التنرد في التوظيف:: البعض يوظف البنات على حساب الشباب الكفوء (موضه)..

اولاً احب اقولك الله يعوض عليك والوظيفة ماهي من نصيبك..

انا معاك فيه شركات كثير هالايام تفضل توظيف البنات وبصراحة ما اعرف ليش هذا التفضيل.... انا لا انكر وضد اي احد يقول ان البنت السعودية ماهي كفو تشتغل مثل الرجال بس الظاهر و في الوقت الحالي ان (بعض) الشركات توظف البنات ومو اي بنات بل يستقطبو البنات بناءاً على الشكل ويمكن اللغة الإنجليزية بغض النظر عن الخلفية التعليمية للمتقدمة.

احنا شبه تخلصنا من سالفة عصابات الاجانب في الشركات بس الحين سوق العمل طلع بموضة جديدة الا وهي الي في عنوان هذا الموضوع.

اعيد واقول المرأة السعودية قادرة على العمل في اي مجال سواء المجالات النفطية او الاستشارات الهندسية وحتى المقاولات. بس الواقع يصدم بصراحة من الشركات واتمنى ان ياخذوا هذا الموضوع بجديه ويتم التوظيف بناءاً على المؤهلات وجدارة المتقدم/ـة

حبيت افضفض معاك وفالك التوفيق والله يرزقك بمكان افضل من صدارة..

 

وكيف عرفت ان اللي وظفوهم مكانك مو اجدر منك؟

 

أولا الله يوفقك و يكتب لنا ولك كل خير

ثانيا انت نظرت للموضوع من وجهة نظرك انت فقط ولكن شركة مثل صدارة المتقدمين للشاغر فيها قد يكون بالميات فهل تتوقع انها تسوي معاهم مقابلات جميعهم؟ يعني كل وظيفه بتاخذ أشهر علشان المقابلات فقط بدون الاجراءات الثانيه. علشان كذا لابد ان يكون في فرز مبدئي مثل الاعلى في المعدل ومن لديه خبره أكثر أو جامعه اقوى أو دورات تساعد المتقدم وبكذا يتواصلوا مع عدد قليل منهم ومن ثم يختاروا ويوفروا وقتهم ووقت ومجهود المتقدمين من مشاوير السفر والمصاريف. فمسألة انه شروط التقديم تنطبق عليك مومعناته بانه أكيد سيتم التواصل معاك.

وبإذن الله ربي يرزقك باللي أفضل منها

 

مو دايم انا جتني مقابلات في اقل من سبوع
بدون ماكتب المعدل وبدون تدريب او خبرة في نفس المجال
المشكلة في التقديم اونلاين كشاب انزل وقدم بنفسك
اهم شي خلي السيرة الذاتية مرتبة لاتخليها زي المقال

انرفضت في شركة اتوقع عشان ماعندي انترشب لان سال عنها وقعد يسال ليش ... إلخ <— موظف ارامكو الله يسامحه البيروقراطية عندهم الف ( الشركة عندها عقد مع ارامكو )

المهم بعض الشركات تفكر انها تقدر ترفع السمعة بتوظيف البنات دون تمكين العامل السعودي و فتح المجال للغير سعوديين (١=٢)

مقتنع ان مافيه جدارة بدون خبرة
و مع التدريب في الشركة تصير جدير

 

اللي اعرفه صداره ادارتها اغلبها اجانب بما انها شراكه بين ارامكو و سركه اجنبيه. و شارطين نسبه سعوده فيبدو قالو نوظف بنات نحطهم فمكاتبهم و لا يشغلونا بالاسئله عكس الشاب

 

انت بنفسك كاتب " الليس من الاجدر احضار جميع من تنطبق مؤهلاتهم للمقابله ومن ثم تحديد من هو الاجدر بغض النظر عن جنس المتقدم؟ ولا السالفه توظيف البنات موضه؟،
يبغون مساوه خلاص موافقين لكن الاجدر ياخذها.."
والحين تجي تقول وين انا كتبت انهم مو اجدر مني او انا اجدر منهم؟ التاني في إيصال الفكرة مطلوب عشان ما تحط نفسك في موقف متناقض

تحياتي

 

نقاط السعودة للموظفة الأنثى أكثر من الذكر.. و الا لا؟

 

قاهرتني شركة فاتحة وظيفة بروسس انجنير وحاطين بين قوسين (Female) ووقت التقديم واختيار الجنس يكتبون لك ان شركتنا ماتفرق بالتوظيف بين الذكر والانثى
واعرف لك شركة "كبيرة بالاسم فقط" توظف المهندسين الذكور على مسميات لوظايف الدبلوم والمهندسات على مسميات انجنير

 

مو الشركات تفضل بنات،
الدولة بكبرها الحين تجبر الشركات السعودية تفصل شباب وتوظف بنات، والشركات الاجنبية عشان مالهم يد عليهم ،يغرونهم أن البنت لها نقاط اعلى بنسبة السعودة فطبيعي يخلون الادارة كلها بنات،
شركة الكهرب خلال هالسنتين،التوظيف بالموقع مقفل، لكن توظيف البنات يجري ع قدم وساق، شلون محد يدري منين يجيبونهن والعيال مانزلوا خلال هالاربع سنوات الا اقل من 20 وظيفة بالموقع وممكن اقل.

والمصيبة حجتهم في ذلك ان الحرمة والرجل ع مد سواء،
طيب مثل ماتم اسقاط الولاية قانونيا وصارت حسب زعمكم مساوية للرجل ،النفقة تبع للولاية ،المفروض تسقط قانونيا
مو توظف البنت وتفصل الشاب او تخليه بدون وظيفة ثم تجي تطالبه وتعتبر الحرمة ضعيفة وناقصة عقل ودين يصرف عليها وانت تفضلها بالوظيفة .
حنا مو عميان،
بنات بنفسهن بتويتر يعترفن يقولن اي وظيفة نقدم عليها مقبولات خصوصا الادارية لدرجة وحدة تقول شركة وهيئتين حكوميات كلهم قبلوني وتعترف ان الي صاير توظيف للحريم بس عشانها حرمة ويزيد نسبة قبولها اذا تخلت عن حجابها عشان تصير ديكور قدام الاعلام.

الوضع للأسف مزري وراح يخرب النسيج الاجتماعي والشاب يبقى عطالي والبنت تعنس لا هي الي قادرة تخطب ولا هي الي راح تقبل بواحد عاطل بحجة انه من وين له يصرف عليها وفوق كذا القانون متناقض مسقط ولايته ويطالبونه يصرف ويدفع مهر.
وحتى وطيفة البنت لنفسها فقط،عكس الرجل اذا توظف اول شي يفتح بيت ويتزوج ويؤسس اسرة ينفق عليها،
لكن الحين ع هالوضع مستحيل هذا الشي يصير وراح يزيد الفساد وسبقونا دول كثيرة وصاروا متخلفين اكثر واكثر

االي صاير الحين الشي ونقيضه والله المستعان

 

في احد مجالات العمل بعد ما تم خصخصته لهم 3 سنين ما وظفوا ولا شاب، وحسب ما وصلني انه بيكون التآنيث فيه فوق 90٪. واحد من اصحابي مشوه من وظيفته وقسمو راتبه على 3 بنات جدد. الوضع يغبن، انا انقالت لي في وجهي من نفس هذي الجهة انه ماعندنا توظيف رجال حاليا. نتمنى التوفيق للجميع وسواء كان ولد او بنت

 

الموضوع باختصار ان البنت الواحدة عن 4 شباب في نظام نقاط السعودة والدعم لهذا السبب اتجاه اغلب الشركات لتوظيف البنات عن الشباب والبعض ينهي خدمات الشباب لتوظيف البنات
الشركات مالهم علاقة باللي يصير وماهمهم توظيف بنات او شباب, هذا توجه الدولة والشركات يبون ربح باقل التكاليف وهالشي يخدمهم
غير هذا الشي خذ فره على لنكد ان اغلب البنات خبراتهم لاتتجاوز 3 سنوات وبمناصب منجر ومدراء ومشرفات وهذي الامور تحسب للشركة كنقاط ...!

 

و للأسف نوعية وحدة من البنات اللي مستفيدين من هالشيء و كلنا شايفين هالنوعية
مجرد شكل للإستعراض للأسف
شفت بنت في لينكدين تخصصها تصميم داخلي توظفت على طول في احدى الشركات الكبيرة جدًا كفيلد انجنير !!!

المفروض كون الناس تتطالب بالمساواة مايتم تحديد جنس و حسب علمك تتوظف و طبيعي فيه وظايف لا تناسب بنية البنات و هذا واقع و لازم يفهمونه

 

انا من الاشخاص اللي تضرر من هذا الشي
"عاطل الان قرابة السنتين"