تجربتي في التدريب التعاوني مع الشركة السعودية للكهرباء

الموضوع في 'قسم التدريب التعاوني والصيفي' بواسطة Big H, بتاريخ ‏20 يناير 2016.

  1. #1 Big H, ‏20 يناير 2016
    آخر تعديل: ‏21 ابريل 2016
    السلام عليكم , أحب انقل لكم تجربتي في التدريب مع هذه الشركة , خصوصا بعد إعلانهم اليوم , ولقرب توقيت البحث عن فرص التدريب
    أكثر من يفيده الموضوع متخصص الهندسة الكهربائية .

    الشركة تنقسم ل 3 أقسام رئيسية : التوليد , النقل , التوزيع .
    فالبداية توقعت اني راح امر على كل هذه الأقسام , اكتشفت ان هذه الأقسام منفصلة عن بعض بإدارات ومباني مختلفة , تقدر تعتبرها 3 شركات مختلفة لكن تعمل تحت غطاء واحد . بمعنى المبنى اللي تشوفه لشركة الكهرباء مو شرط فيه كل الأقسام .
    تدريبي كان في قسم التوزيع في منطقة المدينة المنورة , اخترت المنطقة لاني قدمت وارسلت اوراقي لفرع المدينة , لكن ما اخترت القسم ,اغلب تخصصات الكهرباء يكونوا بالتوزيع تلقائيا , لأن مثل ما قلت الأقسام الباقية لها ادارات مختلفة وتحتاج تصريح دخول لتجاوز الامن الصناعي وغيرها .

    فالبداية رحت لشؤون الموظفين اعطيتهم خطاب التدريب , طلبوا مني رقم حسابي مع الايبان مطبوع في ورقة حتى يعطوني المكافأة , بعدها حولوني على اول قسم للتدريب لي . بالمناسبة المكافأة ما تاخذها الا نهاية تدريبك دفعة واحدة مو شهريا .

    التوزيع ينقسم ل 4 أقسام هي : التخطيط - الانشاءات - الصيانة - العمليات , كل قسم له فروع تحتها .
    بداية تدريبي كان فالعمليات .
    شؤون الموظفين يتوقعوا انك تداوم في مكان واحد لمدة 7 شهور , لكن هذا سيء لك ولكتابة الريبورت , كلمت سكرتير اول قسم تدربت فيه اللي هو العمليات لانه هو اللي جاته رسالة اني متدرب فالشركة , سوالي جدول لكل الاقسام من عنده وطبعلي هو , قالي اي قسم روح وريهم هذا الجدول وبيقبولك كمتدرب , ولو ما قبلو كلمني أرسل رسالة تدريبك للقسم اللي تبغا تروحله , وسويت مثل ما قال وزبط الموضوع وقدرت امر على كل اقسام التوزيع , مو شرط تسوي مثل طريقتي لكن انصحك ما تجلس بمكان واحد .

    بدأت الدوام , اول عيب راح تلاحظه وهذا شيء في اغلب الشركات مو بس الكهرباء , وهو انه ما في قسم مخصص لتدريبك ومافي موظف مخصص في كل قسم يدربك , لازم تستلبش وتكلمهم عشان تاخذ المعلومات , لكن موظفي الكهرباء كانوا متعاونين جدا , بس ملاحظة مهمة وهي انه لا تستحي تتكلم لانه محد بيعطيك وجه لو سكتت

    بالنسبة للدوام , كل الأقسام تقريبا نصف شغلها مكتبي والنص ميداني , تلاقي فريق مهندسين بالمكتب وفريق ميداني من التقنين , ميزة هذه الشركة هي انه كل يوم في عمل ميداني , الساعة 7:30 الصباح كل يوم يخرجو التقنين , ركز على كلمة كل يوم , نصيحة لا تجلس فالمكتب كثير , ممكن اول يوم او يومين اجلس مع المهندس يفهمك شوي عن عملهم , بس الأفضل انزل دائما مع التقنين للميدان , كل يوم ممكن تشوف شي جديد وبالتالي تقدر تكتب أشياء كثير في الريبورت .

    وقت الدوام كان مريح جدا ومن أفضل الأشياء في الشركة . كنت اول يوم او يومين فالقسم اكون فالمكتب عشان افهم فكرة القسم وكنت اتفاهم مع المهندس مع مين حيطلعني من التقنيين واخذ رقم اللي حاطلع معاه واخلص بدري واروح البيت, الايام الباقية اطلع ميدان , من 7:30 اخلص 12 الظهر وارجع البيت . طبعا يعتمد على الشغل الميداني ويعتمد على رغبتك , يعني مرات كنت احضر مرة وحدة مع التقني فالميدان ويقولي الباقي زيها لو تبغا تجلس حياك لو ما تبغا عادي امشي .


    انا بدات الشركة بترتيب خاطيء في تسلسل عملية التوزيع , بدأت بالعمليات - صيانة - انشاءات - تخطيط , والترتيب الصح هو العكس تماما , يعني العمليات هي اخر خطوة . فالنهاية الموضوع ما فرق معاي يعني فهمت كل شيء وما تلخبطت كثير , بس ممكن أفضل لو تبدأ بالترتيب الصح .

    بالنسبة للحضور , فما وقعت ولا على دفتر تحضير لأي قسم رحتله , فالنهاية لما خلصت التدريب رجعت لسكرتير القسم اللي كلمته فالبداية وسوالي الجدول, وقلتله اني خلصت لفلفة وتدريب , ارسل رسالة لشؤون الموظفين اني ملتزم وخلصت تدريبي وقبلوها مني , قسم الموظفين يحسبني في مكان واحد وما يدروا شي , الوضع سهالات يعني .

    حاولت أغطي أغلب الجوانب اللي يحتاجها المتدرب فالشركة, لو في أي سؤال أنا حاضر , وان شالله تشوفو اللي كتبته مفيد لكم .
    بالتوفيق للجميع
     
    • x 5 إعجاب إعجاب
  2. الله يعطيك العافية , معلومات ونصائح قيمة .

    1 - التقديم كان عن طريق الجامعة وانت اخترت المدينة ولا انت تواصلت مع الشركة ثم تالي جبت الموافقة للجامعة ؟
    2- اذا تقدر تذكر المكافأة + في اي سنة اشتغلت معاهم اكون شاكر لك
     
    • x 2 إعجاب إعجاب
  3. #3 Big H, ‏21 يناير 2016
    آخر تعديل: ‏21 يناير 2016
    تدريبي كان 143-151 التجربة فريش يعني , المكافأة 3 الاف .
    لأني من أهل المدينة وكنت ابغا اتدرب فالمدينة وفهذه الشركة بالتحديد , قبل ما يبدأ ترم 142 رحت الشركة فرع المدينة وسألت شؤوون الموظفين وقالوا في فرص وحنعلن عنها , لكن جا 142 وما شفت لهم اعلان او ما اعلنوا بدري , بس انا اول ما عرفت الاوراق اللي لازم ارسلها للشركة , رسلتها على طول وجاني رد وخلصت اموري مع الجامعة . يعني تواصلت مع فرع المدينة مباشرة.

    الان زي ما هو واضح ارسلولكم اعلان , لذلك أسألوا عن الاماكن المتاح فيها التدريب وكل شيء من بدري , ولو كنت تبغا تتدرب في نفس مدينتك ما يمنع تروح الشركة بنفسك تتأكد .
     
    • x 2 إعجاب إعجاب
  4. يعطيك العافية اخوي على الوصف الرائع لكن عندي سؤال شاطح هل سجلو اسمك بالتأمينات ؟
     
  5. لا
    عذرا على التأخير
     
  6. أيش الأوراق اللي لازم نسلمها ؟؟​
     
جاري تحميل الصفحة...

مشاركة هذه الصفحة