نصائح لكل باحث عن عمل ..... خصوصا حديثي التخرج.

السلام عليكم و رحمة الله و بركاته

أخوكم خريج جامعة البترول دفعة 2006 معدلي 2.59/4
استمريت عاطل لمدة سنة و ثلاث شهور بالضبط و الحمد لله توظفت في شركة كبرى في السعودية.

طبعا أسباب بقائي عاطل كل هالفترة كثيرة بس المهم منها سبب واحد و هو النصيب و المكتوب من رب العالمين و التقصير لا يخلو انسان منه لكن أعتقد و بشدة أن هذا كان ابتلاء من الله سبحانه و أسأل الله أن يكتب الأجر و يغفر الزلل. طبعا يمكن تقولون ان الفترة هذي عادية مو طويلة لكن اللي اتخرج من البترول غالبا يعرف انه متوسط فترة العطالة لطلاب البترول هي تقريبا ستة أشهر و هذا معناه ان اللي يجلس اكثر من سنة يبدأ يشوف أخوياه اللي تخرجو معه و بعده حتى يتوظفون و هو يتفرج و مهما حاول الانسان يصبر لابد ما يتأثر و يجي في نفسه شي لانا كلنا بشر و الله يقول (إِنَّ الْإِنسَانَ خُلِقَ هَلُوعاً).

أول ما تخرجت من الجامعة كان التقديم عندي متلخبط جدا و كانت فكرتي اني اقدم على شركتين ثلاث و انتظر منهم رد و طبعا هذا أكبر غلط. على كل حال بعد ما كملت سنة تقريبا و ما جاني و لا عرض مع اني سويت حوالي 8 مقابلات قررت اني اجد في التقديم و البحث و المتابعة. وطلع معي هذا الجدول البسيط و اللي ساعدني جدا في الحصول على وظيفة بعد تقدير الله و توفيقه سبحانه.

بس قبل أن أعرض الجدول حاب أذكر كل من يقدم على وظيفة بعدة أمور خصوصا حديثي التخرج :



أولا: أخلص التوكل لله وحده و اعلم انه ما أصابك لم يكن ليخطئك و ما أخطأك لم يكن ليصيبك و حاول انك تحسن علاقتك بربك و خلك كل يوم أحسن من اللي قبله. و اعرف شئ مهم و هو ان الوظايف قسمة و نصيب يعني لازم تتوكل على صاحب القسمة و موزع الأرزاق سبحانه و ليس على تخصصك و لا معدلك و لا الجامعة اللي تخرجت منها و لا حتى واسطاتك لأنه أسوأ شي انك تتوكل على هذي الأشياء فيكلك الله إليها فتتورط ورطة كبيرة.....< ما في اسلوب

ثانيا: من التوكل انك تستمر في العمل بغض النظر عن النتائج فالعمل بالنسبة لك كعاطل أو باحث عن عمل بشكل عام هو انك تبحث و تقدم و النتائج عند الله سبحانه لا تفكر فيها أبدا الا في وقتها لانك بتتعب كثير اذا قعدت تفكر.

ثالثا: لا تحط في راسك شركة معينة أو حتى مجموعة شركات. لازم تقدم على كل مكان ممكن يقبلك و تحضر كل مقابلة تدعى إليها و إذا جاك عرض ساعتها استخر و استشر.

رابعا: السواد الأعظم من الشركات هذي الأيام ما تتعامل بالتقديم المباشر اللي يستدعي حضورك مع ملفك اعتقد ان هذا الزمن انتهى سواء بالنسبة للشركات أو حتى الجهات الحكومية. اليوم كل التقديم عن طريق الانترنت و بسس. لكن أهم شي في التقديم على النت هو التحديث ثم التحديث ثم التحديث. أنا كنت غافل عن هذي النقطة جدا بس طلعت أهم شغلة في التقديم لأن الشركات دائما تبدأ بالمتقدمين حسب التحديث (أو آخر تسجيل دخول) لعدة أسباب منها ان اللي ما دخل الموقع من شهرين و ثلاثة احتمال كبير انه يكون توظف فالموظف ما راح يتعب نفسه يكلمهم أكيد راح يبدأ من أول القائمة و هذا شي بديهي بس للأسف ما كنت منتبه له.

خامسا و أخيراا : في معلومات كثير من الناس ما يعرفوها و للأسف أنا أيضا ما كنت أعرفها و بعضها مهم جدا خصوصا من ناحية الخسارة المادية في السفر للمقابلات و حتى اجراءات ما بعد العرض وهو انه من حق المتقدم اللي يستدعى للمقابلة انه يعوض بقيمة التذاكر حقت السفر و تكاليف السكن بس بعض الشركات يقولون للمتقدم خصوصا اذا فيه امل ينقبل و أغلبهم يسكتون الين تطلبتهم فبعد كل مقابلة جيب معاك التذكرة و كلم موظف الموارد البشرية و قله ابغا تعويض خصوصا اذا حسيت انك خبصت في المقابلة و ما في امل تنقبل < خاربة خاربة



أعتذر على الإطالة .... الحين نجي للجدول في المرفقات





زي ما تلاحظون فيه اسماء 152 شركة مقسمه على صفحتين وحدة للشركات الكبيرة و القوية و الثانية للشركات اللي مشي حالك

و فيها روابط التقديم و تاريخ آخر تحديث (دخول للموقع) و خانتين لاسم المستخدم و الباسوورد و بعض ايميلات الشركات



و زي ما قلنا أهم شئ

التحديث

التحديث

التحديييييييث



الجدول موجود في المرفقات

حاولوا تنشرون الجدول لتعم الفائدة

و لا تنسوني و والدي و والدتي و أختي و المسلمين من صالح دعائكم


أخوكم

أبو الحسن

​

 

تسلمون جميعا

بس ياليت المشرفين يثبتون

 

الله يجزاكم خير و يتقبل دعاءكم لي و لكم و لمن يقول آمين

 

التحديث في الكهرباء هو مجرد انك تسجل دخولك للموقع حسب علمي