حلم متوقف بسبب المعدل

أعرف أشخاص كثيرين كانوا معدلاتهم جدا منخفضة والان هم أصحاب مناصب وقرارات في شركات كبيرة.
حياتك المهنية ما تتوقف عن المعدل وأنت صار لك سنيتن تقريبا من تخرجت وما اشتغلت وهذي مشكلة أكبر من المعدل

نصيحتي لك
- حاول تقبل بأي عرض وظيفي حتى لو الراتب منخفض،(أو حتى وظيفة تكون فني) أهم شيء تاخذ خبرة وهذا راح يساعدك ويخلي الشركات تتغاضى عن المعدل ولا تنظر فيه.
- حاول تفكر وتاخد دورات احترافية تتعلق في مجال شهادتك أو عملك المستقبلي، ويوجد دورات كثيرة تتعلق بالحاسب مثل شهادة مايكروسوفت وغيرها. الشهادات الاحترافية راح تساعدك كثيرا وترتقي أكثر والشركات تهتم أكثر للشهادات الاحترافية أكثر من المعدل.
- تخصص الحاسب غير التخصصات، يعني انت مطالب تتابع التقنية أول بأول وتحاول انك تتعمق فيها وهذا يعتمد عليك بالاشتراك في المجلات العلمية أو البحوث العلمية المنشورة.

في النهاية لكل مجتهد نصيب وانت اجتهدت وأخذت الشهادة لكن يعتمد عليك انك تجاهد على الوظيفة أو لا.

وربي يكتب لك السعادة والتوفيق.

 

لا تكتب المعدل بالCv واعتمد على التقديم اليدوي بحكم ان المواقع بالعادة تطلب منك المعدل .. وفي حال كان فيه اعلان وظيفي ارسل الCv بدون ذكر المعدل ..

 

لا تحطم نفسك وتقلل من شأن نفسك اذا انت سويت كذا اجل لا تلوم الشركات المعدل شي يعتبر متطلب احيانا مهم ولكن ليس جوهري وماتمشي امورك الا فيه لذا حاول ان تغطي نقطه المعدل بشي يجذب الشركات بما انك هندسة حاسب الي ابحث عن فكرة لاتجلس تهوجس وتجلد ذاتك عشان المعدل شي صار وانتهى وجرب المجال العسكري وإذا مالك هوى حاول تقبل باي وظيفة وتاخذ الخبره لانها راح تكون بمثابة تعويض عن المعدل ..
الله يرزقنا وياك بكل خير

 

السلام عليكم,

اول شي حصولك على بكالوريوس بحد ذاته انجاز بغض النظر عن المعدل, اهم شي لا تستهين بشهادتك وبقدراتك. الشباب ما قصروا واضافتي هي ان المعدل ينتهي دورة تقريبا نهائيا بعد العمل لانه الحديث يكون عن الخبرات اللي تملكها. ببساطة المعدل معيار يعطي فكرة عن عملك خلال الدراسة لكن بعد الحصول على وظيفة يتغير هالمعيار يصير على الخبرة.

بحكم انه لك فترة متخرج, برايي انك تقبل باي عرض وتعمل ولا يمنع انه تبحث عن عمل افضل وانت على راس عمل بس تحتاج تعرف القوانين علشان ما يصير عليك التزامات مالية. ومهندس حاسب اعتقد فيه شهادات مهنية مثل سيكيورتي وغيرها فشي جميل لو تحرص على التحضير لاحد الشهادات المهنية.

اهم شي لا تيأس There is always a way

بالتوفيق

 

يالغالي اغلب زملائي معدلاتهم فوق 3 من 4 وناس منهم اونر وصارلهم عاطلين فوق السنتين فيهم المهندس وفيه البزنس .. واغلبهم مهندسين كهرب وميكانيك
والفارق بالموضوع ان ماشاء الله الي معدلاتهم تحت 2.5 متوظفين وفيه منهم الي بارامكو .. صدقني اصحاب العمل يركزون غالبا ع المعدلات المنخفضه لانهم ميقنين انهم مجتهدين وودهم يعطونهم فرصه عشان ينفجر بالعمل .. فانا اخوك لاتقول هالكلام وادع ربك واستغفر وتنفرج ان شاء الله
والله يوفقك ويرزقك الوظيفه الزينه لكن زي ماقالوا لك الشباب لاتكتب المعدل ب السيفي حقك .. وزميل مقرب متخرج هندسه معدل 2.1 تقريبا ومتوظف ماشاء الله احسن وظيفه

 

السلام عليكم

حبيبي كم معدلك؟ ومن أي جامعة متخرج؟ هل المعدل تحت 1.5 ؟

عموما المعدل قلت أهميته عن أول كثير وأغلب اللي يحصلون وظائف معدلاتهم تحت ال3

وبعدين ياغالي القطاع الحكومي عادة ما يطلب معدل عالي وعندك كثير من الهيئات والمؤسسات الحكومية وغيرها من القطاعات التابعة لوزارة الخدمة المدنية ماتطلب معدل عالي. ابحث عن الأشياء التابعة لوزارة الخدمة وخذ خبرة وبعدها إذا تبي تنقل مكان آخر بإذن الله تستطيع

بالنسبة للماجستير عندك الجامعة العربية المفتوحة وعندك الجامعة الإلكترونية مع إن فكرة الماجستير ما أشوفها مفيدة إلا بالأشياء اللي لها علاقة بعملك.

بالتوفيق

 

السلام عليكم

يا أخ simsim2010 لا تنزعج كثير من المعدل اللي حصلت عليه حتى لو كان منخفض هذا مرحلة في حياتك ولازم تتعامل معاها بكيف تفيدك بمستقبلك

مثل ما قالوا الاخوان اول شيء لاتكتب المعدل بالسي في
* السي في لازم تكون جذابة من ناحية الانجازات اللي سويتها او البروجكتات الكبيرة بمامعناه ركز على مشروع التخرج والتدريب الصيفي او الكواب واذا سويت بروجكت كبير في كورس اكتب عنه والسي في هي اللي راح تدخلك المقابلات.
* في البداية غض النظر عن الشركات الكبيرة (مو معناها ما تقدم عليهم أقصد لا تتوقع منهم تواصل) توقع ان اول المقابلات راح تجيك من المتوسطة او الصغيرة.
*اثبات جديتك ومؤهلاتك للعمل بغض النظر عن المعدل راح تكون بالمقابلة فركز على كيف تبهرهم بالمقابلة ( راجع الاسئلة العامة اللي تجي بالمقابلات وحضر لها بالاضافة لتحضيرك ومراجعتك لما كتبته من ما تعرفه او انجزته من مشاريع او تدريب)
* حاول انك تأخذ وظيفة متناسقة مع تخصصك مع اي شركة وحتى لو الراتب مو مجزي لكن لاتجحف حق نفسك وهالشيء راح يهيأ انك تقدم على وظائف تناسب تخصصك في شركات كبرى بالمستقبل.

بمعدل ثلاث سنوات عمل بشكل جاد وانضباط وتحقيق انجازات في العمل هالشيء راح ينهي سالفة المعدل المنخفض او الشركات ما راح تركز عليه كثير وقد ما تسألك عنه.

وفي أشخاص أعرفهم صار لهم نفس حالتك والآن في منهم من هو متوظف في شركات كبيرة وصدقني ( بدون واسطة ولا ريكمنديشن )

أتمنى لك كل التوفيق

 

السلام عليكم

عزيزي صاحب الموضوع

انا مهندس مدني اتخرجت قبل ٤ سنواتت ولله الحمد ، معدلي مقبول نفس وضعك بالضبط .
ابداً لاتجعل المعدل يقلقك نفسياً او يوترك اقسم بالله العظيم ماقد انسألت عن معدلي الا مره واحده فقط . اولاً لم اكتبه في السيرة الذاتيه وثانياً اذا كنت متمكن من نفسك وشخصيتك ممتازه في المقابله ماحد راح يفكر يسالك عن معدلك لانهم شايفين الشخص الي قدامهم ممتاز .
وحاول انك تقوي نفسك في تخصصك علمياً وتتدرب علي المقابلات الشخصيه .

للمعلوميه اجريت اكثر من ١٠ مقابلات شخصيه في حياتي العمليه والحمدلله لم اسال الا مره واحده عن معدلي واجبتهم انه مقبول وانقبلت لله الحمد ..

يعني لاتفكر في موضوع المعدل ابداً ، هوا صح راح يقلل فرصك في الشركات الكبيره مثل ارامكو وسابك ومعادن وغيرها لانهم يفرزو على حسب المعدل اذا كنت خريج جديد لاكن اذا كنت بخبره اكثر من ٣ سنوات ، ثق تمام الثقه ماحد راح يهتم بمعدلك ...

وفي الاول والاخير التوفيق بيد المولى عز وجل وثق بالله ان رزقك بيده ليس بيد شخص اخر ونصيحتي دعاء الوالدين ...

شكراً لكم ..

 

أخوي معدلك فوق الـ2.1 وشايل هم؟ أنا توقعته تحت الـ2.0

على العموم المعدل ليس سبب توقف حلمك أبدا ومعدلك جيد أصلا لو صار فوق 3.0 كثير شركات ممكن ماتنظر للسيفي بسبب توقعهم إنك بتتركهم بعد فترة.

بالتوفيق لك أخي ولا تجعل الأفكار السلبية تحبطك.

 

شخصيتك اهم بكثير من معدلك. اتكلم عن تجربه.
اشتغل اي شي وخذ تجربه (اتكلم عن وورد واكسل وبعض الاجراءات والانظمه المطبقه) وبعدها بتحصل كثير ان شاء الله