أي استفسار عن أسواق المال

بسم الله






هذا الموضوع لتحريك القسم شوي ،،

أي شخص عنده استفسار او يحتاج استشاره عن اسواق المال يسدحه هنا وان شاء الله انا وباقي الاخوان بنحاول نجاوب عليه. أي سؤال يدور براسك بس ياليت مايكون عام مره مثل "كيف اربح بالسوق؟ "

الموضوع يشمل كلل اسواق المال والاستثمار فيها والتحليل بجميع انواعه ، وأما اللي عندي خبره فيه أو خلونا نقول معلومات فيه هم سوق الاسهم السعوديه وسوق العملات العالميه "فوركس" ،، وعندي بعض "الشطحات" بسوق الاسهم الامريكي ..







أخيرا ،
فيديو لاصدقائنا الـمهتمين باسواق المال والمحللين ،،

http://www.youtube.com/watch?v=MwKYjZ_8EcE&feature=youtu.be

​

​

 

ماهو توصيات بحد ذاتها لكن اذا ودك ندرس شركه ونشوف مستقبلها واستثماراتها واللي ممكن يفيد حتى الموظفين بحكم ان هالمنتدى حق طلاب وموظفين او على الاقل مستقبلا ، ومثلك عارف بعض الشركات تعتمد على ارباحها ومدخولها السنوي بتوزيع البونص السنوي . واما اذا ودك توصيات فيه منتديات متخصصه بهالموضوع وافضلها "هوامير البورصه" وبيني وبينك غلط احد يعتمد علي غيره "توصيات من غيره" بالتجاره بدون علم!

شكرا على المشاركه

 

وعليكم السلام والرحمه ،،

شكرا على المشاركه اخوي وهذا الموضوع ماكتبته الا عشان اجاوب علي الاسئله فاخذ راحتك ،، وترا انا بعد تخصصي هندسه كهربائيه وهذا الشي ماجاء الا من اهتمام وحب لا اكثر ولا اقل .

نجي لسؤالك ،
أول شي لازم تعرفه واللي ممكن مايكون اللي تبحث عنه ، لكن في كل اسواق المال "اسهم ، عملات ، ذهب ، نفط ، مشتقات وغيره وغيره بأي مكان ،، السعر "الارتفاع والنزول" يعتمد ببساطه على العرض والطلب .. اذا زاد الطلب ، زاد السعر ،، واذا زاد المعروض قل السعر ،،،

واما اللي تبحث عنه اتوقع هو ايش اللي يخلي سعر السهم يرتفع او ينزل ،، أو خلنا نقول ايش اللي يخلي الطلب يزيد او يقل على السهم .. وهذي طبعا عوامل كثيره وبحر وعشان تدرس هالعوامل لازم تكون عندك على الاقل اساسيات الاقتصاد والماليه والمحاسبه.. بالعربي حتى بعض الجامعات تعتبر تخصص الماليه كله عباره عن دراسة لسعر السهم "السلعه" والعوامل المؤثره عليها وتبعيتها.

خلنا ناخذ شركة ابل مثلا ، بصوره سريعه اقتصاد الدوله "امريكا" ككل يأثر على انتاج وارباح الشركه ،، ايضا القطاع والصناعه اللي تندرج تحته الشركه ، هنا مثلا ابل تندرج تحت قطاع السلع الاستهلاكيه وتحت صناعة المعدات الالكترونيه!!

عشان مايطول الكلام عوامل كثيره تأثر على سعر سهم الشركه من اقتصاد الدوله "الكلي" الى متوسط دخل الفرد وأي شي بينهم!!

ولكن كامحلل وناوي تضارب او تستثمر بسهم الشركه فادراسة القوائم الماليه وتحليلهم فنيا كافي ، يعني مثلا تشوف ارباحهم هل زادت؟ فيه توسع او زيادة انتاج؟ هل الديون قلّة؟ هل فيه منافسين؟ ،، هذي الامور هي اللي تخلي الشعب يزيد طلبهم على الشركه فلذك يرتفع السهم ..


اعتذر اذا كان جوابي ماهو اللي تبحث عنه لان السؤال كبير مره

 

شكرا علي الاطراء والدعاء ، الله يسعدك ياشيخ.

سؤالك مرّه حلو وجميل ،، احترت ماادري منين ابدأ لان هذا السؤال سمعته كثير. عموما ،

انا اشوف السوق السعودي ممتاز كاخيار استثماري ويعتبر سوق ناشيء وفيه فرص ربح كثيره للي يعطيه وقت ويتعب. طبعا السوق السعودي فيه لعب او خلنا نقول اغلاط ولكن ترا كل اسواق العالم فيها تلاعب وبامريكا فيه تلاعب "منظّم" بعد!

وبرضو نفس الشي ينطبق على الهوامير. في كل سوق في العالم فيه هوامير وللمعلوميه مصطلح هوامير ماتعني امير او شخص كاش بحد ذاته ، هي مصطلح لشخص او مجموعه عندهم سيوله عاليه تأثر على السهم اللي يدخلون فيه ، تشمل الامراء ورؤوس الاموال وتشمل صناديق الاستثمار والبنوك وهذا الاغلب وايضا تشمل قروبات "واتساب مثلا" يتفقون مع بعض وهكذا!!


التحليل عموما قسمين تحليل مالي وتحليل فني ،، وكل واحد مكمل للثاني ويجب ان لا يتقاطعان وهم مثل ماتقول وجهان لعمله واحد ،، وهذا الشي اللي مايفهمه الكثير وتلقا البعض يقول الهامور والمعلومه اهم من التحليل..
طيب خلنا نشطح شوي،
-التحليل الاساسي "المالي" باختصار وبالعاميه وهو دراسة العوامل اللي تأثر على السعر يعني دراسة القوائم الماليه وارباح الشركه وثقة المستثمر والديون وغيره ،،، "فلسفة هذا العلم هي ان هذي العوامل هي السبب اللي يصنع التغير في سعر السهم"
-اما التحليل الفني وهو عباره عن علم احصاء ومعادلات رياضيه "فلسلفة هذا العلم وهي انه انا عندي السعر يقول لي كل شي عن الشركه وما احتاج ابحث عن الاسباب والسعر يعكس وضع الشركه كاملا ، من قوانين هذا العلم هو ان التاريخ يعيد نفسه"

الجزء الاهم:
الجزء الاهم مثل ماقلنا وهو انهم لايتقاطعان ، يعني مثلا بعد ماسوينا تحليل فني لسهم تبين ان السهم راح ينزل او انه قاعد ينزل وراح يكمل نزول ،، ولكن طلعت معلومه وهي مثلا ان الشركه راح تزيد رأس مالها وتقسم الاسهم !! هنا خلاص صار حدث "أو خبر" كل القوانين تتغير وبالغالب راح يرتفع السهم ،، باختصار التحليل الفني ناجح على ان لايتضارب مع التحليل الاساسي.



نجي للجواب على سؤالك:
طبعا يمديك تتبع صانع السوق او الهامور واكون معك واقع هذي هي اللعبه والشطاره ، انا اعتبر التحليل الفني مثل تتبع الاثر ، تحاول تشوف وين اتجاه الشخص باقرب وقت وتمشي معه لين البيت او المكان اللي موجه له!! قسم كبير من التحليل الفني يدرس الجانب النفسي وهذا شي مهم ، الحين الهامور تلقى عنده ملايين الاسهم مايقدر يبيعهم مره وحده تلقاه يضطر يبيع شوي شوي عشان محد يقفطه ويبيع قبله ويطيح السعر ، وهنا تكون اللعبه ويصير مثل ماتقول تهريب للورق وانت عليك كشفها!!


اعتذر عن الاطاله تحمّست شوي
​

 

ابو عابد بحاول اعطيك مثال حي كيف ان التحليل الفني مهم جدا وبدون مانجهل جانب التحليل المالي.

هذي شارت سويته لشركة نادك ،




بحاول اشرح الطريقه ببساطه ، طريقتي تقول باختصار انتظر الى مايصير الخط الاخضر فوق الخط الاحمر وبينهم مسافه تعتمد على تذبذب السهم وهذا بدا عند السهم الاحمر، وبعدها انتظر الاختبار "الدائرة الحمرا" كاتجربه اولى واتأكد ان السعر يحترم المنطقه اللي بين الخط الاخضر والاحمر. حلو ،، الطريقه تعتمد علي ان السعر يدخل في المنطقه بين الخطين ويرجع يرتفع "مثل منت شايف بالرسم" وغير كذا لازم يعطيني السعر اشاره ثانيه وهي شمعه تشبه المطرقه او الشاكوش "اللي في المربعات الحمرا" وهذي تقول لك يالله ترا السهم بيرتفع ،،

لو تلاحظ هنا اني ماجبت طاري الشركه ابداً او اي شي عنها ، كل مافي الموضوع هو فن تحليلي لشارت السعر ... بس فيه شغله ثانيه لو تلاحظ عند المربع الاحمر الايسر ، السعر بدا ينزل زياده والخطين الاخضر والاحمر قربوا من بعض وكنت تقريبا اقول ان النموذج بيفشل ،، بس تدري ايش صار هنا؟ هوامير كان عندهم علم بان الشركه بتزود راس مالها فاعشان كذا قاموا يبيعو عشان ينزل السعر ويبيعون الناس ويرجعون يشترونها الهوامير بسعر رخيص ،، وللي عرف الموضوع وماباع شف وش حصّل! خلال شهر تقريبا السعر ارتفع اكثر من 12%

باختصار تحليلي كان صحيح ولما جاء خبر زيادة راس المال "تحليل مالي" أكد ان تحليل صحيح ولو صار فيه اغلاط بسيطه هي بفعل الهوامير عشان يطردون العالم!!


ان شاء الله اني وضحت شوي مع اني عارف اني من جنبها بالشرح



​

 

ماعندي علم اكيد بما اني ماني طالب ماليه ولكن مااتوقع انه فيه كورسات ، واذا فيه شي ولو بسيط يكون بمادة الانفستمنت. أنا عندي استعداد اسوي دوره عن التحليل الفني للطلاب!

واما بخصوص المصادر فهي عد واغلط ، التحليل الفني له مدارس كثير وبحر بحد ذاته وكلّن ياخذ الاسلوب اللي يعجبه وكلّن له طريقته الخاصه في التحليل لأنه ببساطه عباره عن فن!!

المصادر يعتمد اذا كانت اللغه الانجليزيه تسعفك فوضعك بالسليم وبتتعلم كل شي واما اذا كان ودّك بالعربي فا انا اذكر ان فيه كتاب عربي بسيط جدا لكن يعتبر بدايه حلوه وانصح فيه للي ماودّه انجليزي ، عطني خبر وانا ادور لك الكتاب واجيبه لك.

اما اذا ماعندك مشكله باللغه وودك تدرس الاساسية واصول التحليل فأول شي واكيد مايختلف عليها اثنين هو دراسة كتاب جون مورفيtechnical analysis of the financial markets -john murphy فهو الاب الروحي للمحللين الفنيين ، كتابه هذا ترجم يمكن لكل لغات العالم ومنها العربي بس مشكلة الترجمه تحسها شاطحه شوي!!

واما اذا ماودك بالكتب والقلل مثلك عارف الكتب اللي عندنا مسويه غثاء بلحاله ، فا فيه موقع انا انصح فيه وبقوه وهو برضو يعتبر بداية بس ولكن يشرح بااسلوب خفيف وينهضم
http://www.babypips.com/school
طبعا راح تلاحظ ان الموقع يتكلم عن التحليل الفني لاسوق العملات "فوركس" ولكن ماعليك التحليل هوا هوا للاسهم والعملات مافيه الا اختلافات بسييييطه جدا مامنها خوف !!


اتمنى اني افدتك
​

 

كلامك صحيح وهذا هو التحليل الفني وله مدارس واساليب كثيره منها "النماذج السعريه" او الـchart patterns واللي منها الكوب والعروه ، المثلثات ، والرأس والكتفين وغيره وغيره ،، كلها نماذج اذا تكونت تساعدك بتوقع اتجاه السهم وهذي جت من مبدأ ان التاريخ يعيد نفسه ،،، ناس زمان لاحضوا انه مثلا كل ماتكون نموذج الكوب والعروه يرتفع السهم بعدها وهذا مثال ،




وايضا صدقت فيه اسهم مضاربات وفيه اسهم استثماريه وايضا فيه مساهمين يعتبرون مضاربين وفيه مساهمين مستثمرين ،،،

المضاربه هي الدخول والخروج من السهم بمده قصيره تكون من ساعات الى اسابيع بهدف الحصول على ربح بسيط وسريع، والمضاربين دائما يدورون اسهم المضاربات اللي تكون الكميات والتذبذب فيها عالي يعني تحركات السعر سريعه مثل قطاع التأمين مثلا.
الاستثمار هو الدخول وعدم الخروج من السهم الا بعد مده طويله وبأهداف تكون كبيره ، وتلقى المستثمرين يبحثون عن "اسهم استثمار" وهي اللي تكون ثقيلة الحركه وتقريبا سعرها يكون فيه معدل ثابت وبالغالب المستثمر يربح من توزيع الارباح السنويه وتقسيمات الاسهم مثل شركة الكهرب الحين تضمن لك حتى عام 2019 انها تعطيك ٧٠ هلله مدعومه من الحكومه عن كل سهم تملكه سنويا ، يعني لو معك مليونين ريال وتحطها بشركة الكهرب ، الدوله تضمن لك يجيك سنويا ١٠٠ الف على الاقل غير الفارق السعري يعني تقريبا بيطلع لك من ١٥٠ الف الى ٢٠٠ الف ريال سنويا وانت قاعد بالبيت بلا عقار بلا هم ​

 

للمعلوميه ،

نظره سريعه لموارد الاستثمار <<يبي لي افتح شركة استشارات

مثل مالجميع عارف ، افضل استثمار في السعوديه حاليا هي في العقار او الاسهم ،،

العقار مثل ماهو معروف دخله السنوي يتراوح من 9% وهو المينيموم الى 10% في الظروف الطبيعيه الى 12% و 13% في افضل الظروف يعتمد على المجال والموقع ،،

لكن تعال شف نسبة المخاطره بالعقار حاليا ومثل ماهو معروف ان العقار الحين متضخم جدا ووصل اسعار فلكيه وهو حاليا في القمه لذلك انا اشوف ان المخاطره عاليه ..

اما الاسهم حاليا وخلال الـ8 سنوات متوسط الدخل السنوي لها هو تقريبا 13% ويمكن يوصل الى 56% وممكن ينزل الى سالب 28% يعتمد على نسبة الخطوره ،،،
والحين العالم كلها والصناديق متوجهه لسوق الاسهم بحيث انه سجل ارتفاعات حلوه وتقريبا وصل الـ9000 نقطه وفوق هذا تم الاعلان عن السماح للمستثمر الاجنبي بالدخول في السوق وهذا يعني سيوله اعلى وارتفاعات اكثر ،،


لكم الحكم ​

 

أضافه ،،

فيه واحد من الشباب سأل سؤال وقال وش راح يصير لو انفصل الريال عن الدولار؟ وجاب هذي الصوره ،،




انا متأكد ان فيه طلاب هنا افهم مني بهالموضوع بكثير ولكن حبيت اني اطرح جوابي لهالسؤال المهم جدا برأيي:


شوف ياخوي سؤالك مهم وجميل .. انا مانيب خبير ولكن من وجهة نظري ان التحليل صحيح وواضح انه تحليل شخص خبير ،،،

طبعا انفصال الريال عن الدولار شي مهم وترجع فائدته للمواطن والوطن واعلم ياعزيزي ان حجم الاقتصاد السعودي الان هو تقريبا ٢ ترليون ريال ولو تم وانفصلنا عن الدولار فابحسب الارقام ان حجم الاقتصاد السعودي راح يوصل ل ٩ ترليون ريال .... طيب ليش ماننفصل؟ طبعا في أمور تكون سياسيه ولكن هذي تمثل ١٥٪ من الموضوع والباقي وهو اساس المشكله في اقتصادنا هو ان الدوله ماعندها قاعده انتاجيه !!

عشان الدوله تنفصل لازم تكون دوله منتجه ومانعتمد على النفط فقط واللي يمثل ٩٢٪ من دخل الدوله مثل ماقلت ،،

طيب لو انفصلنا وش بيصير "وهذا شي صعب الصراحه"؟

اللي بيصير وباختصار وبدون الدخول في التفاصيل وهو ان كل دول العالم اذا بيشتروا بترول لازم اولا يشتروا الريال ،، حلو ، وبعدها راح يزيد الطلب على الريال وترتفع قيمته لان كل هالعالم يبونه ، وعشان الدوله توفي هالطلب الزايد راح تضطر انها تشتري سندات حكوميه مثلا بسعر مرتفع عشان تضغ الاموال في نظام الدوله الاقتصادي ،، وبعدها راح تقل فوائد البنوك "لأن عندهم فلوس كثيره" فاراح تزيد الطلبات على القروض لان الفائده قليله ،،،،، واذا الشعب صار عندهم اموال من القروض راح يبدأون بالشراء ونبدأ رحلة التضخم الى ان مانصل لمستوى عنده تجي الدوله وتبيع هالسندات مره ثانيه بسعر منخفض وترفع الفائده عشان تقلل الاموال وهكذا وهذي هي سنة الحياة ،،،،، ولكن السر هنا واللي يلاحظه الاقتصاديين اننا راح ناخذ وقت طويييييل جدا على مانبدأ بالتحرك باتجاه التضخم الحقيقي وهذا لان نسبة الفقر والبطاله بالسعوديه عاليه واذا تم ضخ الاموال لهؤلاء الفئات راح ياخذوا وقت على مايصلوا للمركب اللي حنا راكبين فيه للاتجاه للتضخم وطبعا هذا شي طيب وجيد!!!!

ان شاء الله اني قدرت اجاوب ولو جزئيا ،،، واخيرا انا حبيت اوضح بان ابدااااااا مافيه مقارنه مع اقتصادنا واقتصاد الكويت !! السعوديه عندها امكانيات ضخمه جدا جدا جدا جدا لاتملكها اي دوله بالعالم ولا حتى الصين مقارنتا بحجم الاقتصاد ولكن تدري وين المشكله وأساس البلى هو سوء الاداره وبس​

 

رد علي يبي توضيح اكثر و يسؤال ثاني وهو ماذا لو انخفض سعر النفط؟

جوابي ،،،

اسمح لي اوضح هالنقطه من جانب بسيط جدا برغم ان الموضوع معقد ويصعب الدخول فيه بدون مرجعيات اقتصاديه طويله ... المهم سؤالك ذا ياعزيزي ماذا لو انخفض سعر النفط؟ المفروض يوجه للدوله حاليا بما ان اقتصادنا يعتمد على النفط بايراداته بنسبة ٩٢٪ وهذا رقم مهول ومرتفع والذي يجعل اقتصادنا اقتصاد اعرج!! باختصار انت كل دخلك من النفط يعني اذا انخفض ، انخفض دخلك!!

طيب والحل؟

الحل لو فرضنا اننا بننفصل من الدولار وان يتم بيع النفط بالريال "وهذا حقيقتا امر صعب جدا" ،، حنا عشان ننفصل لازم يكون عندنا قاعده اقتصاديه وانا اقول ان الاعتماد على النفط لايجب ان يزيد عن ٥٠٪ من دخل الدوله ... كيف؟ عندك سابك مثلا تنتج مواد اوليه مهمه جدا جدا وتستخدم في كل شييييي ،، ليش مايتم انشاء مصانع تاخذ هالمواد من سابك ويتم تصنيعها مثل مصانع سيارات طائرات وغيره وغيره؟ ليش نبيعها على الصين وغيرها؟ اما في البلد وهذا طبعا راح يرجع للمواطن بالفائده بفتح الوظائف وفرص الاستثمار .. او اقل الايمان يتم انشاء مصانع "سعوديه" في دول مثل الصين اللي تكلفة الايدي العامله رخيصه نسبيا ،،،،
حاجه ثانيه ومهمه برضو ، الطاقه الشمسيه !! هل تعلم ياعزيزي ان محطة لانتاج الطاقه الكهربائيه بالطاقه الشمسيه توفر وظائف دبل ٩ مرات عن ماتوفره محطات الطاقه العاديه!! وفوق هذا كله التكلفه الانشائيه لمحطات الطاقه الشمسيه اقل او تساوي التكلفه الانشائيه والتشغيليه للمحطات العاديه؟!! وفوق هذا كله تدري محطات الطاقه الشمسيه ماذا تحتاج للصنعها؟ تحتاج "تراب" لان محطات الطاقه الشمسيه عباره عن لوحات سيلكون واللي تتوفر بالتراب واللي ماشاء الله مثل ما انت شايف متوفر عندنا .... وغير هذا برضو ممكن تفتح مصانع لانتاج هذي الالواح وتبيعها وهذي طبعا راح توفر وضائف بالملايين من وضائف تشغيليه وبحثيه؟؟!!!
هل تعلم ان السعوديه هي اكثر دوله بالعالم "رقم واحد" ومافيه اي دوله تقاربها في جاهزيتها لانشاء محطات طاقه شمسيه! قل ليش؟ لان السعوديه في منطقه اسمها الحزام الشمسي واللي تكون الشمس متركزه فيه وتصل اشعة الشمس للسعوديه لمدة ٢٥٠ ساعه في الشهر كامتوسط في السنه "شتاء وصيف"!! وعندك تراب وفير وببلاش!! وفوق هذا كله مافيه اي مشاريع للطاقه الشمسيه ،، المانيا والصين هم المتصدرين بهذا المجال وهذا والمانيا الشمس ماتطلع عندهم الا بمعدل ٨٪ من شمسنا!!! ولا عندهم تراب مثل ماعندنا ،، مع هذا تلقاهم الاوائل في هذا المجال ! ليش؟ عشان مايعتمدون علي نفطك ويصيرون تحت رحمتك!!



طال الكلام وانا اعتذر ولكن تحمست لاني عملت بحث عن هالموضوع وعندي بعد امور اكثر واكثر!! باختصار مثل ماقلنا السعوديه عندها امكانيات ضخمه جدا ليتهم يستغلونها وعندها لو ينزل البنفط لين يقول امين ماراح يأثر علينا!! هل تعلم ياعزيزي بان صندوق النقد الدولي توقع بان سعر النفط سيصل ١١٠ بعام ٢٠١٥ "شف سعره الان بالضبط مثل ماتوقعوه" وايضا توقعوا بانه راح ينزل الى ٦٨ دولار في عام ٢٠١٨ الوقت بيننا ...​