التنقل بين الشركات

اخوي انا ماعندي فكرة عن مسماك الوظيفي بس كثرة التنقل تضرك
و بما انك اشتغلت شهرين فقط في الوظايف السابقة فما له داعي انك تذكرها في السيرة الذاتية ....يعني اذكر فقط وظيفتك الأخيرة
و انت استمر معاهم و بنفس الوقت ابحث عن فرصة افضل
و اذا حصلت على فرصة افضل احسبها صح من جميع النواحي و ليس الراتب فقط

 

يا مرحبا بزميل التخصص
شوف انا بقولك شغله وخلها في بالك وهي والله العظيم نصيحه بس بشد معاك شوي واعتبرني اخوك الصغير ❤️

انا تخرجت عام ٢٠١٣ ، توظفت بنفس الجامعه بوظيفه مالها دخل بتخصصي .. وجلست اربع شهور وطلعت لوظيفه بالبنك خدمه عملاء والحمدلله كان بنك جديد بالسعوديه وراتبي ١٠ غير الاسنتف كل ثلاث اشهر
لكن كانت ماسكه معاي اني اشتغل بتخصصي لان هو الي بصير قوي بالسوق ...... و و و الخ
جاني عرض بشركه انابيب
اتعب واقول خياس خياس خياس واشتغلت عندهم ٣ شهور وطلعت بسبب سوء البيئه شي خياس ، انصدمت جدا بالوضع مع ان مسمى كان senior IT

وجلست سنه عاطل ، وبعدها توظفت بشركه طبيه ومسمى دعم فني ( تكنشن ) وانا جامعي الزبده

كنت محطم نفسيا بالفتره الاولى ، وهذا مو مكاني انا لازم اكون بوظيفه مهندس .... الخ

كنت احطم نفسيتي بنفسي وبالسلبيه الي مقنع فيها نفسيا

غير ان الراتب ٦٠٠٠ والشغل ميداني ولا اخذ حقوقي كامله

لكن اقتنعت عن هذا رزق من ربي كيف اتذمر منه !!!!!!!

جلست سنه كامله وانا معاهم ابحث عن عمل وبنفس الوقت قاعد احاول استفيد من الشركه ، ولا اعطي نفسي مجال اني احطم نفسي ،،

اخذت اجازتي السنويه وسويت اكثر من مقابله وربي
سبحانه وتعالى استجاب لدعائي ووقعت مع شركه تعتبر الاقوى بالسعوديه الحمدلله رب العالمين والشكر وراتب افضل وبيئه افضل ومسمى اقضل ..


انت حاليا بوظيفه راتب كويس وشركه كويسه

اترك عن التذمر لان هو الي بيخرب عليك ، قل دائما الحمدلله على منك وكرمك يارب ، وعوضني خيرا يارب

انت بمكان استفيد منهم اترك عنك السلبيه والتنقل من مكان لمكان لان كذا بتشتت نفسك ، ارضى بما قسم الله لك بترتاح . ادخل معاهم بالشغل حاول قد ما تقدر تقوي نفسك وتكتسب مهارات جديده ، اعتبر نفسك انك في فرصه كثير يتمناها غيرك ، اقرا ابحث شارك .. ثقف نفسك طور نفسك ، وبنفس الوقت ابحث عن وظيفه ..

لا تفكر بالمستقبل كثيرا انت الان باول الطريق
كلنا نبي شركه نستقر فيها ،، لكن التعب له طعم اتعب ع نفسك وادع ربك هو الرازق سبحانه

قول لنفسك ( انا بوظيفه - راتبي ينزلي - كل شهر يمر علي بالشركه يحسب لي خبره حتى لو بعيد عن تخصصك )
يمكن ربي يوفقك بمسار افضل بمليون مره من تخصصك

لا ترهق ذهنك بالسلبيه ،، اذا تبي الافضل والوظيفه الافضل اتعب ع نفسك ..

شف تنقلت ثلاث مراتب وما اقتنعت ان ربي راح يرزقك الافضل ان شاء الله

حط في بالك ( يُدبر الامر ) ❤️

انبسط وداوم وركز ع شغلك واستفيد من عملك الحالي

انا اشتغلت سنه بالبنك خدمه عملاء
وكسبت مهارات التواصل مع مختلف الناس والجنسيات واقسم بالله ان الخبره فادتني .

ثق بالله انه راح يعوضك عن تعبك ❤️

اكثر من الدعاء والاستغفار

وعسى ربي يوفقك ويوفق جميع من يبحث عن عمل ويرزقكم من حيث لا تحتسبون ❤️

اسف ع الاطاله ، ولا تنسوني من دعائكم

 

حط ببالك انه ممكن تشتغل في مجال غير تخصصك (اللي درسته 4 سنوات بالكثير) وتبدع فيه ويكون رزقك بعد الله عليه

باختصار لاتخلي هالاربع سنوات تحكم مستقبلك الوظيفي اللي هو 30 سنة او اكثر

 

ليش انت مقتنع انك بتقعد بالشركه هذي العمر كله !

معليش انت بنفسك جالس تحبط نفسك ..

بكره بتحصل لك وظيفه افضل بمكان افضل

ليش كل هالاحباط

 

بالنسبة للي يقول لا تذكر الخبرة في السيرة الذاتية لأنها شهرين أو اقل, ارد واقول كلام غير صحيح. اكتبها في السيرة الذاتية احسن لأنه الشركة لما تشيك عليك في التأمينات الإجتماعية و تشوف انك ما قلت لهم انك اشتغلت في المكان الفلاني والمدة الفلانية, راح ينأخذ عنك انطباع سيء.
الأفضل تذكر كل شي و تجهز نفسك ترد عليهم لو سألوك ليش ما تستقر في وظيفتك

 

بالعكس اخوي خبرة شهرين ما تعتبر شي حتى يكتبها في السيرة الذاتية
انا شخصيا مجرب اشتغل في عدد كبير من الشركات و ما اذكرها كلها في السيرة الذاتية.... و لا مرة سألوني عن التامينات

 

انا تنقلت بين 3 شركات خلال فترة قصيرة وماكتبتهم في السيرة ومحد سئل وينصح انك ماتكتب الخبرة اذا كانت ابو كم شهر

 

ما راح يسألوك, الشركات تشيك بدون ما تقولك, هذي الخطوة ضرورية للشركات عشان تتأكد أنك فعلا كنت شغال بالمكان الفلاني و بالراتب الفلاني. لو ما يسوونها كان ما في أسهل من تزييف شهادة الخبرة, لا واكتب فيها راتب من راسي بعد.

 

ما يمديه يعرف راتبك. اذا يبي يعرف راتبك يطلب منك Pay slip.

 

بالنسبة لتخصص Business Analyst انت محظوظ بهذا المسمى لانه يضم تكنيكال و بزنس مع بعض, مروا علي مهندسين كثير في ارامكو كمبيوتر انجنير مسمى وظيفتهم مهندس بترول لان التحكم في البترول في ارامكو عن طريق نظام في الكمبيوتر, و بعد فترة حولوهم بزنس انالست, و طلعوا من ارامكو على مناصب في شركات ثانية لكنهم طوروا انفسهم و اخذوا ماستر في ادارة الاعمال و ساعدهم كثير مع مسمى محلل اعمال.

موضوع المسمى الوظيفي ما يفرق اذا كان في نفس تخصصك ولا لا اذا كاان قوي, المهم يكون عندك رغبة تكمل في نفسل المسمى عشان تحسب خبرتك .

 

ولو شيكوا ...هذا ما يعني بالضرورة انك ملزم انك تذكر جميع الشركات اللي اشتغلت فيها في سيرتك الذاتية!!
خصوصا اذا كانت شهرين او اقل
اذكر فقط ال Relevant experience