مغادرة شلمبرجير

نصيحتي لك لاتطلع من الشركه الا بتوقيعك عقد مع شركة ثانيه! اما تطلع وتجلس بالبيت ترا بتكون نقطه سلبيه بالسيره الذاتيه عليك خصوصا لو عرفو انك مستقيل بسبب ان العمل متعب وما الى ذالك! لكن الاستقاله بعذر انك حصلت وظيفه افضل من رأيك اشوفه احسن

 

انا من وجهة نظري الصبر حاليا ومراجعة قراراك وتاخذة من نواحي اخرى ، لكل وظيفية عيوب ونفس الوقت لها مميزات وبالنسبة لشلمبرجير مميزاتها المادي كثير كويس خصوصا انك شاب ببداية الحياة لازم تفكر في انك تتعب الحين وتكون نفسك ومستقبلك وتصبر وتتحمل ثانيا الخبرة اللي تكتسبها خصوصا بعدثلاث سنوات او اكثؤ راج تخلي اكبر الشركات مثل ارامكوا وغيرها يركضون وراك وياخذونك وذا طلعت الحين مو افضل لك خصوصا ان ماعندك عقد مع شركة آخرى او وظيفة وياليت تذكر لنا اكثر الاسباب اللي ماخلتك مرتاح غير الأجهاد والمناطق النائية وبالتوفيق لك يارب

 

اعرف ناس طلعوا هالسنة من الوايرلاين ولا دفعوا قرش .. يعتمد بعلاقتك مع مديرك والعذر اللي بتعطيه

هم قالوا لمديرهم ان اهلهم يحتاجونهم ومن ذا الكلام .. بس ترا طلعوا والعرض عندهم ما طلعوا وانتظروا بالبيت ,,

 

الوضع الان جدا تعبان للمهندسين مافي وظايف كثيرة
بما انه ما عندك عرض ثاني انصحك تصبر سنتين او الى ان تلاقي عرض ثاني
لانه عندي اصحابي الي عندهم خبره و الى ماعندهم خبرة كلهم يعانو من شح الوظايف
نصيحتي الصبر الصبر الصبر

 

لا تطلع بدون ما يكون عندك عرض وظيفي لانك لو طلعت وقعدت بالبيت راح تندم

الوضع الحالي سيء والواحد يمسك بأي وظيفة تجيه دام الراتب معقول ، وانا عارف انه دوامك متعب جدا لكن تأكد انه احسن من الفضاوة والقعدة بالبيت

اصبر وتحمل الين يجيك عرض مناسب

موفق

 

عليكم السلام
بما أنه ماعندك خطة لبعد خروجك ولا فيه وظيفة جاهزه توقع معهم اللي أنت خايف منه بيصير وبتأخذ من اسمك نصيب!! من قال لك أن الحياة سهله وماهي متعبه جداً؟! هذي هي الحياة تعب ومشقه وتجارب اشخاص لهم 20 و30 سنة في الرقوق ومع هذا صابرين على البعد والتعب وجمعة العائلة اعمل ثم اعمل ثم اعمل عمر الراحه ماجابت الراحه لصاحبه كثير اشخاص يتمنون وظيفتك ويحاولون بكل الطرق لجل يدخلونه وأنا منهم مو مهندس لأني ماتعبت ولا درسة أتمنى اكون عامل اقصى طموحي عامل فقط ومالقيت، وظفني عندك ومالك الا واحد يشتغل عن نفسه وعنك وكل يوم اعطيك قصص وقصائد اخليك تنسى أنك بالفيلد ههههه ، آسف إذا زعلك صراحة كلامي لكن نصيحة أخوى لأخوه
" كمل الصعود لاتنزل على حساب راحتك"
بالتووفيق يارب للجميع

 

والله وبالله وتالله
راح تندم اشد الندم
نصيحه لوجه الله لا تستقيل
انت ما درست وتخرجت مهندس عشان تدور الراحه
اقسم بالله العظيم انا قبل كم سنه كنت بشغال بشركه كنت ماني مرتاح وصبرت شهر وشهرين وثلاث واستقلت توقعت اني برتاح .. ارتحت اول شهر
بعدها جلست سنه كامله نفسيتي تعبانه وهم وغم
وجهي صار شاحب واخلاق تجاريه صرت انا والهم اصدقاء .. منغلق محطم نفسيه .. صرت اشوف الدنيا سودا
، بعد التعب قلت ليتني صبرت اقل شي سنه ولا دمرت نفسي .. وجلست متحطم سنتين وهواجيس وافكار سلبيه وووووووووو .. بتشوف اخوياك كلهم موظفين ويشتغلون ومستقرين وانت استقلت عشان التعب .. وبتستقيل وبتقعد تقدم وتسوي مقابلات ولا في اي رد .. وكل من شافك قالك عطني اوراقك ولا راح يسوي لك شي ... لا ترفس النعمه الي انت فيها .. ، احيانا في امور بحياتنا تغثنا وتلعب بالنفسيه بس لابد لابد انك تتعايش وتتاقلم .. فكر بشخص ماعنده وظيفه ولا راتب قوي اخر الشهر ولا حتى شركه قويه ، شف غيرك وبتعرف انك بنعمه ..
غير تفكيرك بتتغير نفسيتك انت باقوى شركة بالعالم
راح تفتح لك فرص اقوى وافضل
خبرتك اقل شي لابد تكون سنتين .. اطلع اجازه سافر غير جو .. لا تحط التعب براسك وان الحل لراحتك هو النفسيه وتعبانه .. الحياه صعبه يبي لها صدر واسع ويسلك اموره ىيستفيد .. وتاكد ان ربي بيزينها اكثر من الدعاء .. والدعاء يغير مالم تتوقع .. شيل الافكار السلبيه ..
انت ماراح تتوقع كيف بتكون حياتك بعد الاستقاله والعطاله والطفش والملل والغثا ..

فكر كم سنه تشتغل وتجمع فلوس واذا جيت بتتزوج بتحصل ان وضعك المادي ممتاز ، هذي نقطه بعد مهمه

اشتغل ع نفسك وتاكد ان موب بس انت الوحيد الي يداوم هالدوام ..

الفرصه اذا ضاعت منك راح تندم عليها كثير

وبالتوفيق يارب

 

متفهم وضعك جدا لأني في نفس وضعك. نصيحتي لك لا تطلع إلا بوظيفة ثانية. فيه شغلة ثانية وهيا انك تكلم مديرك عن هذا الموضوع يمكن يتفهم وضعك ويعطيك وظيفة مكتبية لفترة. على سبيل المثال لو شغال مع الدي ان ام يمكن يخلوك RT . او يمسكوك مشروع تكون المنسق حقه.. الفكرة انو قبل ما تستقيل شوف خياراتك داخل الشركة واشرح وضعك لهم يمكن يتفهموا بما انهم دفعوا فيك مبالغ. الله يوفقك

 

وعليك السلام ....
انا اقول اطلع من الشركة واشتغل مثلي في التوسيق والمبيعات دوام صباحي 5 ايام 5000 ريال سعيد ومرتاح .... هندسة البترول لقيتها مملة ومتعبة ... اهم شي الصحة الجسدية والنفسية ... انتبه يا متعومس دوامك يقلل من عمرك سنين كثيرة والعمر بيد الله لكن افعل الاسباب واعمل رياضة وقت فراغك لا تركز على الدراهم شف حياتك في منظور ثاني وسع تفكيرك ... ادري اغلبهم ما يعجبهم كلامي... انصحك تصلي صلاة استغاثة وادع ربك يوجهك....

في امان الله

 

انت فقط محتاج لحاجة واحدة فقط هو عدم التفكير واقناع نفسك ان العمل متعب اترك التفكير وكمل مسيرتك المهنية واسمح لي اتوقع انك ماجربت العطالة فترة طويلة ولا كان تعض على هذه الوظيفة خصوصا اسم شلمبرجير له وزنه
عموما ترا فيه شغله الأغلب يغفل عنها هو رفع المعنويات لذا ارفع معنوياتك بنفسك

 

طول بالك ولاتفكر الشغل متعب. مانصحك تطلع من الشركة حتى لو حصلت وظيفة ثانية الا بعد ٣ سنين لان الفرص اللي راح تجيك وقتها راح تكون اقوى. خبرة شلمبر مو هينة والتعب في بداية مشوارك المهني امر لابد منه ولا ماراح تتعلم

 

نصيحة مني كمل معهم لين تغلق ٣ او ٤ سنين ولا تطلع وإلا رجلك بمكان ثاني (ضامن وظيفة ثانية)

 

انا ادري انه رأيك الخاص وانت حر فيه ، بس ما كان له داعي تدخل البترول وتدرس هندسة كم سنة وتتعب نفسك اذا طموحك ترضى بوظيفة مبيعات بـ 5 الاف .. كان رحت بعد الثانوي يمديك مدير مبيعات ذحين.

اما شغلة العمر والفلوس صراحة كل كلامك غلط ، اللي يدور الراحة ببداية شبابه راح يندم عليها اذا شيّب بدون ما ينجز شي بحياته ويتمنى النشاط يرجع

 

لا احب مجادلة احد كلن عند رايه وقناعته .. case closed

 

الراتب هو اللي يحدد

انا راتبي 5 الاف الحين ورب الكعبه احس اني اشتغل ببلاش حتى سيارتي عجزت اغيرها

لو راتبك زين لا تفكها الين تاخذ خبرة 3 سنوات اقل شي ، يفضل 5 سنوات

بعدها بتلقى وظيفة مريحة وراتبها زين بنفس الوقت

اما الاستقالة حاليا ليست من صالحك

 

انا ابيها وما عندي مشكلة على الاطلاق ببيئة العمل وساعات العمل مهما كانت

كيف طريقة التقديم ؟ لاني قدمت على موقعهم ولا جاني منهم رد

هل يوجد تقديم يدوي ؟

 

حبيبي متعومس اضغط على نفسك وكمل كم سنة وصدقني الشركات وقتها بتقدر خبرتك
اما الآن حتى لو تطلع لعرض ثاني ماتضمن قوة الجهة من ناحية الامان الوظيفي ..
الوضع صاير في الشركات مثل لعبة تبديل الكراسي (الاستغناء صاير زي السلام عليكم)
الله يوفقك

 

انا رأيي من راي اغلب الشباب .. لا تطلع وتحمل.. وترا خبرتك في شلمبرجير مايستهان فيها بتكون قوية جداً
الوضع أسوأ من كلمة "سيئ" اعرف مهندسيين كثير عاطلين من سنتين او يشتغلون بشركة عادية بس تمشية حال
اذا حصلت لك شي كويس مناسب لك ووقعت العقد قدم استقالتك اذا ماراح تكون في قضية ضدك وتتمشكل بخصوص استرداد المبالغ