7. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    البقية :
     

    الملفات المرفقة:

    • s11.JPG
      s11.JPG
      حجم الملف:
      129.2 ك. ب
      المشاهدات:
      1,979
    • s12.JPG
      s12.JPG
      حجم الملف:
      114.8 ك. ب
      المشاهدات:
      5,968
    • s13.JPG
      s13.JPG
      حجم الملف:
      93.8 ك. ب
      المشاهدات:
      1,840
    • s14.JPG
      s14.JPG
      حجم الملف:
      100.6 ك. ب
      المشاهدات:
      1,320
    • s15.JPG
      s15.JPG
      حجم الملف:
      84.8 ك. ب
      المشاهدات:
      980
    • s16.JPG
      s16.JPG
      حجم الملف:
      143 ك. ب
      المشاهدات:
      2,467
    • s17.JPG
      s17.JPG
      حجم الملف:
      120.6 ك. ب
      المشاهدات:
      4,223
    • x 2 إعجاب إعجاب
  8. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    #8 شدعوه, ‏17 يناير 2017
    آخر تعديل: ‏17 يناير 2017
    الله يبارك فيك وعقبالك .. هو باقي سمستر على التخرج
    لكن لأنه بيكون 18 ساعة و3 لابات فبيكون ضغط فقلت خل أنزله الحين . ونفس الوقت قلت يمكن أحد من الشباب الخريجين يقرأ الموضوع ويفيدنا بنصيحة .
     
    • x 1 إعجاب إعجاب
  9. Mr.A

    Mr.A عضو

    انضم:
    ‏5 نوفمبر 2015
    المشاركات:
    1,131
    التخصص:
    هندسة كهربائية (EE)
    الجامعة:
    KFUPM
    سنة التخرج:
    2019
    الجنس:
    ذكر
    الإقامة:
    الأحساء - الظهران
    التقييمات:
    +1,369 / 7 / -63
    كلام كبير ، يكتب بماء الذهب
    أجزم لو كل شخص إتبع ما ذكرته كنا راح نشوف عقول ناضجة فاهمة وش قاعدة تدرس ، وهذا كله راح يعود بالنفع على المجتمع...

    ألف مبروك التخرج مقدما ، والله يعينك على الترم الجاي
     
  10. ahmad 00

    ahmad 00 عضو

    انضم:
    ‏25 أغسطس 2014
    المشاركات:
    66
    التخصص:
    E
    الجامعة:
    KFUPM
    سنة التخرج:
    2
    الإقامة:
    كفيوبم
    التقييمات:
    +41 / 0 / -15
    كلام رائع وتشكر عليه .. والف مبروك التخرج
     
  11. M nd m

    M nd m عضو

    انضم:
    ‏29 نوفمبر 2014
    المشاركات:
    960
    التخصص:
    ME
    الجامعة:
    KFUPM
    سنة التخرج:
    2019
    الوظيفة:
    طالب جامعي
    التقييمات:
    +925 / 2 / -41
    رائع. كالعادة.

    لي عودة لاحقًا لقراءة كل حرف كتب إن شاء الله

    و الله ما أنسى وقفتك "الشنبية" أيام منتدى يزيد يا إني غثيتك غث عالخاص ههههههههههههههههههههه

    الله يوفقك و يسدد خطاك و أسعدك الله في داري الدنيا و الآخرة
     
  12. أمير الشعراء

    انضم:
    ‏12 أغسطس 2013
    المشاركات:
    260
    التخصص:
    محاسبة
    الجامعة:
    اليترول
    سنة التخرج:
    ٢٠١٨
    التقييمات:
    +111 / 0 / -7
    ألف مبروك التخرج ( مقدماً )

    ما ننسى ردودك على أي موضوع في المنتدى ،

    صحيح اللي راح في الجامعة كثير بس الجاي كثير برضو

    نصايحك تُكتب بالذهب
    بالمناسبة ودي أعرف ايش تخصصك؟
     
  13. ماستر7

    ماستر7 عضو

    انضم:
    ‏5 أغسطس 2011
    المشاركات:
    495
    التخصص:
    N/A
    الجامعة:
    N/A
    سنة التخرج:
    N/A
    التقييمات:
    +68 / 2 / -1
    للأمانة نصائح مفيدة كطالب سينير أوافقك في أغلب ما ذكرت

    قليل اللي مثلك يحاول يفيد ويستفيد

    الله يوفقك بإذن الله لأعلى المناصب
     
  14. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    @ ماستر7 Mr.a@ , @Mn d m @ ahmad ]
    الله يسلمكم , و مشكورين على هالكلام الجميل ..

    @أمير الشعراء
    تخصصي cise
     
  15. First_Step

    First_Step عضو

    انضم:
    ‏30 أكتوبر 2016
    المشاركات:
    9
    التخصص:
    N/A
    الجامعة:
    N/A
    سنة التخرج:
    N/A
    التقييمات:
    +2 / 0 / -0
    الف مبروك التخرج .. :قلب::قلب:

    الله يسعدك موضوع مهم واستفدت كثيرا منك ..
     
  16. Đяєαмѕ ..!

    انضم:
    ‏6 ديسمبر 2009
    المشاركات:
    545
    التخصص:
    ME
    الجامعة:
    KFUPM
    سنة التخرج:
    N/A
    الإقامة:
    عــَـَـآلم الـ بق ـبق ~!
    التقييمات:
    +85 / 0 / -14
    -


    الغيابات - الكويزات - الهومورك
     
  17. شدعوه

    شدعوه مشرف سابق

    انضم:
    ‏12 يوليو 2011
    المشاركات:
    7,573
    التخصص:
    Control & Instrumentation Engineering
    الجامعة:
    Kfupm
    سنة التخرج:
    2017
    التقييمات:
    +4,522 / 9 / -22
    ؟
     
  18. Mo'7

    Mo'7 عضو

    انضم:
    ‏5 سبتمبر 2016
    المشاركات:
    15
    الجنس:
    ذكر
    التقييمات:
    +7 / 0 / -0
    نصائح من ذهب ... والله يجزاك خير ويرفع قدرك

    (( حاولوا تستفيدون من الساعات المكتبية للدكاترة, منها تطور مهارات التواصل مع شخص اكبر منك وايضا تستفيد من خبرات الدكتور وايضا لتحسين لغتك الانجليزية خصوصا اذا كان الدكتور اجنبي ))
     
    • x 1 إعجاب إعجاب
  19. Mohammed Alduais

    انضم:
    ‏26 سبتمبر 2016
    المشاركات:
    6
    التخصص:
    Civil engineering
    الجامعة:
    KFUPM
    سنة التخرج:
    2021
    الجنس:
    ذكر
    التقييمات:
    +2 / 0 / -0
    نصائح جدآ مفيدة
    وان شاء الله سيتم تطبيقها
    وأتمنى لك التوفيق والنجاح في حياتك العلمية والعملية
     
  20. ٍSaud

    ٍSaud عضو

    انضم:
    ‏12 ديسمبر 2014
    المشاركات:
    117
    التخصص:
    Applied Electrical Engineering
    الجامعة:
    KFUPM
    سنة التخرج:
    2020
    الجنس:
    ذكر
    الوظيفة:
    Field Engineer
    الإقامة:
    Hofuf, Saudi Arabia
    التقييمات:
    +39 / 1 / -8
    الله يعطيك العافية أخي على جهودك في المنتدى وإفادة الطلاب حتى بمواقع التواصل الإجتماعي
    ومبروك التخرج والله يوفقك في حياتك

    نتمنى تواجدك في المنتدى حتى بعد التخرج :(
     
جاري تحميل الصفحة...
مواضيع شبيهة - نصائح كنت أتمنى أسمعها في بدايتي بالجامعة روابط مهمة
  1. Adel_PETE
    الردود:
    5
    المشاهدات:
    3,777
  2. أنس الشرياني
    الردود:
    3
    المشاهدات:
    7,093
  3. بروتوكول
    الردود:
    1
    المشاهدات:
    1,460
  4. zero
    الردود:
    1
    المشاهدات:
    2,882
  5. Abdullmohsen
    الردود:
    13
    المشاهدات:
    2,851
  6. s2010xxxxx
    الردود:
    3
    المشاهدات:
    1,856
  7. Sάudi Eηgiηeer
    الردود:
    14
    المشاهدات:
    1,723
  8. الملك راؤول
    الردود:
    1
    المشاهدات:
    800
  9. legendkj
    الردود:
    5
    المشاهدات:
    627
  10. عبدالرحمن جبرتي
    الردود:
    42
    المشاهدات:
    3,077

مشاركة هذه الصفحة