التحويل من هندسة لإدارة !

سواء كانت فترة ضغط أو لا , لا تتخذ هذا القرار الحين , حاول تجتهد وتجيب أعلى الدرجات لأن سواء استمريت في الهندسة أو رحت للإدارة , الكورسات الي جالس تأخذها راح تدخل في المعدل .
فأنتظر نهاية السمستر وبعد ماترتاح من ضغوط المياجر والسمستر فكر واستشير الشباب , هالفترة احيانا الواحد تجيه افكار يعتقد انها منطقية بس لأن هدفه الهروب من الضغط
الشي الثاني لو اقتنعت بفكرة التحويل , الأفضل تقتنع بالتخصص الي بتحول له , لاتفكر الإدارة سهلة , ممكن في البداية تحس بهذا الشيئ لأنك بتقارنها مع تجربتك في الماث والفزكس وغيرها من المواد الهندسية لكن مع الوقت راح تتعمق في التخصص وممكن ماتعجبك طبيعة المواد في تخصصات الإدارة فأهم شيئ سواء كنت بتحول أو بتستمر في تخصصك هذا القرار المفروض يكون عن قناعة لأن صدقني حتى بداية السفمور فكرة تغيير التخصص راح تستمر معاك ومع اي درجة سيئة راح تفكر بتغيير التخصص , فأفضل حل تتخذ القرار في الاجازة وتكون مقتنع بقرارك .

ماعليك من ردة فعل المجتمع , لاهم الي راح يختبروا عنك ولا هم راح يوظفوك ولا راح يسو شيئ .
سو الي مقتنع فيه بشرط يكون إنه صحيح واتخذت القرار عن قناعة وبعد استشارة اكثر من شخص .

بالتوفيق

 

إذا كان عندك ميول إدارية فعلًا فتوكل على الله... أما إذا بتحول بس عشان "أسهل" فلا طبعًا... لعلمك التخصصات الإدارية مو هينة ولا هي سهلة و طقطقة... شوف هذه تغريدة شفتها أمس لأحد الاخوة تأكد كلامي:
خالد جاسم on Twitter

و لعلمك الضغط بيستمر معك و بزيد كل ما تتقدم... أنا الحين اتذكر نفسي بالفرشمن و أقعد أضحك و أقول لنفسي (منجدك أنت كنت تحسب نفسك مضغوط)

نصيحتي المتواضعة اللي أوجهها لنفسي أولًا... اجتهد و اشتغل و اتعب

أخيرًا بالنسبة لردة فعل المجتمع باختصرها لك بحرفين... طز.

 

وجه ذا السؤال لشباب الاداره هم الاولى بالرد...اذا تعرف واحد منهم يدرس ولا خريج اجلس معاه اعرف اكثر عن التخصصات المواد البروجكتات...اذا ماتعرف احد منهم حرك رح مبنى 24 كلية الادراه وانا متأكد ماحد راح يقصر منهم بيعلمك كل شي.....بس لاتشيل الفكره من راسك...who knows ممكن تكون ناجح اكثر هناك..

بالنسبه للمجتمع ههههههههههههههه...تدري الحين احنا شباب الانجنيييرنق جالسين ندور فرص كوأب مو محصلين...قلييييله جدا هالسنة بس تدري مين اللي مريح عالاخر؟؟؟

شباب الاداره...مثلا في يوم التدريب كل الشركات تقريبا تطلب تخصصات الاداره وبعضها مثل البنوك وشركات التأمين طبعا حصرا عالاداره...وشباب المناجمنت ماشاء الله كانو مبزوطيييين عالاخر عددهم اقل بكثير من شباب الهندسه وفرصهم اكثثثثر..وقس ع ذلك الوظايف..في اول ايام التوظيف الللي مخصص لطلاب وخريجين الجامعه كم طالب وخريج هندسه وكم اداره؟؟؟؟

فكر فيها...موفق

 

تخصصات الإدارة ما هي سهلة ولا صعبة ...

راح تكون سهلة بالنسبة لك إذا كنت حق حفظ .. خصوصًا بعض التخصصات مثل الإدارة أو التسويق ..

فيها كمية حفظ كبيرة .. فتذكر مثلًا أيام الثانوي كيف كان وضعك مع المواد اللي فيها حفظ مثل الأحياء؟ هل تحس إنك ارتحت لها أم تحس إنها كانت غثيثة بالنسبة لك

حتى لو دخلت تخصصات مثل المحاسبة اللي تعتمد نوعًا ما على الفهم أكثر شيء .. راح تدرس كمية لا بأس بها من المواد اللي نظامها حفظ × حفظ

فيا عزيزي إذا تشوف نفسك من النوع اللي يقدر يحفظ بسرعة من دون أي مشاكل .. أقدر اضمن لك إن راح تمشي في الإدارة زي السلام عليكم (ما أقول راح تكون سهلة لكن راح تمشي أمورك إن شاء الله)

أما إذا كنت العكس فراح تكون غثيثة بالنسبة لك .. وأنت أبخص بوضعك أكثر من غيرك

والحمد لله التخصصات الإدارية لها مستقبل .. بس أهم شيء يكون عندك الرغبة والميول ..

أتمنى لك التوفيق...

 

السلام عليكم
معاك خريج من كلية CIM واي استفسار او سؤال عندك ممكن تتواصل معاي على الخاص

من ناحيه السهوله زي ما قالوا لك الشباب ....... مافي شي سهل و هم مافي شي صعب << كله يعتمد عليك
طبعا انا ما اقول الكلام بس للتحفيز و الحماس و و و الكلام الفاضي. انا جالس اتكلم من تجربه شخصية.

من ناحيه برنامج الاداره في جامعتنا يعتبر من اقوى البرامج لانك راح تتخرج بشهاده Bachelor's of Science وليس Bachelors of Business و جامعتنا تعتبر من القليلين من الجامعات السعوديه اللي تعطي هالشهاده عطفا على انه كلية CIM تعتبر من الكليات القليله في الشرق الاوسط اللي ماخذه الاعتمادات اكادميه (Accreditation) من اكثر من منظمه عالميه مثل (ACCA - IMA- AACSB).

طبعا التخصصات الاداريه اللي موجوده في جامعتنا هي:
إداره MGT
تسويق MKT
مالية FIN
محاسبة ACCT
نظم المعلومات الاداريه MIS

 

طبعا انا مو مع الشخص اللي قال انه تخصصات الاداره حفظ x حفظ
الفكره هي انك تعرف ايش تذاكر و كيف تذاكر.
مو كل المواد تتذاكر بنفس الطريقه و الاسلوب. في تكتيكات معينه تخليك تستوعب الماده بأقل جهد ممكن

 

اكثر اللي يقول الادارة سهلة وبس حفظ تلقاه يردد شي دارج بالمجتمع ما جرب ولا يدري - انا درست كم مادة الحفظ فيها ما راح ينفع وحتى لو حفظت ومنت فاهم ما بتعرف تحل

انت استخير وشوف اللي يناسبك وله طلب بسوق العمل ، المجتمع ما راح يوظفك ولا راح يصرف عليك فلا تحطه في بالك حتى

 

الأخوة اللي اختلفوا معي بالرأي على العين والرأس ..

لكن أنا مو جايب هذا الكلام من جيبي، فبالإضافة إلى إطلاعي على كتب التخصصات الإدارية (بنفسي)، أنا تأكدت من هذا الشيء من تجارب طلاب الإدارة نفسهم (سواءً في مواضيع تقييم الكورسات في المنتدى هنا أو من خلال سؤالي واستفساري ممن أعرفهم ممن دخلوا أحد التخصصات الإدارية).

الأخ Practice هو بنفسه في أكثر من موضوع في تقييم كورسات الإدارة مكرر عبارة (الكورس مليان حفظ) .!!

ولو تلاحظون في كلامي أنا خصيت كورسات الإدارة والتسويق بهذا الشيء (وأيضًا أضيف تخصص نظم المعلومات الإدارية لأنه مليان حفظ) .. .. وقلت إنه كورسات المحاسبة والمالية تعتمد نوعًا ما على الفهم بشكل أكبر..

أدخلوا على مواضيع تقييم كورسات الإدارة وراح تلاحظون أكثر عبارة تتكرر (الكورس مليان حفظ) أو عبارات مرادفة تصب في نفس المعنى

أنا ما أقول هذا الكلام بقصد التقليل من التخصصات الإدارية، لكن أنا أنقل الواقع اللي أشوفه قدامي، مع كامل احترامي وتقديري للأخوة اللي فوق ..

معروف إن اللي بيدخل إدارة محتاج إنه يقرأ كثير ويحفظ كثير من الأشياء، بعكس طالب الهندسة اللي نوعًا ما تركيزه على فهم المعادلات والقوانين وتطبيقاتها، والقراءة والحفظ فيها أقل.

خالص تحياتي ..

 

كلامك يا عبدالله صحيح ... فيه كورسات تعتمد على الحفظ بشكل كبير و برضه كلام practice صحيح فيه كورسات معتمده على الفهم بشكل كبير جدا ويكاد الحفظ فيها يكون معدوم مثل كورسات ال operation management , statistics , finance , accounting , marketing research , supply chain mamangement ...
تخصصات الادارة فيها جزء نظري و جزء تطبيقي ( حل مسائل ) واتكلم عن تخصصي المحاسبه الجزء النظري فيه اقل من التطبيقي
... لابد من الحفظ حتى ولو كان بسيط جدا في جميع التخصصات حتى التخصصات الهندسية والعلمية

 

ركز بردي الله يحفظك انا ما قلت مافيه حفظ وقلت فيه كم مادة الحفظ فيها ما ينفعك يعني مو معناته تحفظ وامورك تمام خلاص ، عندك mgt311 كمثال وتراها بالعربي وشوف الاختبارات بنفسك اعلى طالب تلقى الاي بلس طارت عليه هذا وهيا بالعربي بعد
موفق

 

انا محول ه الترم من هندسة للادارة وامنانتا اتكلم معاك

الادارة اشوفها من وجهة نظري كتجربة اول ترم اسهل بكثيييير من الهندسة ما ادري مكن انا عندي الحفظ مسواه اكثر من الفهم ما ادري , طبعا في مواد تعتمد على الفهم مثل المحاسبة بس ما تقدر تقارنها بصعوبة الفزكس من ناحية الفهم يعني يحتاج تحل كم سوال و تفهم الفكرة و امورك تمام

 

والله ياخوي اني طالب اقل من العادي ، وتعثرت بدايتي ، بس كنت ابغا اصير مهندس باللي هي به ، جت طيب ولا غصب ، كنت عبيط وماداني المذاكره ، حسيت ان الجامعه بدت تخلص ومعدلي كان لك عليه ، شديت حيلي في الهندسه والحين معدلي اعلى من بعض الدوافير في الجامعه ..

السالفه باختصار مذاكره ، واعرف كيف تذاكر ، اسلوب التلقين والحشو اللي فالثانوي انساه ، هنا اعرف الماده واعرف كيف تجيب فيها قريد بأي طريقة كانت ، شد حيلك وامش مع دوافير والصق بهم حتى لو كانوا بثرين ، وركز ان مواد الجامعه مختلفه ومتنوعه ، كل ماده لها طريقتها ، مثال : بعض المواد زبدتها في اللاب ، عرفت تشتغل في اللاب م يحتاج لها مذاكره مثل me210 و ics ..وفيه مواد اللاب حقها تحصيل حاصل وزبدتها في السلايدات والاولد اقزام ، وبعض المواد اذا تقدمت بعدين ركز ع اللي يشرحه الدكتور ويحله خصوصا المواد اللي مش كومون ، وتختلف باختلاف المواد ..

شد حيلك واصمل " وذاكر " وفالك باش مهندس ..

للعلم انا اتكلم معك وباقي ما صلحت عيوبي ، وباقي كره المذاكره فيني متأصل ، بس اهون من اول بكثييييييييييييييييييييير

وفالك الاونر ❤

 

ياشين الفلسفة بس .

 

عفوا ماتلاحظ ردك يفتقد ل الباقة
مع اعتذاري لصفتك الاعتبارية كمشرف

 

الله يوفقك
رغم ان ردي متأخر
محاكيك فر كليات وجامعات وتخصصات قضاء فني جراحة قلب علوم بحار هندسة معمارية هندسة مدنية الكنرونيات
تصدق كل هالتخصصات مادخلت مزاجي
وجدت جوي اقرب شي للكرزما حقي مسار الدبلماسي او الادارة الفندقية لكن اكتشافي بعد الوقت الضائع
حاولت اقدم على هالمسارات كان يالعمر مشكلة او التخصص موب موجود بالسعودية هالكلام قبل باب الابتعاث
دخلت تخصص الي متخرج منه الان لأنه لي خبرة عمل سابقه

الي ابي اقوله لك
انت ايش تحب وايش قدراتك
انت ايش تحب تعمل بعد ماتتخرج
انت تحب شحوم دست مصافي مكائن ازعاج هدك
ولا انت تحب تطلع من بيتكم كشخة تروح المكتب وانت متعطر نظيف
انت تحب تشتغل في المصنع ولا بالموقع
ولا تحب تشتغل في الادارة حول صناع القرار في الشركة تصلي الظهر ولي حولك بالمصلى كأنهم بعرس
ولاتحب تصلي في المصنع ريحة الجوارب والبلاوي ملوثه الاجواء الروحانية

لابد تحط براسك موب تتخرج مهندس ووظيفتك جاهزة في سابك ولا ارامكو ولا مرافق!
اذا طموحك وحلمك هندسة كمل
اذا ماتدري وين تبي تروح فكر وشف مختص يوجهك اخسر ترم ولا 1000 ريال عند استشاري ولا تندم عمرك
احسن الواحد يضحك عليك الان ويشوفك فاشل انك حولت ادارة وبعد ماتتخرج يشوفك ناجح
ولا يشوفك ناجح الان بالهندسة وتتخرج بفشل او كره تخصصك لاسمح الله

عذرا الكي بورد عندي مندرين اذا في اخطاء وعدم تنسيق سوري

 

كلام واقعي تشكر عليه صراحة ، كمية كبيرة من الناس يدخل تخصص ما يبغاه بس عشان الناس تمدح ذا التخصص

 

لايك يا بطل