تجربتي في برنامج التبادل الطلابي

بسم الله الرحمن الرحيم

بإذن الله سأتكلم في هذا الموضوع عن تجربتي في برنامج التبادل الطلابي Exchange Program. الحديث بيكون على شكل حلقات أنزلها كل ما تيسر الأمر وبين الحلقات مرحب جداً بالأسئلة بشرط تكون الأسئلة عن تجربتي أما الأسئلة العامة فمكانها هو الموضوع المثبت.

الحلقة الأولى: التقديم وتحديد الجامعات
أول مرة بدأت أفكر في الموضوع بشكل جدي كانت في سمستر 131 لمن صديق عزيز (بنسميه عبدالله) كلمني عن الموضوع في لاب الأورقانيك كميستري، تحمست معاه وقدمنا سوا على أساس نطلع في سمستر 141 واحنا جونيور بعد التقديم جاني ظرف منعني من الاستمرار فاضطريت اعتذر عن البرنامج بينما كمل عبدالله عملية التقديم لكن يشاء الله ألا يستطيع هو أيضاً المشاركة بسبب مشكلة من الجامعة المضيفة.

عن نفسي شلت الفكرة من بالي بعدها، لكن سبحان الله أول ما فتح التقديم لفصل 151 تحمست جداً وقدمت مرة ثانية وقدم عبدالله أيضاً، بعد التقديم كان أول اجراء هو اختبار التوفل ولن أتكلم عنها لأنه سبق لي الحديث عنها (KFUPM Student Exchange Program | Term 151 - الصفحة 22 ) بعد التوفل وظهور الدرجة كان هناك مقابلة مع الدكتور البغلي في مبنى 21 الدكتور كان يعرفني لأني كنت آخذ مادة عنده ذاك السمستر بالتالي المقابلة كانت بسيطة وواضحة جداً. بعدها وصلني إيميل يطلب مني تحديد ثلاث جامعات أرغب فيها. لمن كنت أحدد خياراتي حاولت أضع المعايير التالية في الجامعة اللي بضعها في قائمتي:
1- سمعتها جيدة
2-يوجد بها مواد كافية تتعادل (15 ساعة على الأقل)
3-توافق عليها أرامكو (أهم شرط بالنسبة لي كوني مبتعث من قبلهم)
استثنيت فلوريدا وسينسيناتي وليهاي كون أرامكو ما توافق عليهم وأيضاً استثنيت MIT وجورجيا تك كونهم غير متاحين لتخصصي واستثنيت كايست لأنه ليس عندي رغبة في الذهاب لكوريا
بعد التفكير والحذف والاضافة للقائمة قررت أرتب الجامعات كالتالي:
1-جامعة كورنيل
2- جامعة تكساس ايه أند ام
3- جامعة أريزونا

بالنسبة لعبدالله فاختار جامعات أخرى وما كان من بينها أريزونا ولا تكساس ايه اند ام. انتظرنا فترة طويلة بعض الشيء، وأثناء الاختبارات النهائية لفصل 141 جاني ايميل رسمي يحدد الجامعة وكانت جامعة أريزونا، المفاجأة أنه عبدالله أيضاً حددت له جامعة أريزونا مع أنها ما كانت من ضمن خياراته.

الحلقة الثانية بتكون إن شاء الله عن الفيزا واختيار المواد وتأخر الاجراءات والاشاعات عن إلغاء البرنامج.

 

الله يعافيك، نعم توافق لكني شخصيا ما كان لي رغبة فيها

مثل ما ذكرت الدكتور البغلي كان يعرفني جيدا بالتالي كانت أسئلة مباشرة من قبيل متأكد أنك تبغى تروح؟ عمرك سافرت برا؟ كم جبت في التوفل؟ أشياء مثل كذا

العفو، الموضوع يكون حسب المقاعد المتاحة يعني في واحد ثاني غير عبدالله نفس الشي جاله أريزونا كلم الدكتور البغلي فقاله عندك أريزونا أو كلورادو تقدر تختار منهم غيرهم ما نقدر نخليك تروح بسبب المقاعد

 

للأسف ما عندي جواب غير الكلام السابق اللي انقال لي: حسب المقاعد وللعلم تم الغاء جامعتي كورنيل وتكساس ايه اند ام من البرنامج هذا السمستر

 

الحلقة الثانية: الاشاعات والفيزا والبحث عن سكن
بعد تحديد الجامعة والذي كان أثناء الاختبارات النهائية حصلت وفاة خادم الحرمين الشريفين الملك عبدالله رحمه الله وتولى الملك سلمان مقاليد الحكم وأصدر عدة قرارت أهمها بالنسبة لنا كطلاب هو دمج وزارتي التربية والتعليم ووزارة التعليم العالي في وزارة التعليم. القرار هذا كان له تأثير كبير على برنامج التبادل الطلابي كما سيتبين. بما أن عبدالله كان مقدم السنة الماضية على البرنامج فهو مر بجميع المراحل وكان يقولي احنا متأخرين في اجراءات كثير! ما قدمنا على الجامعة ولا على الفيزا عكس السنة الماضية! كنا نسأل مكتب التعاون الدولي (هو الجهة المسؤولة في الجامعة عن برنامج الاكستشينج) وكان يقولوا انتظروا وما عندنا جديد، بعد ما انتهى نص الفصل الدراسي 142 تقريبا وصلنا ايميل من سكرتير المكتب الدولي يقول ابدؤوا في التقديم على الجامعة ورسلنا رابط التقديم، التقديم على أريزونا كان سهل إلى كبير وكان التقديم على برنامج اسمه non degree seeking يعني تبغى تدرس في الجامعة من غير ما تاخذ من عندهم درجة علمية.
أنهينا التقديم لكن للأسف ما وصلنا شي! لا القبول من الجامعة ولا أي شي جديد من مكتب التعاون الدولي، والأسوأ بدأنا نسمع اشاعات عن الغاء البرنامج مع التوجه الجديد لوزارة التعليم.
بعد فترة أخرى انتهى الفصل الدراسي 142 ووصلنا خبر سيء اللي هو الغاء البرنامج بالنسبة لطلاب جامعة ليهاي لأن برنامجهم يبدأ في الصيف والاجراءات ما انتهت كلمنا الدكتور البغلي وقال أنه مصير باقي الطلاب غير مرتبط بليهاي وقال تفاءلوا خير.
بعدها بفترة بسيطة وصلنا القبول من الجامعة أخيرا وتم قبول 9 طلاب في الجامعة وتم أيضا ارسال الi-20 .
بمجرد ما وصلتنا هذه الأمور بدأنا الاجراءات للتقديم على الفيزا وهذا كان أثناء أدائي للتدريب الصيفي في الظهران. قدمت من موقع القنصلية الأمريكية والأسئلة بصراحة كانت طويلة جدا وأيضا كان لازم تدفع ما مجموعه تقريبا 1400 ريال عشان تاخذ الموعد (يفترض الجامعة بتعوضنا عنها بعدين). أخذنا الموعد أخيرا وكان في الظهر في رمضان أظن، راح اتجاوز موضوع التفتيش الخ الى المقابلة، كان في ثلاث كاونترات تقابل فيها موظفين القنصلية و انتظرت إلى ما نادوا اسمي لواحد من الكاونترات وكان فيه موظفة أمريكية هي اللي بتقابلني سألتني أسئلة بسيطة جدا مثل مين اللي بيدفع؟ وكم سؤال ثاني أظن عشان تعرف مستوى اللغة وآخر سؤال كان هل سبق ورحت سوريا أو إيران؟ قلت لها لا فابتسمت وأعطتني ورقة مكتوب فيها إني مقبول وبيرسلوا لي الجواز مع الفيزا عن طريق أرامكس وبالفعل بعد حوالي أسبوع استلمت الجواز.
استمر التعليق من قبل مكتب التعاون الدولي والسبب اللي سمعناه بشكل غير رسمي هو "تأخير من الداخلية" وما ندري هذا ايش معناته! عندنا فيزا وقبول لكن ما نقدر نسافر! أثناء هذه الفترة تفاجأت بشي غريب جدا: أرامكو رسلوا لي تذكرة إلى أمريكا! كوني مبتعث من أرامكو بالتالي هم المتكفلين بجميع الاجراءات ومن ضمنها موضوع التذاكر وما كان عندهم علم بالتأخير اللي حاصل. في هذا الوقت كنت في وضع جدا صعب عندي تذكرة بعد حوالي 10 أيام الى أمريكا وما أدري اذا بسافر أو لا! تواصلنا مع مكتب التعاون الدولي وقالوا لي بيتم التحديد خلال أيام اما السفر للكل واما الغاء البرنامج تماما. للأسف عدت فترة وما وصلني رد فأصبحت في وضع سيء جدا تذكرتي بعد أيام وأنا ما أدري بسافر ولا ما بسافر! وأيضا كنت أداوم في أرامكو من 7 صباحا الى الى العصر وما عندي وقت أراجع مع مكتب التعاون الدولي بشكل يومي! لمن تبقت حوالي خمسة أو أربعة أيام قررت أنه لازم أحصل على جواب نهائي حالا لأن الوضع لا يحتمل، اتصلت على المكتب الدولي وطلبت أكلم الدكتور سمير البيات المشرف العام على مركز التعاون الدولي فقالو لي أنه في اجازة قفلت الخط واتصلت مباشرة على مكتب الدكتور خالد السلطان فقالو لي أيضا أنه في اجازة ومدير الجامعة بالنيابة هو الدكتور سهل عبدالجواد. اتصلت على مكتب الدكتور سهل وقالو لي أنه موجود بالجامعة وممكن يقابل أي طالب بعد الظهر، خرجت من الدوام في أرامكو على الساعة 1 ورحت مبنى 15 لمقابلة الدكتور وانتظرت عند السكرتير لأن الدكتور كان لسى ما وصل، بعد حوالي ربع ساعة وصل الدكتور وقال للسكرتير يدخلني دخلت وشرحت له السالفة كاملة وكيف أني معلق واني جيت أكلمه بصفته المسؤول الأول في الجامعة حاليا، الدكتور تفهم الموضوع تماما وقالي أن الموضوع ليس من صميم عمله في الظروف العادية كونه عميد البحث العلمي في الأساس لكنه قالي أرجع بكرة وابشر بالرد اللي يرضيك. شكرته ورجعت للدوام بعد ما وصلت للدوام لقيت واتساب من عبدالله يقولي شوف الايميل، فتحت الايميل الجامعي ووجدت رسالة من مسؤول مكتب التعاون الدولي نصها: ألف ألف ألف مبروك تمت الموافقة!

الحمد لله انحلت بعدما ضاقت المسألة جدا، ثاني يوم رحت الجامعة وأكدوا لي أني أقدر أسافر خلاص لكن الوقت كان ضيق جدا لأن الرحلة كانت بعدها بكم يوم فكلمت أحد مسؤولي أرامكو وقالي أنه عندهم 4 أفواج تسافر الى أمريكا خاصة بطلاب السي بي سي واحنا نسافر معهم، بالصدفة كنت في أول فوج وقالي مافي مشكلة نخليك في الفوج الرابع والأخير واللي كان يسافر بعد الفوج الأول بحوالي تسعة أيام. أصبح الوضع الآن أفضل بكثير واتفقت مع عبدالله أنه خلال هذه الفترة ندور على سكن في أريزونا وأيضا كان عندنا قروب واتساب لجميع طلاب أريزونا طرحنا فيه موضوع السكن. في البداية كان فيه أماكن سكن كثير تظهر لنا في البحث واعتمدنا بشكل أساسي على تطبيق yelp في البحث وأيضا موقع الجامعة الرسمي.
استبعدنا السكن داخل الجامعة لعدة عوامل كونه مكلف وضيق وغير مشجع بالمرة، شفنا شقق كثير ومجمعات سكنية خاصة بالطلاب كثير لكن واجهتنا مشكلتين رئيسيتين:
1- الأماكن الممتازة كانت فل
2- أغلب الأماكن كان عقد الايجار فيها سنة!
النقطة الثانية بالذات سببت أزمة لأنه بنجلس بس 4 شهور ومافي عقد ايجار 4 شهور والحل اللي وصلنا له هو أننا نستأجر الشقة لمدة سنة وبعدين نأجر باقي السنة علِى أحد أو ما يسمى بsublease والحل الأخير اللي كان ممكن نسويه هو أننا نستأجر 4 شهور ونسحب عليهم بعدها هذه الحركة سواها بعض الشباب اللي درسوا في أريزونا قبلنا وما صارت لهم مشاكل لكن قلنا نخليها آخر الخيارات، حطينا عينا على كم مجمع سكني سكنوا فيه الشباب اللي قبلنا وتأكدنا أن عندهم شقق فاضية فيصير بس باقي نروح لهم نوقع العقد ونستنى أسبوع بعدها الى ما يجي تاريخ اسمه moving in date وهذا التاريخ هو اللي كل الطلاب في جامعة أريزونا ينتقلوا فيه للسكن الجامعي وكان تاريخ ثابت لكل الشقق والمجمعات السكنية.

الحلقة القادمة عن الوصول واليوم التعريفي ومشكلة السكن المفاجأة​

 

الحلقة الثالثة: الوصول واليوم التعريفي والتسجيل ومشكلة السكن
كانت رحلتي يوم 9 أغسطس من مطار الدمام الى مطار الدوحة ومن مطار الدوحة إلى هيوستن تكساس عبر الخطوط القطرية، الرحلة كانت في الفجر حوالي الساعة 4 صباحا تقريبا وأنا رحت مواصل متعمد بهدف اني أنام في الطيارة لأني ما بتحمل أجلس 16 ساعة صاحي. تفاجأت عند مقاعد الانتظار عند بوابة 23 في مطار الدمام بأني أقابل "يوسف" وهو أيضا من الطلاب اللي طالعين أريزونا وكنت أعرفه من أيام الثانوي لأنه كنا سوا في المدرسة. كانت رحلة يوسف دمام دوحة شيكاغو ومن شيكاغو الى توسان مباشرة (توسان هي المدينة اللي تقع فيها الجامعة في ولاية أريزونا) بينما أنا كنت بجلس في هيوستن يومين لأن أرامكو عندهم برنامج للطلاب المبتعثين وطلبوا مني أحضر البرنامج. تفرقت أنا ويوسف عند مدخل طائرة الدوحة ووصلنا بعدها بساعة وكان باقي على رحلة هيوستن حوالي ساعتين جلست أبحث عن البوابة لين حصلتها في آخر المطار وكان باقي التفتيش ما فتح. قبل موعد الاقلاع بحوالي ساعة فتحوا البوابة وبدأت اجراءات التفتيش والاجراءات كانت عادية جدا اللهم أنهم طلبوا أطلع من اللابتوب من الشنطة وأحطه على الجهاز لحاله لكن محد فتحه وشيك البرامج أو شي مثل كذا. موضوع التفتيش كله ما أخذ 5 دقايق وبعدين قالوا لي تفضل للطايرة، الطيارة كانت من بوينج 777 وأخوكم كان كرسيه تقريبا آخر كرسي في الطيارة! الشي الجيد أنه الكرسي اللي يساري كان فاضي ويميني كان الممر بالتالي كان يمديني آخذ راحتي الى حد ما. كنت متفائل وقلت بنام 10 ساعات أقل شي والوقت بيمشي وفعلا نمت مباشرة بعد الاقلاع لكني قمت بعدها بخمس ساعات فقط! لسى باقي 11 ساعة!!!! الوضع كان قمة الملل شفت فيلمين يمكن من افلام الطيارة وكلها كانت سامجة ولعبت بالجوال وسويت كل شي وحاولت أرجع أنام لكن ما قدرت. في النهاية عدا الوقت وقبل الوصول بحوالي ساعة وزوعوا علينا نموذج طلبوا مننا نعبيه حسب اجراءات الحكومة الأمريكية توضح فيه ين بتسكن (يكفي تحط اسم الفندق) واذا مدخل معاك بضاعة أو أكل الخ عبيت النموذج وانتظرت الهبوط وفعلا هبطنا بعدها بقليل. عند باب الطيارة استقبل جميع طلاب أرامكو شخص عربي يعمل في المطار لتسهيل الاجراءات، طبعا تخيلوا شكلي هنا كل اللي معي طلاب سي بي سي (أوريات بلغتنا ) وأنا الوحيد اللي سينيور ومحد منهم يعرف ليش أنا واقف معهم المهم أخونا اللي استقبلنا كان بطل وخلا كل الفوج اللي هو حوالي 25 واحد يخلصوا اجراءاتهم (مقابلة سريعة والتأكد من المستندات) سريع سريع وأخذنا الشنط وطلعنا من منطقة التفتيش، خارج منطقة التفتيش كان فيه موظفتين من أرامكو في استقبالنا كمان كان فيه عدد من طلاب أرامكو المتطوعين، المهم أخذنا الشنط وحطيناها في الباص وجلست في ثاني كرسي وجلس قدامي واحد من طلاب أرامكو القديمين وقام يسولف معي وهو ما يدري اني اكستشينج وسألني عن التخصص ولمن عرف اني كيميكال قام يكشخ علي D يشرح لي ماس بلنس من 201 وهو فرحان قلت له تراني سينيور وعارف كل ذا الكلام اذا تحب أنا ممكن أشرح لك طبعا قعدت ساعة بعدها اشرح له فكرة الاكستشينج الى ما وصلنا الى الفندق وكان في اجتماع سريع في البداية وغدا وسلموا كل اثنين من حقين السي بي سي غرفتهم بينما سلموا محدثكم غرفة كبيرة لحاله ، كان البرنامج لمدة يوم ومضغوط جدا كله محاضرات ودورات قصيرة واجتماعات مع مسؤولي الملحقية الثقافية، كان في محاضرة لقسم شرطة هيوستن ومحاضرة للضغوط النفسية وسبقهم محاضرة عشان كل الطلاب يتعرفوا على بعض ويتعرفوا على مشرفهم الأكاديمي واستغليت هذه المحاضرة عشان أعرف بنفسي للكل وأشرح فكرة الاكستشينج وكثير من الحضور أثنوا على برنامج الاكستشينج وعلى جامعة البترول بشكل جعلني أشعر بالفخر والحمد لله.
انتهى هذا البرنامج السريع المضغوط واستلمت تذكرتي من المشرفة الى توسان ولاحظت اني بوصل بعد بداية اليوم التعريفي بحوالي ساعتين فقلت هذا الشي للمشرفة فقالت لي أنه أصلا كل طلاب أريزونا وصلوا مع الفوج الأول الا أنا وطالب ثاني ومع هذا قالت لي مو مشكلة لأن مديرة مكتب الطلاب الدوليين هناك صاحبتنا وبنضبط معها الموضوع. وفعلا على حوالي الساعة 9 في الليل وصلني ايميل من "جوان " اللي هي مديرة مكتب الطلاب الدوليين في جامعة أريزونا وعطتني كل التفاصيل اللي لازم أسويها. ثاني يوم سافرت من مطار هيوستن الى توسان في رحلة سيئة جدا الى توسان عبر خطوط united الامريكية المتواضعة الطيارة كانت عبارة عن باص يطير! على كل عدت الرحلة ووصلت توسان الحمد لله ورحت الفندق اللي كان محجوز لي فيه (أرامكو حجزوا لي 3 ايام على حسابهم) حطيت أغراضي في الفندق وطلعت مشي للجامعة كونها قريبة، بعد مشي حوالي ربع ساعة وصلت الى مبنى اسمه student union وهو اللي فيه كل الاجراءات كانت الساعة 12 الظهر يعني وقت بريك الغدا بالتالي كل الاجراءات موقفة حاليا، كلمت "عبدالله" وقالي أنه موجود مع في ال food court اللي هو في نفس المبنى مع باقي طلاب البترول، رحت قابلتهم وكان الموجودين 6 طلاب كوني أنا السابع والثامن حصلت له مشكلة في جوازه وما قدر يحضر والتاسع مختفي وما ندري فين موجود. قالوا لي الشباب الاجراءات اللي سووها وكانت عبارة عن استلام الوثائق والتصوير للبطاقة الجامعية ومقابلة "جوان". بديت الاجراءات بعد الغدا على طول وكانت تلك فترة انهاء الاجراءات لطلاب الدراسات العليا لكن لمن أوري أي منهم ايميل "جوان" يمشيني على طول، استلمت الوثائق واتصورت للبطاقة بعدين مسكت سرا عشان أقابل "جوان" لين وصلت عندها لقيت الأخت شنطتها عليها شعار أرامكو وكوب القهوة حقها عليه شعار سابك:D ، المهم كلمتني شوي بعدين قالت لي أنت انهيت اجراءات اليوم تعال بكرة. ثاني يوم كان فيه أشياء كثير ما أتذكرها كويس لكن أهم شي كان مقابلة جوان مرة ثانية ومعها "ماري" و"توم" اللي هم موظفين في مكتب الطلاب الدوليين، كلمونا عن النظام وعن تسجيل المواد اللي بيكون بكرة وكيف بيكون ووضحوا لنا أن الموضوع بيكون حسب القسم وما يقدروا يجبروا قسم يفتح لنا سكشن مقفل. بعدين قالوا أحد عنده أسئلة؟ فسألت عن مستوى طلاب البترول اللي سبقونا في أريزونا فقالت لي بصراحة أن طلاب السنة الماضية كان مستواهم سيء سألتها ليش في رأيك؟ قالت ما أدري بالضبط لكن أداءهم ما كان في المستوى المأمول. كنت عارف جوابها كوني قبل أكثر من 4 شهور اجتمعت مع الدكتور محمد آل حمود وكيل الجامعة وقلت له اني طالع أريزونا فقالي بالحرف: طلاب أريزونا سودوا وجهنا المرة الماضية! وطلب نعدل سمعة الجامعة.
المهم ثالث يوم في أريزونا كان يوم تسجيل المواد وكنت مقرر أنزل 15 ساعة هي (حسب الاسم في البترول):
che 402
che 425
che 453
ce 201
gs 321
بالنسبة للجي اس فكانت مادة سيكولوجي للفريشمان وتسجيلها من الموقع مباشرة لأنه مافي لمت للسكشن (في أول محاضرة كان عدد الطلاب المسجلين في المادة حوالي 500 طالب في قاعة ضخمة) وهذه فرصة عشان أقولكم أن البورتال حقهم فاشل بصراحة مقارنة بالبورتال حقنا. بالنسبة لمواد الكيميكال ومادة لسيفيل كان لازم نروح للقسم بنفسنا. كنا 4 طلاب كيميكال و4 طلاب ميكانيكال وواحد لسى ما وصل بسبب مشكلة الجواز. عموما طلاب الكيميكال طلعنا للقسم حقنا في مبنى هارشبارقر (شي جميل أن المباني على أسماء دكاترة مو أرقام مثلنا) المهم قابلنا سكرتيرة القسم اسمها "ديبي" وطلبت مننا نعطيها قائمة بمواد الكيميكال اللي نبغاها وهي بتتكفل بالباقي طلعنا من عندها على قسم السي اي عشان ننزل المادة فطلبوا مننا نرجع بعد كم ساعة فقلنا خلنا نروح نشوف الشباب في قسم الميكانيكل رحنا لمبنى الميكانيكل وتفاجأنا أن الشباب تقريبا مو قادرين ينزلوا اي مادة! كل السكاشن مقفلة والسكرتير يقول ما أقدر أسوي لكم شي وهم يحاولوا معه من غير فايدة حتى كان في طلاب برازيليين اكستشينج وعندهم نفس المشكلة. المهم طلعوا شباب الميكانيكل من عنده وراحوا على قسم الماث لأنهم يبغوا ينزلوا ماث 301 وكمان واحد كيميكال راح قبلهم يبغى ياخذها اليكتيف، قابلوا مسؤول من قسم الماث قالهم ترا المادة صعبة وما أتوقع بتعدوا والدراسة في أمريكا غير الخ الخ قالوا له سجلنا وما عليك (نهاية السمستر نصهم أخذ A) بالنسبة لنا رجعنا قسم السيفيل وقابلنا رئيس القسم وكان متعاون جدا بس شاف الترانسكربت وقال خلاص بنسجلكم واذا السكشن قافل بفتحه عادي.
في نهاية اليوم تسجلت بالنسبة لي ولعبدالله جميع المواد بينما بعض الطلاب اضطروا أنهم يغيروا في خططهم ويشوفوا مواد ثانية مثل ساينس اليكتيف وغيرها.
بعد ما انتهيت من سالفة تسجيل المواد بقي عندي موضوع واحد وهو سالفة السكن، في ثاني يوم وصلت فيه توسان رحت للسكن اللي كنت ناوي عليه مع عبدالله وقابلنا المسؤول وقال ايه ابشروا موجود اللي تبغوه بس تعالو بعد أسبوع واستلموا المفتاح والحين كل اللي عليكم تعبوا البيانات، طبعا خلال هذا الأسبوع أنا وعبدالله كنا في فندق وكل يوم ندفع عليه الشي الفلاني، الزبدة بعد أسبوع وصلنا السكن وجينا نستلم المفتاح، الا نتفاجأ بأنه المدير يقولي اسمك مو موجود! كيف كذا؟ يقول مدري! قلت له أنا موقع معاك عقد قال ما عندي شي! واذا تبغوا شقة الحين توقعوا عقد جديد وبسكن معكم اثنين ثانيين أو تدفعوا قيمة شقة كاملة لأربعة أشخاص! طبعا لمن قالها عرفنا على طول أن السالفة ابتزاز ويحسب السعودي بيدفع على طول. سحبنا شنطنا وطلعنا من عنده.
من حسن الحظ أن باقي الشباب لقوا سكن كويس نسبيا وعقد ايجاره شهري لكنه يأجر استديو فقط وليس شقق وكان أحسن حل قدامنا فأخذ كل واحد استديو عبارة عن سرير+مكتب+ثلاجة كبيرة+مغسلة مطبخ وأدراج وأدوات مطبخ+ حمام وأنتم بكرامة . سبحان الله بالصدفة أصبح كل طلاب البترول ساكنين في نفس المجمع السكني وحمدنا الله كثيرا بعدين على هذا الشي.

انتظرونا في الحلقة القادمة

 

i-20 هي ورقة ترسل لك من الجامعة الامريكية وهي دليل أنك طالب مقبول للدراسة عندهم، من دونها لا تصدر لك فيزا

الى الآن ما تعوضت بشي (ما رجعت السعودية للآن)

moving in date هو تاريخ تتفق فيه الجامعة مع كل المجمعات السكنية الطلابية والجامعة نفسها تعتمده للسكن الداخلي، هذا التاريخ هو اليوم اللي تستلم فيه السكن وعادة يكون قبل بدء الدراسة بأسبوع