وجدت رد محبط في أحد المواضيع (تعليقكم)

اغلب خريجين الجامعة المهندسين على مر الزمان ينجحون ويلقون التقدير اللي يستحقونه , احنا نمر بفترة صعبه اقتصاديا على العالم كله وكلامك كلام شخص محبط ويائس من هالفترة الصعبه فقط

مهنة الهندسة بجميع تخصصاتها مطلوبه وتبقى مطلوبه دايما , اتمنى لك ولكل شخص يقرا النجاح والتوفيق

 

بصراحة اخي ما أعرف ايش الغرض من فتحك لموضوع مثل هذا
مافي اي تخصص جميع خريجينه يتم توظيفهم ومثل مافي ناس للأسف يجلسوا سنه وأكثر بدون توظيف في ناس تتوظف بعد عدة شهور وايضا ممكن تلاقي اثنين بنفس المعدل تقريبا ونفس التخصص وواحد يتوظف بدبل راتب الثاني لأن الأرزاق بيد الله سبحانه وتعالى وما في احد عارف فين نصيبه لنفرض شخص عنده رغبة قوية يدرس هندسة وحاب التخصص ومستمتع فيه هل يعقل يتركة ويدرس مثلا ادارة لانه قرا شخص او اكثر كاتبين انه التوظيف في هذا المجال صعب؟ وخصوصا انه بيتخرج بعد سنوات يعني كل الاحتمالات وارده.
النقطة الأخيرة اللي بأضيفها انه اذا بتبحث عن السلبيات والنظرات المتشائمة بتلاقي واذا بتبحث عن الايجابيات واشخاص تجاربهم ناجحة لنفس الموضوع بتلاقي فالموضوع يعتمد عليك انت.

ركز على الأمور اللي تساعدك في تحقيق هدفك واترك عنك كلام الناس ولا تبني رأيك عليهم وعلى تجربتهم.

وبالتوفيق.

 

مهنة الهندسة عليها طلب والجهات والشركات لم يطلبوها شفقة ورحمة بالباحثين بل لأنهم يحتاجونها . الأرزاق بيد الله يا صاحبي وحتى من أتو بمعدلات عالية أو منخفضة لم يضمنوا مكانهم ١٠٠% والعبرة في جائحة كورونا . لا أخفيك علماً بأنني وشريحة كبيرة من الزملاء محبطين لتخرجنا في أزمة كهذه لكن ليس أمامنا سوى الإستمرار في البحث . فلا فائدة من قراءة تعليقات كهذه وغمس نفسك وغيرك في دوامة من اليأس والاحباط .

 

ردي عليك وعلى الكلام الطويل واللي كتبه بكلمه بس (( الله الرازق )) انتهى.

 

الازمة اللي قاعدين نعيشها أثرت على كل شي مو بس الوظايف وفي كل أنحاء دول العالم.

الشي الثاني: أكبر غلط انك تحط في بالك انك شخص مختلف عن غيرك فقط لانك متخرج من جامعة معينة! ممكن يجيك شخص ثاني من جامعة اخرى تعب على نفسه ويقرأ ويحاول ينمي معلوماته سواء على مستوى تخصصه او خارج تخصصه، ويكون افضل منك. اسم الجامعة يحدد وظيفتك او مجال عملك هذا اكبر خطأ.

مجال الهندسة هو مجال وااااسع وعليها طلب بشكل كبير.

الشي الاخير: مريت بفترة بسيطة قبل التوظيف وبالعكس ماكنت متحسف لدراستي او اختياري الهندسة. حطيت عندي خيارات ثانية مثل اكمال الدراسة. وطبعا وقتها كنت اشتغل كمدرس خصوصي اونلاين منها احصل فلوس وقاعد استخدم معلوماتي اللي درستها.

لاتحصر نفسك في وظيفة او شركة معينة.

 

هو تكلم من واقع يعيشه و تجربة مر فيها قد البعض يراه يبالغ بكلامه لكن مو من حقنا نحاسب احد بكلامه طالما ما اساء لاحد

اختلف معه في شي و اتفق فحاجات اخرى

اتفق معه ان وضع خريجي الهندسة صعب و دون المأمول

خلينا نتكلم عن وقتنا الحالي الان لنا اربع شهور من قرار توطين المهن الهندسية

وش لاحظتو من تغيرات ؟؟

اللي لاحظته ان الشركات كنها طفل عنيد مو مقتنع بالمهندس السعودي

بعض الشركات و المصانع استحدثو مسمى مهندس سلامة و لو تلاحظون كثير اعلانات وظايف فالايام الماضية على هذا المسمى

عشان يقولون شوفو وظفنا مهندس سعودي

و لا اقلل من اهمية هذا البوزشن لكن مو من صميم الهندسة و اصلا السيفتي كعلم مو مختص للمهندسين فقط

خريج اي قسم يقدر يروح ياخذ دورة سيفتي و يتوظف مسؤول سلامه

الفروع الرئيسية للهندسة :

- التصميم
- الانشاءات
- الانتاج و التشغيل
- البحث و التطوير

المفترض يركزون على هذي المجالات هي صميم عمل الشركات و المصانع مو كل صباح الاحق العمال

اشوف هل لبسو الله يكرمكم السيفتي شوز و الا لا !!!

 

لاتشيل هم يا أخي ..

مهنة الهندسة مرغوبة والان قرارات توطين وأقل وظيفة مهندس ب 7 الاف ريال ..

صح هناك ظروف اقتصادية صعبة نمر بها وأزمة .. لكن بإذن الله الوضع يتحسن .

ونعم ال GPA مهم جدا وكل ماكان عالي زادت فرصتك واللي اعرفه ان جامعة البترول صعب تجيب معدل عالي او حتى جيد نظرا لصعوبة الدراسة بالبترول عكس الجامعات الاخرى .. هنا المشكلة .

نظرا لصعوبة الوضع حاول تقدم حتى لو على غير تخصصك بالاخص اذا راتب عالي روح مو لازم التخصص .. روح حتى لو شركات الكونتراكت او smp فني اللي راح يكون عليها توطين ماهي مشكلة اهم شي تكسب خبرة ويكون عندك مصدر دخل .

بالنسبة للتخصصات الاخرى مثل الطب انا ما انصح فيه الا للي يحب هذا المجال فقط .
لان الهندسة مقارنة بالطب موية .. الطب راح تنكرف كرف وتجنن جنان عمرك ماشفته بحياتك .

فيه تخصصات حلوة مثل اداراة الاعمال - القانون - الموارد البشرية - الأمن السيبراني - علوم الحاسب ( هذي لها مستقبل ضخم ) والهندسة كمان مرغوبة .

 

بالبداية حاب اقول الله يرزقك بالوظيفة الي تتمناها قريب. نعم انت كخريج هندسة من جامعة البترول (بغض النظر عن المعدل) تقدر تتفوق على الكم الكبير من الخريجين ولا تشيل هم. بعض النصائح:

- اهتم بفهمك للتخصص. لما تكون مهندس كهربائي وتدخل مقابلة لازم تعرف ايش ال transformer a وانواع ال motors. والاساسيات بتخصصك.
- اهتم بلبسك وقت المقابلة. اذا بتلبس ثوب وشماغ قفل الازرار الي فوق (ما تتخيل قد ايش هالشغلات مهمة). اذا بتلبس لبس كاجوال خليه مرتب.
- اهتم باللغة الانجليزية شوي.
- شد حيلك بالمواد. حاول ما تقل عن 2.5 وحتى لو كنت اقل فيه فرص ان شاء الله
- قدم قبل لا تتخرج! لا تنتظر لين اخر فاينال اقزام.
- خلك مرن باماكن العمل.

موفقين يارب

 

من رأيي وقلته كثيييير

في السعودية مافي شي اسمه تخمه وخريجين كثييير والدليل ان بلدك فيها 13 مليون اجنبي! انت موظف عواطلية دول الجوار وبعضهم برواتب حلوة
وعدد العاطلين عندك مليون او 2 مليون بسس طبعا لو حسبنا الي منتيه اقاماتهم والمتخلفين العدد بالراحة يوصل 17 مليون اجنبي!!

عدد المهندسين للحالهم 300 الف والسعوديين منهم مايجي 10% يعني لو سعودنا كل وظايف الهندسة راح نضطر نستقدم مهندسين من برا

انا اشتغلت في اكثر من شركة بشوف اجانب بدون شهادات مسجلين بالهيئة بمسمى مهندس ورواتب اساسي 20 الف! هنود ولبنانيين ومصارية

ولاحد يقول فيه تدقيق مافي اي تدقيق واذا انكفشوا يقولولهم غيرو المهنة لفني...

بس المشكلة من فوووق

طبعا يجيك شايب اتخرج في ال70 ويوم اتخرج اعطوه ارض و50 الف (تسوا 500 الف حاليا) والشركات والحكومة كانت تقوله تعال فين تبغا تتوظف واختار..

يقولك والله لو طيرنا الاجانب مافي سعودي يشتغل عامل نظافة او سواق او بناء وغيره

حبيبي محد قال نطير عمال النظافة لان عددهم كلهم على بعض مايجي مليون او 2 مليون! باقي الاجانب فوق حاجتنا وبالامكان الاستغناء عنهم واحد المسؤولين كم مره صرح وقال بالامكان التخلي عنهم بس شكله بياع كلام...

فوق ماهم راضين يصدروا قرارات قوية لصالح الشباب الي يشكلوا الاغلبية

شباب بدأو يدخلوا سن ال30 بدون اي خبرة ولا وظيفة وبالتالي بدون زواج وتكوين عائلة

بعد 10-20 سنة راح نشوف كارثه...


المحزن المضحك المبكي ان خلال فتره كورونا لحالها وزارة العمل اصدرت مليون فيزا عمل!
ويقولك والله ازمة اقتصادية ومدري ايش!

يعني مليون وظيفة تم توفيرها لعواطلية وضحايا كورونا وانت ياسعودي يالي تعليمك احسن من باقي جامعات دول الجوار اذا اتكلمت تشوف هجوم وتخوين وقذف...



----------


ثاني شي صاحب الكلام الاصلي كل كلامه البترول البترول يحسسك ان خريجي الجامعات الثانية متخرجين من منصتي ودارسين اونلاين. الكل تعب وشقا عشان الشهادة... الله يرزقك ويوفقك وان شالله الفرج قريب.

 

ما قريت الا بداية كلامك لكن اقول لك كله كلام فاضي... اشخاص معدلات اقل من العادي من جامعات مغموره حصلوا شغل. اللي كتب ذا الكلام منضغط نفسيا ماهو واقعي ابدا... وترى من الحين مسؤولية انك تحصل وظيفة هي عليك انت شخصيا كل شيء في الدولة مهيأ انك تحصل شغل من نظام توطين وسعوده القطاعات وانشاء مشاريع في كل ديره... "الهندسة مالها مستقبل في السعوديه" الهندسة لها حاضر حاليا وان شاء الله مستقبل افضل... لكن هي مسؤوليتك انك تحصل وظيفه ولو تروح يدوي او ترسل SMS غصب بتحصل.

 

s

تراك عايش وهم ومقلب كبير في حياتك يالغالي
بالأخص نقطة أنك كخريج البترول تتفوق على الباقيين + تقفيلة الأزرار

 

لا ابدا مو ماخذ مقلب و كلامه صحيح

 

أنا أتوقع سبب سيطرة الأجانب على الوظائف الكبيرةمثل القطاع الهندسي و الصحي انو لو ترجع قبل 40 سنة تلاقي السعوديين عندما يتخرجو مباشرة يذهبو للقطاع التعليمي كونه أسهل دراسة و يصير مدرس يعني مثلا 80% من الخريجين يدخلو قطاع التعليم ( اجتماعيات , لغة عربية , اسلامي ) أسهل تخصصات و يدرس بعدين في مدرسة حكومية او خاص . فصار الطلب على الاجانب يزداد كون القطاع الهندسي و الصحي يحتاج موظفين و طبعا الاجانب الذين يتزظفو يتوارثو الوظيفة تلاقي الاجنبي مثلا قبل ما يتقاعد يوظف كم شخص من أهله . القطاع التعليمي صار فيه اكتفاء من 2010 يقول مدرس قبل قدم للتعليم 32 الف و قبل منهم 8 الاف . عندي أخ كان يتدرب في شركة سعودية كان يكلمه المديرأجنبي أن السعوديين دوامهم غير منضبط و حتى شغلهم غير جيد . لكن ميزة توظيف الاجانب :
1- الاجنبي يرضى براتب قليل لانو راتب الاجنبي يجي نصف راتب السعودي ( السبب أنه يحول راتبه لبلده فيساوي هناك أضعاف )
2 - الاجنبي منضبط بالدوام حتى لو هوا مريض و عنده كورونا يداوم
3 - حتى شغله تحسه يتحمل كرف و في نظرهم الاجنبي عنده أمانة في الشغل

 

سوبرمان مو أجنبي

 

لا ابدا. آنا درست ماستر برا وفي جامعة من التوب 50 وشفت بعيني قد ايش انا متميز كخريج بترول مب بسبب ذكائي بل بسبب الكورسات الي درستها بالجامعة.

ونقطة تقفيل الازرار هذه متاكد منها (قصة حقيقية).

شباب البترول: لا يصيبكم اي احباط او شكوك رجاء. شدو حيلكم بس والمستقبل قداكم مشرق ان شاء الله

 

الظروف صعبه , وتوكل على الله