تجربتي: إجراءات التقديم على فرصة تدريب صيفي في P&G

السلام عليكم ورحمة الله وبركاته.


توي مخلص تجربتي مع التقديم في شركة P&G للتدريب الصيفي تحت مسمى supply chain ، أو supply network operations في دبي (مع العلم إنّي متخصص هندسة كهربائية).


طريقة وصول لفرصة التدريب كانت عن طريقة دعوة من نفس الشركة للتقدّيم ، أرسلوا لي عن طريق الإيميل وقالوا إنّك مستوفي المؤهلات.


الإجراءات: عبيت فورم كامل أونلاين ورفعت السيڤي ، واليوم اللي بعده مباشرةً وصلني إيميل أختبر إختبارين أونلاين.


الإختبار الأول: Peak performance test


هذا الإختبار يعطيك مواقف ويقول لك إيش بتسوي فيها وتقدر تبحث وتستزيد عن الإختبار من الشيخ قوقل ، بس اللي لاحظته هو أهم شي يكون عندك أخلاقية. بمعنى العمل الشريف ، على سبيل المثال: إذا مديرك سرق فلوس وصادوه مرة وسرق مرة ثانية قدامك ايش بتسوي؟ طبعًا بتخبّر عليه .


الإختبار الثاني: reasoning screen test


هذا الإختبار يختبر قدرتك على معرفة الأنماط والأشكال والتنبؤ بالشكل القادم بناءً على النمط اذا اكتشفته ، مشابه نوعًا ما لاختبار موهبة. برضو هذا الاختبار بتلاقي منه اشكال والوان في النت وعند الشيخ قوقل.


بعد ما تختبر هالاختبارين تنتظر رد الشركة إمّا بالرفض أو بالتقدم للخطوة ثالثة ماقبل الأخيرة.


الخطوة الثالثة هو إختبار اسمه: reasoning test

هذا الإختبار لازم تكون متجهز له بشكل كويس لأنه هو الوحيد اللي يفصلك عن المقابلة وهي الخطوة الأخيرة.


هذا الإختبار ينقسم إلى ثلاثة أقسام:

١- استيعاب رقمي: اسئلة رياضيات زي اللي كنت تشوفها في اختبار القدرات العامة.

٢- استيعاب منطقي: هذا القسم لازم تتمرن عليه ، هم راح يرسلوا لك نسخة تجرب فيها في هذا القسم يعطيك مجموعة معلومات وتجاوب عالسؤال. الخدعة في هذا القسم يعطيك في الاختيارات معلومتين صح ، لكن الفرق هو إن في معلومة صحيحة مبنية على المعلومات المعطاة ومعلومة صحيحة لكن غير معطاة فالجواب الصحيح يكون المعلومة الصحيحة المعطاة في السؤال.

٣- استيعاب بياني مثل اختبار reasoning screen test.


عيب هذا الاختبار هو إنّك لازم تحضره في مركز اختبارات هم معين ، وهذا المركز موجود في البحرين- المنامة ، السعودية- الرياض ، السعودية- جدة. وأنت مخيّر تختار أي مركز.


أيضًا طريقة تحديد مركز الإختبار غبية نوعًا ما


راح تعبيها كذا:

Postal code: Manama

Country: Bahrain


او


Postal code: Riyadh

Country: Saudi Arabia


أهم شي تحدد وقت ويوم الاختبار اللي يناسبك ويكون خلال اسبوع من ارسال الايميل لك.


اختبرت هذا الاختبار يوم ١١ ابريل ، يوم ١٥ ابريل وصلني اتصال هاتفي يفيد بتأهلي للخطوة الأخيرة وهي المقابلة وناقشتني متى الوقت المناسب للمقابلة ، المقابلة كانت أونلاين. كان بامكاني اجراء المقابلة بالفيديو أو الإكتفاء بالصوت فقط. ولو واجهت مشاكل في النت بيتصلوا لك تلفون ويجروا المقابلة ، المقابلين كانوا ثلاثة: مهندس مكيانيكي ، موظف موارد بشرية ، موظف مسؤول عن السوشل ميديا مدري شدخله. المقابلة استغرقت ساعة ونص.

كانت كالتالي:

١- مقدمة عن كل موظف منهم

٢- مقدمة عني

٣- سؤالين او اربعة عن الخبرات السابقة ما اذكر بالضبط ، وطريقة تعاملك معها سواءً كانت مشاكل واجهتها أو مبادرات وغيرها.

٤- سؤالين عن مواقف افتراضية وكيف بتتصرف وقتها.

٥- فتحوا لي باب الاسئلة اذا كان عندي وأوجهها لهم.


مع العلم إن بيرسلوا لك ملف pdf فيه بعض الاسئلة اللي بتنطرح عليك او مشابهة لها عشان تتجهز للمقابلة بشكل كويس.


بالنسبة لي ما جاني ولا سؤال مشابه ، لكن صملت وجاوبت بنفس الأجوبة.



ملاحظة: الإجراءات تطوّل كثير ، قدّمت ١٨ فبراير ، والآن ١٩ أبريل وتوّي أمس مخلص المقابلة.


راح أحدث الموضوع لو وصلني قبول أو رفض.


إلى اللقاء وحتى إشعار آخر .

 

نفيد ونستفيد ، وجميعًا يارب