برنامج الاقتصاديين السعوديين من مؤسسة النقد العربي السعودي 2018

وعليكم السلام ورحمة الله،

انا مقبول في البرنامج السنة الماضية. ان شاء الله بكتب تجربتي خلال الايام القادمة. اذا عندك استفسار معين تفضل.

 

برنامج الاقتصاديين السعوديين عبارة عن برنامج توظيف وابتعاث عن طريق مؤسسة النقد لدراسة الماجستير والدكتوراه في تخصص الاقتصاد. هدف البرنامج اعداد نخبة من الاقتصاديين من حاملين شهادة الدكتوراه لتغذية السوق السعودي وتزويده بالاقتصاديين.

تخصصي هندسة ميكانيكية متخرج من جامعة الملك فهد للبترول والمعادن في جانواري 2017 والتحقت بعد التخرج مباشرة بشركة ارامكو. اختبرت توفل خلال عملي في شهر ديسمبر 2017 وقدمت على البرنامج و بعدها تم اختياري لاجراء مقابلة مع الموارد البشرية في المؤسسة في شهر فبراير 2018 وبعد اجتياز المقابلة الاولى تم ترتيب مقابلة ثانية مع لجنة البرنامج وكانت هي المرحلة الاصعب، والحمدلله تم ابلاغي بالقبول بعد ثلاث اشهر وقدمت استقالتي من عملي وانضميت للبرنامج.

بعد القبول توقع عقد مع المؤسسة و خلال السنة الاولى تعمل كباحث اقتصادي ويجب عليك خلال هذه الفترة تجهيز ملف التقديم والحصول على قبول للماجستير في احد الجامعات ضمن قائمة المؤسسة. السنة الاولى يتخللها دورات تدريبية لاختبار ال GRE المطلوب من اغلب الجامعات الأمريكية للقبول لمرحلة الماجستير او الدوكتوراه. ودورات تدريبية عن الاقتصاد والاحصاء. البرنامج يقدم مميزات ممتازة للمقبولين من ضمنها نصف راتب + مكافاة مبتعث وحساب سنوات الخبرة خلال فترة الدراسة. البرنامج عليه تنافس شديد ويقدم فرصة جبارة للي له رغبة يكمل الدراسة في مجال الاقتصاد.



اتمنى لكم التوفيق،،،

 

شكرا لك اخ هشام
بس ممكن تقولنا كم كانت درجتك في التوفل
والمقابله الاولى والثانيه ايش سألوك والاختبار كان عن ايش
وهل كانت بالعربي او انقلش

 

وعليكم السلام ورحمة الله

العفو اخوي. بالنسبة لدرجة التوفل IBT، في الاعلان لخريجين الجامعات السعودية المطلوب فوق ال61. درجتي كانت 93 بس فيه مقبولين اقل واعلى من درجتي. يعني الدرجة العالية تدعم ملفك لكن ممكن تقبل بدرجة اقل من درجتي.

بالنسبة للمقابلات كانت بالانجليزي، المقابلة الاولى بسيطة نسبيا مع الموارد البشرية لكن الثانية هي المهمة وكان فيها الاختيار. الاسئلة غالبا تشمل عرف عن نفسك، ليش تبغى تغير تخصصك، ليش تبغى تدرس اقتصاد، ايش تعرف عن الاقتصاد، بعض الاسئلة العامة عن الاقتصاد مثل التضخم ايش تحديات الاقتصاد السعودي. طبعا اذا تخصصك هندسة مارح يتوقعون ان عندك معرفة تامة بهذي المواضيع لكن ضروري يكون عندك تصور ومعلومات عامة.

بالتوفيق،،

 

والاختبار كان عن ايش
ونزلك راتب اول ماتوظفت ؟

 

مافهمتك. ايه نزلي انا حاليا موظف في المؤسسة.

 

السلام عليكم اخ هشام عندي كم استفسار اذا ماعليك امر

- هل يقبلون تخصص هندسة كيميائية ؟
-هل فيه امكانيه ادرس ماستر سياسه واقتصاد بدل من اقتصاد او الامر محصور فقط على الاقتصاد ؟
- هل سلم الرواتب مثل سلم رواتب الخدمه المدنيه او لهم سلم رواتب مختلف ؟
- تشوف يستاهل الواحد يترك ارامكو وسابك ويتجه للمؤسسة من ناحية المميزات الماليه والتطور الوظيفي ؟

 

اهلا وسهلا اخوي

- بالنسبة للتخصص ايه يقبلون كل تخصصات الهندسة كما هو موضح بالاعلان. هم يستهدفون التخصصات اللي فيها دراسة مكثفة للرياضيات بحكم ان الدراسات العليا في تخصص الاقتصاد تعتمد على الماث والإحصاء بشكل كبير.


- بخصوص ماستر السياسة والاقتصاد، المطلوب مننا حاليا نجيب قبول للماجستير في تخصص الاقتصاد. لكن فيه كثير برامج ماستر اقتصاد في امريكا يكون فيها تركيز على تخصص ثاني مثل Financial Economics و Policy Economics. وفيه طلاب من دفعات سابقة تخرجوا من هذي البرامج، فالاهم من وجهة نظري ان خطة الماستر تكون فيه المواد الأساسية للاقتصاد.


- سلم الرواتب يختلف عن سلم رواتب الخدمة المدنية.

- النقطة الأخيرة، مريت بنفس المرحلة هذي السنة الماضية. ضروري تسال نفسك ايش اهدافك من الدراسات العليا هل فيه مهارات معينة تبغى تكتسبها. وهل عندك الرغبه بدراسة الاقتصاد. غالبا الخطوة هذي تعتبر استثمار طويل المدى لان البرنامج يستثمر فيك لمدة طويلة تقريبا 7 سنوات.

 

ماقصرت والله اخوي هشام لكن استفسار اخير كم الراتب الاساسي للفريش وكم يوصل بعد اخذ الدكتوراه ؟ انا احب الاقتصاد والسياسه جدا لكن ابي اشوف المردود المالي هل يسوى اترك ارامكو او لا

 

مرحبا
عندي سؤال بخصوص:
١- عدد المقبولين الدفعه الماضية كم كان وكم متوقع ينقبلون هالسنه، اذا سمحت
٢- كم عدد البنات المقبولين لو عندك خبر وهل يفرق معهم او لا
اخر سؤال
٣- هل كان فيه اختبار بعد اسسمنت تست او لا وشكرا

 

بالنسبة للمردود المالي كراتب في البداية اقل من راتب ارامكو وسابك. والراتب بعد الدكتوراه يعتمد على اشياء كثير منها معدلك في الماجستير والدكتوراه.

بالنسبة لي اشوف المردود المالي كراتب ما يذكر مقارنة بالمبالغ المستثمره في المقبولين في البرنامج اثناء سنوات الدراسة. ومن اللي اشوفه حاليا ان المؤسسة تستثمر في موظفيها وتدعمهم سواء بدراسة، دورات، حضور مؤتمرات خارجية و انتدابات للعمل كممثل للمملكة في جهات خارجية.

الله يوفقك،،

 

البرنامج يقبل البنات ما يفرق معهم.
بالنسبة للاختبارات كان فيه اسسمنت تست واختبار لغة عربية بسيط كلها في نفس اليوم مع المقابلة الاولى حق ال hr. بالنسبة لي اشوف ان الاسسمنت تست يحتاج استعداد قليل خصوصا اذا كنت ماقد اختبرته من قبل مع تقديمك على الشركات مثل ارامكو. حط في بالك ان اجراءات القبول ممكن تتغير تغير بسيط مع كل دفعة.

 

١-اخ هشام هل المؤسسه فيها فرع نسائي ولا اختلاط ؟
٢-الشي الثاني ف التقديم مو حاطين خانه ندرج فيها درجة الايلتس م ادرجتها هل بكذا م ينظرون لطلبي ؟ ولا المهم بالمقابله تكون شهادة الايلتس معاي ؟ م ادري وين احطها بموقعهم
٣- المقابلتين الشخصيه كلها انجلش ولا فقط عرف بنفسك انجلش ؟

 

- فيه قسم نسائي.
- حاولي ترفعين الدرجة في اي مكان بالابلكيشن حتى لو مو مخصص بالايلتس.
- كلها انجلش.

 

السلام عليكم:

يعطيك العافية عندي سؤالين:

هل مستحيل أنهم يبعثون لغير أمريكا؟ وخصوصا إذا كان القبول من جامعة top?

هل البعثة بقرار الوزارة أو بقرار المؤسسة؟

 

وعليكم السلام

القائمة الحالية للجامعات تضم جامعات امريكية فقط. مستحيل ان اقبل في جامعات خارج امريكا؟ اتوقع فيه احتمال خصوصا لو كانت جامعة قوية في التصنيف العام وخصوصا في تخصص الاقتصاد وتكون ضمن قائمة الوزارة. لكن مافي احد يقدر يضمنلك كل هالقرارات تعود للجنة القائمة على البرنامج في مؤسسة النقد هم لهم القرار النهائي في النهاية. حتى البرامج في الجامعات الامريكية يراجعونها ويشوفون المواد قبل القرار النهائي للبعثة.

البعثة توافق عليها المؤسسة في البداية وبعدين الملحقية لانك تعامل معاملة الطالب المبتعث في فترة الدراسة وعندك عقد مع المؤسسة فلازم موافقة الكل.


بالتوفيق،،،

 

سوال يا اخوان
هل بدأو ف اجراءت القبول للبرنامج لهذه السنه ؟

 

لو سمحت هل يقبلون تخصص حاسب الي _ نظم معلومات ؟
وكيف إجراءات المفاضلة ؟

مع الشكر لك

 

ايه التسجيل متاح في موقع المؤسسة لبرنامج الاقتصاديين السعوديين. يطلبون توفل/ايلتس