محتار كونتراكت أرامكو أرجو الدخول

الراتب يادوب يمشيك لنهاية الشهر وانت بعيد عن اهلك
المسمى الوظيفي حق ثانوية
الوظيفة سعودة
كونتراكت ارامكوا يستلموا اعلى من كذا بكثير
خلك حول نيوم و وعد الشمال اقرب و اكرم لك من تقعد تتسلف من الناس نهاية كل شهر

 

الراتب مقابل ماتعطيهم مشاريع ارامكو وغيره فيه اجحاف وحرمنه!

لو كان الشغل في نفس صميم تخصصك او عمل هندسي مثل انترفيس انجنير او بلان انجنير او بروسس انجنير كان قلنا خبره وموب مشكله تقبل بهالوظيفة بداعي الخبرة!

اذا ماعليك التزامات شخصية او اسرية ومعدلك طيب ولغتك جيدة لا تقبل بالعرض!

ممكن تقبل بالعرض اذا العمل في الخبر وفيه شفتات تقدر تجي تجرب وفي النهار تجرب تقديم على الشركات وتتعرف على شركات وتتواصل مع زملاءك المهندسين وتطلب منهم المساعده في التقديمم منتب خسران بشرط الشركة ماتكبلك يعني تكرفك من الساعه سبعه وماتطلعك الا خمسه او سته.

الله يوفقك ويقرب لك الافضل

 

فعلا ، ولو المسمى اقل شي مهندس العرض بيخليك تفكر وتحتار لكن فورمان حتى بالسايت راح يتعاملون ك عامل وليس مهندس
حاول فيهم بتغيير المسمى والراتب ان وافقو والا ربي بيعوضك غيرها ان شاء الله

 

جرب انك تخوض تفاوض معاهم، بما انهم اعطوك العرض الحين تبدأ رحلة التفاوض، فاوضهم على كل شي بمنطق، فاوضهم على المسمى و على الراتب بمنطقية، كون واثق و قولهم انك تشوف مؤهلاتك اعلى من الوظيفة اللي هم اعطوك اياها و ان الراتب لا يكفي حتى الحاجات الاساسية. حاججهم بجمعك للبيانات عن رواتب المهندسين الأڤرج في السعودية و قولهم ان العرض المقدم لك لا يلتقي حتى الminimum salary لشخص بمؤهلاتك و اطلب منهم reconsideration للعرض.
الأفضل من هذا كله ان لو قدرت تجيب عرض من شركة ثانية براتب اعلى و مسمى ثاني افضل تقدر تستخدم العرض الثاني للحصول على اللي تبغاه في عرضك الأول. التفاوض فن ابدأ محاولاتك فيه ولا تبين لهم انك محتاج الشغل او desperate for the job رح يستخدمون هذا الشيء ضدك

 

في تجاربك الجاية ابداً لا تحسس الHR انك يائس و تحتاج شغل ولا نقطة. سوف تستخدم ضدك. فيه واحد قالي "انتي من قدرتك على الوصول لي من بين ١٨٠ متقدم واضح انك كنتي تبغين شغل بأي طريقة"، أعطيتهم وضعية اللي عرضكم و المسمى حقكم مو عاجبني و سهل الشغل مقارنة بمؤهلاتي و they’re reconsidering it و بالفعل لو ما غيروا رح ارفضهم. أعمل إجراءاتك و استخدم مهاراتك و مؤهلاتك عشان يوظفونك لقيمتك و دائما لا توافق على العرض على طول، قولهم رح اخذ عرضكم بعين الاعتبار و ادرسه.

 

انتم البنات عاد حالة خاصة لان البنت الوحد تنحسب باثنين سعوديين فاكيد راح يزودنك الف او الفين احسن مما يوظفوا اثنين شباب براتبين و تكون خسارة عليهم

 

كلامك صحيح و لكن كبنات في الهندسة احنا بالغالب معرضين للعب علينا، بس لأننا بنات يعطونا وظائف ما تناسبنا ولا تناسب امكانياتنا و بالنهاية هم مستفيدين كشركات من توظيف البنات كسمعة للشركة

 

اذا مالقيت افضل من هذا العرض روح اشتغل عندهم مؤقتا وتاكد من العقد انك تقدر تسحب عليهم اي وقت وتأدبهم وتكسب خبرة لك .

لان 6000 وبعيد عن اهلك ومنطقتك .
احسب ايجار البيت + المواصلات والاكل الخ ...

ماراح يبقى لك شيء الا اذا يعطوك بدل سكن يكون افضل .

بالتوفيق .

 

وعليكم السلام ورحمة الله وبركاته،،،

عندي وجهة نظر قد تكون مختلفة، أنا من رأيي تقبل في حالة إنه إذا كان ذهابك لهذا المكان راح يعرفك على أشياء جديدة أقصد أنه راح يعرفك على تخصصك أكثر يعني راح تشوف كيف العمل في السايت وكيفية إقامة المشاريع وخطوات إدارة المشاريع إلخ ... هذا بدوره راح يعطيك أمور كثيرة عن تخصصك ويوسع المدارك وأشياء كثيرة راح تتعرف عليها ويعطيك الحياة الواقعية لتخصصك ... ومتى ما تحس انك اكتفيت أو لقيت عرض ثاني ممكن تمشي ... بشرط إذا قبلت تتخيل نفسك في دورة تدريبة وليست وظيفة

يعني إذا كنت تشوف ان هذا استغلال لك .. أنت بعد استغل مكانك ووظفيتك في أنك تتعلم أشياء جديدة ( يعني يكون استغلال من الطرفين)

أما إذا كان عملك مجرد في مكتب وما فيه خروج للسايت وروتين معين ما يتغير ... فهنا ممكن أقولك لا تقبل العرض