استفسار موجه للعتيقين

وعليكم السلام ورحمة الله وبركاته
حياك الله
أولًا من ناحية تخصص علوم الحاسب او هندسة البرمجيات
انصحك اذا انت شخص لا يحب الرياضيات او البرمجة و الخوارزميات فلا تدخل التخصص لعدة أسباب
لابد ان يكون شغفك جدا عالي و مهارتك عالية بمعنى تخصص وقت يومي للبرمجة و القيام بمشاريع عملية و مهنية
شح الوظايف في المملكة العربية السعودية منذ عام 2015 في انتكاسة اسعار النفط العالمية و اثرها في توفر وظايف
لذا لا تتوقع كونك تخرجت بالتخصص بعد خمس سنوات جامعية بان تحصل على وظيفة ( مع الاسف الشديد)

اذا انت مصر على التخصص انصحك بان تتفوق فيه و تكون من افضل طلاب الدفعة و حبك الكبير للبرمجة

أما من ناحية سؤالك من جامعة الملك فهد للبترول و المعادل
فهي جامعة مرموقة و قوية عالميا و محليا و لها فرص وظيفية لخريجيها دون غيرهم

انصحك بأن اذا اردت الاختيار بين تخصص علوم الحاسب او هندسة البرمجيات الافضل كمسار دراسي و معتمد عالميا هو علوم الحاسب ،لكن يظل عليك حمل كبير التعليم الذاتي لا تتوقع بأن الدكتور او المحاضر بأن يشرح لك كل شيء في المنهج نسبة تحصيلك من الجامعة هو 20% و 80% تعتمد على دراستك و قراءتك و اطلاعك على التخصص

أحببت بأن اقدم لك لمحة بسيطة و نصيحة اخ في اختبار التخصص الانسب لك.

 

ما عندي نصيحة واضحة لكن هذي عدة نقاط لعلها تفيدك، تنم عن راي شخصي كخريج جامعة البترول في 2012 وكان عنده قبول في جامعة الملك عبدالعزيز، وشاركتها مع احد أخواني كان في نفس الموقف قبل سنتين:

• جامعة البترول حتطلعك مهندس أفضل. أفضل من خريجي الهندسة من باقي جامعات المملكة (وحتى كثير من جامعات أمريكا). خريج البترول ما يغلط في الأساسيات أو في الحسابات الأساسية وهذي يطول الحديث فيها.

• هذا الشي ما راح يفرق مع جهات التوظيف اليوم. يمكن كان يفرق في وقت من الأوقات، لكن حتى في زمني أنا قبل 9 سنين ما كان يفرق. ما راح تترشح لمقابلة اسرع بسبب أنه اسم جامعة البترول على سيرتك الذاتية. ممكن قدرتك على اثبات نفسك خلال المقابلة الشخصية حتكون أعلى، وهذا الشي اللي المفروض تراهن عليه.

توجد مفاضلة بسيطة بين خريجي جامعات المملكة عند جهات التوظيف، لكن بشكل عام البترول-عبدالعزيز-سعود تعتبر متساوية عندهم كدرجة أولى، والبكلريوس من الكليات التقنية تعتبر درجة أخيرة ، وباقي الجامعات الحكومية في النص.​

• احتمالية تخرجك بمعدل متدني في البترول اعلى بكثير. يعني نفس الشخص بنفس القدرات بنفس قدر الاجتهاد ممكن يطلع بمعدل 2.5/4.0 في البترول، و 4.5/5.0 لو راح عبدالعزيز. فيه ناس مجتهدين ويتخرجو من البترول بمعدل أعلى من 3.9 من 4 في كل سنة ويستاهلو كل خير، لكن أنا أتكلم احصائياً.

المعدل يفرق مع كثير مع جهات التوظيف.
عدد كبير من أخصائيين الموارد البشرية تجيله آلاف السير الذاتية لحديثي التخرج على كل وظيفة ولا عنده وقت يشوفها كلها، واذا ما كان عندهم خبرات ما حيقدر يميز بينهم. فاللي حيسوييه انه يرتب البروفايلات حسب المعدل ويراجع اول 200 مثلا. لو معدلك ما كان مرتفع ما حتكون من هذي المجموعة، بغض النظر عن اسم جامعتك.

المعدل يفرق بقوة في احتمالية قبولك لدراسة الماجستير والدراسات العليا. لو كانت الدراسات العليا هدف أساسي لك، ما أنصحك تدرس في البترول. تقدر تروح جامعة ثانية تضمن فيها معدل عالي وبعدها في الماجستير تروح جامعة متفوقة وتبدع هناك. هذي ماهي قاعدة وممكن تنكسر وأنا شخصياً كسرتها، وعلى العموم أنا ما أنصح بدراسة الماجستير بعد البكلريوس أصلاً أو جعل الدراسات العليا أحد أهدافك قبل دخول سوق العمل. دراسة الماجستير خطوة جيدة بعد خبرة إذا اجتمعت عدة ظروف أو احتجتها لغرض معين، لكن الدراسة لمجرد الدراسة هدف غير جيد.
​

• زي ما تفضلت، أغلب طلاب البترول يتخرجو خلال 5.5 إلى 6 سنين مع أخذ ترم صيفي واحد على الأقل. برضو ماهي قاعدة لكن احصائياً هذا اللي حاصل. هل تفضل وعمرك 24 تكون خريج بدون خبرة (اذا تخرجت في 6 سنين) أو خريج مع خبرة سنة (إذا تخرجت في 5 سنين)؟

• انشغالك الشديد مع الدراسة في البترول (عشان يالله تنجح) حيشغلك عن الأعمال اللاصفية. أقصد بالأعمال اللاصفية العمل التطوعي، النشاطات مع الأندية، العمل بدوام جزئي، الانشغال بهواية معينة، التدرب في شركة كل ترم صيفي، أخذ أو حتى تقديم دورات تدريبية. النشاطات الصفية تفرق مع جهات التوظيف اليوم أكثر من اسم الجامعة وأكثر من المعدل. وطبعا مع ادارة الوقت بشكل جيد، تقدر تدخل في نشاطات كثير حتى لو كنت طالب بترول.

• الاستقلالية عن الأهل من عمر صغير لها اثر ايجابي على شخصيتك. بعض الطلاب تقلب عليهم سلبيا بانهم يدخلو في حالة اكتئاب وتزداد عندهم الانطوائية، والبعض الاخر يفلوها بسبب انعدام رقابة الاهل.

• المجتمع المحيط بالطالب في البترول متميز. أغلب الطلاب اختارو البعد عن الاهل وترك الراحة للبحث عن التميز، ومع الفلترة حقت البترول (انسحاب أو طرد عدد كبير من الطلاب خلال اول سنتين) ما راحى يكملو الا النخبة. في نفس الوقت البترول تتميز بنظامها الصارم. مافيه شي اسمه الدكتور استقصدني او ظلمني او نفسية، وحتى لو بكيت عند الدكتور اللي رسبك برضو حترسب لو كنت تستحق الرسوب.

• المكافئة في البترول حتصرفها عشان تقدر تعيش. المكافئة عند الاهل حتحطها كاملة في جيبك او تصرفها في غير الضروريات.

• عدد التخصصات المتاحة في البترول قليل، اذا ما كانت عندك ثقة في اختيارك او غيرت رايك خلال اسنة التحضيرية.

​

 

انا رأي روح للاسهل لما تتخرج تخصص هندسي طور نفسك بالشهادات الاحترافيه وانجليزي مكثف وخذ لك ايلتس او توفل وامورك تمام

عندنا ناس بالعمل متخرجين من اردى الجامعات الامريكية بدون اي تعب ومجهود وبمعدلات عالية ومتوظفين على نفس القريد ونفس الراتب مع ناس خريجين معهد RIT ترتيبه افضل 100 على العالم