تجربتي مع اجراءات التوظيف الأمن الصناعي ساسرف

السلام عليكم ورحمة الله وبركاتة .

في الحقيقة استفدت الكثير من اعضاء هاذا المنتدى
وفي تجاربهم وخبراتهم السابقة .

اعرفكم بنفسي حاصل على بكالوريس ادارة مالية والوظيفة الي جتني بالثانوية بس دخلت بالمفاضله
عندي خبرة امنية 6 سنوات من ايام الجامعه الى الان ربي ماكتب لي الوظيفة ، والله يكتب لي الخير ولمن يقراء .

اليوم بقولكم قصتي مع اجراءات توظيف ساسرف

15 فبراير راسلوني على صفحتي باللنكدن وقالو انك مرشح لوظيفة رجل امن صناعي وقدم علينا ارسلت cv وفي تاريخ 2 رمضان كلموني عطوني موعد مقابلة في موقع الشركة بالجبيل ورحت لهم طبعاً انا من سكان محافظة قريبة من الرياض تقريبا 140 كيلو المهم مقابلتي كانت الساعه 10 ويوم كنت بالطريق باقي على الجبيل 90 كيلو وقفت بجانب الطريق وغرزت سيارتي وباقي على مقابلتي تقريباً ساعه ونص وارسلت ايميل لهم وعلمتهم بالموقف الي صار لي والحمد لله تجاوبو على طول قالو تعال بعد الظهر او بكرى وجيتهم بعد الظهر والحمد لله سويت المقابله مع رئيس الأمن ومشرف الامن وموظفه من HR وكانت اسئله عامه بالعربي وقال تكلم عن نفسك بالانجليزي وعطيتهم كم كلمه وطلعت منهم الصدق حاس اني ما عجبتهم اجوبتي لاني ماحظرت صح ومع تغريزت الصبح والحر وصيام وقالو بنرد لك بالرد او الرفض

وفي تاريخ 25 رمضان ارسلو لي موعد اختبار اللغة الانجليزية في كلية الجبيل وحضرت وخذيت A1 في الاختبار طبعاً عرفت الدرجة بعدين في المقابله مع المدير العام وطلعت منهم رجعت لديرتي

وتاخرو بالرد توقعت ما انقبلت لاكن الحمد لله في تاريخ 6/6/2021 ارسلو ايميل قالو مقابله مع المدير العام للأمن الصناعي وحضرت المقابلة وكان المدير المهندس عبد الكريم الشمري اذا ماخانتني الذاكرة رجل واخلاقه عالية وكانت مقابله من احسن مقابلاتي كنت مروق قالي تحدث عن نفسك ومن تكلمت بدت السوالف ونصحني وعلمني عن امتيازات الشركة وحسيت اني مقبول من كلامة وقالي اذا انقبلت راح يجيك فحص طبي وهو شرط اساسي للقبول في الشركة وعندك اختبار لياقة يعتبر مو شرط بس يدخل بالمفاضله وقالي بعدين بنعطيك دورات في اللغه الانجليزية وبنعطيك دورات اقتحام دورات في مجال عملي .

ومن ابرز امتيازات الشركة :
1- بدل سكن 40 الف في السنة كحد ادنى ( على حسب كلامة )
2- 60 الف اذا جيت تتزوج سواء للرجل او المراءه
3- امكانية الحصول على منزل بعد 5 سنوات خدمة في الشركة
4- تامين طبي لك ولوالديك ( افضل تأمين طبي في الجبيل حسب كلام المدير)
5- تقديم دورات تطويرية للموظف
وحسب توقعي يوجد بدل تعيين
ومميزات اخرى ما اذكرها

المهم طلعت من عنده وخبرني بدرجتي بالاختبار الي هي A1 طبعا قال درجك نازلة بس هاذي الدرجة اقل درجة نقبل عليها هاذي الوظيفة وقالي ان عندك تقييم ايجابي في مقابلتك الاولى *اتوقع شفعت لي التغريزة*

ووصلني ايميل بتاريخ 17/6/2021 يطلبون تعريف بالراتب من جهه عملي الحالية وحقيقة هاذا شي زعلني لاني شغال في شركة حراسات امنية براتب اساسي 1000 ريال ومجموع الراتب 3000 مع البدلات والصراحة خايف يعطوني حول راتبي السابق .
والى الحين ماوصلني العرض وانهيت جميع الاجراءات وننتظر العرض بعدها الفحص والله يكتب الي فيه الخير .

معليش على الاطاله لاكن ممكن تفيد احدكم لان اجراءات الشركة تتطول زي ماقالي الموظف .

وعندي استفسار الي يعرف احد او عنده معلومة
عن رواتبهم اكون شاكر وممنون ❤️

واعتذر عن الاطالة ...