اعاني من التاتاه وعندي مقابلة شخصيه واحتاج احد أتدرب معه

بحكم تجاربي فالمقابلات, انصحك انك تركز على ثقتك بنفسك دايم وحاول قدر الامكان انك ماتتوتر وتكلم على مهلك حتا لو تأتأت لأن بيعرفون انه عندك تأتأه ومستحيل هذا يكون عامل مؤثر لتقييمك, اهم شي الاجوبه اللي بتقولها وكيف بتقدم نفسك لهم. عشان كذا حاول تكون ريلاكسد وتذكر انها مجرد مقابله وظيفيه ماتوقف عندها الدنيا. لأن التوتر ممكن يخليك تنسى نقاط مهمه او يخليك تلخبط افكارك.

موفق

 

انا نفسك عندي تاتاه وشديدة لكن ابلغ اللي يقابلني بهذا الشئ قبل لا ابدا المقابلة وسويت حدود سبع ست مقابلات وفيهن الزين والشين لكن ابدا ما عمري قلت هذي المقابلة سيئة عشان تاتات كثير او شي من هذا القبيل لين ما ربي وفقني بالوظيفة الزينة والعقبى للجميع...

صدقني هذا مو سبب انهم يرفضونك ايه اتفق معك لو كانت الوظيفة كول سنتر او مقابلة الجمهور كثير.

لازم اولاً تتقبل التاتاه اللي عندك وتعرف وتتيقن انه مو جانب ضعف عندك بالعكس تزيدك اصرار على مواجهتها.

ثانياً: قبل المقابلة خذ نفس عميق حاول تتنفس قد ما تقدر (اللي هو شهيق من الانف بعدين احبسها شوي وزفير من الفم)

ثالثا: تدرب على المقابلة لو قدام المراية او مع صديق ثنتين وثلاث لين ما تحس انه انت بوزيتيڤ وواثق انك تدخل المقابلة مع ايا كان.

رابعاً: ابتعد عن الافكار السلبية " ايه انا بخبص واتاتا بالمقابلة وبيقولون عني كذا وكذا" ترى بالعربي ما احد داري عنك وخل حديث الرسول صلى الله عليه وسلم قدامك " انا عند ظن عبدي بي" تفائل واتدرب وابلغ الاشخاص اللي قدامك بالتاتاة ولا يكون قدامك الا كل خير ...

اسأل الله لي ولك التوفيق ولكل من يقرى هذا الموضوع.