استشارة بخصوص رواتب المهندسيين السعوديين في الشركات؟

السلام عليكم,
أخواني أنا خريج جامعة أمريكية تخصص Computer System Engineering مع Information Assurance. الجامعة تعتبر قوية في هذا التخصص و التقييم حقها على حسب موقع US News هو 28 على مستوى الجامعات الأمريكية. في أخر سنة حصلت على وظيفة part-time و اشتغلت في الشركة لمدة سنة, كان راتبي 45 دلاور بالساعة, كان اول راتب و اقوى دخل حصلت عليه في حياتي

بعد التخرج حصلت على عرض من نفس الشركة, مع توفير اوراق الأقامة و العمل داخل امريكا. بس جاني عرض ثاني من شركة امريكية في مجال Power System Automation & Protection, بس مكان العمل يكون في السعودية - الخبر. طبعا فرحت بهذا العرض خصوصا أني من أهل الشرقية.

بعد ما أجتزت المقابلة و الاختبار, قالوا أنت مقبول ولازم ترجع السعودية. رجعت السعوية وبعد اسبوعين أتصلوا على عشان أوقع offer. انصدمت بالراتب الا هو 7000 ريال أساسي مع البدلات 8500 ريال. عطوني وعود ان هاذي بس البداية, و راح نحسن من وضعك. أنا صدقت وعودهم و في وقتها قلت خلني اشتغل و بعدين أشوف لي وظيفة ثانية.

مع مرور الأيام أكتشفت سلبيات كثيره في هاذي الشركة, اولها الادارة الي كانت تحكمها شخصيات من جنسية عربية وحده, و حاصرين مميزات الشركة و ادارتها ليهم. ثانيا, بيئة عمل سيئة معظمها هنود و باكستانية و السعوديين اقل من 5 اشخاص, و الكثير من السلبيات الأخرى الا ماراخ اذكرها عشان لايطول الموضوع اكثر من كذه.

مع كل هالسلبيات, اثبت جدارتي في الشركة و سويت تغيير كبير, لانه كثير من الأعمال الا أنا اقوم بها, كانوا يسوها عن طريق sub-contractor, لانه ماعدهم اي خبره في هذا المجال خصوصا البرمجة في أجهزة و برامج التحكم.

الأن أمضيت اكثر من سنتين معاهم, و تقييمي كل outstanding, بس للأسف الراتب كامل مع البدلات 11500 ريال سعودي. هن ما جاني أي عرض وظيفي أخر من أي شركة داخل السعودية.
مع ذلك حصلت على عرض وظيفي في شركة النفط في أبوظبي, بس خفت أطلع خارج البلد.

أنا عندي حساس أن راتبي قليل جدا, هل توافقوني الرأي؟؟
معدلي 2.93 من 4, هل هذا سبب منعني من الحصول على وظيفة اخرى؟؟
أنا كل تقديمي Online و ما خليت موقع شركة الأ وقدمت فيه, بالأضافة الى حضوري أيام التوظيف في جامعة البترول. تتوقعوا المفروض أقدم بالحضور الشخصي لكل شركة؟؟

اسف للأطالة, بس حاب أعطيكم الصورة الكاملة, و استشيركم في وضعي.

 

شكرأ يالغالي على النصيحة, بس أنا على طول أحد أحدث السي في, و حضرت بعض ايام المهنة بس لا حس و لاخبر!!!
بس بأحاول أحضر كل أيام المهنة القادمة. المشكلة الثانية الكل يفكر راتبي عالي جدا من يسمعوا اسم شركة الا أنا شغال فيها!!

 

شكرأ لك اخوي Buckeyes,
فعلا أنا ندمت كثير على هذا العرض, أكثر من عرض الشركة الأمارتية. بس الا خلاني ارجع اشتياقي للأهل و الاصدقاء و ارض الوطن المشكلة نصحوني كثير أني ارجع و اقدم قبل لاتستنفد الوظائف بس الله كريم

اخوي ويش تقصد بأني اوسع علاقتي, من الناحية وظيفتي علاقتي كويسه مع كل عملاء الشركة زي موظفين أرامكو, صداره, شركة الكهرباء السعودية. او انك تقصد اشترك في orgnizations زي IEEE و mesa.org و غيره؟؟؟

بس حلوه منك الترجمة شياطين الشمس خخهههه

 

أنت ناوي تقدم على وظيفة داخل امريكا او في السعودية؟ Part-time or Full time؟؟

لما كنت طالب قدمت اثناء الدراسة في يوم Job Fair. أنا ماكنت متوقع أحصل على وظيفة نهائيا, بس سويت كم مقابلة في لولها شركات كبيره مثل Intel و Microsoft و قالوا لي مع السلامة. بس رحت لشركة صغيره و عديت المقابلة. بس لا تستهين بهاذي الشركات, لان فيه طلاب امريكان كانوا محتاجين للريال و ماحصلوا على اي وظيفة.

بخصوص الوظيفة في السعودية,
فانصحك تقدم مع بداية اخر سمستر, وحاول تاخذا Recommendation من عند الدكاتره, او مديرك ادا كان عندك خبره حتى part time.

 

مشكور اخوي طالب ذهب,
عندي بروفايل في bayt.com و linkedin و حاليا أفكر انظم في Organizations زي IEEE بس المشكلة الاشتراك مش مجاني و يحدود 290 دولار, و مادري عن فعاليتها هنا في السعودية.. احد جرب؟؟ السؤال الثاني هل أحد فيكم اشترك membership fees في linkedIn و bayt.com و لا كل حسابتكم مجانية مثلي؟؟ اذا فيه ياليت تذكروا لي الفوائد؟؟

 

السلام عليكم أخوي أبو بدر,
كلامك جميل و يدل على أنك برفشنال, و راح ارد على بعض النقاط الي ذكرتها:
1- مسألة التخصص و الراتب اشوف ما تأثر كثير كثر مسمى الوظيفة, و غير محسومة. مثلا التقارير الأجنبية تشير الى أن رواتب مهندسين الكمبيوتر أعلى من رواتب مهندسين الكهرباء "جرب google". شي ثاني تخصيصي انا Computer System Engineer كان مشترك بين قسمين الكهرباء و الحاسب و فيه تشابه كثير في الكورسات. حاليا انا ماسك منصب Automation Engineer, نفس المنصب فيه مهندسين كهرباء.
2- صحيح الراتب زاد 2500 ريال خلال سنتين بس فيه تغيير منصب و ترقية. أخوي أنا اذكر ان الدول صرفت علي في حدود 700,000 ريال الى مليون ريال خلال خمس سنوات الدراسية. يعني اذا مارديت المبلغ في أقل من 10 سنوات تعتبر الدراسة خسارة علي و على الدولة.
3- بالخصوص الهنود و الباكستانية أنا اتكلم عن عمالة رخيصة و تقبل برواتب زهيده (السبب رئيسي وراء تمسك الشركات بهم). موشرط ديما أنك تتعلم منهم, و يمكن ما يعلموك اصلا. اما في حالتي انا تعلمت عن طريق مهندس سعودي senior بالأضافة الى مهندسين خليجيين "والله ما قصروا" و self study. و الحين المطلوب مني أعطي دورات حق بقية المهندسين الا هم هنود و باكستانية. القهر ان بعضهم صغار في العمر و ماعدهم اي خبره, وينقبلوا بسرعة و السعودي اذا جاء يزحلقوه.

أخوي انا لما حصلت على عمل داخل أمريكا, كان العمل محصور للامريكان و الحاصلين على قرين كارد. فلذلك الشركة وجهت صعوبات كثيرة في توظيفي, و طلبت تدخل محامي و اعلان في الجرايد انه مافي مواطن أمريكي عنده نفس مؤهلاتي و يبغى الوظيفة.

 

فعلا أخي الكريم, نواجه نفس المشكلة في ادراة الشركة, كلهم من جنسية وحده, و بعضهم عمره ما تجاوز 25 سنة, عنده سيارة شركة, جوال, موقف خاص, و سفريات امريكا, اليابان, و كوريا و غيره هههه. و السعودية يستخدم سيارته الخاصة, جواله الخاص, و بالأخير يرمونه بشيبه و حرض,,, و الله ظلم

 

أخوي أنا أعتقد هناك عدة اسباب لتوظيف الأجنبي و تختلف على حسب حجم الشركة و قطاعها. راح اذكر بعض منها بأختصار (هاذي مجرد توقعات):

1- في الشركات الضخمة الشبه حكومية, هناك امور سياسية حتى لو على المستوى الداخلي للشركة "خصوصا في توظيف الأجانب من دول اروبا, امريكا الشمالية, و حتى الجنوبية".
2- الثقة العمياء في الموظف الأجنبي من قبل المدراء, المسؤلين, و اصحاب الاموال.
3- النظره السلبية عن الموظف السعودي بعدم كفائته: لا يمتلك المؤهل العلمي و العملي المطلوب, عدم التزامه بالحضور و كثرة غيابه, كسول, و كثير التذمر, الخ.

اما بالنسبة للشركات الأجنبية "مثل الشركة الا انا عمل فيها" فينطبق عليها جميع ما ذكر, باالأضافة الى:
1- رخص رواتب الموظف الأجنبي, خصوصا من اذا كان من العمالة, و هاذي اعتبرها من تجارة الرقيق. يعني حتى لو كان هذا الموظف, المهندس, او العامل لايملك المؤهل المطلوب, هم يعتبر مطلوب للسوق السعودي.
2- سهولة تسريح و ترحيل الموظف الأجنبي اذا اضطرت الشركة.
3- بعض المسؤلين في هذه الشركات هم من الاجانب "المرتزقة", هدفه سلب نعم و خيرات هذا البلد. فيعمل داخل هذا البلد لمصالحه الشخصيه فقط, و لمصلحة غير اهل البلد. يعني راح تشوف يوظف اقاربها, او من جنسيته. يذمر الموظف السعودي بأي طريقة ممكنة. فوق ذلك تشوفه يعيب وطننا و اهلنا. يقولك السعودية فيها كذه و كذه وووالله قهر
4- ........ الخ.

للأسف فهناك من يروج لهذه الأسباب و الأعذار لخدمة مصالحه سواء من الأجانب أو بعض السعوديين. و اتمنى من الدولة و المجتمع التصدي لهم.

صحيح الي ذكرته مجرد تحليلات شخصية, الا ان عندي ثقة ان ماذكرته مقارب للواقع. فعودتي للبلد حاملا شهادتي من جامعة رفيعة المستوى, خبرتي العلمية و العملية لم تشفع لي في الحصول على وظيفة مرموقة.

اما عن مسألة التهميش فلم تواجهني ابدا. بالعكس انا حاليا أقوم بتدريب المهندسين الجدد. فعندي خبره عالية في بعض الاجهزه و البرامج التي تحتاجها الشركة. بس هذه الخبره اتعبتني و صار معظم المدراء يتكلون علي في معظم المشاريع .