Aramco interview - experience & advice

بسم الله الرحمن الرحيم

هالمنتدى واعضاءه لهم فضل كبير بعد الله بتثقيفي بالاجراءات والنصائح، وجاء الوقت الي ارد فيه الجميل ولو بالقليل، عملت مقابله مع قسم loss prevention وما انكتب لي انقبل معاهم.

قدمت اوراقي على موقع ارامكو بعد تخرجي بشهر، ووقتها ما كان عندي رقم جوال سعودي، هالكلام بداية شهر ٦ وبعدها باسبوعين وصلني ايميل منهم عشان اكمل اوراقي، كملتها وانتظرت لنهاية شهر ٧ وما احتملت انتظر زياده وارسلت ايميل على نفس ايميل الموظف الي نبهني اكمل اوراقي، وصلني ردهم خلال يوم انهم حاولوا يتواصلون معاي من قبل وما اعرفوا كيف، واطلبوا رقم جوال مع كم سؤال بسيط مثل رقم الهوية ووين ساكن وهل مهتم انضم لهم، وصلني بعدها بيوم اتصال وقالولي عندي مقابلة بعد اسبوع 1/8 مع قسم الloss prevention.

جهزت للمقابله وحضرت كم جزئيه عن السيفتي، وب السيڤي عندي كم شهادة اخذتها خلال دراستي لكنها شهادات "مشّي حالك" ماعليها القيمه وما فادتني حيل، حاولت اتذكر بعض النقاط الي اخذتها بهالدورات عشان اكون جاهز اذا سألوني، ودورت بموقع Glassdoor عن مقابلات مع نفس القسم بارامكو ولقيت اثنين كاتبين تجاربهم وحاطين كم سؤال، واحد عن BOP الي هو blowout preventer ضروري تفهم عمل هالجهاز لانه من ابجديات الwell control.

جاء وقت المقابله وكان باستقبالي ٣ موظفين والرابعه موظفة الHR، اول سؤال كان عرفنا عن نفسك وين تخرجت الثانوي والجامعه وخبراتك، جاوبت على قد السؤال واضفت عالسؤال نبذه عن مشروع تخرجي، والحين بحط اخطائي على شكل نقاط اسهل للفهم وللمراجعه

١- وانا اتكلم عن مشروع التخرج قلت ان فريقنا كان مكوّن من طلاب اجانب عشان تتاح لنا فرصة البحث بنفسنا ونعتمد على نفسنا بالقراءة والتحضير والتقديم بدون مساعدة native speaker، للاسف النقطه انقلبت علي وصارت اننا حددنا criteria مو على اساس التفوق الاكاديمي، حاولت ارقّع بس ما فاد اعتقد.

٢- سألني عن البرزنتيشنز الي قدمتها، وغلطتي ما كنت محضر ومتذكّر الاشياء الي قدمتها، ما كان ببالي الا الفاينل بروجكت وتكلمت عنه، كان من الافضل اني افصّل بهالنقطه عن اكثر من بروجكت فأعتقد اني طلعت بصورة اني ما كنت active as a speaker.

٣- سألوني لو عندي 3 tanks الاول مليان غاز والثاني نص والثالث شوي، وانفجروا، أي واحد يسبب اكثر انفجار، طبعا الاجابه الي الثالث لانه نسبة الاكسجين اعلى، للاسف هذا كان جوابي لكن اثروا علي وشككوني بالاجابه وغيرتها للاوسط. لا تسألوني كيف.

٤- سألوني اذا ماعندي مشكله اشتغل بremote area طبعا بنظرتي اجابتك لازم تكون ايه اياً كان عذرك، ماتدري يمكن يحطونك بمنطقه قريبه من العايله، جاوبت عالسؤال ايه ماعندي مانع اشتغل بأي مكان، لكن بعدين عرفت ان الافضل تعبر عن انها بتكون تجربه جديده وعظيمه وانها بتفيدك عالمستوى الشخصي والمعرفي، وان ممكن تكون مركز على نفسك ١٠٠٪‏ وماتتشتت، او ايا يكن، اهم شي تكون مجهز اجابتك.

٥- اخر شي اسألوا اذا عندي سؤال، طبعا قلت لا وشكرتهم عالفرصه، بس الافضل مثل ماعرفت تسألهم عن شي متخصص بالشغل وتخليهم يتكلمون وتسمع لهم واذا عندك follow up question احسن.

وخلال المقابله كان فيه كم سؤال مثل، سؤال عن كلاسات elective اخذتها واحد منهم كان عن الrelationships والزواج قلت انها مهمة للنجاح بالحياة، قال طيب ليش اخذت كلاس ثاني عن الزواج، لحظتها ما كنت اذكر الكلاسات الي اخذتها، بس الي اعرفه اني اخذتهم عشان ارفع المعدل بس، وما عرفت اصرفها الا اني قلت ما اذكر، حضروا نفسكم عقليا لأي سؤال عن الكورسات، وحاولوا تتذكرون الاحداث الي صارت من كل كلاس عشان تكون عندكم صورة ذهنيه وتقدرون تجاوبون.

وسؤال ثاني كان عن الشهادات الي اخذتهم وعن شنو، قلتلهم عن الي راجعته، وكل شي تعلمته من اليوتيوب، فحاولوا انكم تحفظون النقاط الاساسيه مثل الprinciples للinherently safer design الي هم اربع minimize substitute modify eliminate، اذا جاكم سؤال عن اي شي لا تنتظرهم يسألون سؤال ثاني عن نفس النقطه عشان توضح انك فاهم او حاف1 عطهم الاجابه من اول سؤال.

والحمدلله على كل حال، بعدها ب٦ ايام وصلني الرفض،

 

بالنسبه لمقابلتي كل واحد عرف بنفسه وحتى يوم دخلت قاموا وسلموا، بس بالنسبه للاسلوب بالكلام والسؤال مثل ما قلت مو بروفشنل ويحاولون يسفزون وبالاخص اثنين منهم.
الله يكتبلك الخير ويرزقك من فضله.