إستفسار حول السكن الجامعي

السلام عليكم و رحمة الله و بركاته

بإذن الله تعالى انا راح اتخرج هذا الفصل او الترم الصيفي.
روميتي تخرج الفصل اللي راح و حاليا حطوني بِقائِمة الفُرادى

سؤالي هو:
هل تسمح إدارة الإسكان بأن ابقى بلا روميت إلى نهاية هذا الفصل؟

السؤال الثاني هو:
هل تسمح إدارة الإسكان بأن ابقى بلا روميت إلى نهاية الترم الصيفي؟

حاليا نزلت 18 ساعة بس عشان اتخرج ذا الفصل
اذا يسمحون إني اضل فرادى إلى الصيف ممكن أحذف مادة Elective و أخليها للصيف
و إذا ما يسمحون مرة وحدة الله يعين على اللي يجي منهم

 

سبحان الله كنا ادري انهم بينقلوني

طبعا انا ما شفت إسمي بقائمة الفرادى بالبورتال اللا بتاريخ ٨ يوم الاربعاء من الاسبوع اللي فات.
من قبل ما كان موجود

عموما رحت لهم من شوي و قالوا لي راجع المدير يوم الاحد و قال انه تقدر تكون فرادى اذا كنت خريج هذا الفصل
اما اذا بستمر للصيف ممنوع اكون فرادى

طبعا سألتهم عن المكتوب بالورقة انهم بينقلوني بكرة قال الموظف مستحيل

ما ادري اصدقه ولا اصدق الكلام المكتوب بالورقة؟

 

فقط للفائِدة
إذا كان الطالب بآخر فصل دراسي, بإمكانه البقاء فُرادى عِند تخرج زميله.

الخطوات:
بداية تروح إدارة الإسكان و بعدها إلى السكرتير. بتحصل لدى السكرتير ورقة تكتب بها خطاب.
هذا الخطاب توديه مركز التوجيه و الإرشاد. بالنسبة لي ما وديته بنفسي. رحت اليوم الثاني و شفته موجود معهم.
بعد ما تروح التوجيه, تدخل على المدير و تقول له اسمك و بيطلع الخطاب اذا كان معه. طبعا بيسألك بعض الأسئلة.
مثلا هل انت مدخن وغيره من الاسئلة
طبعا بعدها بيكتب كلام بالخطاب و يقول لك رجعها إدارة الإسكان. طبعا ممكن ما يعطوك إياها و يودونها هم فإنت عليك تشييك على سكرتير إدارة الإسكان اليوم الثاني.
الكلام المكتوب بالخطاب هو هل مسموح لك او لا و الفترة اللي تكون بها فرادى. طبعا مُعظم الاحوال بيقبلون انك تكون فرادى دام انه آخر فصل.
و شي أخير, عادةً الفترة تكون شهر و عليك تمر إدارة الإسكان من جديد الشهر اللي بعده و تخبرهم انك تبي تضل لحالك بالغرفة و إلا بيجيبوا لك واحد او بتشوف روحك مع احد بدون اي إنذار.

بالخطاب إكتب اي شي تبي تكتبه. طريقة مذاكرتك, عدد ساعاتك ليش تبي تكون فرادى و اي شي تحس انه ينفع كسبب عشان تكون فرادى.

طبعا الأفضل إنك تروح لهم قبل فترة دمج الفرادى بإسبوع عشان لا تتوهق مع واحد ما تعرفه. فترة الدمج تكون ثاني او ثالث إسبوع من كل فصل تقريبا. هذا للطلاب إللي تخرجوا رماميتهم .