موضوع الخبرة اكل راسي ومو عارف ايش اسوي

أنا جداً متفهم لوضعك وهذا شيء مر فيه كثير من الناس.. أن الشغل مو قاعد يلبي رغباتك وشغفك (بغض النظر عن المقابل المادي)

بالنسبة للتقديم على وظائف أخرى استمر على هذا التقديم ولا تيأس الفرص مو كثيرة لكن الفرصة بأي وقت ممكن تجي بعد مشيئة الله

بالنسبة وقت الدوام الي ما يكون فيه شغل حاول تستغله وتفهم أكثر في مجال المقاولات وتطور نفسك أكثر، هذا ان شاء الله يزيد من فرصك ..مجال المقاولات قوي ومهندس الميكانيكا ممكن يشتغل في أنظمة التكييف.. أنظمة إطفاء الحرائق.. أنظمة العزل الحراري.. الطاقة وكفاءة الطاقة.. الخ..

الفراغ قاتل وأنا مريت بنفس هذه التجربة في شركة كانت قوية ولها اسم في السوق.. لكن كان مسحوب علي وما فيه عمل حقيقي أقوم به لدرجة اني كنت أغيب وما فيه أحد يدري اني غبت

بالنسبة للخبرة صدقني السنوات والعمر مو كل شيء ممكن واحد يبني خبرة في 28 لكن تكون كل الي بعدها متكرر وما فيه تطور حقيقي .. ممكن واحد يبني خبرته في ال 30 أو 35 تعتمد على الظروف والشركات يفترض أنها تشوف الشخص الي يلبي رغباتها بغض النظر عن عدد السنوات .. وبعدين كثير من الموظفين خبرتهم... وبعدين أنا اشوف الخبرة الي قضيتها لها قيمة حقيقة وأكيد أنها طورت فيك بأشياء محلوظة أو غير ملحوظة


خلاصة الحديث استمر في التقديم .. حاول تستغل وقت الفراغ في الداوم سواء تعمل أشياء في نفس المجال لشركات أخرى (رسومات، تخطيط) بأجر مقطوع .. أو تطور نفسك ذاتياً وتحاول تفهم احتياجات السوق .. استهدف الشركات الي يكون فيها عمل ميداني لإن خبرتها تكون أقوى لكن أصعب


والله يوفقك ..

 

أهلا..
بس بتكلّم على جزئية الشركة الـ Start-up - كشركة/بيئة عمل، مش كمجال-.
أشتغلت في شركة ناشئة أول ماتخرجت، على علّاتها لكن الواحد يكتسب منها شغلات ممكن مايكتسبها في الشركات الكبيرة - ونفس الوضع، شغلات في الشركات الكبيرة مش موجودة في الناشئة-.

سؤال فكّر فيه برواق: وش الشغلات الي راح تاخذها معك من هالمكان؟ (مهارات soft، hard، علاقات، مسارات مهنيّة معينة فتحتها لك، ..)
ثم فكّر ، الخلطة الي طلعت بها وين ممكن تودّيك + وش أفضل الخيارات المتاحة (كمسار مهني).

شغلة ثانية: أنت الحين هندسة وخريج البترول وتجربتك العملية مختلفة/غير تقليدية، والنمط هذا بدا يتنشر ويصير له قبول، تلقى واحد خريج هندسة رايح للـ Consultation على طول.
المقصد هو أنه ممكن الوضع مش بالسوء الي تتصوره، وممكن أنه على سوءه فيه فرص أنت منت منتبه لها حتى الآن.

 

فعلا الموضوع متعب نفسيا وخصوصا لما تقارن نفسك بأقرانك والناس الي دخلوا شركات مرموقة وفي برامج تدريبية معروفة. والخبرة في الصغر مهمة جدا وهي الطريق للدخول للشركات الكبرى المعروفة. لانه الشركات الكبرى يا تقبل كفرش يا خبرة حقيقية ٥ سنوات او اكثر.
وحاليا المنافسة شديدة بين الشباب في كل مكان وكل مجال. خوفك في مكانه وتفكيرك صائب والواحد اذا ما خاف على مستقبله بيخاف على ايش؟
الي اقدر اقولك اياه كم معلومة لعل وعسى تنفعك لانه من خبرتي وبحثي اكتشفت الموضوع هذا جدا صعب وجزء كبير من المشكلة انه خارج ارادتك.

1. واصل في تطوير مهاراتك التقنية: حاول تتطور معرفتك وتوصل لدرجة شبه احترافية في المهارة المعينة.
2. ضرورة عمل اكثر من سيرة ذاتية. سيرة ذاتية تكون صايغ السيرة وتظهر قوتك كمهندس تصميم مثلا، وسيرة ثانية كمهندس مشروع مثلا وما الى ذلك. يعني سيرة ذاتية مكتوبة ومصممة لكل مسمى وظيفي انت مهتم فيه.
3. المواظبة على التقديم بشكل يومي عن طريق لنكدان وبيت. يوميا تنزل وظايف على الموقع وضروري تكون سباق في التقديم.
4. حاول تستهدف الشركات الصغيرة للمتوسطة في تقديمك، فرصة القبول فيها كبيرة جدا مقارنة بالشركات الحكومية والشبه الحكومية.
5. لا تقارن نفسك بغيرك، قارن نفسك بنفسك فقط. المقارنة ما راح تضيف لك اي شيء حاليا وبتكون سبب في تدهور ثقتك بنفسك. خصوصا الي تشوفهم يحطو مواضيع/بوستات في لنكدان عن نجاحاتهم وانجازاتهم ترى اكاد اجزم انه ٩٥٪؜ منها مبالغات وكذب. فعليا اعرف ناس قريبين مني كمثال: واحد حاط بوست انه تخرج من ماجستير من البترول وكاتب فيه اشكر مديري واشكر فلان وعلان- مع العلم اني اعرف انه مديره كان مستقعد له اصلا على دراسة الماجستير ولا كان يعطيه ايام اجازة للاختبار!! ولما سالته ليش تشكره في البوست مع انه الواقع عكس الي قلته؟ ما قدر يرد علي، وعرفت انه الكثير من الي نشوفه في لينكدان مجرد تطبيل وبهرجة.

الله يسهل لك امرك ويرزقك بالافضل ويعوض عليك

 

الي اعيشه الحين نفس وضعك للاسف، الله م كتب لي اتوظف في شركة عدلة و جتني الكأئبة فعلا والحين تقريبا معاهم 3 سنوات.

م اقول الا ان شاء الله يجي الفرج من الله.

شوف حاول تطور حالك في شي معين او تاخذ ماستر الي سنة في الجامعة يمكن تعزز لك السي في

 

لاتتكدر كثير خبرتك جميلة لكن ممكن ينقصك التسويق لنفسك

شوف شركات SMP مع ارامكوا يقبلوا خبرة ثلاث سنين وفوق بكل اريحية بس اهم شئ لغة ممتازة



فيه نقطه حاب انوه عليها بخصوص الشهادات الاحترافية حاولوا دايماً تأخذوا شهادات تكون متطلب شبه الزامي عشان الوظيفة سواءاً صيانة او تفتيش


وبالتوفيق

 

ليش انت مكتئب ومنفس !! مين زعلك .

اذا الشركة ماعندها مجال للإبداع او اي شيء تسويه عليك انت تكون بيل غيتس وتفكر كيف تبدع وتحقق نجاح للشركة . مهارتك وخبرتك وتفكيرك
راح تخلي كل شيء ناجح ! اقترح على مديرك المشروع الفلاني وقله هذا راح يسبب نجاح وأرباح . خلي عندك عقلية بديهية وثقة بالنفس .

لا تيأس من الخطأ ولا تتحطم منه و حاول مراراً وتحصل كل امورك ناجحة ان شاء الله .

 

وعليكم السلام ورحمة الله وبركاته.

شف ياطويل العمر والسلامة, اذا تبي تغير مجالك او شركتك بأسرع وقت ممكن حتى لو ماعندك خبرة, عليك بالشهادات الإحترافية والله أعلم, هذي هي الهبة حاليًا حتى لو ماعندك خبرة في نفس المجال.

حسب مافهمت منك إن عندك شهادة إدارة مشاريع, وهذا شيء جيد الحمدلله, لكن مايمنع انك تحاول تجيب كم شهادة معها, أغلب الشباب اللي اشوفهم يتنقلون بكثرة غالبًا متحركين بموضوع الشهادات وكل شوي جايب شهادة ورازها بكل مكان.

يعني كمثال, انت عاجبك مجال تحليل الأعمال, شف وش الشهادات الإحترافية اللي تُقدم بهالمجال وحاول تجيب أحسنها وتقدم على وظائف محلل أعمال وهكذا.

واذا موضوع المال مقلقك, ادخل موقع هدف وشف الشهادات المدعومة وحاول تجيب اكثر شيء مرغوب ويناسب المجال اللي تبي تستدفه.

من كلامك أشوف شغلك مافيه ذاك الضغط حاليًا, اشتغل على نفسك وقت الدوام اذا انجزت مهامك, لعلك تجيب كم شهادة إضافية ترفع من اسهمك.

وقبل كل شيء عليك بالدعاء وتحري اوقات الإجابة, وتوكل على الله سبحانه. والله يرزقنا وإياك من واسع فضله.

 

ما ألومك
الان أنا بكمل السنة الرابعة مع شركتنا الحالية و بعد كم شهر ممكن شركتنا تخرج ولا ندري وين نروح
لكن ربنا كريم و ما يضيع أحد

المقارنة متعبة متعبة متعبة جدا جدا
بالدين فقط انظر للأحسن منك
بقية أمور الدنيا انظر للي حالهم أسوأ منك وقتها بالك يهدأ و تقول الحمدلله من أعماق قلبك