شوركم ياأهل الخبرة في عرض وظيفي

انا من رأيي بأنك تقبل بالعرض أقلها تكسب خبره في نفس مجالك وصدقني والله العظيم الاغلب بدو بوظايف صغيره ورواتب قليله وبعدين انتقلو لوظايف افضل واحسن ورواتب اعلى واكبر! اقبلها ولاتجلس عاطل وعاله على نفسك ونا اخوك اقلها تكسب خبره ويكون عندك راتب يمشي ومصرف

 

دامها بمدينتك وبتخصصك اقبلها و تعلم . ومثل ماقال اللي قبلي كثييير والله قبلو ب شي بسيط وبمجرد اخذو الخبرة انتقلو وتطورو
6 شهور كفايه انها تخليك توافق وتبدأ . واكيد انك تبحث عن وظايف وتشوف يطلبون خبرة ف شد حيلك والله يوفقك

 

وعليكم السلام

الأفضل أنك تقبلها للخبرة... وإذا كنت خايف من مسألة تعريف الراتب (لو طلبوا تعريف راتب) ممكن تقولهم أنا قبلت براتب 3000 لإن ما كان عندي خبرة والحين عندي خبرة ... وبعدها تضع الراتب المناسب لك

 

طيب عندي لك رأي مادام العرض 3000.

ليش ماتسجل في برنامج تمهير؟
البرنامج هذا ينزلون فيه وظايف بمكافأه قدرها 3000. ميزتها ان اسمك مايكون مسجل بالتأمينات الأجتماعية ومنها تاخذ خبره. وفي اي وقت تحصل وظيفة تقدر تطلع بكا سهولة. البرنامج مدته 6 شهور. أنصحك ابحث اكثر وافهم هذا البرنامج وعن شروطه والله يكتب لك التوفيق وين ماتروح

 

اذا كانت بتخصصك ومكان قريب منك نعم اقبل. تحصل خبرة ومنها تسند نفسك بالراتب شويتين. وما راح تاثر عليك ابدا. انا كنت شغال كول سنتر ومن ثم اشتغلت IT براتب 5000 والأن الحمد لله جاني عرض هندسي براتب يرفع الراس بعد سنتين. صحيح ماله علاقة بتخصصي بس اكتسبت خبرات في التعامل مع العملاء والتعامل مع الإدارة بتفيدك في الوظيفة الي راح ترفع راسك. صدقني راح تنفعك حتى لو كنت في اسوا شركة.

 

المفروض تدعس على خشم الي اعطاك العرض
الهندي الحين ما عاد يقبل 3000 غير ان اقل راتب في مالكدونالز 5000 ريال
لا تقبل العرض لان في النهاية الراتب ما يكفي حتى حق البنزين و راح تدفع الفرق من جيبك

 

عليكم السلام
رأيي اتوكل على الله و ابدا فيها صدقني بتستفيد و بتستمتع فيها
نقطه مهمه: احيانا نحتاج اننا نشتري الخبره اذا ما جتنا. صحيح ان 3000 شي بسيط و انت عندك مصاريف
لكن هذا مهر للحصول على خبره.و الجميل انها فمجال تخصصك.
محاكيك كنت اسوي مقابلات و لا يحصل نصيب جتني فرصه مخلص اعمال يعني بالعامي معقب
قعدت فيها خمس شهور ما فيه جهه حكوميه ما دخلتها. اقل حاجه استفدتها شفت كيف الحكومه و الشركات كيف تشتغل
تعرفت على موظفين الوزارات صرت جريء اكثر ...
و جاني عرض من شركة عميلة للشركة اللي انا شغال فيها و توظفت عندهم فالجوده و السلامه
يعني صار المثل "رجل الديك تجيب الديك "

 

اقبل العرض خصوصا انه عندك عمولات ودوامهم مرن

 

خذ العرض الاول،
لو تحسبها صح، العرض الاول افضل.
اول شي، العرض الاول وظيفة عقدها اقل شي سنة + في مجالك وراح تاخذ خبرة بتنفعك في المستقبل.
ستة شهور في تمهير ما راح تنفعك كثير كخبرة +مش اكيد انه راح يوظفك بعد انتهاء الفترة.

 

أولاً مبروك عليك العرضين أخي.
ثانياً:
كشخص مثلك أنا متخرج تسويق .. ففرص المبيعات جالسة تكثر هالفترة ولو إن الطاقة النسائية بل والهندسية أيضاً جالسة تكثر وظايفهم في المبيعات..

النقطة اللي بوصلها لك هي بحكم إنك خريج في التسويق المفروض تعرف إن فيه فرق بين المبيعات والتسويق، وبناءً عليه فإنت أعرف بحبك لأي جانب منهم أكثر
إذا كنت مهتم بتكوين خبرة في البيع فقط وترك التسويق فتوجه ليها، لأنه البياع المحترف بكرا يكوّن له اسم ويصير مطلوب عند الشركات.

أما إذا كنت حاب تعمل في التسويق، فغالباً وظيفة المبيعات إلى حد ما بتقتل فيك الحس الابتكاري والتطويري والبحثي وغير ذلك.

أنا شخصياً عملت في المجالين، وفضلت التسويق على المبيعات لأسباب شخصية، قد وقد لا تنطبق عليك.

 

3000 ريال انا اشوف انها ماتمشي صراحة في هذا الزمان واذا انت مصر الله يوفقك كوظيفة مؤقتة .