خريج محتار وأحتاج مشورتكم بشدة

بصراحة ما أدري كيف تفكر يوم كنت تطلب من الشركة الي كانت بتوظفك مهندس استقبال التنازل عن راتبك او نصف راتبك مقابل الخبرة

اشوف انك ضيعت فرصة كبيرة و باين عليك متردد و خايف من القطاع الخاص و ما تبغى تترك العسكرية

ما في شئ اسمه اقدم على وظيفة حكومية و انا موظف حكومي او اتوظف دوام كامل في قطاع خاص بدون التسجيل في التأمينات

اذا جاتك وظيفة هندسية استقيل من العسكرية على طول هذا اذا تبغى تشتغل بشهادة الهندسة

 

ماشاء الله عليك انسان مقاتل والله يكتب لك فرصة ممتازة تناسب طموحك قريبا.
تأكد ان سيرتك الذاتية تكون مكتوبة بشكل احترافي ( في موضوع مثبت لمراجعة السير الذاتية )
ماعرف كم عمرك لكن العمر بعض الاحيان يكون عائق اذا كتبته لان الشركات ماتدري عن الاشياء الي مريت فيها وبمجرد مايشوفون انك متخرج بعمر اكبر من الطبيعي يعطيهم انطباع عن الاهمال ( فحالتك الموضوع مختلف ) لو كنت مكانك ماراح اكتب العمر واذا سالوك عنه فالمقابلة بيكون نقطة قوة بحيث توضح لهم انك كنت تشتغل وتدرس فنفس الوقت.
الله يوفقك ان شاء الله

 

ابحث عن شيء يناسب شهادتك مو مهندس استقبال
أنت بوضع كويس و ممتاز يعتبر لأنك موظف حكومي و تبحث عن الأفضل ذي لوحدها نعمة من رب العالمين غيرك عاطل باطل

حاب أقولك لا تيأس و العمر قدامك طوييييييييل و لساعك صغير و الله

اجتهد و اصبر و توكل على الله و نظرة الناس ادعس عليها برجلك , الناس ما يعجبها شيء
ادع رب العالمين و لا توقف بحث و انتبه تذل نفسك على وظيفة ما تفيدك بتخصصك أو ما تجيب لك راتب زين

 

حاب احط مداخله من خبرتي انا مهندس ميكانيكا خريج امريكا

انا اشتغلت بشركه 3 سنوات مع مشاريع ارامكو والمهم بعد ماخلصت الثلاث سنوات مشوا اغلب الموظفين وخسرت الشركه وحاولت اقدم على شركات كثيره بخبرتي وزي منت عارف وضع السوق المهم اني شفت عمري قاعد يمشي والعمر مايرحم رحت دخلت عسكريه على رتبه رقيب ( بالواسطه بعد جبتها ) وحاليا موظف والحمد لله تزوجت واستقريت

صحيح اني تعبت على الشهاده والدراسه لكن الحمد لله على كل حال اعتقد الاستقرار الاسري والوظيفي اهم من هذا كله انا عكس قصتك تماما عسى الله يكتب لك اللي فيه الخير انت اسعى وجاهد وفالك التوفيق

 

فعلا،اخونا عنده طموح لكن مسيطرة عليه فكرة "وظيفة الحكومة امان والقطاع الخاص كخة"
وهذا الي جاب الفقر للعالم
ترا الهيئات وكبرى الشركات عقود تتجدد سنويا ورواتبهم ضعف رواتب ديوان الخدمة،

افصل من الفقر طالما انت مهندس وتوظف اي وظيفة اهم شي قريبة لتخصصك . وبظرف ثلاث سنين بالكثير راتبك راح يصير دبل العسكري.

للأسف كثير فرص تضيع من شباب واشوفه غباء بسبب السالفة ذي
والله اعرف واحد فصل من شركة الكهرباء بعد ماتوظف بشهر وراح توظف مرتبة سابعة بوزارة المياه.

حجته الغبية يقول الكهرب شركة مافيها امان وظيفي !!!

والمصيبة كانت كل الوظيفتين عند اهله
طبعا هالكلام عام 2014
بعد مانزل من راتبه حول 4000 ريال وشاف خوياه فرق رواتبهم بينهم وبينه للحين يعض اصابع ااندم

 

دامك عسكري ليش ما تقدم على كلية الضباط راح يرتفع راتبك اكثر وفيه اقسام للمهندسين ممكن تدخل معاها.
ترى مب ضروري تشتغل نفس تخصصك 100% لو طبقت 10% فهذا شيء ممتاز
انا خريج جامعة البترول وخبرة. اللي طبقته من دراستي حوالي 15% فقط والسبب ان اللي تدرسه اغلبه نظريات هندسية و اغلبها (assumptions )
لكن الحياة الواقعية ما فيها assumptions.
الخلاصة : انا لو محلك مستحييييييييل اتخلى عن وظيفتي الحالية وراح اقدم على الكليات العسكرية بشهادة الهندسة. ترى القطاع الخاص حاليا سيء كل الشركات الكبيرة صارت توظف كونتركات يعني اذا خلص المشروع الله يستر عليك (مافي امان وظيفي مثل الوظيفة الحكومية )
و اسف ع الاطالة

 

توك صغير سن تعتبر. ترا انا توظفت وعمري قريب 28 سنة. وتوظفت والله بوظيفة شاطحة عن تخصصي لكن شرطت يحطون مسماي مهندس كهرب
وعديت سنة وبعدها الحين مهندس مشروع مع أحد الهيئات والوضع يتحسن لصالحي من فضل الله
فإياك تدفن نفسك ،يعني ماشاء الله حتى عمرك صغير توك يعني .وانا لو محلك والله اقبل وظيفة لو اقل راتب لأنك راح تاخذها دبل باذن الله قبل الثلاثين واختبر قدرة معرفية عشان تسجل ديوان الخدمة بعد.

والله اثنين ضباط اعرفهم مهندسين
واحد فصل بعد خدمة حول عشر سنين وراح هيئة الطيران
والثاني خدمة حول 15 سنة وتوظف بشركة المياه فتأمل رعاك الله.
العسكرية حتى لو انك ضابط وقت التقاعد ينخسف راتبك خسف قاتل لأن ثلاث ارباع راتبك بدلات
عكس المدني، فما بالك بالشركات

 

أولاً لاتفقد الأمل في نفسك وفي سوق العمل، فأنت انسان مكافح وربما كل من يقرأ موضوعك يتفق، ثانياً؛ معدلك مرتفع وتخصصك مطلوب، يجب عليك رسم طريق واضح لمستقبلك ان كان قطاع خاص او عسكري او حكومي، فكرة الأمان الوظيفي فكرة غبية جداً وهي لاتوجد في الدول المتقدمة ، ( ولا يعني ذلك بأن انصحك ان لاتفكر بقطاع حكومي او عسكري) ولكن الفكرة اساسها خطأ وعودتنا كسعوديين على الراحة وشرب الشاي وترك الأجانب يعملون ويصلون الى المناصب، عمرك لا شيء فيه بل بالعكس مازلت شاب، اذا امضيت سنة بمقابلة واحدة فقط فهذا يشير الى خلل في السيرة الذاتية انصحك بمراجعتها في الموضوع المختص في القسم، لاحظت خطأ عند اجراءك للمقابلة وهي قلت ( انا ابغى خبرة بس ) اذا كانت افكار بينك وبين نفسك فلا بأس، اما اذا قلتها الى الشركة فهذا خطأ فادح يشير الى انك تعتبر الشركة محطة عبور فقط والشركات لايعجبهم هذا الشيء، هذه مجرد نصيحة لك ولي وللجميع، دائماً اظهر انك مهتم في الشركة عند المقابلة، انا نفس تخصصك وتخرجنا نفس الوقت ( خريج امريكا) ومعدلي اقل منك بكثير وحصلت على عشرة مقابلات ربما، حاول ان تجدرالاسباب، هل الفرص الهندسية متوفرة في مدينتك ؟ هل طريقة تقديمك للشركات صحيحة ؟ لاتيأس جميعنا نعرف السوق لكن اهالينا كبار ومايعرفوا لذلك اعذرهم اذا تكلموا بهذا الاسلوب، اتمنى لك كل التوفيق

 

الله عليك

 

ماشاء الله عليك ، اولاً الله يوفقك ويكتب لك في كل خطوه نجاح وتوفيق ، انا مهندس كهربائي خبرتي ولاشي ، جلست عاطل سنتين تقريبًا قلنا يمكن العيب بالسيره الذاتيه وضبطتها وكل شي ومانفع ، قلت والحل طيب ، للأمانه احباط في احباط وتخصصي مطلوب هندسة كهربائية ولكن الفرص الاغلب للخبره عشان نكون صريحين ، رحت لأحد مكاتب الاستشارات الهندسيه وتبعد عن مدينتي ٤ ساعات اضطريت اروح وبدون مقابل عشان استفيد ، وكملت معهم ٤ شهور وعطوني عرض وظيفي كمهندس مشروع اشراف يعني ، ولكن يوم سويت مقابله مع مالك المشروع رفضني رغم ان المقابله كانت جميله وسهله لأبعد الحدود وطلعت من المقابله مبسوط ، المكتب الاستشاري وافق علي وعطاني العرض وقالو بمجرد يوافق المالك خلاص توقع عقدك وللأسف رفضني مالك المشروع وجاني علم بعدين ان الي قابلوني وظفو عن طريقهم اشخاص والله يبارك لهم بالنهايه الجهه هذي هي مالكة المشروع ، فقلت يالله لعلها خيره وخلص التدريب ورجعت مدينتي مابقى ملتقى وشركه مارحت لها ف سبحان الله الرزق مكتوب لك اللهم ماتدري متى يجي رزقك والحين الحمدلله اشتغلت في شركة متعاقده مع ارامكو والان البوزيشن حقي site engineer ف صدقني رزقك بيجيك بس حاول وان شاء الله فالك التوفيق والله يسهل لك امرك ويفتح لك ابواب الرزق.

 

وعليكم السلام ورحمة الله وبركاته

ماشاء الله عليك انت شخص طموح ومكافح
اذا لم تجد فرصة بالقطاع الخاص اكمل الماجستير في تخصصك واهم شيء يكون امتداد لتخصصك اذا كانت لك رغبة بالوظائف الاكاديمية بحيث تكون استفدت وحصلت على شهادة اعلي و الوظائف الاكياديمية لاتطلب خبرة عملية وهذا شيء جيد
القطاع الخاص سيء وخاصة من ناحية الشركات المتوسطة والصغيرة ودوام مرهق انصحك اكمل الماجستير
وفقك الله