المانيول سلوشن

اشوف هذي اسباب النسخ من السلوشن :

- بعض الهموركات بدون فائدة أو صعبة أو مستوى شرح الدكتور ما يتناسب مع صعوبة الأسئلة .

- الصراحة في بعض الطلاب ماهمته الفائدة , يعني حتى لو كان الهمورك راح يفيدك في فهم الكورس , هو ماراح يحله . خاصة الي ينقل الأسئلة على حسب رقم السؤال بدون مايكلف نفسه ويقرأ الجواب أو على الأقل يتأكد هل هو حل لسؤال الهومورك أو لا .

- الهوموركات اوقاتها غالبا ً تكون غلط , يعني بكرة عندي ميجر لنفس الكورس تعطيني هومورك في نفس اليوم او اليوم الي بعده , ليش ؟!

- تساهل القريدر أو الدكتور مع حالات النسخ من السلوشن ( انا ما اعارض إن الواحد ينسخ خاصة اذا كان مشغول , لكن انقل بفهم او على الاقل اعرف شقاعد تنقل حتى لو ماكنت فاهم الدرس , لاتنقل وبس وحتى اسم الدرس ماتعرفه ! )

-مشكلة المانول سلوشن هي نفس مشكلة بعض الطلاب مع التست بانك , لأن اغلب اسئلة الدكاترة منها في بعض الكورسات
يصير شغله بس يحفظ التست بانك بدون فهم وفي النهاية الفائدة من الكورس شبه معدومة
بالرغم إن التست بانك الي يغطي ماتيريال الميجر ممكن يوصل لأكثر من 50 صفحة ! إلا عدد مب قليل من الطلاب يفضل التست بانك ؟!

إنك تحمس الطالب يحل الهومورك بنفسه شيئ صعب , حتى لو خليت اسئلة المياجر من الهوموركات عدد مب قليل راح يحاول يحفظ السلوشن أكثر من إنه يفهم فكأنك يا بوزيد ما غزيت ..

 

ياليت يلغون الهوموورك والسايمنت و خصوصا انو غالبية الطلاب نسخ لصق و قليل اللي يستفيد منها و يكتفون بالاختبارات كويزات مياجر ميدتيرم فاينل
الاعمال الفصلية داخل الكلاس وسلامتكم

 

الترم هذا منزّل مادتين تخصص مع دكتورين مختلفين ، وللأمانة نظامهم ممتاز جدا -حسب وجهة نظري- ، وراح أذكرهم الحين:

الأول شايل شيء اسمه هومورك من باله. ودرجة الكلاس وورك كلها موزعة على عدد معين من الكويزات على طول الترم. فالأمر بيدك إذا تبي تذاكر وتفيد نفسك أو لا ، وراح تنكشف إذا أنت تذاكر أو لا عن طريق الكويز.

الثاني منزّل أسئلة هومورك في السيلبس ، لكن ما عليها درجات. نظامه ينزّل الحلول على البلاك بورد ويعطي كويزات على الهوموركات نفسها ، لكنه ما ياخذ الأسئلة نسخ لصق منها. ياخذ أفكار الأسئلة ويسوي أسئلة جديدة كأنها أسئلة مياجر ، ويجيبها في الكويز.


أنا طبعا لي رأي في المواد اللي يكون فيها هومورك ، وهو إذا تبي تحقق الاستفادة من هذه المادة لازم تطبق نقطة من اثنين:
١. الدكتور يكتب الهومورك بنفسه ، يعني يسوي أسئلة من راسه ويعطيها للطلاب ، بحيث إن ما لها حلول في أي مصادر. بهذه الطريقة الطالب راح يفكر ويحل بنفسه + يعمل حساب الديدلاين وما يؤخره لليلة التسليم.
٢. توضع درجات قليلة على الهومورك ، ويترك بشكل عادي مثل الحالي (المانيوال موجود والكل ينقل منه) ، لكن في المقابل يتم وضع بروجيكت أو برزنتيشن أو أي شيء يكون فيه شغل للطالب ويثري التعلم الذاتي عنده ، وتكون عليه درجة عالية من الكلاس وورك. هذا النظام حسب ما نُقِل لي معمول به في جامعة CalTech الأمريكية ، بل وصل بهم الحال هناك إلى أن كل اختبارتهم Take Home ، لكن العروض والبروجيكتات كثيرة ؛ لأنها هي اللي تقيس إتقان الطالب للمفاهيم واستفادته من المادة.

 

ما شاء الله يا ابو ريناد انت شخص مجتهد اسأل الله ان يوفقك تذكرني بصديق لي كان دافور يوم ازوره في غرفته قاعد يذااكر على الطاولة و يقرأ لين يجي موعد النوم وبالتوفيق لك و للجميع

 

باختصار ، الفكر الموجود عند غالبية الدكاترة إنهم يبون الطالب عبارة عن ماكينة تعرف تحل تريكات وأسئلة صعبة ومعقدة ، بدون الاهتمام بفهم الطالب ، فالطالب لازم يماشي الوضع عشان ما يضيّع القريد في المادة ، وهذا خطأ.

 

أختلف وبشدة مع اللي يقول ان الهوموركات غير مفيدة .. اذا حليت الهومورك بنفسك هذا يكفيك عن ساعات من المذاكرة قبل الميجر .. وكلنا نعرف أن أسئلة الميجر - في العادة - تجي أسهل من الهومورك !!

المفروض أن الدكاترة يشدون حيلهم ويكتبون أسئلة من عندهم .. يعني ما لها manual solution !!
وقتها أنا متأكد أن مستوى الطلاب بيرتفع.

 

السلام عليكم ورحمه الله وبركاته
اولا اشكر الجميع على صدق مشاعركم تجاه الموضوع وهو بالفعل موضوع يؤرق الكثير من الطلاب ولكن بغض النظر عن بعض حالات الهوموركات اللي تتعارض اوقاتها مع الختبارات و المياجر و البروجكتات ولكن لدي كلام في صدري اتمنى ان الجميع يقراه ويعلم الله اني مررت بالموضوع وانا فقط اتصفح وبدون اي همه تجاه الرد على اي موضوع ولكن حن قلبي لايام البترول وشبابها بحلوها ومرها واردت بكل صراحه ان ابلغ اخوتي وجماعتي " البتروليين الاحبه " ...

اخوكم خريج دفعه 2008 وما تحدثت في الموضوع الا محبه فيكم ....ندخل في لب الموضوع ... الهوموركات في وجهه نظري مساله مفروغ منها وهي انها جزء لا يتجزا من القريد العام وانا لست معارض مساله المانول سلوشن نهائيا ولكن انا ارى ان الواجبات تزرع بداخل الطالب مهارات اخرى تماما منها شخصيه و تحليليه ....فالتحليليه تكون في طريقك لتحليل السؤال واستنتاج المطلوب بغض النظر عن النتيجه واضافه على ذلك تقوي من مهارات التفكير لديك بشكل ملحوظ مع مرور الوقت والمهارات الشخصيه هي مهارات ستجعلك على مر السنين مهندس تفوق اقرناك في المجال سواء كان مهني ام اكاديمي وهذي المهاره هي مهاره الاتزام باتمام الامر بشتى الوسائل وبغض النظر عن الظروف المحيطه بك فمن اعتاد على اتمام المطلوب سيبقى هكذا على طوال السنين ...... اخوكم يتحدث من واقع مر به ولا ازكي نفسي ابدا فقد اعتدت على اتمام بعض الهوموركات بالمانيول سلوشن ...... ولكن نصيحه انصح بها الجميع " ذاكر بذكاء " وقد يعلم البعض منكم بامر بعض الطلبه حين يراه في اخر الفصل ونائم في اغلب الواقت ولكن يدهشك بعلو درجته في الماده فهو يعلم معادله النجاح لكل ماده ويمر بتفاصيلها والبعض قد يظن ان الاجتهاد وحده هو سيد الموقف دائما ...... اعتذر على الاطاله واتمنى من العلي القدير ان يرزقكم ما تتمنوه ايها المجتمع الغالي " البتروليين "


دمتم في اطيب حال ......

 

المشكلة في اغلب الكورسات عليها 5%, ويجيك عشرة اسئلة في الهوموورك الواحد

من وجهة نظر الغالبية انها بتكون مضيعة وقت, فيفضل انه ينسخ في عشرة دقايق وياخذ 0.35%

بينما في بعض الكورسات عليها اعلى من المياجر واجزم 100% اني استفيد منها واخرج وانا فاهم الكورس

تنويه بسيط:

في دكتور اسمه اشهر من نار على علم في الجامعة الغى الدرجة المقررة على الهومورك واضافها للكويزات, النتيجة سكاشنه يجيها افرج على الاقل 15% اعلى من بقية السكاشن في المياجر!

اسال الله ان يجزيه خير الجزاء هذا االدكتور