استفسار لمهندسي الرياض

الله يعينك ويوفقك ويسهل دربك وتحصل اللي تتمناه

عليك بقوقل وان شاء الله الشباب بيفيدونك

نصيحتي لك احيانا يكون الرفض من السيكورتي بانك ماتدخل ، لا تدخل عليه بالموضوع على طول وخصوصا اذا كان من السيكورتيه البسطاء ، حاول تجامله تجيه بالسوالف والضحك ومن خبره مايمنع تسب الشركه والاداره حقته خخخخخخ لأنه هالشي احيانا يكون قاسم مشترك بينكم ويكون وده يفضفض ويشكي ،
ياكثر ماسويت هالحركه واحيانا ينتهي الوضع بانه هو يكون الواسطه خخخخ

نجي للمفيد
أعرف اعداد بسيطه من الشركات اللي ممكن يكون فيها التقديم يدوي وبدون خبره

QGC Saudi Geomatics
كنوز للاستشارات الهندسيه
MDS Riyadh
إعمار - imar urban consultants
شركة ماركو الرياض
ssem riyadh
Italconsult S.p.A. - Riyadh
Khusheim Holding Company - Riyadh
وعليك بالمستشفيات عموما و الخاصه خصوصا
ومر شركات الأسمنت وخلافه + البنوك + الشركات المساهمه والمسجله بسوق الاسهم واللي يكون مقرها الرياض

حسب ماهو طالع عندي الوظائف في الرياض ٨٥% project management
و ١٠% AutoCad similar jobs و Design

فاخلّك متهيء على هذا الوضع

بالتوفيق

 

من باب المشاركة راح اذكر موقف صار معي بالنسبة للتقديم اليدوي في الشركات الي تكون عادة في الابراج

انا مريت الابراج اللي في الخبر مليانة شركات والسكيورتي بالعادة يدخلونك خصوصاً وقت الظهر لكن تنصدم من الفرنت دسك حق الشركات جميعهم هنود وباكستانيين وفلبين مايفتح لك الباب حق الشركة لانه يشوفك بثوب وشماغ وخصوصاً اذا كان معك ملف فيه اوراق. احد المواقف اني دقيت الجرس حق شركة من الشركات ورد علي باكستاني طبعا بالانجليزي قال من تبي قلت له ابي HR وقالي انتظر شوي ونسى يسكر المكروفون وجالس اسمعه يتكلم مع هندي بلغتهم و يقول Saudi guy حول 4 مرات وبعدين قالي HR موموجودين انتهى دوامهم!! هذا والساعة 1 الظهر...

المهم انتظرت5 دقايق لين واحد سعودي طالع من الشركة جزاه الله خير دخلني ووداني للموارد وسوو معي مقابلة صغيرة وسلمتهم السيفي.. نفس الرجال قالي هم الحين نظام الاجانب يشوفونك بالكمرا مرسم ومعك ملف مايدخلونك لانهم عارفين انك تبي تقدم وظايف ونصحني البس ملابس عمل رسمية واخفي الاوراق او اصفطهم وحطهم بجيبك وحاول ماتتكلم الا انجليزي,,

مع الاسف وصل بنا الحال في بلدنا ان مانرسم ومانتكلم لغتنا عند التقديم اليدوي في الشركات بسبب اللوبي الاجنبي

 

أول شي مبروك الف الف مبروك التخرج وعقبال الوظيفة المشرفه يارب

سلمك الله عند في الصناعية الثانية شركات كثير منها ال ABB تاخذ يدوي و تعبي عندهم معلوماتك في الايباد أكتب في قوقل ماب المدينة الصناعية الثانية ومايقصر

فيه ايضاً شركة الالكترونيات المتقدمه في ابراج واحة غرناطة جنب مول غرناطة تسلم الفرونت ديسك السي في

وعلى فكره بما انك رايح للصناعية الثانية ترا فيه مصانع كثير هناك حاول تدخل على اي شركة تحصلها ابحث عن الفنار و شنايدر


الله يوفقك ويسمح امرك وعقبال الوظيفة الزينة بس خل بالك طويل مع الشركات وخل همتك عالية يا بعدي