أحسد طلاب البترول الحاليين على هالمنتدى

السلام عليكم،

انا درست في البترول سنه وحده بس اللي هي التحضيرية في عام 1998 وهربت بعدها للدراسة في الخارج. وقتها ماكان فيه انترنت اصلا توها داخله البلد .. كنا نسمع عن الانترنت ونشتري كتب ماهي الانترنت .. سمعنا عن انترنت كافيه في البحرين وصرنا نروحله .. حتى مواقع ماكان فيه ذاك الوقت الا مواقع الشركات الكبيرة بس والايميل والتشات فقط. وبعدها فتح كم انترنت كافيه بالدمام لازم بالحجز وببطاقة الاحوال واذا انتهى وقتك تقوم غصب عنك عشان اللي بعدك يقعد.

المهم يوم شفت هالمنتدى وكمية المعلومات اللي فيه قعدت افكر كيف كانت ايامنا واكيد اللي قبلنا كانت ايامهم اصعب واسوأ. كان كل شي على عمانا وكل شي عشوائي ويوميا تصادف مفاجئات سواء من اجراءات او امتحانات.

كان تسجيل المواد هذا فيها مراكض من مكتب لمكتب لمدة كذا يوم كأنك تقدم على بطاقة احوال جديده (طبعا حاليا حتى بطاقة الاحوال صارت سهلة اجراءاتها). دخلنا الجامعة واخذنا مواد وجتك مشكلة جديده انك لا تعرف كيف الامتحانات ولا كيف تجي الاسئلة وانت وحظك اذا تعرف واحد يعرف واحد يعرف معلومة. حتى الهوموركات كانت ازمة فعلية. بعد كذا جت سالفة المعدل GPA اللي ماعرفنا كيف ينحسب الا متأخر. صراحة كنا في ضياع مابعده ضياع ويمكن قلة المعلومات والتواصل كانت سبب في فشل ناس كثير في الجامعة.

اما حاليا بوجود هالمنتدى بكمية هالمعلومات وبكمية الشباب اللي ممكن يردون على اسئلتك المفروض انه ماباقي عليك الا انك تجتهد وتركز في دراستك واذا عندك سؤال غالبا في احد هنا بيجاوبك ومافيها مراكض بين دواير ومكاتب الجامعة. ليت هالمنتدى كان موجود قبل 20 سنه كان تغيرت حياتي يمكن.

بالتوفيق لكم جميعا.