تجربتي في المقابلة مع (CISCO ( Sales Associate

السلام عليكم
اليوم سويت مقابلة مع Cisco فحبيت اشارك تجربتي لأن اتوقع الشركة جالسة تسوي مقابلات هالاسبوعين

* معلومات عن البرنامج :
- التقديم كان من الموقع على وظيفة Associate Systems Engineer (Full Time) Sales (Saudi Arabia)
طبعا ً , التقديم انتهى
(هذا الدسيكربشن للبرنامج )
Associate Solutions Engineer - Bachelor/Master (Graduate) (ASE) - Saudi Arabia Job in Riyadh - Cisco - Bayt.com

لكن التقديم مستمر على وظيفة ثانية :
Associate Sales Representative - Bachelor/Master (Graduate) (ASR) - Saudi Arabia

- البرنامج مدته سنتين تقريبا , اول سنة برا السعودية ( تقريبا في هولندا او في براغ في التشيك ) , السنة الثانية في السعودية احتمال كبير في الرياض . راح يتكفلون بالسكن وبقية الأشياء خلال مدة التدريب برا السعودية .

* المقابلة :
1- راح تكون اونلاين على تطبيق خاص ب cisco وهو WebEX راح يرسلك الموظف الرابط للمقابلة قبل يوم مع الوقت
ونصيحة تأكد من الوقت لأن في الايميل الأول يعطيك موعد و في الايميل الثاني مع الرابط بتحصل وقت ثاني فأنتبه لهذي النقطة .

2- مدة المقابلة : نص ساعة بالكثير والي يسوي المقابلة معاك بريطاني .

3- المقابلة على قسمين :
الأول : أسئلة شخصية وعامة :
مثلا متى تخرجت , وش تخصصك , وين تدربت بعدها راح يسألك وش تعرف عن cisco , اذكر لي حالة كنت تحت ضغط و لازم تسلم البروجكت وانت ماعندك وقت وكيف تصرفت ؟ اذكر لي حالة كنت في قروب واحد من الأعضاء مب متعاون كيف تعاملت معاه ؟
ليش العمل كقروب افضل ؟
ليش تبي تنضم لهذا البرنامج ؟ ليش تهتم في العميل وش تأثير هالشي على الشركة ؟
كيف سمعت عن البرنامج ؟

و من هالنوع من الأسئلة .

الثاني : اسئلة تكنيكال لكن ماهي صعبة , مثلا اذكر لي تطبيق او مشكلة الانترنت و networks كانت سبب في حلها .
اشرح لي بشكل مختصر وش هي malware , Phishing , واشياء ثانية مشابهة لها لكن نسيتها

بعدها راح يسألك اسئلة تكنيكال ويعطيك 4 خيارات , اسئلة سهلة لكن الرجال شوي سريع في الكلام و الصوت مب واضح عندي فمب متأكد اذا جبتها صح او لا لكن ان شاء الله خير .
على العموم من أسئلة الخيارات مثلا
بيسألك وش اسم الفيروس الي يستولي على البيانات ويطلب فدية ؟
ransomware ولا malware
وش الذاكرة المسؤولة عن تخزين البيانات بشكل مستمر : Ram ,Rom , hard disc
MAC ADDRESS
UDP
OSI Layers
وفي سؤال عن ال اللينكس لكن نسيته
ERROR 404 وش معناه

بشكل عام الأسئلة سهلة لكن لاترتبك وركز معاه في السؤال .

طبعا وانت تسوي المقابلة هو قاعد يسجل اجاباتك ( الأسئلة العامة والتكنيكال )على جهازه وبعد ماتنتهي المقابلة راح يرسلها ل hr manager واذا عجبهم ادائك في المقابلة راح يتواصلون معاك بعد فترة عشان تسوي برزنتيشن عن موضوع معين ل 4 دقائق , طبعا الهدف من البرزنتيشن هو يتأكدون من communication skills عندك , هذا على كلام الموظف .



هذي مواضيع قديمة تقريبا عن نفس البرنامج او برامج مشابهة له ممكن تفيدك خاصة بعد القبول :
مقابلة سيسكو من امستردام
هذه قصتي … بعد تخرجي (تجربة لخريج من الجامعة مع cisco الموضوع من 2008 لكن مايمنع تطلع عليه )
للملتحقين ببرنامج Cisco Netversity
برنامج سيسكو للخريجين الجدد Associate Systems Engineer "ASE


اليوم سويت المقابلة فمابعد يحددون اذا عديت المقابلة او لا , لكن اذا احد تواصلوا معاه بخصوص البرزنتيشن او الاجرائات الي بعدها ياليت يعلمنا او يشاركنا تجربته في المقابلة عشان يستفيدون بقية الشباب .

بالتوفيق

 

اي عادي , حتى انا تخصصي ماله علاقة بالشبكات و It الا بشكل بسيط .
على العموم راجع الاساسيات الي مرتبطة بالأشياء الموجودة في الموضوع وان شاء الله راح تبدع في المقابلة
واقرأ عن الشركة ومجالها .

 

ماعندي فكرة .

 

الي عدى المقابلة خل يشيك الايميل لأنهم امس ارسلو ايميل , طالبين فيه فيديو مدته دقيقتين ( تسويه عن طريق موقع خاص بالشركة اعتقد اسمه montage ) تجاوب فيه على سؤال معين موجود في نفس الايميل ( يطلب منك تشرح اي منتج او تقنية ابتكرتها cisco وتشرح ال working principle طبعا انت تختار المنتج او التقنية )

طبعا لما تدخل على الرابط : تعبي بياناتك من جديد وترفع احدث نسخة من ال cv والخطوة الي بعدها تعرف عن نفسك عن طريق تسجيل فيديو . و الخطوة الي بعدها تجاوب على السؤال الموجود في الايميل , الخطوة الي بعدها عبارة عن 3 اسئلة :
متى تخرجت ؟
ارفقت ال cv او لا ؟
وش تخصصك ؟
,وعلى حسب ادائك , راح تترشح للمرحلة التالية وهي assessment day والظاهر بيكون في الرياض .

 

جاني رفض بعد المقابلة الثانية، الحمدلله على كل حال. فالي مقدم عليهم خل يتأكد من الايميل يمكن ارسلوا له شي.

على كلامهم الي انقبل بيتواصلون معاه الفترة الجاية معاه ويحددون موعد ال assessment day

موفقين يا شباب.