اكتب خطأ كان له تأثيرفي مقابلة العمل للشركات... للفائدة العامة

ولو أن راح نطلع عن الموضوع
بس بالفعل مشكلة اشتراط عمر محدد ازدادت في السنوات الأخيرة
لاحظت كثير من الوظائف تشترط أن يكون العمر في العشرينات وبعضها إلى بداية الثلاثينات يعني الناس اللي في نهاية الثلاثينات مثلي محسوبين أنهم شياب!!

إذا أحد يعرف سبب هذا التوجه في الفترة الأخيرة خل ينورنا (حتى لو في موضوع منفصل)

 

عمرك فوق ال ٣٠ يا خوي؟
الله يوفقك و ييسر أمرك و تنال مرادك آمين.

 

اكبر خطا سويتة اني تفلسفت في مقابلة من المقابلات في احدا الشركات الكبار

كانت المقابلة ماشية زي الحلاوة وتفلسفت في الاخير في شي انا مو متمكن منة مرة وفتحت علا نفسي باب حقد علا نفسي كنت بوريهم شوفو تراني فاهم بس وضوفوني يرحم والديكم بس الحمدالله علا كل حال انرفضت

 

قبل بضعة أشهر حصلت بعد طول انتظار على مقابلة مع PwC
المقابلة كانت HR وعن طريق الهاتف اجتزت المقابلة واجتزت الاختبار بعدها
وبعدها بأسابيع حددوا لي موعداً للمقابلة بالهاتف أيضاً مع Senior Manager
المقابلة كانت Technical البداية كانت جيدة والنهاية أيضاً, لكن الكارثة في منتصف المقابلة حيث عجزت عن جواب بضعة أسئلة متتالية
الخطأ مني أنني جهزت نفسي لمقابلة HR أخرى ولم أستعد بما فيه الكفاية لمقابلة Technical

ضاعت الفرصة ولم أندم لأنني متأكد أن هناك فرصة أخرى أفضل تنتظرني إن شاء الله

 

نعم فوق 30
امين واياك ان شاء الله

 

سويت مقابله مع شركة نوماك ولا كان عندي اي خلفية عن الشركة
وكانت مدة اخباري بموعد المقابلة قبلها باقل من 24 ساعة فقط

المهم كان عندي شغل ولا قدرت انام۔ رحت مواصل للمقابلة وكانت اكبر غلطة
التركيز كان صفرر، رغم اني الحمدلله فاهم وعارف كل الانظمة الي سألوني عنها بس للاسف مخي مهنق ولا قدرت اجاوب على بعض الاسئله البسيطة
الحمدلله على كل حال

النوم ثم النوم ثم النوم ۔۔ أهم شيء قبل المقابلة

 

من تجربتي البسيطه اول شي لازم تطبق قاعدة " قل لهم ما يعجبهم و ليس ما يعجبك"
مثلا مو لازم يعرفون انك ناوي تاخذ خبره سنتين ثلاثه و بتطلع هالشي بيخليهم يرفضونك
صحيح قد يكون وضع الشركه المالي مو كويس لدرجه موظف Hr نفسه يفكر يمشي
لكن لازم تاخذ وضعية المثالي و اطرب مسامعهم بالكلام الجميل

 

أتذكر أول ما تخرجت سويت كم مقابله مع عدة شركات وهذا ملخص لأهم الأخطاء اللي أعتقد اني سويتها:

- سألني عن اذا كان جاني عرض وظيفي من قبل؟ جاوبته ايه ورفضته بسبب مكان العمل وكان من شركة كبيره عشان أبين له اني كويس وكذا هههههه..
- أحد الدورات اللي حضرتها أيام الجامعة كانت project management وكنت حاطها في السي في سألني عن خبرتي في ادارة المشاريع وقلت له مو ذاك الزود من باب الصراحة وكذا..
- سألوني مره ليش ما توظفت في الشركة اللي طبقت فيها, جاوبت لهم اني حاولت بس ما قبلوني!!!
- مره جاني سؤال عن ان دوامنا 6 أيام في الأسبوع وانا ما كنت متوقع أبد ولا في بالي انه ممكن يتطرق لهذا الموضوع, فقلت له اذا الراتب كويس ما عندي مانع, بعدين خش في موضوع كم الراتب اللي تتوقعه وجبت العيد..

عموما من خبرتي في المقابلات حاول انك انت اللي تدير المقابله من بدايتها بشكل غير مباشر,, بحيث انه في سؤال تكلم عن نفسك حاول تذكر الأشياء اللي انت متمكن منها بس بدون تفاصيل وتخليها كأفخاخ يستخدموها في أسئلتهم اللي بعدها,, لأن 90% من أسئلة المقابلة في أعتقادي مبنيه على جوابك لهذا السؤال.. طبعا لازم تكون محضر كويس لهذا السؤال..
من الأشياء المهمة أيضا انه كل جواب لك تدعمه بمثال أو شيء انت سويته يخدم الفكرة..

الأمور العامة اللي لازم ما تنساها:
- لازم تحضر قبل المقابلة بوقت كافي
- تكون نايم كويس ومفطر
- اللبس حاول انه يكون من ثقافة الشركة نفسها يعني قطاع حكومي البس لهم ثوب وشماغ اما الخاص شوف ايش وضعهم اليومي بشكل عام هل هو رسمي زي أرامكو مثلا أو smart casual زي بعض شركات القطاع الخاص

وبالتوفيق للجميع