طالب احتاج استشارتكم..

اول شئ كلنا مررنا بهذا الضغط النفسي وهذي الحياة مافيه شئ بسهوله وهذا طبيعي.

النقطة الثانيه، اذا انت حاب التخصص وماعندك مشكله فيه ولكن مشكلتك الضغط النفسي فهذا طبيعي جدا.

بالنسبة للوظايف رزقك مكتوب ولاتحكم على نفسك من الحين، لازال السوق يطلب مهندسين ويحتاج لايغرك فلان حصل وفلان ماحصل، اجتهد وحاول تحقق معدل مرتفع والتوفيق بيد الله.

وفي الاخير قبل اي قرار تتخذه استخر وتوكل على الله

 

الجامعه بالذات التخصصات الدسمة طب هندسة حاسب محاسبة لازم عالاقل يكون لك رغبه و ميول للتخصص

و ترا الاوضاع تتغير بسرعه يعني على وقت تخرجك ممكن يكون تحسن الوضع بكثير

 

من ناحية الضغط هذي لازم تراجع روحك ترتب وقتك تنزل مواد قليلة الحد الأدنى مافي شي سهلات

من ناحية البطالة وشح الوظائف لاتفكر فيها بدري عليك باقي لك 4 سنوات قدام يتغير الوضع ماهو ثابت لانه حاليا ازمة كورونا فاذا انتهت راح تنفتح وظائف كثيرة وبعدين فكر فيها فيه اشخاص توظفوا برواتب كويسة في عز ازمة كورونا فلا تفكر كثير وانت توك

انت ادرى بقدراتك اذا تقدر تكمل او لا

 

بالبداية أحب أهنيك على وعيك وحرصك على مستقبلك بالرغم من صغر سنك، أنت أفضل مني ومن شباب كثيرين يوم كنا عمرك.

الشيء الثاني: مهنة الهندسة في السعودية مالها مستقبل، لا الحين ولا حتى بعد ١٠ سنوات على أقل تقدير. تكدس خريجين بشكل فظيع من جامعات محلية وأجنبية، سوق العمل مب بس متشبع إلا جته تخمة من أعداد الخريجين الهائلة مقابل احتياجاته. إذا أنت تخرجت بمعدل ٣/٤ مثلا في تخصص الهندسة المدنية، حط ببالك أن فيه ١٠ آلاف (حرفيا ١٠ آلاف) مهندس بنفس مؤهلاتك بالضبط وبعضهم عنده خبرة وأنت لا. هل تتوقع أنك تقدر تتفوق على ١٠ آلاف من أقرانك؟ الجواب غالبًا لا.

كخريج من جامعة البترول، أنت مختلف عن البقية قي نظرك وراح تبقى هالنظرة ملازمة لك وقت طويل لأنك عارف ومستوعب حجم الضغط اللي مريت قيه مقابل خريجي الجامعات الثانية. الخبر السيء أن سوق العمل مايهتم كثير لهالمعلومة وقرر يختزل مسيرتك الجامعية كلها في رقم مجرد اسمه GPA.

الحين بنقل لك تجربتي الخاصة اللي ماتعد حكم نهائي لقرارك لكن هي تجربة لازم تسمعها، وأنا بعمرك تمنيت أحد يقول لي هالكلام.

تخرجت بأغسطس ٢٠١٩ تخصص هندسة كهربائية من جامعة البترول بمعدل ٢،٨٨/٤، قدمت على شركات كثير يدويا وعبر الشبكة او عن طريق لنكدن وبيات، قدمت كثير لكن مافيه رد وزملائي ايضا واجهوا نفس الاشكالية، توقعت أن المشكلة في طريقة التقديم او السيرة الذاتية، راجعتهم كثير وطورت فيهم لكن المحصلة واحدة! اغلب برامج تطوير الخريجين المنتهية بالتوظيف من الشركات الكبيرة تطلب معدل معين كشرط اساسي للقبول بدون ادنى اكتراث لحقيقة انك طالب مختلف من جامعة مختلفة! (او هذا على الاقل اللي زُرع فينا من وحنا اوريات سواء من قبل المجتمع او من منسوبي الجامعة نفسها)، بعد فترة ٦ اشهر -وبشكل لاشعوري- بدأ الاحباط يتخللني، وصار تعدي علي اعلانات توظيف ولا اقدم عليهم لان عارف ان مابستفيد شي، تحطمت كثير وحزنت كثير لاني اعرف اني مااستحق كل هذا لكن الحمدلله، اشتغلت بعدها بمرسول عشان اغطي مصاريف يومي مع الاستمرار في التقديم، استمريت على هالحال ٨ اشهر تقريبا ( الان مضت ١٤ شهر منذ تاريخ تخرجي) الى ان وصلني رد مقابلة لوظيفة نسيت اصلا اني قدمت عليها (من كثر الشركات اللي قدمت عليها) قعدت احوس بالايميل وادور لين لقيت انهم مستودع تخزين معدات ثقيلة وانا قدمت عليهم قبل ٣ شهور و٣ اسابيع على وظيفة مشرف سلامة براتب ٥٠٠٠ بدون خصم Gosi يعني ٤٥٠٠ دوام ٦ ايام بالاسبوع. رحت المقابلة طبعا والحمدلله عدت على خير ووصلني بعدها العرض الوظيفي وقبلت فيه بلا تردد كون هالراتب مااقدر اجيب مثله وانا سواق مرسول. الحين لي ٣ اشهر تقريبا في هالوظيفة اللي لاتمت لتخصصي ومؤهلاتي وقدراتي بصلة.. تعدي علي اوقات وانا بالمستودع واتذكر كم ليلة ميجر او فاينل مانمت فيها وقعدت اذاكر واخرتها هالنهاية.. هالشي مضيق صدري كثيير ومسبب لي ازمة مااتوقع بتعافى منها في الوقت القريب.. طبعا باقي زملائي بعضهم ماتوظف للان ومعظمهم تعسكر في الامنية وايضا بعضهم توظف لكن بوظايف مشابهة لوظيفتي واخيرا فيه نسبة ٥-١٠٪؜ توظفوا بمكان يليق بهم. الحمدلله على كل شي، انا اعرف ان هذه مب النهاية وماراح اظل بهالوضع المزري للابد لكن الحين قربت تعدي سنتين راحت عالفاضي وهذه محد مسؤول عنها الا انا واختياراتي غير المدروسة!

ما اقدر اقولك اذا الطب هو الحل، لكن اللي متاكد منه ان الهندسة مهي الحل. شوف لك تخصص انت فاهم فيه وتقدر تجيب معدل ٤/٤ يصير حتى لو ماتوظفت فيه تقدر تنقبل في برامج حديثي التخرج.

هذه تجربتي باختصار، ونصيحتي لك دامك باقي مادخلت ٢٠ سنة حتى، اطلع.. غير تخصصك لان فيه احتمال ٩٠٪؜ راح تتعب حالك على الفاضي..

الله يوفقك

 

لو بننظر للموضوع بشكل منطقي اقتصاد الدولة بشكل عام يعتمد على النفط والقطاع الهندسي ومع المشاريع الي فكل منطقة فالمملكة المفروض تكون في فرص كبيرة جدا للمهندسين لكن الواقع للاسف سيء جدا. من بعد 2020 والوضع للأسوأ بسبب الازمة الحالية والفرص حتى الان شبه معدومة وعلى امل تتحسن الاوضاع فالمستقبل القريب. اذا بنصحك بشيء هو انك توقف التردد والتشكيك لان هالشيء ماراح ينفعك ، بمجرد ماتتخذ قرار انسى المستقبل وركز على الحاضر وكون نفسك وحاول تفهم تخصصك وتتخرج بمعدل كويس وحاول تطور لغتك هالاشياء هي الي بيدك حاول تسويها بافضل شكل ممكن لانها بتحسن فرصك في المستقبل.

 

عزيزي فاهم اللي تمر فيه ..
بالنسبة للضغط فطبيعي جداً وبالعكس اشوفه شيء ايجابي لأنه يصنعك ولكن أنتبه لا تعطي الأمور أكبر من حجمها وعيش رحلة حياتك الجامعية وانت مستمتع بكل شيء تسوية ،حافظ على معدلك حافظ على معدلك حافظ على معدلك لأن معدلك هو بوابة دخولك لأكبر الشركات بإذن المولى عز وجل وحتى أحياناً كثيرة يلعب دور في سرعة وصولك لأعلى السلم في حالة تميزك في الجوانب الأخرى ،الخلاصة خل لك هدف واضح جداً تبغى توصل له وسيكون هذا الهدف هو وقودك اللي يصبرك على وعورة وصعوبة الطريق وبإذن المولى عز وجل ستصل إلى هدفك اللي تبغاه وتكون المرحلة هذي مجرد ذكريات جميلة لا تتخذ أي قرار بسبب انفعالات لحظية أو ظروف وقتية خارجية ويكون قرارك مجرد هروب من طريق وعر إلى طريق آخر تظن انه أسهل ولكن خل قرارك مدروس من جميع الجوانب واياك ان تدخل أو تأثر مشاعر اللي حولك في اي قرار تتخذة .. وقبل هذا وبعده اسأل الله التوفيق والتسديد في جميع امورك وان يهيء لك من امرك رشداً ..

 

الله ييسر امورك ويفتح عليك الخير من حيث تحتسب ومن حيث لا تحتسب لا تيأس وتاكد أن الجميل ينتظرك قدام .. واسأل مجرب " من لَزِم الاسْتِغْفَار، جَعَلَ اللَّه لَهُ مِنْ كُلِّ ضِيقٍ مخْرجًا، ومنْ كُلِّ هَمٍّ فَرجًا، وَرَزَقَهُ مِنْ حيْثُ لاَ يَحْتَسِبُ "

 

مدري هو عندكم اختبارات حاليا عشان تشطح فيك الافكار في مواضيع مالعا داعي... على العموم تصدق حتى في كورونا حصلت شغل وقاعد اكثر من مرة احصل عرض وظيفي... ما اقول لنها جتني وانا منسدح لكن هي توفيق من الله غير اني متابع مع الشركات وغير الفرص الوضيفيه الغير معلن عنها اللي جتني من خلال التواصل مع الشركة سواء ايميل اتصال او مقؤ الشركة... انت مالك شغل في غيرك وش لقى مو شرط انت زيه... انا تعبت لكن الحمدلله خريج كورنا معدل اقل 3 ومع ذلك حصلت فرص بل فيه فرصه حصلتها بنفسي رحت مقر الشركة وعرفت وش يحتاجون وتوظف 3 من اخوياي فيها مهندسين على مسماهم حديث تخرج كلهم.


وخلك من الكلام الفاضي انت منفس وما تبي تدرس وتبي اعذار نفسيه. 2019 مو زي 2020 ولا زي 2021 وانت باقي وراك مشوار ماتدري وش فيه المستقبل.

 

اهم شي شف انت وش التخصص اللي تميل له. لا تحاول تقول هالتخصص عليه طلب بسوق العمل او ما عليه طلب. لو تختار تخصص رقص شرقي اهم شي تدرس حاجه انت تحبها وتبدع فيها وتجيب معدل كويس. والوظيفة راح تجيك ولا تشيل همها.