استفسار: بخصوص بدل فترة الإنذار عند الاستقالة.

وعليكم السلام اخوي،
بالنسبة لفترة الانذار هي ليس عرف هي من مكتب العمل مدتها شهرين وضعت لاجل الشركة تبحث عن بديل لك في هذي الفترة، بعض الشركات اللي ماتحتاج بديل لك ممكن تقول لك انك تقدر تغادر الشركة وتستقيل بدون ماتداوم شهرين الانذار وتخلي طرفك لكن بالنسبة اذا اجبروك تداوم شهرين الانذار ف تعتبر مثل اي اشهر دوام قبلها من ناحية ساعات العمل والراتب اللي كان ينزل لك لكن اذا قررت انك ماتداوم الشهرين وتخلي طرفك ف عليك ان تدفع راتبين بدل الشهرين او ممكن انك تقايض ب اجازتك السنوية عن شهر، بالنسبة للمبلغ اللي ممكن تدفعه اذا قررت ماتداوم الشهرين فما عندي علم اكيد هل هو الراتب بعد خصم التامينات او الراتب كامل قبل خصم التامينات

عذرا ع الاطالة وموفق لكل خير

 

المعروف انك تقدم استقالة (ترسل ايميل لمديرك و الموارد البشرية)، اذا تمت الموافقة في نفس اليوم تحسب ٦٠ يوم من تاريخ القبول.
اذا حاب تطلع بدون ال٦٠ يوم، تدفع لهم راتب شهرين (هذا للعقد الدائم) للعقد المحدد ما عندي فكرة.
عموما، الافضل تتواصل مع الموارد البشرية في شركتك وبيعطونك العلم الاكيد وبالتفصيل، افضل واضمن لك

 

في شركات زي SLFE عقود سنوية تتجدد واللي يقدم استقالة ويبي يطلع لازم يسدد جميع الرواتب المتبقية بالعقد

 

لا توجد مادة في قانون مكتب العمل تلزمك على سداد الرواتب المتبقية في العقد اذا كان العقد سنوي او محدد.
ما سمعناه هناك عقود للتدريب في بعض الشركات متفق عليها بين الموظف و الشركة انك اذا قدمت استقالة خلال فترة التدريب لازم تدفع قيمة التدريب للشركة لان الشركات دافعة قيمة التدريب لك اما عقد سنوي او غير محدد بدون تدريب فالمفروض المتعارف عليه في كل الشركات تكون فترة انذار 60 يوما او بدون فترة انذار اذا قدمت استقالة خلال فترة التجربة.

 

الشي اللي أنت ملزم فيه هو اللي مكتوب في عقد العمل بشرط عدم مخالفته لنظام العمل السعودي

راجع العقد كامل بند بند وشوف وش مكتوب فيه ، إذا منصوص فيه على تعويض فلا بد من التعويض ، إذا مانص على التعويض فمالهم غير مدة الاشعار شهرين وبس

 

طيب لو قدم الشخص استقالته ورفضت الشركة شهرين الانذار وقالت له ضف عفشك وتوكل على الله
هل ملزمه الشركة في هذه الحالة تسلمه رواتب الشهرين او لا ؟
بعض الشركات اذا قدم الشخص استقالته اخاف يفشي اسرارها او وثائقها او يأثر على زملائه ويطلع اكثر من موظف من الشركة!
فالحل الأسلم لها انها تقول له توكل على الله

 

في حال ان الموظف قدم استقالته وطلب يطلع بدري والشركة موافقة ماله حق بالشهرين بالعكس الشركة تكون تنازلت عن حقها. اما في حالة ان الموظف قدم استقالته وماعنده مشكلة يداوم شهرين الانذار ولكن الشركة اجبرته يطلع بدون مايداومهم فالشركة ملزمة انها تدفع له راتب الشهرين.

 

أهلا ومساء الخير..

أعتقد الجواب لإستفسارك هنا ، وبيكون بناءً على فهمي لنظام مكتب العمل ولحالتك وبيكون بنقطتين:

النقطة الأولى (ما نص عليه نظام مكتب العمل):
عقدك محدد المدة لذا الأصل يكون إنتهاء العلاقة التعاقدية بـ3 حالات:

1- خلال فترة التجربة "ولكل منً الطرفين الحق في إنهاء العقد خلال هذه الفترة ما لم يتضمن العقد نصا يعطي الحق في الإنهاء لأحدهما" [المادة الثالثة والخمسون].
2- بإنتهاء مدة العقد [فقرة 1 المادة الخامسة والخمسون & فقرة 2 المادة الرابعة والسبعون].
3- يحق لأي طرف إنهاء العقد بأي وقت ولكن للطرف المتضرر أن يعوّض بـ" أجر المدة الباقية من العقد إذا كان العقد محدد المدة"[الفقرة 2 المادة سبعة وسبعون].

النقطة الثانية (ما تم الإتفاق عليه بالعقد ولم ينص عليه نظام مكتب العمل):
وهنا النظام يسمح بأن يتم إضافة أي بند للعقد ما لم يتعارض مع ما ذكر بنظام مكتب العمل "ولطرفي العقد أنّ يضيفا إليه بنودًا أخرى، بما لا يتعارض مع أحكام هذا النظام ولائحته والقرارات الصادرة تنفيذا له"[فقرة 2 المادة الثانية والخمسون].

وبعقدك تم إضافت خيار رابع لإنهاء العقد وهذي تعتبر ميزة ذهبية كونك الطرف المستفيد فقط ولا يحق للشركة إستخدامه (بعض الشركات تحدد 30 يوم وهذا لا يخالف النظام ، الـ60 يوم هي حد أدنى لفترة الإشعار للعقد غير محدد المدة [المادة الخامسة والسبعون]).

الإجابة لسؤالك هي ، لطالما الشركة أعطتك خيار إشعارها بـ60 يوم فأنت ملزم تعمل كامل الـ60 يوم ليتم تنفيذ البند الإضافي وفي حالة عدم إلتزامك فهذا يعني سقوط البند الإضافي والعودة لتطبيق نظام مكتب العمل (الحالة الثالثة في النقطة الأولى اللي أنا ذاكرها فوق) واللي يتوجب عليك دفع كامل المدة المتبقية من عقدك (راتب أساسي عن كل شهر).

هذا كان من مفهومي للسيناريوهات النظامية ، ولكن أتوقع لطالما الشركة أضافت لك هالبند بعقدك فأتوقع إنهم ما رح يلزموك بدوام الـ60 يوم ومتى ما وافق مديرك المباشر فالـHR عادة يعفونك.

هذا كله يمثل فهمي وقد أكون مخطئ ، وبالتوفيق.

 

كلامك صحيح ، نفس المبدأ مع مكافأة نهاية الخدمة.