الأجانب في شركات السيرفس إلى متى؟

"التنمية ساقطه بسبب الاجنبي الوافد"

التنمية ساقطة بسبب وزارة العمل, الاقتصاد والمالية وغيرها من الوزارات اللي رأس الهرم فيها ووكلائه سعوديين.

"الى متى وانتم تتبعون اسلوب الانسانية"

أستغرب هالقول مع ان نظام العمل والكفالة بالمملكة أبعد ما يكون عن الانسانية بل هو مرادف للعبودية.

"الاجنبي هنا يأتي لكي يخدمنا لا لكي يصبح مسئول علينا"

الأجنبي جا هنا بعقد عمل سواء يخدمك بشكل مباشر كعامل منزلي أو يخدم شركته سواء سيرفس وغيرها أو يكون رئيس عليك. سالفة انه جا هنا عشان تتفضل وتمن عليه شيلها من راسك.

--

ملاحظة\ أنا سعودي بشهري الأخير بالجامعة وللحين ما حصلت على فرصة لكن ما بحط حرتي بالأجنبي وأنا أعرف ان البلاء من وزاراتنا, تحديد المشكلة نصف الحل.

على كل حال كل شركة تبحث عن مصلحتها وتوفير التكاليف قدر المستطاع والتغيير بيد وزارة العمل والجهات الحكومية فقط أما انك تنتظر من الشركات تبادر فهذه أحلام يقظة.

 

اخي الكريم قل خيرا او كن مستمع جيد لما يدور حولك
ان لم تعلم ما نواجه خارجا في سوق العمل من تمييز مقيت و استغلال واضح من منسوبي شركات القطاع الخاص الاجانب ضد ابناء هذا البلد و بالتحديد في القطاع الحيوي الاول وهو قطاع النفط

سواء في شركات الخدمة
ك شلمبرجير
هاليبرتون
و بيكرهيوز ولا ننسى وذرفورد و الشركات الصغيرة الاخرى


ارجوا ان تكون اكثر واقعية و عقلانية في ردك و نظرتك للموضوع ,
كاتب الموضوع واضح انه اختبر التمييز والعنصرية و وضع نقاط كثيرة على الحروف فيما يجري في قطاع النفط داخل شركات الخدمة
لوبيات كثيرة
سواء عربية او اجنبية
شرقية او غربية
من حثالة المجتمعات يغزون سوق العمل المحلي من دون خبرة تذكر و لا تتفاجئ ان علمت بعض شهاداتهم او خبراتهم مزورة ناهيك عن الاعداد الغفيرة التي تقدم للبلد مع العلم بوجود السعودي فعلا الكفؤ وما يزيد الذي بامكانه شغل المنصب او الوظيفة ولكن المنظومة العمل في الشركات هذه ونظام الجماعات العنصرية اكبر من ان يحصى بعدة ردود هنا او بضع كلمات على وسائل التواصل.


نحتاج وقفة جادة وصارمة تجاه هذه الشركات وطريقة تعيينها للموظفيين سواء السعوديين او غيرهم, والتركيز على ماهية استقدام الاجنبي و مدة تواجده في البلاد و تطوير هذه الشركات للكفاءات المحلية السعودية اذا تم استقطاب الاجنبي لمدة معينة .


المهزلة يجب ان تقف !!

 

انا حاليا تطبيق كواب في شلمبرجير .. التكتلات والحزبية لا تكون في الشركة ككل ، ولكن في بعض الاقسام الصغيرة ( من الصعب جدا تكوين لوبيات في اقسام عملاقة ) ..

الشركة فصلت اجانب كثير ولكن ابقت عالسعوديين لدرجة ان بعض الاجانب نقل الاقسام الصغيرة عشان ما تكون العين عليه

الشركة ما اعلم عن النسبة الدقيقة للسعوديين فيها ( حول 40-50% )

ولكن الشركة عندها خطة تحول الى 75% نسبة سعودة ، ومع الازمة السعوديين نقص من بونصهم اليومي بالفيلد 18% فقط ..

بينما الاجانب فصل واللي خبرته قوية خلوه وخصموا منه 38% من الراتب

وارامكو حاليا تمارس ضغوط عالية لسعودة قطاع النفط والغاز لدرجة انهم بعض الاحيان يجون عند بعض حقول النفط ويعدون كم سعودي موجود في شركات السيرفس ..

ما ادري الصراحة انت كيف تبي تغير الوضع بيدك ؟ ، وكلامك معاملة الاجانب كالخدم فيه اجحاف بحق اناس جو بتاشيرة عمل ما جو عشان تستعبدهم وعبارتك فيها استنقاص من قدرهم كبشر . ( انا عارف مين الجنسية اللي تقصدهم شايفين نفسهم ، ولكن اللوم عاللي جابهم مو عليهم )

 

انا طبقت بسامرف - كنت اشوف اجانب بالادارة وظيفتهم جدا جدا جدا جدا بسيطة ( ادخال بيانات - دفع فواتير - تدقيق حسابات - مراجعة قوائم مالية)

كنت دايم اقول الاجانب يجو هنا عشان الشغلات الصعبة او اللي المواطن يستحي منها - اكتشفت انه نظريتي خطأ 100%

اتذكر واحد كانت وظيفته مدقق حسابات - طبعا اللي درس كورس Auditing من طلاب الاكاونتنق بيعرف انه شغله يقدر يسويه اي شخص سعودي متعلم

طبعا بعضكم بيقول عشان راتبهم اقل والكلام ذا - المدقق هذا يستلم راتب كويس ما شاء الله يعني ما نحسده لكن مين أولى ؟ في بلد غني ولله الحمد يتخرج طالب بمعدل كويس ولا يلقى وظيفة اما الاجنبي تجيبه من برا عشان يشتغل !

وجهة نظر شخصية واحترم رايك يا كاتب الموضوع لكن انت اهنت الاجانب - بالنهاية مو غلطهم ، غلط اللي وظفهم

 

لن يؤخذ حق بالهجوم وتوجيه أصابع الاتهام بشكل عشوائي، المسؤول الأول والأخير هم الوزارات الحكومية وليس الشركات. الشركة يهمها في نهاية السنة صافي الربح بأي طريقة قانونية ممكنة والخلل بالأنظمة أما أروح أقول الوافدين هم السبب الرئيسي فهذه نظرة سطحية مع احترامي وكون كاتب الموضوع تعرض لتمييز ضده فنحن أمام حالتين:
١- القانون السعودي يسمح بالتمييز ضد المواطن وهذا يؤكد وجود خلل بالأنظمة
٢- القانون السعودي لا يسمح بالتمييز ضد المواطن وفي هذه الحالة يشتكي كاتب الموضوع ليأخذ حقه.

أنا مؤيد أنه المفترض ان النسبة العظمى من موظفي شركات الخدمات النفطية مواطنين لكن السبب الرئيسي هي الأنظمة وليس الوافد.

 

احد اقاربي يملك شركة SMP مع ارامكو و سابك يقول اكثر الوظائف للاجانب تروح للمناصب اللي فيها الturnover عالي

 

وأنا شغال في شركة تعتبر كـ vendor وللأسف الشديد عندنا اعتماد مهول على الأجانب, ودائما السعوديين مهمشين. بعد صراع طويل جدا مع الأجانب الي هم هنود, مصريين, و باكستانيين قدرت أتعلم على الsystem الخاص بالشركة و أفهم في التصميم و التعديلات و غيرها من الأمور, وطبعا عرفت أتعلم أحيانا أجيهم بالحيلة عشان أتعلم شي, واحيانا بالشدة وكل مرة أشوف لي طريقة. يعني ضيعت سنتين من خبرتي عشان بس عرف كيف ابدا و كيف أشتغل. طبعا يجوني الهنود ويقولوا لي بما معناه أنه انت صرت خطر علينا لأنك عرفت الشغلة و عرفت للسستم, وكل ما شافوني اعلم السعوديين الي معاي يتضايقون و تتغير الوانهم.
المشكلة العظمة انه ما في أي احد في الشركة من المدراء أو المسؤولين سعودي الجنسية, عشان كذا كل شي يصير أصعب في التعامل و التفاهم.
طبعا اشتغلت في شركات ثانية ونفس الموضوع مع قلة السعوديين أو إعطاء السعوديين للمهام السخيفة الي لا تسمن و لا تغني من جوع.
والي صدمني أكثر و أكثر, لما يجينا الكستمر عشان testing & commissioning انا ما يخلوني اقابله بحجة انه خبرتي ما تتعدى 3 سنوات معاهم, وفي نفس الوقت أغلب الهنود الي معانا خبرتهم 3 شهور مع الشركة !!!!!! واغلب الي جايين من هناك تكون هذي أول وظيفة لهم, لكن مع الدعم الي يجيهم و تسهيل الأمور خلال فترة بسيطة بس يصير متمكن.
طبعا بوقف هنا لأنه الموضوع مزري جدا في القطاع الخاص و المافيات منتشرة, واي احد ينكر هذا الشي فهو غير مدرك للأمور و لا شاف شي.

 

ياجماعة أساس المشكلة أرامكو لانها اللي تقدملهم التسهيلات وخطابات الاستقدام ووزارة العمل ماتقدر توقف في وجه أرامكو لكن الان الوضع جالس يتغير،،،
المفترض مهندسين أرامكو ( الفورمان ) المراقبين للفيلد يكتب تقارير يومية لإدارات أرامكو عن قلة السعوديين وسيطرة الأجانب وبكذا تفرض ارامكو على الشركات زيادة السعوديين ولا مافي تجديد عقود بالخط العريض والشركات راح تخاف لانه عقودها بيد ارامكو وتوظف سعوديين لكن طالما ارامكو ساكتة ومهندس ارامكو مو فارقة معاه سعودي ولا اجنبي الوضع حيبقى على ماهو عليه لان ارامكو هيا كفيلهم بالعربي،،،

زمان ماكان فيه مهندسين سعوديين كثير لكن الان ماشاءالله موجودين وأحسن تعليم ومن جميع التخصصات ومستعدين للعمل في اَي مجال نتمنى من ارامكو الضغط على الشركات واللي ماينفذ نسبة سعوديين معينة إلغاء عقد وكلهم حينفذوا مستحيل احد يطلع من اكبر سوق بترول في العالم،،،

توطين الخبرات والتقنية في هذا المجال مهمل جدا من قبل ارامكو والسلام.

 

ياسلام عليك
أنت تصف حالي ١٠٠٪‏ ، هذا الرد يمثلني


وعموما الموضوع رائع و زاده روعه اضافات الشباب ومبادراتهم ،
وأنا برأيي الحل يكون ببناء قاعدة بيانات بكل الموظفين الأجانب بالبدايه للتجربه يكون على الشركات العملاقه والكبيره
ويكون أي سعودي يتقدم لوظيفه بالشركه مع وجود أجنبي خبرته تحت الخمس سنوات مثلا ، بحيث أنه يبدأ عداد من توظيف هالسعودي بنفس المكن اللي فيه هالأجنبي ويكون فيه عداد للشركه بحيث انه بعد ٣ - ٤ سنووات يتم الغاء فيزة عمل هالأجنبي وتسفيره بحجة جاهزية البديل السعودي ...

 

سوق العمل أصبح مثل الجمعية الخيرية للأجانب!
الأجنبي إذا حصل على هدفه سيذهب وسيبقى أبن البلد خالي الوثاق!

 

والله الي عنده خبرة وفاهم ويفيد البلد ما نقول عليه شي بالعكس بس اغلبهم همهم زرف فلوس ويتوكلو بعد كم سنة والمشكلة اختلط الحابل بالنابل ما تدري مين الكويس فيهم ومين الي ما عنده سالفة ولا شهادته ابو كلب

 

اقولكم سالفة

مرة كنت بمجلس و أحد التجار اللي يشتغلون بالتصناعة

يقول يوم ازمة الخليج ما شغل مصانعي الا السعوديين و الأجانب كلهم حطوا رجلينهم وهجو

رحمة من ربي و ظفتهم كذا و الا ما ابيهم

عاد كيف مهندسين الشركات الكبيرة معهم على الأقل جنسيتين


ما حينفع البلد ألى اهله و ليخسى الأخاسؤووووووون


ليت قومي يعلمون


شكرا لهمومك صاحب الموضوع

 

صاحب الموضوع شكرا لك قلت كلام بخاطر كثير شباب متخرجين من تخصصات هندسية وجامعات محترمة وجالسين بالبيت لا شغلة ولا مشغلة ..
ومايغبنك اكثر الا اللي توه ماتخرج ويفكر الحياة وردية وبيطلع ويقدم ويتوظف طوالي ..
تخرج واطلع سوق العمل وعاني مع التقديمات وبتعرف ان الله حق ، اعرف ناس خريجين البترول اخوياي واونر والله تخصصات هندسة ميكانيكية وكهربائية قاعدين عاطلين .. حرام ياخي انا اجزم انهم فاهمين واذكى من اغلب الاجانب اللي ماسكين اماكنهم لكن حسبي الله ونعم الوكيل

 

أرامكو جالسة تضغط بشكل كبير على جميع الشركات المتعاقدة معها بتوظيف سعوديين وذلك من خلال برنامج إكتفاءIKTVA وهو برنامج هدفه الرئيسي توطين الوظائف وإجبار الشركات على شراء البضائع وصرف نسبة معينة من مدخولاتها داخل السعودية وهو برنامج جبار سوف يجبر الشركات التي تفوز بعقود مع أرامكو بتحقيق نسب معينة في الصرف على السعوديين من خلال الرواتب والمميزات والتدريب وغيرها.

 

ارامكو صراحة تشكر على جهود اجبار الشركات الأجنبية على دعم المهندس السعودي و الاعتماد على ابن البلد. هذا طبعا لاحظته بشكل كبير في اخر سنتين و ان شالله انه يستمر حتى بعد ٢٠٣٠.
طبعا فيها سلبيات و من ضمنها الواسطة و المحسوبيات و عدم توظيف الشخص الأكثر استحقاقاً. لكن خلينا نمشي على قولة المثل " العوض و لا القطيعة ".
و نقطة ثانية حبيت أوصلها لشركة ارامكو بما ان هذا المنتدى يعتبر منبر يسمعه الكثير. ي ارامكو قبل لا تبدأين بغيرك أبدي بنفسك اتركي الواسطة و العنصرية و استثمري في ابن البلد، ترا الأجنبي ما جاء السعودية الا عشان الدراهم و اي نكسة اقتصادية في البلد بيكون الأجنبي اول المغادرين و اول الباحثين عن مصدر ثاني.

 

موضوع جدا قيم ويحكي معانات الكثير ليس في قطاع النفط فقط بل جميع القطاعات،

الحل في وجهة نظري، يجب ان يكون هناك تحالفات سعوديه قويه في مختلف القطاعات ومعاملت الاجانب بما يعاملوننا، لابد ان ندافع عن انفسنا بشراسه ونعلن الحرب، ي حنا ياهم

 

مو صحيح إنهم قادمين بتأشيرة عمل ، الاغلبية الآن وبعد تغير نظام التأشيرات أصبحوا يأتون بتأشيرة زيادة مؤقتة لتقليل التكاليف وليسوا تحت اسم شلمبرجير حتى!! بل بأسماء بعض المسؤولين في الموارد البشرية وهالكلام شفته بعيني ما قريته أو سمعته من أحد.

عزيزي الفساد في الشركات متفشي بشكل فوق ما تتصوره

الله المعين

 

لقد أسمعت لو ناديت حياً ولكن لا حياة لمن تنادي
فوق ماهم حاطين الاجانب في مناصب حساسة وقيادية ،، بعد يبتعثونهم للدراسات العليا وعيالنا يجلس بالسنين ما يحضر كورس تطويري محترم