أفضل المشاركات: ارامكو، سابك، الشركة الوطنية، ساتورب، مهندس كيميائي؟ أدخل

السلام عليكم ورحمة الله وبركاته،

في الحقيقة ياجماعة هذا المنتدى للأمانه فادني الكثير وكان سبب بعد الله ولله الحمد في حصولي على وظيفتي الحالية.
كتبت هذا الموضوع من باب شكر وعرفان للقائمين على هذا المنتدى واعضائه الكرام. أسأل الله الكريم ان يوفقكم لكل مايحب ويرضى.
وأيضاً كوني مهندس كيميائي حبيت اكتب هالموضوع لايضاح صور كثيرة وللمساعدة باذن الله في تسهيل الحصول على وظيفه لكم.

أولاً نتكلم عن سابك: التوظيف موقف من 2015 والى الان مكتفين وزياده بمبتعثينهم يعني من الاخير لاتتعب نفسك.. هالكلام أكيد وصحيح 100٪ من خلال اسألتي لاصحاب المناصب في الشركة ومحاولتي شخصياً بشتى الطرق الحصول على وظيفة.

ثانياً: ارامكو السعودية: ارامكو للأمانه يعطون مقابلات ويوظفون والتقديم عن طريق الموقع.

ثالثاً: الشركة الوطنية للأنظمة الميكانيكية: الشركة يوظفون في الوقت الحالي كل اللي عليك تقدم على الموقع وباذن الله بتجيب مقابلة خلال شهر شهرين باذن الله.

رابعاً: ساتورب (الشركة اللي حصلت فيها على وظيفة): التقديم احيانا يفتحونه ويسكرونه فجاه مايطول عن يومين.

للأمانة هذي الثلاث شركات هي الوحيدة اللي شفتها توظف بعقود رسمية.. الباقي كونتراكترز وللأمانه ارسلت لاكثر من 200 ايميل من الكونتراكترز ولا احد عطاني وجه هههه.

ملاحظة: لاحظت للاسف في اغلب الشركات اللي ذكرتها يبغون فقط!!! (طلاب مبتعثين او من البترول والمعادن) يعني لو معدلك 5/5 في جامعة الملك سعود، سيتم اسقاطك من المنافسة.

ملاحظة اخرى: اسمع كثير من الشباب يحط عذر اذا ما انقبل في المقابلة ان الشركة حاطين هالمقابلات مزهريه.. وهالشي شفته في بعض الشباب الله يهديهم معي بالمقابلة كانو مستهترين.. ولا جتهم الوظيفة للاسف.

نصيحتي للجميع: جهز نفسك للمقابلة، بيخلونك ترسم مشروع التخرج، تشرح بالتفصيل، تكلم عن نفسك، ليش نوظفك، وش تعرف عن الشركة، وش فرقك عن المتقدمين الاخرين، كل جواب من اجوبتك المفروض مايعدي دقيقة واحدة فقط!!! انتبهو. الهدف من المقابلة للشركات اللي بتعطيك تدريب هو التعرف على شخصيتك.. يدرون انك تعرف الاساسيات وبيدربونك على التفاصيل فركز على ثقتك بنفسك. بالنسبة للشركات اللي مافيها خطة تدريبية بالعاده اسالتهم بالتخصص اصعب واكثر عمق.

(لا تكثر كلام في المقابلة، سؤال ورد غطاه بأقل من دقيقة ويشمل هذا سؤال تكلم عن نفسك)

سؤال تكلم عن نفسك: لاحظت كثير ناس مايفهمون وش يبي الاتش ار يسمع منك بهالسؤال.. باختصار يبي تتكلم باختصار شديد عن اسمك الكامل، عمرك، دراستك، تخصصك، مشروعك، خبراتك. بشكل مختصر جدا جدا.

للأمانة الوظائف الان في غاية الصعوبة الحصول عليها، فنصيحتي لكم تتفرجون يوتيوب عن المقابلات وتكتبون بالنت اساله الاتش ار بيطلع لكم كثيير اجوبة. تدربو تدربو تدربو على المقابلة وخل عندك فكره عن الاسئلة اللي ممكن يسألونك اياها. 4 من الاسئلة التكنكال اللي سألوني اياها كنت متدرب عليها بالصدفة في النت الحمدلله.

طبعاً هالموضوع يخص المهندسين الكيميائيين فقط!!

أسأل الله ان يجعل هذا الموضوع فائدة وفاتحة خير للجميع
والسلام عليكم ورحمة الله وبركاته

 

يعطيك العافية على مشاركتنا تجربتك، لكن تعليق بسيط على "ملاحظة: لاحظت للاسف في اغلب الشركات اللي ذكرتها يبغون فقط!!! (طلاب مبتعثين او من البترول والمعادن) يعني لو معدلك 5/5 في جامعة الملك سعود، سيتم اسقاطك من المنافسة."
هالكلام غير صحيح، أنا أستغرب من نشر هالمعلومات ومن المستفيد منها، وكيف حكمت إن الغالبية تتبع هالنظام وأنت ما تخرجت من سعود ورفضت ؟، أنا خريج جامعة تعتبر من متوسط الجامعات السعودية (كسمعة) وخريجي الجامعة وأعني المهندسين ممن أعرفهم يعملون في أرامكو وسابك وشركات عالمية زي ABB وماكديرموت وبيكر هيوز والله على ما أقول شهيد، يعني اوك لو كانوا المتقدمين متقاربين في الكفاءة ممكن يفضلون خريج البترول بحكم سمعة الجامعة وتجربتهم مع خريجيها، لكن تتكلم عن ٥/٥ في سعود ويرفض فقط لأنهم يفضلون خريج البترول هذا كلام أبدا غير منطقي، ولو حدث فهو في شركات قلة وليس في أرامكو أو سابك.

وحتى ما يجيني أحد مدرعم تراني من عشاق الجامعة، والمنتدى هذا قدم لي خدمة عظيمة طوال مشوار دراستي، ولكن حتى ما ينتشر الإحباط وتنتشر معلومات مغلوطة علقت على الموضوع.

 

بعد التحية
عن تجربة شخصية كموظف سابق تحت ادارة مدراء مهندسين خريجي البترول ومن جامعات سعودية ثانية ومن جامعات سباكة دول العالم الثالث في اسيا وافريقيا

يبقى البترولي علامة فارقه ترتاح تشتغل معاه!
بعض المهندسين ماتعرف تشتغل معاه ماتدري هو مهندس او معتوه!

ماني خريج هالجامعة رغم انها كانت حلم لي

 

الله يعافيك هذا حقكم علي،

الاسئلة اللي اذكر جتني هي، تكلم عن نفسك، عرف الهندسة الكيميائية، نقاط الضعف والقوة، ايش تعرف عن الشركة، ليش نوظفك، ايش فرقك عن المتقدمين الاخرين.

الله يوفقكم وتذكرو ان الرزق بيد رب العالمين وسجدة بين يديه تغير الحال وعلى قول المثل ماتضيق الا تفرج ان شاءالله

 

السلام عليكم

بالنسبة لتجربتي بالتوظيف كانت نوعاً ما ارتجالية
الحمدلله تخرجت بمرتبة الشرف
ولغتي الانجليزية ممتازة في كفايات اللغة الانجليزية 90 من 100 واعتبرها درجة سيئة لكن الحمدلله على كل حال
و ILETS score 8 out of 9

دخلت حتى الآن مقابلتين في حياتي
وكانت انطباعات المقابلات بشكل واضح تتركز على شخصيتك .. ولغتك الانجليزية و بعض الأسئلة التقنية في تخصصك
تحدث على نفسك بإسهام؟ .. تحدث لنا عن حياتك الأكاديمية ؟ و ما مشروع تخرجك؟
أعطيني مشكلة واجهتك و كيف قمت بحلها؟ أعطيني نقطة سلبية في شخصيتك
هل تستطيع التأقلم مع بيئة مختلفة عن بيئتك؟
لماذا اخترت شركتنا؟ ولماذا نختارك رغم عن كل المرشحين؟
طبعاً المقابلة باللغة الانجليزية بالكامل مع طاقم كوري في شركة كورية متعاقدة مع أرامكو
مدة المقابلة 15 دقيقة
الذي يعيبها قلة الرواتب للمهندسين السعوديين و تنظر لك من باب السعودة للأسف

ولاحظت اخفاق طلاب من جامعة البترول في المقابلة الشخصية بسبب الارتباك او ضعف التجهيز للمقابلة
وبعض الطلاب لغتهم الانجليزية ضعيفة او واجهوا مشكلة في المعدل الجامعي حسب رأي مدراء الموارد البشرية
رغم انهم لا يركزوا على اللغة .. اكثر من ركزوا على قابليتك للعمل في الأماكن النائية

وجتني مقابلة ابتعاث للماجستير وزارة النقل
كان فيها ثلاث اختبار قدرات إذا نجحت في الاختبارات الثلاث تترشح للمقابلة
و المقابلة كانت تعتمد على شخصيتك و مدى تجاوبك مع المسؤول للمقابلة
الحمدلله نجحت فيها رغم أن الوقت الذي اخذوه في المقابلة 25 دقيقة

 

بكل صراحة اقوى جامعة سعودية في التخصصات الهندسية هي البترول.

لكن في جوانب اخرى مهمة لازم تأخذ بعين الاعتبار هو مستوى اللغة, الدورات التخصصية, الثقة وقوة الشخصية بالاضافة الى المعرفة التخصصية او المعدل.

ممكن تحصل شباب من البترول يجمع لك كل هذي الجوانب وممكن لا ونفس الشي ينطبق على الجامعات الاخرى بغض النظر عن اسم الجامعة وقوتها

على سبيل المثال في احد الشركات كان في Assessment day وكان مجموعنا 9 انا محدثكم و معي 2 من البترول وواحد من سعود وواحد من جامعة ولاية اورجن من امريكا وكم واحد من جامعات أخرى

البعض منهم كانت شخصيته ضعيفة واللي يستحي و آخر عنده صعوبة في التحدث بالانجليزي وواحد ماشاء الله طلقه وبلبل وفاهم بتخصصه وواحد مهارات التواصل عنده ضعيفة وو مقاييس أخرى وكثيرة عد واغلط ....

من الـ 9 اخذو 3 وانا منهم خريج كلية التقنية وواحد من البترول والثالث مادري من وين وهذا دليل على انه راح زمان هذا من جامعة امريكية وهذا من جامعة فلانية, والي بياخذ الوظيفة هو الشخص الاجدر بها.

في ناس متخرجين بمراتب شرف وممكن عملو كم مقابلة لكن عاطلين لهم سنة وفي ناس معدلات متوسطة او نازلة وممكن من جامعة عادية توظفو خلال شهر بعد التخرج, هي قسمة ونصيب وتوفيق من رب العالمين ولكن لو نأخذ بالاسباب ممكن يكون احد الاسباب المذكورة غير موجودة في المتفوق وموجودة في صاحب المعدل العادي. ولاننسى فئة معهم واسطة ينسف لك كل المذكورين سابقاً وهو شهادته ثانوي ليلي.

وصحيح توجد شركات كثيرة مايدخلون مقابلاتهم الا طلاب البترول وعادة اجراءاتهم قصيرة, مقابلة او مقابلتين وبعدها عرض وظيفي وهذا من حقهم لان ممكن تهمهم جوانب معينة وماهي موجودة الا فطلاب البترول مثل تحمل الظغوط والمعرفة التخصصية بغض النظر عن المعدل واللغة.

وفي شركات مايهمهم الفهم في التخصص بل تهمهم الجوانب الاخرى الشخصية ولذلك تشوفهم يسوون اجراءات طويلة لاختيار المرشحين تبدأ من اختبارات و مقابلات تصل لـ 4-5 مقابلات ويوم مفتوح واخيراً العرض الوظيفي

 

اولا الارزاق بيد الله عز وجل

راح زمن "ما نبغى الا خريج البترول" الحين وش معدلك ابوووي



بالعربي راح تلقى واحد دخل جامعة الملك عبدالعزيز وجاب مرتبة شرف ثانية تخصص هندسة ميكانيكة و الوضع كان سهالات جدا ودوام فلة ودراسة فلة

وواحد دخل جامعة الملك فهد للبترول والمعادن انمحط واتمحص وكان ياخذ نص ويكند في بعض الاسابيع عشان يعوض الخطة الدراسية ( صارتلنا ممكن مرتين ) ويختبر يوم الجمعة (صارتلي مرة وحدة ) وضغط نفسي رهييب وعجيييب وجاب معدل 2.1/4 تخصص هندسة ميكانيكة

هذول الاثنين بيقدمون على ارامكو .. ارامكو راح يدخلون اللي تخرج من جامعة الملك عبدالعزيز الانترفيو لان معدله عالي .. وراح يقولون لصاحبنا من KFUPM حاول مرة اخرى بعد 3 سنين لان صاحبنا معدله نازل .. ( في قصص لاصحابنا من ذوي المعدلات المنخفضة اللي سلكت امورهم)

وفي الحقيقة اذا اخذت الاثنين بمقابلة شخصية راح تلقى ان صاحبنا من KFUPM متفوق بلغته الانقليزية ومتمكن من مواد التخصص وكل شي تمام لكن معدله منخفض بسبب الضغوطات اللي يواجهها من قبل الجامعة .. بينما صديقنا صاحب مرتبة الشرف الثانية دراسته سهلة جدا وسهالات ومافي اي صعوبات يواجهها وقريدز بكل سهولة ياخذ .. لكن الواقع المرير خلى المعدل اهم شي

تتوقع اذا جبت خريج امريكا او بريطانيا او جامعة تانية يقدر يحل اسئلة Physics 101 او Physics 102 ؟ انا ماتوقع الا قلييييييل منهم


الواقع ان كان معانا ناس اساسا مانقبلوا ب KFUPM بسبب مستواهم المنخفض اليوم هم ب ارامكو سابك وغيرها بسبب معدلاتهم العالية من جامعات دراستها سهلة
الواقع كان معانا ناس ماتحملوا الاوريا او ماعدوا الانقلش او الماث تبع KFUPM وخرجوا من الترم الاول او الثاني وراحوا جامعات سهلة بأمريكا وبريطانيا وغيرها واليوم هم ب أرامكو وسابك وغيرها
الواقع ان معانا موظفين ارامكو مايدرون وش الطبخة من اصحاب المعدلات العالية بالجامعات السهلة اللطيفة واهتمامتهم متى بطلع تشابتر 8 او تشابتر 14 او متى بطلع اسايمنت برا خليني افل بذا المدرا لو تناقشهم بتخصصهم مافهموا شي لكن مدري كيف عدوا الانترفيو (طبعا مو كلهم)


بكل سهولة ويسر اختارلك جامعة سهلة وجيب معدل عالي .. اطلع امريكا او بريطانيا جامعة سهلة منها بتتعلم انقلش تمام ومعدل عالي وتتمشى وتشوف الدنيا وتجي ارامكو وسابك وغيرها وتنبسط وراح تشوف خريج بترول افضل منك وبكفاءة عالية في وظيفة اقل منك لان معدله مخسوف


اعرف خريج بترول بمعدل 2.1/4 طلع امريكا ماستر جاب 3.8/4 كان يطقطق ويتونس (دراستهم فلة يبووووويا )

زي ماقلت فووووق اول شي الارزاق بيد الله عز وجل


بكل سهولة ادرس بمكان سهل وريح نفسك وجمب اهلك وجيب معدل عالي و ان شاء الله ربنا يعطيك اللي تتمنى



اساسا اش اللي خلانا نفتح الهرجة دي ؟ ماعرف

 

بعيدًا عن المثالية الزائدة ، بعض طلبات التوظيف الي توصل للموارد البشرية في ارامكو من الأقسام الثانية ينصون على دعوة خريجي البترول فقط للمقابلة .
طبعًا هذا بسبب العنصرية من بعض خريجي الجامعة القدامى لطلاب البترول (أنا خريج الجامعة)