خالد السلطان ...... إني ابحث عنك

تصريف الامطار سيء بالجامعة وخارج الجامعة فلا يوجد عذر سواء امطار قوية او ضعيفة فلابد أن يعترف بأن البنية التحتية لجامعتنا حالها حال الجميع وليست بالسمعة التي يروج لها
انا خوفي ان من الأساس المباني مو مجهزة لتصريف مياه الأمطار او ميزانية تصريف الأمطار تكون ضعيفة بحكم إنها ما تمطر علينا إلا بالسنة حسنة

 

اقسم بالله ذبحتنا بكثر تحلطمك ، ياهووو البلد كله غرقان ، لاتجلس تحسسني ان الجامعة اقليم منفصل ، الكل غارق ، بالإضافة ان كميات الأمطار في هذه المرة فعلا هائلة .

 

سيول الامطار مو مشكلة بس في جامعتنا ولا بس في الشرقية ولا بس في السعودية..ولا بس في الخليج ((تصير نفس المشكلة في قطر الامارات الكويت...Look it up)) تو جاي من البحرين والموضوع هو هو...والمشكلة ترا عالمية وتصير حتى في دول اوروبا المتقدمه...العام الماضي صارت ب باريس وحتى ام التكنولوجيا المانيا غرقت مرات بسبب كثرة هطول المطر وصارت وفيات..وبعض مناطق امريكا حدث ولا حرج..Also look it up...قدر الله وماشاء فعل...الكوراث تصير في كل محل..

عارف انه في تقصير واللي قاعد اقوله مايبرأ المسؤولين ولا اقصد انه المشكلة ماتنحل...اكيد اذا في تخطيط و نظام تصريف محترم مصمم من قبل مهندسين يشتغلو صحح ماراح تحدث المشكلة وعندنا نماذج هنا بالسعودية مايحتاج تروح بعيد...شف حي الدوحة والدانه بالظهران..وماحد ينسى الجبيل الصناعيه واختها ينبع..وغيرها كثير...وياليت كل مكان كذااا...

بس مستحيل بتشوف كل محل perfect هاذي سنة الحيااااة...ف مالك الا الصببببر..كلها كم يوم ويخف المطر ويجي الصيف الونيس وترجع الحياة طبيعيه...

 

انا مادري ليه ناس تحترق لما ينتقد. ماكلف من جيبك شي لما يفتح مواضيع"زين انه يحرك المنتدى الميت". ياحب البعض لإقصاء الرأي والتهجم على صاحب الموضوع حتى ان اسلوبه في الرد زفت

وهاذي صوره لعيونك


واثقون من بنيتنا التحتيه أجل !

 

يا عبدالله الشباب ما قالوا إن البنية التحتية ممتازة ، وإرجع إقرأ الردود من جديد وبتتأكد من كلامي.
المشكلة اللي يتكلمون عنها إن تضخيم المشكلة وكأنها صايرة داخلة الجامعة ، وأول ما تعدي البوابة تشوف الدنيا ناشفة في الخبر والظهران وحتى الدمام. لا طبعا ، الوضع غرقان تقريبا في دول الخليج كلها ، وأنا حاليا في الأحساء وأؤكد لك إن الوضع نفس وضع الدمام والخبر.

المشكلة الثانية اللي اختلفوا الشباب معه فيها -وأنا أوافقهم الرأي- هي لغة الخطاب في مواضيع أبو ريناد. مع كامل إحترامي له ، هو يستخدم لغة خطاب غير صحيح استخدامها في كثير من المواضيع.


أتمنى ما تجتزئ الافكار وتقرأ بتأنٍّ

 

اللي يشوف موضوعك، وبالذات العنوان، يقول مدير الجامعة محتجب عن الطلاب وما نعرف عنه الا اسمه. اظنك تعرف الطريق لمكتبه، رح له اذا كنت فعلاً تبيه يسمعك.

 

مع إني مالي الحق في الرد عن صاحب الموضوع ولكن
"تشرح له بدال الصياح "
"تفك موضوع بكاء كعادتك "
العبارات هاذي طفوليه إلا اذا انت شايف رد غير اللي انا شفته
انا ابدا ماعندي مانع في النقاشات الجميلة لكن صاير الاحظ فيها تهجم وقح على ابو ريناد

+ إن لم تخني الذاكره في عام 2013 كان التبرير لعدم إعطاء اجازة انهم واثقون من البنية التحتية
وحنا قاعدين نبين انه لا . البنية التحتية لايمكن الثقه بها والتصريح كان وهمي ومجرد "تسليك"

وبناء النقاش على انه ترا "كل البلد كذا " هاذي نقطة غير صالحه ولايمكن بناء النقاش عليها. ترا ننتقد المدن بعد واللي يصير بالكباري وكيف تجمع المياه ولكن هذا منتدى الجامعه ونناقش مشكله تخص الجامعة وتصريف الامطار موضوع كبير وليس بالشيئ السهل

 

انا لما قلت كل البلد كذا ، كان قصدي ليه هو متحامل على الدكتور خالد لهذه الدرجة ، فالجامعة جزء من كل ،وليست بمعزل عما يحدث خارج اسوارها .

 

الأكثر مشاهدة on Twitter

 

Engineering sense!

 

ABDALLAH on Twitter

هههههههههههههههههههههههه

 

مثل الي يفرغ البانيو بملعقة
بس اعجبني التقدم العلمي

------------------------------
خذ هذا ايضا فضيحتنا بجلاجل
ساحات جامعة الملك فهد تتحول لحمامات سباحة.. بالفيديو: الأمطار تجبر المواطنين على خلع ملابسهم في الشوارع - صحيفة المرصد
* مر على التعليقات على الخبر معاك
----------------------------------------
رغم اختلافي الشديد مع كاتب الموضوع في مواضيعه السابقة الا انه اصاب كبد الحقيقة هذه المرة لان ادارة الجامعة ذكرت غير مرة بأن البنية التحتية قوة لذلك لا يلزم تعليق الدراسة والي يذكر أحد الاترم اعتقد داومنا في الغبار يوم الخميس و السبت(كان تعويض) والشرقية كلها معطلة بما فيها أرامكو ووعدونا ان القاعات متهيأة للدارسة ويومها كنا ندخل الكلاس بمناديل نمسح الكراسي وهاتيك تنفس للتراب

و بالنسبة للي يقول روح للمدير لمكتبه هل سبق وجربت ورحت لمسؤول وانتقدته؟!
يا رجل جلست قرابة سنة من مكتب لمكتب أدور حقي ووصلت لمن قبل المدير رغم اني حقي واضح وضوح ضوء الشمس و المسؤول اعترف بذلك ويالله جاء بعد "حب خشوم" وكلمتين تسليك وحسيت بلغة الامتنان و الفضل المقرفة فما بالك بمن يذهب لينتقد و الكلام هذا ليس فقط لإدارة الجامعة أو المسؤولين هنا بل هي ثقافة سائدة في المجتمع للاسف ولا احد يستطيع انكار هذا و السبب انه لا يوجد محاسبة اللمسؤول إذا أخطأ لذا يجب ان نكون واقعيين البعض سيقول هذا ليس نقد بناء اذا تفضل قدم نقدك البناء ولننتظر النتيجة معا على الغالب سيبقى نقدك "البناء" حبيس الأدراج إذا سلم من فرامة الورق.

نقطة: كلامي أعلاه لا ينكر أن المسؤولين في الجامعة هنا لا يتجاوبون مع الاقتراحات بما فيها ادارة الجامعة او غيرها لكنها للأسف ستبقى تحت مزاج المسؤول وليس هناك تغليب للمصلحة العامة فمن الإدارات المتجاوبة مثلا إدارة الحركة متجاوبة مع ملاحظات الطلاب لكن هناك إدارات ليست كذلك للأسف.
عموما الإعلام أو كما يسمى السلطة الرابعة هو وسيلة لإيصال النقد وإن كان لاذعا ولكن بحدود الادب والاحترام و المنتدى هنا وسيلة وله صوت

 

قد اتفق مع صاحب الموضوع
اعتقد هناك بعض الأمور التي تمرر على الطالب (نقدر نسميهم كذبات) من قبل إداري الجامعي خالد السلطان أحدهم :
البنية التحتية للجامعة قوية
لكل خريج 6 في سوق العمل .....ألخ

و لكن لا اعتقد أن من الصحيح أن نجعل السبب د خالد السلطان
و ليس علاج المشكلة استقالته.

خالد السلطان رقم وضع بصمته في الجامعة

 

أشوف الأخوان اللي مدرعمين ومو عاجبهم موضوع الرجال أغلبهم مشرفين وكذا
تحسهم وصلتهم رسالة على قروب الواتس وقالوا تعالوا نرد على المتحلطم ذا ههههههههههههههههههههههههههههههه

على العموم كل شخص له وجهة نظر ومن حقه يطرحها ولا يحق لأي شخص مصادرتها أو التقليل من شأنها أو شأن صاحبها ..
ولكن أقول للي كتب الموضوع ترا السلطان ما درى عنك ، تخيل يأخذ برايك ويخلي اراء المستشارين والخبراء
واقول للأخوان المطبلين ترا السلطان ما درى عن تطبيلكم ، تخيلوا يُعجب بتطبيلكم و يخلي تطبيل الموظفين و الدكاترة ووو

ختامًا
المنتدى هنا لطرح الأراء و مناقشتها و رفعها اذا احتاج الأمر لاحقًا للمختصين عبر قنوات التواصل الرسمية
فلذلك لا تأمل يا كاتب الموضوع ولا تنزعج يا سيدي المشرف
شكرًا لي ولكم ​