اختبار شركة معادن

والله علمي علمك وانا اخوك، جاني اتصال انه فيه اختبار يوم 9 اكتوبر في الخبر وانا من سكان جدة حجزت الرحلة ولكن الحين باقي الفندق ماحجزته لان الافندي اللي كلمني هندي والاكسنت حقه يالله الخراج جالس يقول عندك اختبار في انننننن ليرنينج سكول اقله عيد يقلي انننننننننن ليرنينج سكول قلت طيب قال بنرسل ايميل دعوة ولا جاني للحين. اللي جاه الايميل يشاركنا معلوماته والخريطة تبع الموقع بالله.

 

ماشاء الله شي طيب جاكم رد .. انا سمعت ما رشحوا الا الناس الي معدلاتها فوق 3.5/4

هل صحيح ولا ؟

 

الاختبار في الخليج للتدريب والتعليم في الخبر

 

صحيح اخوي نفس الكلام صار معي , كلموني الاحد والى الان ما جاني الايميل غريبه

 

جزاك الله خير الجزاء اخي الكريم.

 

السلام عليكم..
اللي جاهم اتصال لاهنتو من اي جامعه متخرجين ؟

 

الشباب الي كان اختبارهم اليوم يا ليت تعلمونا كيف كان الاختبار

 

الدفعة اللي كنت معها اليوم كانوا كلهم من البترول.

اختبار الانجليزي عدد غير محدود من الأسئلة لمدة ربع ساعة
بعدها تقابل واحد يقول لك تكلم عن موضوع معين بالانجليزي وتقرأ قطعة قصيرة
بعدها اختبار تحليل الشخصية 200 سؤال بالعربي، كان شيء عبيط مدري وش يبي؛ كان في أسئلة جداً غبية مثلاُ تفضل تشاهد أفلام رومنسية ولا أكشن ومصارعة؟ XD
وآخر شيء 3 اختبارات قصيرة مثل القدرات بالضبط وكلها بالعربي..
الاختبار الكمي تجيك أسئلة مثلاً 1، 3، 5، 8، .... أكمل المتسلسلة، علاقة الرقم س بالرقم ص مثل علاقة الرقم ع بأي واحد من الاختيارات التالية؟ حسابات رياضية بسيطة عن الزمن وتحويل العملات.
أما الاختبار اللغوي تجيك أسئلة مثل مجموعة كلمات وواحدة مختلفة عنها، أو مرادف للكلمة الفلانية أو ضدها... علاقة الكلمة أ بالكلمة ب مثل علاقة الكلمة ج بالكلمة...؟
آخر اختبار يعطيك أشكال هندسية ويقول لك وش الشكل اللي يكمل السلسلة بحسب العلاقة بينها.. جداً سهل وواضح

اختباراتهم في المجمل كانت سهلة وما فيها أي تعقيد

 

يعطيك العافية بس ممكن مدة الاختبار كامل ؟

 

يعطيك العافيه اخوي. هل الموضوع هم يختاروه او انك تختار اي موضوع و تتكلم عنه

 

تسجيل البيانات والتحقق من الهوية أخذوا حوالي 40 دقيقة.
الاختبارات نفسها حوالي ساعة ونصف.بالتفصيل:
اختبار الانجليزي ربع ساعة والأورال 3-5 دقايق. مدة انتظار دورك للأورال ممكن تكون مباشرة أو تاخذ ثلث-نصف ساعة.
بين اختبار الإنجليزي والاختبارات الثانية كان فيه فترة انتظار قصيرة حوالي 20-30 دقيقة لأن بالبداية قسمونا إلى مجموعتين، ثم كلنا اختبرنا تحليل الشخصية/القدرات في نفس الوقت.
اختبار تحليل الشخصية حوالي 25 دقيقة وممكن تخلص بدري وتبدأ القدرات بعده مباشرة.
اختبارات القدرات الثلاثة قصيرين وأخذوا نصف ساعة: كل واحد ياخذ تقريباً 8 دقايق. كل اختبار فيه 25 سؤال والعربي أظن كان 35 سؤال لكنهم سهلين مرة فعادي تخلص بدري ويصير عندك وقت تراجع فيه أجوبتك.
يعني من بداية دخولك للمبنى إلى خروجك منه بتاخذ حوالي ثلاث ساعات.

لا، الموضوع عشوائي واللي يقابلك هو اللي يحدده. لكنهم جداً متعاونين وما يستقعدون لك أبداً.

 

قالوا لكم متى بيردون بنتائج الاختبارات ؟ موفقين جميعا

 

انا اليوم كان اختباري، قالوا لنا بانهم راح يردون لنا خبر اما بكرة او يوم الاحد. واللي يعدي الاختبار، بيكون عنده مقابلة الاسبوع الجاي على كلامهم، وبالتوفيق للجميع.

 

انا اختبرت يوم الثلاثاء وقالوا لنا ان النتائج بعد اسبوعين

 

اختبرت الاحد وقالوا النتائج الأسبوع القادم او اللي بعده ولكن بما ان الأخوان اللي اختبروا الأربعاء كانوا اخر ناس فيمكن الكلام اللي جاهم صحيح. ننتظر الأحد ونشوف. اسأل الله التوفيق للجميع.

 

انا اختبرت يوم الاربعاء الساعه 1 و قالوا لنا انا احتمال راح نتصل على المقبولين اليوم او بكره قصده الاربعاء او الخميس و قال المقابلات احتمال راح تكون اسبوع الجاي يوم الثلاثاء و الاربعاء و الخميس
وللمعلوميه من الي فهمته منهم ان في ناس اختبارهم امس الخميس يعني ما اتوقع ان اصلا راح يمديهم يردون بهالسرعه

 

اخواني اذا احد كلموه بخصوص المقابلة يا ريت يعطينا خبر

الله يوفق الجميع