قيم تدريبك الصيفي / الكواب & بعض الأسئلة

اسم الشركة أو جهة التدريب: ارامكو السعودية
نوع التدريب : COOP
السنة : 2019
التخصص + الجامعة:
ME - Jubail University College
مكان التدريب + القسم :
مصفاة راس تنورة - صيانة معامل التكرير الشمالية
المكافأة : 4500 ريال
طريقة التقديم : الموقع الرسمي

إضافات ( مثلا : رأيك في الشركة , الإستفادة, الكورسات الي يمكن تفيدك في التدريب... ) :

بسم الله الرحمن الرحيم ، أتمنى تفيدكم تجربتي للتدريب التعاوني مع شركة أرامكو السعودية.

بفصّل الموضوع على شكل اسئلة واجوبة:

١- هل يوجد خطة للمتدرب ، وهل طبقتها ؟

نعم ، يوجد خطة بمسمى (Individual Development Plan) أو IDP يعطونها للمتدرب وللموظف الجديد فيها نقاط بالمسؤوليات والمهام الخاصة ، والحمدلله قدرت اطبقها بكل يسر بالتعاون مع الرئيس المباشر. وهنا اذكر المسؤوليات بالخطة للفائدة:

• Understand the maintenance planning & scheduling process.

• Gain basic understanding of compnay contracting procedure.

• Work with mechanical unit for hands on experience on rotating/static equipment.

• Work with electrical and instrumentation unit for hands on experience.

• Worked with plnt maintenance engineer for exposure to company international standards as well as engineering drawings.

• Work with maintenance engineer to gain the understanding of work order planning, material ordering and execution.


٢- أهم المهارات المكتسبة؟

- حضور الاجتماعات والمشاركة فيها من أهم الامور اللي حبيت ان اطور نفسي فيها ، فكنت احضر اجتماعين على الاقل باليوم بالبلانت وبالقسم والمشاركة في التحديات اللي تواجهنا كل يوم.

- مهارات التواصل بشكل عام والاندماج في بيئة العمل يجعل منك شخص ناجح بكل المقاييس.

- الأمن والسلامة وهنا فعلاً اقدر اقول ان أرامكو تشكر على جهودها في هذا المجال ، و غيرت فيني الشي الكثير سواء داخل العمل او حتى على اسلوب قيادتي للسيارة.

- التعرف على العالم الهندسي الواقعي ، كلنا ملينا من قراءة الكتب والسلايدات لكن لما تنزل المصنع او البلانت وتشوف بعينك اللي درسته وتكون قادر على الربط مابين النظريات والشيء الواقعي فعلا شي يخليك ماتندم لحظة وحدة على دراستك.

- الكورساااات تبع ارامكو Elearning ، اخذت مايقارب ٢٠ كورس مختلفة مابين السلامة واخلاقيات المهنة والهندسة ومعامل التكرير و الكثير. للأمانة انصح كل متدرب بأرامكو يستفيد من هذا الشي الجميل صراحة.

٣- كيف كانت بيئة العمل ؟

- اجابة صادقة ، بيئة ودودة جدا وواجهت ناس كثير تحب الخير ومساعدة الطلاب المتدربين والاهم من ذا ان الموظفين يحبون اللي جالسين يسوونه.

٤- وش التحديات اللي واجهتها ؟

- السوبرفايزر وكلني مهمة وهي اني كمهندس صيانة مثل الزملاء الموظفين اغطي معملين تكرير من اكبر المعامل بالمصفاة الشمالية والمسؤولة عن انتاج البنزين ٩١ و ٩٥ ، طبعا المهمة لمدة اسبوع وكنت احضر الاجتماعات يوميا بالمعامل مع الاوبريشن واسجل اعمال الصيانة المطلوبة وايضا نناقش المشاكل المتواجدة وكيفية حلها وطبعا زيارة اعمال الصيانة بالمعمل يوميا والتأكد من انجازها بالشكل المطلوب.


- تم تعييني في اخر شهر بالتدريب في اعمال شت داون لبلانت معين ، طبعا مسماها (Turnaround & Inspection) او T&I Activities ، وهي ايقاف تشغيل المعمل بشكل جزئي او كلياً لإتمام اعمال الصيانة للمعدات المهمة مثلا الهيت اكسشينجر .. الرياكتر .. البويلر والفرنس .. البمب والكمبرسر وغيرها الكثير. تجربة كانت فريدة من نوعها وهي الاهم للمهندس الميكانيكي بالذات لانك تشوف جميع المعدات والآلات مفتوحة ويتم صيانتها وهنا تكمن الفائدة انك تعرف القطع الداخلية والخارجية.


٥- كمهندس ميكانيكي وش الكورسات اللي استفدت منها؟

- اكثر مادة استفدت منها شخصيا هي مادة الكتڤ Maintenance Engineering .. فعلا كل شي درسته شفته وطبقته وانصح اي مهندس ميكانيكي ياخذ المادة ضرورية جدا ، اغلب المهندسين الميكانيكيين هناك بمسمى maintenance engineer.

- Heat Transfer ( عشان الهيت اكسشينجر اكثر شي ).

- Fluid Mechanics (pumps, compressors, turbines, pipes)


٦- كيف كانت تجربتك؟ (عطنا الزبدة)

ولله الحمد اولاً واخراً التجربة كانت ممتازة جدا والتوفيق من الله سبحانه ، واتمنى لكم التوفيق جميعاً لازم تعرفون ارامكو بحر بأقسامها وتخصصاتها لكن الكلام اللي ملحه فيه ان مصفاة راس تنورة يسمونها مدرسة ارامكو ، لان اولا اكبر مصفاة بالشرق الاوسط قبل جيزان حالياً وفيها اكثر من معمل تكرير وبالتالي المهندسين بيستفيدون جدا من اللي بيشوفونه ويتعلمونه ، ثانياً اغلبهم خبرات تفوق ال٢٠ سنه يعني ماشاء الله كيف ماتبي تستفيد.

هذا اللي كان عندي واتمنى تعذروني طولت بالموضوع لكن حبيت افيد الكل باللي اقدر واشارك تجربتي ، واللي عنده سؤال انا حاضر .. دعواتكم واتمنى لكم التوفيق.

 

نوع التدريب: Coop
اسم الشركة أو جهة التدريب : Saudi Aramco

السنة : 2021 ( Januray to August )

التخصص + الجامعة: AME - KFUPM

مكان التدريب + القسم : بقيق - Abqaiq Gas Plant Maintenance Department - Reliability Unit

المكافأة : 3500

طريقة التقديم : من موقع الشركة.

إضافات ( مثلا : رأيك في الشركة , الإستفادة, الكورسات الي يمكن تفيدك في التدريب... ) :
الشركة بشكل عام جيدة من ناحية انهم يخلونك تتعود تداوم وتطلع على الوقت وتكون منضبط وبالنسبه للاجازات مافيه واذا بيعطونك بيعطونك يوم الى يومين بالكثير.
التدريب في الشركة جدا سيء ويبغونك تداوم وتجلس وماتطلع اجازة وفي نفس الوقت ما تشتغل واذا خلوك تشتغل بيقولون لك شف الموظف الفلاني وش قاعد يسوي !!! يعني كأنك في سجن بأختصار.
بالنسبه للكورسات فيه e-Learning كورسات عامة وفايدتها تعتمد على الكورس ( حقت تضييع وقت )

 

سلام عليكم ورحمة الله وبركاتة،

شلمبرجير

تدريب تعاوني

العضيلية
مكافأة ٣٠٠٠ ريال

تفصيل :


التدريب التعاوني في شركة شلمبرجير:

اولا، لابد من ذكر تخصصي وهو هندسة ميكانيكية من جامعة الملك فهد ونوع تدريبي هو تدريب تعاوني. ايضا، لابد من معرفة انه يوجد نوعين من التدريب بالجامعات وهو اما تدريب تعاوني ( التدريب التعاوني يمتد الى ٧ اشهر ) او تدريب صيفي ( التدريب الصيفي يمتد الى شهرين فقط). قبولي بالتدريب كان عن طريق يوم التدريب في جامعة الملك فهد ( يوم التدريب هو يوم تخصصه الجامعة لاستضافة الشركات الي عندها فرص تدريب. فتجي هذي الشركات للجامعة وتكون في مبنى واحد ويسوون مقابلات مع الطلاب المرشحين للتدريب). في يوم التدريب اجريت مقابلة سريعة لمدة ٣ دقائق او اقل مع شركة شلمبرجير ومن ثم بشرني بالقبول المباشر وقلي "انت معانا ان شالله ولاتقدم ع اي احد ثاني". اسئلة المقابلة كانت عبارة عن عرف بنفسك+ ايش تعرف عن الشركة+ ليش اخترت شركتنا+ ليش ماتبغى قريب من اهلك بعدها باسبوع اتصلو واخذو معلومات بسيطة وبعدها باسبوع اتصلو وقالو تعال الفرع عشان تاخذ فورم الكشف الطبي. معايير القبول كانت المعدل بشكل كبير بالاضافة الى اجاباتك بالمقابلة مثلا قدرتك انك تبعد عن اهلك ورغبتك بالعمل بالفيلد . بعد اسبوع وشوي ارسلوا الكشف وهذا يعني اني مقبول نهائي. بشلمبرجير لايهم ماهو تخصصك، بالنسبة لنا في جامعك الملك فهد تقريبا قبلوا من جميع التخصصات الهندسية ميكانيكية، كهربائية، صناعية، هندسة طيران وفضاء، هندسة مدنية، هندسة بترول، محاسبة وغيرها من التخصصات. ولكن النسبة الكبرى للهندسة الميكانيكية. في سنتي 2019 قبلو حول ٤٠ طالب والسنة الي بعدها ٦٠ او حولها مني متاكد من الرقم. طبعا هذي الارقام خاصة بجامعتنا. الشركة تاخذ كمان من جامعة محمد من فهد، كليتا الجبيل و ينبع الصناعية. وجدت ايضا طالبين واحد من جامعة الملك عبدالعزيز والاخر من الملك سعود.



الاسبوع الاول فالتدريب:

ارسلو لنا مكان تجمعنا فالاسبوع الاول، وكان في فندق، اول ٤ ايام كان فيها دورتين بالفندق. الدوام من ٨ الى ٣ او ٤ . طبعا في سناك + غدا ع حساب الشركة. اليوم الرابع كان عبارة عن استلام الشهادات بالاضافة الى توقيع العقد و معرفة الدائرة الي سترسل لها + رقم مديرك. اليوم الخامس بيكون عبارة عن دورة عن غاز سام ومنتشر في ابار البترول وبتكون الدورة في شركة نفط بالخبر.



الاسبوع الثاني والثالث والرابع بالتدريب:


ارسلو الطلاب لدوائرهم وانا رحت لدائرتي الي هي WS وهو اختصار لكلمتين وهما Well Services اي خدمات الابار. رحت لمدير القسم فالصناعية الثانية بالدمام وكان معاي ثنين من الجبيل الصناعية متدربين. المهم المدير اقام اجتماع طارئ من اجلنا. هو كان محتار كيف يوزعنا بادارته لان ادارته تحتها ثلاث اقسام وهي

Fracturing, Cementing and Coil Tubing

المهم بعد مناقشة لمدة دقايق حطنا كلنا سمنتنق. ونادى مدير السمنت ووصاه علينا. لازم تعرفون انه كل ادارة فيها قسمين اما صيانة (تكون بالصناعيك الثانية فقط) واما اوبريشن(تشغيل ويكون عملهم فمواقع ابار النفط) .انا حطوني WS صيانة رغم اني كنت محذرهم ومتفق معاهم من يوم التدريب اني اكون بالاوبريشن. المهم الصيانة كانت عبارة عن تغيير زيوت وضرب بوية و اختبار الالات. كان دوامي من ٧ الى ٥. استمريت ٢١ يوم تقريبا وحسيت انه مافي فايدة من استمراري بالصيانة والاسباب هي:

١- مافي اي مهندس بقسم الصيانة، جميع المهندسين فالتشغيل (الاوبريشن او يسمونه الفيلد).

٢- لايوجد اي شيء مهم وممكن يفيدني بكتابة التقرير للجامعة.

٣- روتين وبيئة مش حالك ، عبارة عن بنشر

٤- عدم ذهابك للفيلد. ميزة الذهاب للفيلد ممكن يوفرلك فرصة توظيف بالشركة+ بتكون معروف بالقسم عند مدير الاوبريشن بحكم ان المهندسين بالاوبريشن فقط وبيسمعون اسمك كثير بالقسم وهذا شي ايجابي وبيساعدك بالتوظيف.

٥- لما تقدم على الشركة بعد التدريب ممكن يخاف انك ماتقدر تشتغل بالفيلد فلما تكون عندك خبرة واشتغلت بالفيلد بتزيد ثقة مدير التوظيف فيك انك مابتنسحب او بتنصدم بالبيئة و وبتتاكد فرصة قبولك ان شالله.


الاسبوع الخامس بالتدريب الى نهايته:

قررت انتقل من الصيانة الى قسم الاوبريشن و كلمت مدير الاوبريشن ووضحتله رغبتي بالفيلد ووافق وانبسط من رغبتي واصراري عشان اروح للفيلد. وارسلني لمنطقة العضيلية واتصل بالقسم هناك وكلمهم ووصاهم علي . قلي داوم بكره الصباح بالعضيلية. رحت العضيلية ( العضيلية تقريبا ١٧٠ كيلو عن الظهران باتجاه الاحساء وتبعد ٣٠ دقيقة عن مطار الاحساء). وصلت واستقبلوني و نزل المدير المناوب واخذ فيني لفة تعريفية باهم الاماكن . بعدها حجزلي سكن في سكن الحوية . سكن الحوية يبعد ٤٠ الى ٥٠ كيلو عن البيس الي بالعضيلية. سكن الحوية هو سكن لجميع شركات السيرفس وفيه كافة الخدمات سواء من وجبات ورعاية صحية ونظافة وجميعها على حساب الشركة ماتدفع شي. طبعا السكن بتروح له اذا ماطلعت للفيلد لذلك نادرا تروحله، تقريبا رحتله ٤ مرات متفرقة خلال ٦ اشهر. كل مرة رحت فيها كنت اروح للسكن العصر واطلع منه الفجر بدون رجعة. الدوام بالبيس كان ٧ ونص الصباح وكنا نجتمع ويوزعون مهمات الحقول على القروبات.

القروب يتكون من مهندس او سوبر فايزر(السوبر فايزر بقسمنا هو الي درس دبلوم او يسمونه سبشلست اذا مانسيت، بقسمنا وظيفة المهندس والدبلوم وحدة والوظيفة من الاساس المفترض يقوم بها خريج الدبلوم ، لكن المهندس يقوم بهذي الوظيفة من اجل التعليم فقط ولمدة سنتين الى ثلاث سنين وبعدها يذهب للاوفيس لوظيفته الاصلية الي هي تصميم الجوبات الي يقوم فيها السوبرفايزر والمهندس الجديد. ولكن معظم الاقسام الاخرى مهمات الفيلد او الحقول لايقوم بها الا مهندس. المهم بعد ذلك نطلع نفحص الالات او tools الي بنطلع فيها للفيلد وبنشتغل عليها. بعد مانفحصها، نشغل السيارة وعلى الفيلد (بعد الفيلد يعتمد ع المنطقة الي فيها الفيلد، بالنسبة لمنطقة العضيلية غالبا بتكون ابعد منطقة تروح لها ٤٠٠ كيلو ). اول مانصل الفيلد يتم تسجيل دخولنا للحقل و بعدها يعطونا الغرف ، بالغالب كل ٢ بغرفة. بعد ذلك المهندس يروح ويراجع البروقرام مع الكامباني مان ( هو شخص يكون من طرف ارامكو وهو يمتلك السلطة الكاملة في الحقل) لازم البرنامج الي عند المهندس يطابق للي عند الكمباني مان . بعد ذلك نبدا نلبس وننزل للموقع ونبدا نجهز الاتنا و موادنا الي بنضخها وغالبا تكون عبارة عن سمنت و بودر و ماء. بعد التجهيز نرجع نرتاح الى ان يجينا الكمباني مان ويقول يالله ابدا الجوب. طبعا الراحة مرات تكون ساعات ومرات تكون ايام ومرات تكون اسابيع، هذا يعتمد على وضع البير او العين، بعض المرات تحدث مشاكل بالبير ف ننتظر الين يصلحون المشكلة. مدة الجوب يختلف باختلاف البروقرام وباختلاف القسم . بعض الاقسام الجوب يستمر اسابيع مثل قسم الدرلنق اند مجرمنت والفراكتشر وممكن يكون عدة ايام مثل قسمنا غالبا من ٣ الى ٥ ايام و قسم الكومبليشن و قسم . المهم بعد مايكلمنا الكمباني مان نبدا الجوب والجوب بالنسبة لقسمنا عبارة عن ضخ سمنت للبئر عن طريقة وحدة ضخ وظيفة الاسمنت بالبير هو حماية البئر ويعتبر كعازل او حاجز بين طبقات الارض والبئر يعني بالعامية عبارة عن جدار ناعم وحامي للبئر . يتم خلط السمنت والمواد الكيميائية قبل الجوب و يكون السمنت على دينسيتي معينة بناءا ع برنامج الحفر ومن ثم يتم ضخها بالبئر (حساب كمية السمنت و نسب تراكيز المواد الكيميائية يتم حسابها والتاكد من صحتها عن طريق المهندس الي بالميدان + المهندس الي بالمكتب). عملية الضخ تاخذ من ٤ الى ٥ ساعات ومرات تزيد او تنقص ويقوم بضخها المهندس ويساعده الاوبريترز والمتدربين. بعدها نفصل وننظف الالات ونجهزها عشان نمشي اما لفيلد اخر او نرجع للبيس. عملية الفصل او التركيب تاخذ ٤ ساعات تقريبا قد تختلف بناءا على طبيعة تصميم الحقل. وعلى هذا الوضع لمدة ٦ شهور. طبعا بحكم انه ماعندك اجازات رسمية مثل الجمعة والسبت فبيتفقون معك على روتيشن بالغالب بتكون ٦ اسابيع دوام و ٤ اسابيع اجازة. انا ولله الحمد ماوجهت هذا الشي . الحمدلله حطوني بقسم احرجوني باخلاقهم وتعاملهم واهتمامهم ولكن ليس بغريب على اهل الاحساء. حتى مرات كنت استاذن و اكلمهم واروح الظهران كم يوم وارجع فكانو متعاونين معاي الى ابعد الحدود. بالنسبة لي كنت بعد كل ٣ جوبات اطلع الظهران اتونس لي يوم، طبعا من غير اجازتي الرسمية الاربع اسابيع الي بعد الست اسابيع المتفق عليها.


نصائحي لك كمتدرب:

اولا من اجل كتابة الريبورت للجامعة تحتاج انك تكلم السوبرفايزر انه يعطيك بعض الملفات الاساسية للمبتدئين والموظفين الجدد بالقسم. الملفات عبارة عن كورسات تدريبية للمهندس وتعلمه شغل القسم كامل من الصفر. فانت كمتدرب، خذ هذي الملفات واكتب الريبورت منها ومابتحتاج اي شي غيرها ان شالله ومايحتاج تطارد ورى المهندس. ثانيا، اذا كنت تبغى وظيفة بالشركة لابد انك تاخذ توصية من مديرك الي هو مدير القسم وليس السوبر فايزر او مراقبك لان ايميل التوصية سيرسل من موظفة الاتش ار الى مدير قسمك . الايميل فيه خانات من اجل تقييمك يعبيها المدير. التقييم عبارة عن درجات وبنهايته هل يوصى بتوظيف الطالب او لا. طبعا لازم مديرك يعرفك عشان يضبطك بالتقييم وياحبذا لو تضبطه وتاخذ رقمه وتتواصل معاه بعد التدريب. واذا عجبك القسم تقدر تكلم مديرك وتقله ابغى اكون معك لان باستطاعته يكلم قسم الموارد انهم يجيبونك لان كل مدير له الاحقية باختيار موظفيه ومن ضمن الطرق المتعارف عليها للتوظيف ف الشركة هو عن طريق التدريب على . في هذي الحالة بيقبلونك قسم التوظيف بدون اي مقابلة ولا اختبار ولا كلام فاضي. ولكن اذا ماودك تكون بالقسم فالتوصية تكفي ان شالله انها ترشحك لمقابلة مدراء الاقسام. بعد ماتقدم عليهم من جديد من اجل التوظيف بيسوون لك مقابلة مع مدراء الاقسام وبعض الطلاب قد يخضع لمقابلة اولى واختبار مثل وضعي (الوضع يعتمد على مدير التوظيف وعلاقتك فيه مثلا واحد من اخوياي ماسوى مقابلة الاتش ار وكلم مدير التوظيف على القسم الي يبغاه وعلى طول حجزله موعد مقابلة مع القسم ولكن انا قدمت عليهم من يوم المهنة وماكلمته فاعتبروني كاني ماتدربت عندهم لكن لاتشيل هم اذا وضعك مثل وضعي امورك بتتسلك وبتعدي المقابلات سلام سلام ويكفى انك عارف سستم الشركةوطبيعة حياة الفيلد). في حالة رشحوك لقسمك الي تدربت فيه و مديرك مايعرفك او مايعرفك نسبيا على الاغلب بيسوي مقابلة تسليكية معك لما تقدم توظيف مستقبلا. بالنسبة لي: قبل اروح للعضيلية مدير القسم وعدني بالتوصية + التقييم الكامل للجامعة+ الوظيفة ان كنت اريد القسم ولكن نصحني اروح اقسام افضل بكثير من قسمه خصوصا بالعائد المالي. نصيحتي لك حاول مدير الاتش ار يعرفك باي طريقة ووضحله انك راغب بالشركة واعطيه السيفي قبل نهاية التدريب وعلمه اذا كنت راغب بالعمل خارج السعودية لانهم يحبون هذي الشخصية باختصار. حاول تزوره كل فترة توضح اهتمامك بالشركة ببساطة كذا بتتوظف بطريقة سريعة . قبل اي مقابلة حاول انك تاخذ نبذة عن الاقسام الاخرى من اصدقائك المتدربين بهذي الاقسام. خذ فكرة عن طبيعة عملهم و كم مدة جلستهم بالفيلد ومتى يجون الفيلد ببداية او بنهاية الحفر او بالاستكشاف وهكذا. لان معرفتك بالاقسم راح تسهل عليك اختيارك للقسم وراح يفرق معك لما تذكرلهم معلومات مثل كذا بالمقابلات الي بتسويها من اجل التوظيف مع الشركة. لانه بالمقابلات في سؤال كامل لازم تجاوبه وهو ايش تعرف عن الشركة . فلما تبهرهم بمعلوماتك بياخذون انطباع اولي ممتاز و نظرة حلوه عنك. طبعا هذا اقل سؤال تقدر تخليه يخدمك من اجل القبول بالشركة للتوظيف. وكمان معرفتك بالاقسام تخليك تحدد ايش القسم الي تبغاه وينفعلك لانه مرات يسالك موظف الاتش ار عندك قسم تفضله او لا عشان يسويلك مقابلة معاه مثل ماحدث معاي . ساذكرها ان شاء الله بالتفصيل في مدونة التوظيف في شلمبرجير.