حياتك بعد البترول !

اذا الي تخرج توظف مثلا في ارامكوا
حط في بالك ما زالت الفرصه بين ايدينك انك تقدر تحقق اعلى النتائج الي تخلي اقوى الشركات تبحث عنك .. احسن الظن بالله وثق بالله واجتهد ونصيحه لا تفكر ببعدين فكر بالشي الي بين ايديك .. صدقني لو ترجع فيني الايام لوراء راح اضرب عشر اضعاف جهدي عشان اطلع باعلى الدرجات ولكن الحمدلله ..

استغل الفرصه الي بين ايديك وابشر بالخير

تفائل خير واكثر من الاستغفار واسال الله العلي العظيم ان يوفقك ويوفق جميع الطلاب ويكتب لك وللجميع التوفيق بالاختبارات وفالك الفل مارك

 

الموضوع جميل , بأتكلم عن تجربتي
تخرجت من الجامعة في سبتمبر 2016 شهر 9 , استغرقت 9 شهور حتى لقيت وظيفة في تخصصي , لكن قصتها كانت غريبة

القصة هي اني اول ما تخرجت حاولت اشغل نفسي بشيء غير التقديم على الوظائف لانه الشيء المعتاد طبعا , ما لقيت غير النادي وخصوصا انه وزني زائد قلت ان شالله حاتلهي فيه

لكن ياخي صعب في هذا الوقت تكمل في شيء وما تحصل فلوس منه الا انه ياخذ منك فلوس ويادوب تستفيد , لكن الحمدلله نقصت 5 كيلو طيبة برضو

فقلت خليني ادورلي دورات او وظائف مؤقتة , لقيت دورتين تبدأ وتنتهي فنفس الوقت كلهم مدتهم شهر ونص , وحدة الصبح والثانية المساء , الاولى كانت دورة عن البيع منتهية بالتوظيف في محل براتب 4 الاف , الثانية دورة صيانة جوالات متقدمة , وفعلا اخذتهم الاثنين وخلصت مع انه كان تعب كانه دوام اوريا , والدورة الاولى كانت بعيدة عن تخصصي وحسيت انها ما لها داعي وكنت افكر اسحب , لكن النتيجة كانت مفرحة لاني توظفت وسرت اصلح جوالات كدخل اضافي

خلال تلك الفترة في وظيفة البيع حضرت يوم المهنة في الجامعة , وحضرت ملتقى التوظيف في الدمام بالشيراتون اللي انتشرت مقاطعه , وجاءتني الردود بالرفض من اغلب الشركات اللي قدمت عليها لأن معدلي منخفض

احبطت صراحة بس اللي خفف عني كان عندي دخل بسيط يعوض الفشل , بس طبعا ما احس كنت راضي لاني كان ودي احلل 7 سنين الجامعة والكرف اللي عشته , واني ابدأ ابني مستقبل لي في تخصصي

اشتغلت في محل للبيع في المطار , مع ان المحل هذا عنده اكثر من فرع في مدينتي , وبالصدفة جاء احد من المدراء ليشتري وبصفة عامة البيع والتجارة تعتمد في سواليفك الكويسة مع الزبائن , فلذلك سولفت معه واكتشفت انه مدير قسم من اقسام التشغيل ويشتغل معاه وتحته مهندسين , وقلتله عن وضعي وقالي اعطيني السي في حقك وان شالله خير , الحكاية انه حسيت حزن عليا اني في هذا المكان بهذه الشهادة , وانا شوية كنت درامي كاني حياة الفهد بس كان هدفي فقط سواليف الصراحة كنت فاقد الامل

الحمدلله تواصل معي بعدها وسويت المقابلة وقالولي ان شالله بعد اسبوعين نكلمك , المهم كلموني بعد 3 شهور وقالولي اجي اوقع العقد معاهم , وان شالله راح اباشر يوم 1/6 اول الشهر الميلادي القادم , وعاد ادعولنا يجينا بونص رمضان
المهم مادري لو في قصة او فائدة في حكايتي , لكن حسيت سبحان الله انها مكتوبة , لانه معدلي سيء وعارف وضع البلد الاقتصادي مش ولا بد , كنت حاعتمد على اني اجتهد في وظيفتي اللي مو فتخصصي وخلاص اقبل بنصيبي , لكن الحمدلله توفقت , عقبالكم جميعا

 

لا تخلي المعدل عذر. شخصيا اعرف كثير معدلاتهم فوق 3.5 وبدون وظائف أو وظائف متدنية المستوى. التوفيق من الله و أنت اللي عليك الإجتهاد.