من استشار ما ضاع

عليكم السلام، علينا و عليك بدوام الصحة و العافية

معليش عالتأخير في الرد على سؤالك بس و الله توي اشوفه

درجاتك كويسة ما شاء الله بس شد في التحصيل و حاول تجيب فوق ٩٠ و افضل كمان فوق ٩٣، و أن شاء الله لك نصيب في القبول باذن الله.

بالنسبة للوضع ما فهمت اي جانب، تقصد الحياة و اليومية و المعيشة و لا الدراسة و المواد ؟

بالنسبة للرياضيات و الله هو شئ لابد منه و عادك اذا ما تطيق الرياضيات فمعاك حلين :

- الاول انك تتعلم انك تحبها.
- الثاني انك تتحمل قرفها.

بصراحة الرياضيات من أكثر المواد و يمكن اكثر مادة بعد مهتمة بيها الجامعة ( يعني عندك تخصص كمستري اللي ماله كثير في الماث، الخطة حقته تدرس ٥ رياضيات، ٢ في التحضيري اساسيات نفس اللي في الثانوي بالضبط، و ٣ كلهم عن الكالكولس، هذا الكلام على ايام الوالد الله يحفظه في الجامعة كان للي بياخذ دبل ميجر (ماينر في الرياضيات) يدرس ال٣ حقين الكالكلس هذي، لكن هنا في البترول لا يا حبيبي هذا مهو دبل ميجر هذا حق تخصصك بس)

انا عن رأيي اشوف الخيار الاول احسن خيار لانك يا صاحبي لو جيت البترول... لو رحت لغير البترول... لو ابتعثت برا، الماث وراك وراك زي الطيب.

بالنسبة للسؤال الاخير، لو ربك قدر و ما انقبلت في البترول روح عزوز بالذات لو انك من سكان منطقة مكة لان عندهم هرجة بايخة مع سكان برا المنطقة، و لا غير كذا روح سعود.

المشكلة الابتعاث السنة ذي مع المكرونا اتقفل كلش كلش فما ادري اش الوضع للي نفسه يبتعث ذي السنة.

معليش اني طولت بس كذا احب امسك خط شوية في الكلام ، و أي أسئلة تحت امرك.

 

نصيحتي لك اذا مالك في الرياضيات تبعد تماما عن الهندسة وعن جامعة البترول

الهندسة = رياضيات + منطق + علوم طبيعية
نوع العلوم يختلف بحسب تخصص الهندسة الفرعي، لكن في الاغلب هي فيزياء

انتا خريج ثانوي ولسا ما شفت الرياضيات
كثيرين كانو يحبو الرياضيات في الثانوي وكرهوها بسبب الجامعة (ما انكر اني منهم)
وانتا من قبل لا تدخل الجامعة قلت انك تكرهها


نصيحتي لك فكر كويس في توجهك والتخصصات اللي ممكن تدخلها او تتقبلها عل اقل
البترول جامعة اساسها هندسي وقسم الرياضيات فيها قوي جدا
هذا الموضوع رفع مستوى صعوبة الرياضيات فيها ، حتى في السنة التحضيرية (المشتركة بين الهندسة والادارة) وفي التخصصات الادارية
اصلا اكثر مواد ترسب الطلاب في البترول وتسبب انسحابهم هيا مواد الرياضيات


الادارة وتخصصات الكمبيوتر في جامعات ثانية مافيها نفس ضغط جامعة البترول في الرياضيات
الطب تقريبا ما فيه رياضيات ابدا

فكر كويس واعرف توجهك وفالك التوفيق