^^
صحيح ,, جربته في ثيرمو2 زمااان
رجال كبير بيتقاعد قريب بأذن الله

 

me311 ترم 201 "ترم الاون لاين"

التحضير : الزامي بس قلبه اختياري اخر اسبوعين
والتحضير من البروقرام تبع البلاك بورد
طريقة الشرح : الدكتور في الشرح اسطوري بمعنى الكلمة وهالشيء يشهد فيه مو بس طلابه .. حتى طلاب باقي الدكاترة من خلال متابعتهم لقناته على اليوتيوب .. ويحب يشرح المعاني الفيزيائية للقوانين وكيف نستخدم هالشغلات في العمل الميداني
الكويزات : 8 كويزات عليهم 50% وكل واحد يقول الزين عندي .. كان يشكل بين متوسط وصعب .. مشكلتها في الاون لاين يعطينا وقت اقل من الطبيعي بزيادة بحجة "لا تغشوا" .. وكانت الكويزات عبارة عن سرعه في الحل اكثر من كونك فاهم او لا.. الوقت الضيق يسبب ضغط يخليك ما تفكر مضبوط في الكويز وتغلط اغلاط ما تدري كيف غلطتها .. + بالنهاية عطانا تيست من 10% زيادة عبارة عن اسئلة قصيرة MCQs .. كان القروب بعد الاختبار عبارة عن "انا ما مداني احل الا نصه .. حليت 6 اسئلة وخلص الوقت ... الخ"
المياجر: فيه مد تيرم من 15% ومو كومن .. عباره عن ثلاثه اجزاء .. MCQs يميل للسهوله .. سؤال متوسط .. سؤال صعب ووقته قصير
الفاينلات : 4 اسئلة مستواهم معقول لكن الوقت تعبنا .. اغلب الطلاب عارفين السؤال وخابزين فكرته بس ما مدى نحله كامل
الصوت: ممتاز وواضح وشرحه عربي مع مصطلحات التخصص بالانجليزي
إضافات : الدكتور مهتم بفهمنا بشكل كبير ويتمنى لنا الخير الله يعطيه العافيه .. لكن طريقته في الاختبارات في ترم الاون لاين كانت مستفزه جدًا

 

بعد سنين من التخرج

ملاحظين ان كثير ينتقدونه حتى وهم متخرجين ؟

حبيت اختصر لكم الموضوع لمصلحتكم ، لاني اشوف كثير يمدحونه لان شرحه جيد

فعلاً هو شرحه جيد. لكن تعامله سيء

يختار كم طالب و يطبق عليهم ضغوط من كل النواحي سواء نفسية او ظلم و الخ

عشان يكونون ضحية قدام الطلاب و يخافون البقية

فقبل ما تنزل المادة معاه ، تذكر انه فيه نسبه انك تكون مظلوم و يكرهك حياتك.

 

ME 311 - Term 211

التحضير: بأول الاسابيع ماكان يحضر ، بس لما مصخوها الطلاب بالغياب + درجاتهم اللي ما اعجبته ، قام يرجع يحضر ، اخر اسبوعين ماحضر فيهم كلش ، مو مرة يهتم بالتحضير.

طريقة الشرح : يشرح عن طريق سلايداته وطريقة شرحه نفسها بالضبط بالمقاطع بالاضافة الى شوية تنكيت، مررة ممتازة ومفهومة وممتعة ويشرح باللغة العربية اكثر شي. اللي يفرق بالكلاسات عن المقاطع انه يخرج عن الموضوع ويقعد يسولف عن امور ثانية ، احيانا يطول واحيانا عشر دقايق بس. بعض الاحيان يجي ياخذ كل الكلاس سوالف عن مصلحتنا وهالامور ، وبعض المرات ماشرح اول عشر دقايق بسبب مزاجه السيئ.

الكويزات : اخذنا خمس تيستات واخذ افضل 4 منها، كل واحد عليه 5% ، كلها متوسطة الصعوبة الا واحد قال بيكون صعب وجا صعب ، الاسئلة ماتخرج عن السلايدات. للاسف الشديد انه ماعنده مرونة بتأجيل المواعيد ، وتحديده للمواعيد اذا مو الاسوأ على الاطلاق ، دائما موعده غلط. في مرة حط تيست بعد ميجر ee204 وبنفس يوم ميجر math202 ، مارضى يأجله ، بالنهاية سوا اختبار خاص لحقين 202 فقط الاسبوع اللي بعده ، ماعرف ليش ماخلاه لنا كلنا .. و احد التستات حطه بنفس موعد ميجر الثاني ل ee204+306 ، ومارضى يأجله ، ما اعرف ليش مايحطه قبل ميجر الفلويد بعدة ايام ، يزعل على درجاتنا السيئة ويقط اللوم على مذاكرتنا والسبب هو بمواعيده الغلط.

المياجر: كومن
الفاينلات : كومن
الصوت: واضح بلهجة مفهومة

إضافات : الدكتور ملك البونصات ، عادي تجمع بونصات ترفعك قريد! بترمنا كان يطلب تلخيص لمقاطعه ، اكتبها بشكل مرتب وباستخدام الوان وارسم الرسومات واضمن لك فل بالبونص. ابدا لاتضيع بونصاته.
الدكتور من ناحية الاخلاق عسسللل ويهتم بمصلحة الطالب وكله يضحك معنا ، ولكن ولكن ولكن ولكن ، اذا عصبه طالب، يقلب مزاجه سيئ وتكره الكلاس معه. هو يحب المجتهدين واللي يجيبون درجات ، كان يقول اني اكره كلاسكم لانكم ماتشاركون ويحب كلاس الثيرمو لانهم مشاركين ودرجاتهم عالية ، لكن بعد الميجر 2 لما صار افرجنا عالي وافرج حقين الثيرمو نازل ، قلب الوضع ههههههههه، صار يحب كلاسنا ويطقطق على حقين الثيرمو.
الدكتور شديد جدا من ناحية الدرجات ، ولكن تاخذ حقك بالضبط حتى بالتصحيح ، واذا كنت تستاهل زيادة فبيزيدك من عيونه ، لكن اذا ماتستاهل فمانصحك تروح له ابدا. يراقب اذا في نقل وغش بالواجبات ولا لا ، حيث احد الواجبات اعطى 0 للي نقلوا.

بشكل عام يحب المجتهدين والمهتمين ، حتى لو درجاتك نازلة ولكن تحضر يوميا وتهتم بيهتم فيك مرة، البروجكت اذا شاف جهد واهتمام عليه بيعطيك درجة حلوة توصل لفل ، اذا شاف تسليك بيخسفك.
الدكتور عليه كلام كثير ، بعد الميجر الاول حسيت بالندم اني نزلت معه، لكن بعدين تغير رأيي ، كلاساته حلوة ، صير محترم معه وبيصير محترم معك ، وبونصات توصل ل6%، مافي أحلى من كذا.

 

191 - ME204

التقييم متاخر لكن تقييمي مبني على كلام الشباب اللي قبل،

1- باختصار شديد ومفيد الدكتور عسل مع المجتهدين، ما ادري اذا غير نظامه ولا لسا موجود لكن كان يقول للشباب اللي ماوده يجي لا يجي، فمن ناحية التحضير كان يسمح لنا ما نجي بشرط نكون مغطين المادة من مقاطع الفيديو اللي اشوف انها كافية الصراحة للمذاكرة، متساهل ومتساعد مع المجتهدين في مسالة البونص مع اللي يستاهلون فكون اني كنت احضر معه السمستر كامل في كلاس الساعة 1 الظهر كان شايف هالشي مني ومن ال4 اللي كانو يحضرون معي فكان جدا متعاون بهالشي.

2- المادة بسيطة للي يتابعون معه بالكلاس ويتابعون مقاطعه، ويحترم اللي يدعون له ويثنون على مجهوده ( قناته جبارة ماشاءالله عليه ) والقناة تعتبر مصدر ممتاز للمذاكرة فلا تفرطون فيها

3- ابدا لا تحضر اي اختبار او اي كلاس له بشورت لانه يتضايق منه ويمكن يطردك بسببه

4- بشكل عام مفضل للمجتهدين وقليلين الغياب والحريصين على محتوى المادة، اسلوبه ممتاز وشرحه واضح يعاب عليه المزاجية لكن بيني وبينكم بعض الطلاب ما يمشون الا بالعين الحمرا لكن طول ما انت ممتاز معه بيكون ممتاز معك

بشكل عام الدكتور اشوفه A