استفسار بخصوص التحويل الى جامعه .. خارجية

وعليكم السلام اخوي
صراحه انا ما عندي جواب على سؤالك<<<<اجل ليش جاي:-#

اللي بغيت اضيفه وهو ممكن تابع لسؤالك
هو ان فيه اعلان انا شايفه في الجامعه قبل فترة عن الدراسه في اليابان
الزبدة انا قريته على عجله وما فضيت له لكني سمعت عن ان الواحد يقدر يحول ويدرس في اليابان وما ادري ايش

يعني انا اتمنى ان احد الطلاب يفيدنا
تحياتي

 

أغلب الجامعات إن لم يكن كلها ما تصدرلك وثيقة تخرج منها إلا بعد أن تكون درست نسبة معينة من الساعات في تلك الجامعة ( ربما 60% أو نحو ذلك ) وهذا يعتمد على الجامعة اللي أنت محوّل لها

غير ذلك مو شرط أن جميع موادّك يتم معادلتها لك ، ربما بعضها فقط ، وربما ولا شيء منها !

السؤال هذا توجهه إلى الجامعة اللي انت حتنتقل لها ، وكذلك هذا يعتمد بشكل كبير على تخصصك ، لأن غالبًا - إن تم معادلة شيء من موادك- المواد التي لا يتم معادلتها تكون من مواد التخصص


فيه نقطة مهمة ممكن تفيدك في قرارك ...


أيش تبغى بالضبط ؟ ، يعني ليش مخطط لأنك تاخذ شهادتك من برّا بس تبغى تدرس أربع سنين بالظهران ..

ربما لو تعيد التفكير حتلاقي أنه من الأفضل أنّك تركّز على إما الدراسة والتخرج من البترول أو الدراسة والتخرج من الخارج ...

بس برضو يبغالك تعيد التفكير ، واسأل نفسك السؤال أعلاه ، وإن شاء الله نساعدك باللي نقدر عليه

 

اظن ان في شرط انك تكون جايب بمواد الفرش (ماث وفيزيكس) اذا كنت هندسة ، C and above.

 

الله يخليك ، عزيزي ، أسبابك ماهي تافهة ، هل حتتفاجأ لو قلتللك أن أغلبها أسباب كانت في بالي لمّن احترت أطلع البترول ولا أقعد ...

أحاول بإذن الله أني أجاوب على تساؤلاتك باللي أقدر أفيدك فيه

مو شرط أقوللك كذا ، كلامك صحيح الجامعة تدرس إنجليزي بشكل كويس ، لكن السنة التحضيرية كافية للتمرس بالانجليزية بالشكل المطلوب ..

علاوة على ذلك - حسب معلوماتي عن الابتعاث التابع للوزارة - أن عندك تقريبًا حوالي سنة كاملة تدخل فيها معهد لغة في الدولة التي ابتعثت لها ، وبرأيي عزيزي -على الرغم من قوّة السنة التحضيرية لدينا- إلا أن دراسة اللغة في بيئة بأكملها تتكلّم هذي اللغة حيساعدك ويقوّيك بشكل أفضل وأحسن ، ومعاهد اللغة اللي تعتمدها الوزارة أغلبها على مستوى جودة ممتاز ويفيدك باكتساب اللغة

بيني وبينك هالمشكلة موجودة مو بس عندك

بصراحة ، مع ذلك ، لو تسأل في عن نظام تغيير التخصص في الخارج ، حتشوف بأنه ماهو بهالتعقيد أو الصعوبة ، بالتأكيد تأكّد أولاً من التخصصات اللي ناويها ( كونك ناوي البترول ) هل قررت أنك تدخل أحد المجالات الأربعة الرئيسة عندنا ؟ ( هندسة/إدارة/علوم طبيعية/تصاميم بيئة كالعمارة وتخطيط المدن)

إذا انت اخترت مجال واحد ( على سبيل المثال هندسة) ، ما يضر أنّك تطلع الدولة اللي ناوي عليها كطالب هندسة كهربائية مثلا ، وبعد دراسة اللغة وسنة الـفريشمان ، إذا رأيت أنك تبغى تغير تخصصك إلى ميكانيكية مثلاً ، ما حتواجه صعوبة بالغة ,,,

لا ما هو معروف بقاموسي

أيش تعريف الـ "قوّة" لديك ؟

أحاول أفيدك بهذا الشيء حسب خبرتي المتواضعة عن الجامعات البريطانية والأمريكية والمحلية

من ناحية قوّة الشهادة العلمية لخريج برنامج ما من جامعة معينة ، فهنالك عدد من الموازين اللي يُقاس بها..

الميزان الأول والأكثر شهرة ، وهو ميزان الاعتماد ، وهذا له هيئات عالمية تعتمد مجموعة من الشهادات العلمية للجامعة إذا توفّرت فيها شروط الجودة ، وجامعة الملك فهد معتمدة شهاداتها في كليتي الهندسة والإدارة الصناعية من قبل هيئة الـ ABET للهندسة وهيئة أخرى - AACSB على ما أظن- للإدارة

وهذا يعني أنك لو تروح بشهادتك لبلد ثاني تبغى تتوظف كمهندس، حيعرفوا أنّك خريج هذي الجامعة اللي متوفرة فيها شروط الجودة واسمك مهنّدس تدرّب على ما درسه فترة معينة ودرس مواد عامة بقدر معيّن ومواد تخصصية بقدر معين ، نعم ربما كخريج البترول تبغى تقدّم على جامعة ثانية في أمريكا للدراسات العليا حيطلبوا منّك تقديم اختبار الـ GRE ، لكنك مُعترف لديهم كمهندس أو خريج إدارة توفرت فيه شروط الجودة


هنالك مقياس آخر للقوّة ، وهو قوّة الشهادة في القطاع الخاص ، ويكفيك ما يقوله -بحق- مدير جامعتنا بأن المشكلة الوحيدة التي تواجه جهات التوظيف مع خريجي البترول هي سهولة الحصول عليهم ، والطالب المتميز لدينا يحصّل أكثر من 6 فرص وظيفية بإذن الله عند تخرجه


هنالك مقياس سمعة الجامعة الأكاديمية والبحثية ، هذي بصراحة لك عليها في جامعاتنا بشكل عام ، لكن جامعتنا اسمها يشار له بالبنان حتى في جامعات أمريكا ، ولمن يجيهم طالب من KFUPM يكونوا عارفين أنه جاي من أفضل جامعات الشرق الأوسط ، وهذا ماهو مجرد كلام ، بل واقع شفته ببعض زملائي الخريجين اللي الآن حصلوا على مقاعد قبول للدرسات العليا في أفضل الجامعات العالمية زي جامعة الملك عبدالله للعلوم والتقنية وجامعات بوردو بفرنسا ، Texas A&M وغيرها من الجامعات القوية بشهادتها

ووجود القناة اللي توصلك بعد تخرجك من البترول بجامعات قوية في دراساتها العليا وبحوثها يكفيك إذا كنت توزن القوّة بميزان ومقياس القوة الأكاديمية والبحثية ، لأن السمعة والقوّة لشهادة الطالب هي آخر شهادة يحصل عليها ،فيكفيك أنّك تعرف أن البترول ممكن تطلّعك للأعلى إذا درست فيها ، وهذا كافي


إذا كان عندك ناحية ثانية للقوة تُقارن بها جامعة KFUPM بأخريات ، فهات هذي الناحية وبإذن الله أفيدك فيها

الله يسلّمك ويخليك ، ووجيهنا يشرفها وينوّرها وجودك بيننا


أخوي من ناحية اللغة ،إذا تعرف تدبّر أمورك مع العمالة الفلبينية بالانجليزي ، يعني أمور السلام والكلام العادي ،وإذا جبت درجة ممتاز بالانجليزي بالثانوية ، فهذا جدًا كافي إلى أنّك توصل بلاد برّا ، وبعدها بإذن الله خلال سنتين إذا كنت من اللي ياخذوا الأمور بجدية أضمنلك بإذن الله أنك حتصير من ناحية اللغة ربما أفضل من نصف طلاب جامعتنا ، لأنك حتكون في بيئة كاملة إضافةً إلى الدراسة بلغة أجنبية ، احنا هنا بس محصلين دراسة بلغة أجنبية وسنة وحدة فقط خلالها نتكلّم بطلاقة مع مدرسينا الأجانب ،لذلك أضمنلك بإذن الله إذا تقدر تتواصل وتتحاول وتقرأ الإشارات بالانجليزي ، يكفيك إلى أنك تدرس بمعهد اللغة سنة أو أقل إلى أنّك تكون متمرس فيها وقادر على القراءة والكتابة الأكاديمية بها

من ناحية النظام الأكاديمي ، أنا معاك بتخوفك ، لكن فكر معي بحاجة بسيطة ..

الطالب الأمريكي المحلي اللي دوبو متخرج من الثانوية وداخل الجامعة ، أيش اللي يعرفه عن النظام الأكاديمي ؟

ما حيكون عارف أشياء واجد ، اللهم أن نظام ثانوياتهم أفضل من نظامنا ، ويعدهم بشكل أفضل

لكن من ناحية تعلّم النظام ، فحتلاقي على الأغلب في الجامعة اللي حتروحلها أسبوع تحضيري للفريشمان + مراكز تساعدك من جميع النواحي ، مركز الطلاب الدوليين عشان أمور معيشتك وأوراقك ، مركز الكتابة عشان يساعدوك تعرف كيف تكتب زي العالم والناس ، مركز التوجيه الأكاديمي ، ومركز التوجيه الوظيفي حتى عشان إذا جيت تخطط لوظيفتك أو بغيت تشتغل عمل جزئي يساعدوك ويوجهوك ! .... هذي كلها ممكن تشوفها في كثير من الجامعات الأجنبية ، الحكومية منها والخاصة

ومن خبرتي بزملائي وأصدقائي اللي سافروا بعد الثانوية على طول ، خلال سنة سنتين بإذن الله تكون عارف النظام وقادر على أنك تتعاطى مع أنظمة الجامعة بكل بساطة ، وأنصحك لو تشوف منتديات المبتعثين أو تتكلم مع أحد معارفك المبتعثين ممكن يوضحلك أكثر ويبدد بعض من مخاوفك -اللي كنت أشاركك فيها يومًا ما ! - ويخليك على بينة أفضل من الوضع هناك.


أود أني أنوّه أنه على ما أظن أن حاليًا حيقتصر نظام الابتعاث على تخصصات معينة فقط ، وأظن أمريكا ما حيكون فيها هندسة هالسنة والله العالم ، فيحتاج أنّك تتأكد وتشوف وتستخير، أتمنى أني ما زدت من حيرتك قدر ما أكون وضّحتللك أكثر الوضع سواءً في البترول أو في الخارج عشان تكون قادر على اتخاذ القرار الأفضل لك بإذن الله



وإذا عندك أي استفسارات أخرى أو ودّك تفكر بصوت عالي معنا عشان نساعدك أكثر فالشباب وأنا بالخدمة ، والله يوفقك وييسرلك

 

نعم ، هذا الأفضل من وجهة نظري، إلا إذا كان هنالك فائدة أخرى تشوفها غير ماذُكر للدراسة نص بالبترول ونص برا...

وربي يعافيك

 

شوف يابو الشباب, انا جونيور في هاذي الجامعه
واسمعها مني,, سيبك من البترول وروح اطلع برا