رحلتي مع أرامكو، من التخرج للتوظيف!

بسم الله والصلاة والسلام على رسول الله، من أبسط حقوق المنتدى إني أقدم رحلتي من إلى، وأحاول أفيد زي ما استفدت منه.

أولا:
بدأت التقديم على أرامكو من خلال يوم المهنة اللي يجي بالترم الثاني، وعدت الأيام وكلموا ناس كثير معدلاتهم أقل مني ويأست للأمانة شوي، لأني حسيت على الأقل إني أستاهل أوصل للمقابلة!.

ثانيا:
نزلوا تقديم أونلاين حق خريجين الهندسة اللي أقل من ٣ سنوات خبرة، وقدمت عليه وأنا أسأل الله إن كان فيه خير لي أن يكتبه من نصيبي. ومن ثم انتظرت! ولكن كنت أقدم في كل مكان كخريج فرش طبعا.

تخرجت بنهاية الترم الثاني ولله الحمد ووصلني إيميل من أرامكو تقريبا بعد التخرج ب١٠ أيام للمقابلة، وكانت بالظهران (أنا من سكان ينبع) ورحت وسويتها وكانت جدا قصيرة وحسيت إني ما بدعت. طبعا المقابلة كانت مع قسم المشاريع وقعدت أقرأ قبل المقابلة عن طبيعة مقابلاتهم، واستشفيت إنهم ما يسألون عن التكنكل والتخصص، ويسألون عن الأشياء الإدارية اللي لها علاقة بإدارة المشاريع، وأنا فرحت لإن تطبيقي كان له علاقة بإدارة المشاريع، فحسيت إن بيكون لي أدفانتج شوي بالمقابلة، المهم دخلت المقابلة وإلا يسألون تكنكل جاوبت اللي جاوبته واللي ماعرفته كان من مادة درستها في السوفمور، فهو قال لي توك متخرج ونسيت قيدك؟ قلت له هذي المادة خصيصا دارسها قبل ٣ سنوات، ولكن ماهو عذر، قالي دامك عارف كفاية. وطلعت محبط من المقابلة شوي أمانة.

ثالثا:
بعد المقابلة تقريبا بأسبوع، وصلني إيميل بإنه لازم أعبي أوراق الKYC والgov. Check واللي على بعضها تعرف بال
Background investigation
يتأكدوا إنك من خلفية كويسة ومالك علاقة بالمشاكل باختصار عبيتها وأرسلتها ورجعوا أرسلوها لي كذا مرة عشان أعدل/أعبي شوية أشياء زيادة بالفورم، يعني عادي تغلط أول مرة ما بيقبلوها لين يقولولك إنها أوكي تمام.

رابعا:
وصلني إيميل إني أسوي الفحص الطبي، فرحت وقتها ولكن قيل لي إن هذا من إجراءات أرامكو ولا يضمن حصولك على الوظيفة، بالرغم من إن كل الموظفين اللي أعرفهم لما قلت لهم قالولي مبروك الوظيفة! وسويت الفحص الطبي والمستشفى دايركت يرسلونه لأرامكو، انت عليك تسويه بس، ولو فيه أحد يحتاج تفصيل للفحص يكتب وبإذن الله أفصل فيه.

خامسا:
تواصلت معي شركة ثانية بعرض مغري، ووقعت العرض وأرسلته لهم، وسبحان الله بعدها بيوم وصلني عرض أرامكو، واتصلت على الشركة الثانية واعتذرت منهم. طبعا المدة بين التقديم من الموقع إلين وصول العرض الوظيفي تقريبا ٤٠ يوم، وعلى حسب علمي إن له علاقة بالإدارات، بعضها لكيعة وإجراءاتها تتأخر أكثر من كذا، وبعضها سريعة والحمدلله إنها كانت سريعة، لإنهم تواصلوا معي الربوع أي قبل عيد الأضحى ب٣ أيام، وقعت العرض الوظيفي ووقعت حاجة اسمها conflict of interest form، ووصلني إيميل بعد الظهر الربوع إن بكرة الخميس تطلع الID (في نفس مدينتك إن كان فيه مركز للID) وطلعته الخميس ٧ جولاي، وكانت بداية مباشرتي بعد العيد ١٧ جولاي بمسمى project engineer IV. والآن أكتب لكم الموضوع من الدوام طبعا اللي عنده أسئلة عن طبيعة برنامج الPDP, أو عمل البروجكت، أو أي حاجة ثانية، أسأل وراح أجاوب بإذن الله، والله يوفق الجميع يارب.

 

الله يبارك فيك ويكتب لك اللي فيه الخير يارب،
طبعا ماشاء الله تبارك الله خريجين مرتبة الشرف الأولى والثانية من دفعتي كثير منهم ما تعبوا في إيجاد وظايف، انا هندسة ميكانيكية، وكثير من اللي أعرفهم من الميكانيكية والكيميائية توظفوا، طبعا الرزق بيد الله وانت أبحث عن الهندسة وأبحث عن الطب والمواد المدرسة في كل تخصص وأبني قرارك على هذا، والوظيفة تجي للمجتهد أينما كان بإذن الله

 

الله يبارك فيك يا عسل ويوفقك ويكتب لك الخير، أنا مع إدارة المشاريع خصيصا عُينت في وحدة جيزان أبها حاليا كأسايمنت مدته ٦ شهور من برنامج الPDP، ولكن بشكل عام إدارة المشاريع فيها تنقل كثير، لأن المشاريع أماكنها كثير خصيصا أرامكو اللي لها يد في أغلب مناطق المملكة، بس فيه أقسام كثير طبعا مافيها تنقل.

 

أنا شخصيا خلال دراستي عاشرت ٣ يدرسون مهندسين كهربائيين، ماشاء الله تبارك الله واحد توظف في أرامكو والآخر بالرغم من إنه اتأخر ترم الا إنه توظف بعد التخرج على طول في شركة خاصة بس ماعرف ايش اسمها والله. والثالث ما زال يدرس. طبعا زي اي تخصص هندسي من ال٣ الكبار، المعدلات العالية فيها دليل على قدرتك العقلية واستيعابك، وعشان كذا يدوروا عليها. وبطبيعة الكهرباء تقدر تتشعب فيها إلى الinstrumentation and control وتكسب فيلد كامل جديد، وطبعا مطلوب جدا لأن التوجه الان الى ال automation وماشابه. ولكن أفضل لك تشوف خريجين الهندسة الكهربائية وتاخذ الكلام منهم شخصيا، لإني أنا نقلت لك تجربتين فقط وكلها كانت لأشخاص أنا اعتبرهم ممتازين جدا دراسيا بشكل فوق المتوسط. والله يوفقك

 

أنا سويت أسيسمنت تيست في يوم المهنة في الجامعة مافتكر كم كان تاريخه، ولكن الناس اللي سووا معايا الاسيسمنت تست وجاهم رد بعدها بأسبوعين تقريبا، انا طبعا ما جاني شي وقعدت فترة لين جاني ايميل ترشيح المقابلة في يوم ٢ جون ٢٠٢٢، توقعي هو أن الاسيسمنت تست لازم الكل يسويه وهو من إجراءات التوظيف، ودرجته تسجل في ملفك بحيث حتى لو ما انقبلت في هذي الوظيفة، بيكون موجود للأقسام الثانية اللي يشوفون ملفك. ولكن توقعي ان هو أول خطوات التوظيف بس لا تشغل نفسك وتنتظر رد قريب، انت جهز له واعمل اللي عليك. والله يوفقك وفالك الخير

 

وب

وبالنسبة لطبيعة الاسيسمنت تست لا هو عام مية بالمية، فيه موضوع مثبت في المنتدى هو اللي استعملته للتجهيزات له بوقته، اطلع عليه واي اسئلة انا حاضر

 

الله يبارك فيك وياك ياارب، الفحص الطبي بسيط جدا، فحص دم وبول وانت بكرامة، عاد ايش يستنتجون منه مادري والله، وفحص نظر وسمع ما ياخذ ٥ دقايق، وتتوكل على الله

 

الله يبارك فيك يا حبيب قلبي،
الاسئلة كانت في التخصص كالتالي:
ايش انواع انتقال الحرارة مع تعريف كل نوع
ايش دورة التبريد ومراحلها
كيف يشتغل رديتر السيارة
ومن ثم بدو يسألوا تكنكل بس في مشروع التخرج اللي هو كان heat exchanger وأسئلة خصيصا لمشروعي، يعني ايش اللي داخل وايش اللي خارج وخواص المواد. وطبعا سألوني لو عندي مشكلة في التنقل لان المشاريع في كل المملكة، هذا اللي أذكره والله