محتااااااار ومحتاج مساعدتكم ورايكم في مؤسسة النقد و BAE Systems

السلام عليكم،


مثل ماهو بالعنوان بصراحة محتار كثير.


أنا خريج ماجستير محاسبة من أمريكا. لما رجعت السعودية السنة الماضية دخلت برنامج تطوير خريجيين غير منتهي بالتوظيف في شركة كبيرة ومعروفة وبعد ستة أشهر جتني فرصة في مؤسسة النقد وكلمت شركتي اني ما أبغى أطلع في حال ضمنتوا لي وظيفة ورفضوا وطلعت للمؤسسة ولحد الآن ما كملت مع المؤسسة شهر.


أمس جاني اتصال من BAE Systems باني اجتزت المقابلة وبيتصلون علي قريب علشان يقدمون العرض ومثل ما فهمت من الموظف انه العرض أفضل من المؤسسة لكن ما اعطاني معلومات.


والحين أنا بصراحة محتار ولا اعرف وش اسوي؟؟


بعض المعلومات عن وظيفتي الحالية في المؤسسة والوظيفة في BAE Systems.


في المؤسسة عملي الآن ما فيه أي جانب محاسبة او مراجعة أو تدقيق ولا حتى مسماي الوظيفي يدل اني محاسب لكن في المستقبل المنظور بيكون فيه هالاشياء وبكون من المؤسسين لأعمال المالية والمحاسبة في هالمجال لانه مجال يتطور بشكل سريع.


الوظيفة في BAE Systems هي محاسب مشاريع واكيد بتكون في صلب مجالي.


آراءكم ممكن تفيدني ويا ليت اللي عنده معلومات داخلية عن BAE Systems يشارك ويفيدني مثلا بيئة العمل والعمل خصوصا مع البريطانيين كيف؟



شكرا مقدما للجميع

 

شكرا ع دعواتك ودعواتي لك بالمثل وأفضل.

الوظيفة موب ع برنامج التطوير ولا أدري هل هي في ادارة المالية أو قسم المالية في ادارة المشاريع.

 

اخوي تركي شكرا لك ونصيحتك والفارق المالي حسب كلام الموظف انه افضل.

اخوي المهندس، الله يبارك فيك وبعمرك حبيبي. فرصة المؤسسة الآن موب في مجال تخصصي لكن المستقبل واعد. ومن ناحية التطوير وبيئة العمل، المؤسسة أقدر اقول انها أكثر من ممتازة. ومديري مميز لأبعد درجة من جميع النواحي.

فرصة BAE Systems في نفس مجال تخصصي والفرق المالي بيكون افضل لكن م عندي معلومات اقيس عليها. من ناحية التطوير وبيئة العمل، أتمنى احصل معلومات من أحد شغال فيها وخصوصا العمل مع مدير بريطاني لانه مديري المباشر بيكون بريطاني.

من ناحية المسافة، كل المكانين بعيدين كثير عن مكان سكني ونتكلم عن ٢٥ كيلو للمؤسسة مع زحمة و٣٣ كيلو لـ BAE Systems بدون زحمة.

الله يوفقني ويوفق الجميع للي يحبون ويتمنون ولا يحط أحد بحيرة مثلي حيرتي.

 

شكرا ع مشاركة الجميع ويا ليت اللي عنده معلومات داخلية يشاركنا بيئة عمل، طبيعة العمل مع البريطانيين.

 

اخوي رونالدينهو أنا سويت المقابلة في نص اوكتوبر السنة الماضية. وبعد المقابلة علموني ان ردهم بيكون خلال اسبوعين برفض أو قبول، وبعد الاسبوعين اقلقتهم واشغتلهم في حياتهم لاني كنت ابغى رد علشان أقرر أنا اروح للمؤسسة ولا انتظرهم وجاني رد بعد شهر تقريبا من المقابلة بالرفض في بداية ديسمبر تقريبا.

والغريب الحين اتصلوا علي يقولون اجتزت المقابلة وبيكلمونك قريب علشان يقدمون العرض.

اخوي أبوخلود كلامك اغلبه صحيح والمكافآت عند المؤسسة الحين كل اربع اشهر موب ثلاث اشهر. موضوع الاستمرار ع عقد مع المؤسسة ما ادري صراحة اذا هو اختياري. لو اختياري صحيح افضل ع المدى البعيد خصوصا انه انا عندي خبرة في التأمينات فبكمل عليها.

اخوي المحارب الذهبي اول شي لا تندم ما رفضت مقابل لاشي؛ رفضك كان مقابل بكالوريوس ووقتها اتخذت القرار اللي رب العالمين هداك له فتأكد انه الأفضل. وبخصوص المادة، اكذب اذا قلت ما تهمني خصوصا وأنا توني ببداية حياتي واشياء كثير تنقصني اولها سيارة توفر علي مشاوير الصناعية الشهرية ومثل ما تهمني المادة يهمني المشوار يمكن اكثر من المادة لكن ممكن اقدر اتحكم فيه بتغيير السكن. ومن ناحية الوظيفة بتكون في الرياض محاسب مشاريع.


شكرا ع مشاركاتكم جميع

 

اخواني حاتم واحمد شكرا لكم وانا الآن بانتظار العرض والله يوفق الجميع للي يتمنون.

اخوي ابوداحل، اول شي دعواتي لك بالتوفيق.

اجراءات التوظيف في المؤسسة تقريبا واضحة من ناحية المقابلات. اول شي اختبار ومقابلة موارد بشرية واذا اجتزت هالشغلتين يبدون الموارد يرشحونك للادارات اللي فيها شاغر. يكلمونك بعدين تسوي مقابلة مع لجنة وعادة تكون مع مدير الشعبة او القسم وفريقة اللي عندهم الشاغر. بعدين يكلمونك لمقابلة مع مدير الادارة اللي تابعه لها الشعبة او القسم. بعد مدير الادارة مرات ملفك يرجع للموارد وينسقون معك للمباشرة ومرات يطلب وكيل الادارة مقابلتك وموب شرط هو يقابلك ممكن مستشارينه. ووبعدها يروح ملفك للموارد علشان ينسقون مباشرتك.

هذه الاجراءات لكن من ناحية المدة ما فيه شي واضح ويعتمد على اشياء مختلفة منها ضرورة الحاجة للمرشح ومنها العرض التعريفي للموارد البشرية للموظفين الجدد اعتقد يقام كل شهرين فيحاولون يجمعون الموظفين الجدد مع بعض.

مثلا انا من مقابلة الموارد الى المباشرة اكثر من ٦ شهور. وزميل لي في نفس المكان تقريبا شهر بس. الاختلاف بيني وبين زميلي انه انا قابلت على اكثر من وظيفة يعني ما توفقت مع الوظيفة الاولى ورشحوني لوظيفة ثانية في ادارة مختلفة.

انت وصلت مدير الادارة وباذن الله ربي يوفقك ويكلمونك قريب لتنسيق المباشرة.

من ناحية المزايا المالية البيسك للبكالوريوس تقريبا ٨٧٠٠ وللماجستير ٩٧٠٠ وبدل سكن ٢٥ بالمية وبدل نقل ١٠ بالمية. عندهم مكافآت مهنية كل ٤ اشهر تعتمد على اشياء كثير اداءك ومدراءك ووكيل وميزانية وعندهم مكافأة أداء نهاية السنة تعتمد على نفس الاشياء للمهنية.

تأمين صحي للموظف وزوجته ووالدينه. نظام الدوام مرن يقدر يبدا الموظف من ٨ الى ١٠ يعني الموظف محاسب بالشهر على تقريبا ١٦٠ ساعه لكن عليها قيود.

هذا تقريبا كل شي وبالتوفيق.

 

المرونة وقت الدوام تبدا من ٧

المعذرة ع الخطأ