سؤال للخريجين , هل تنصحوا بدخول جامعة البترول

نعم انصحك فيها بس على حسب ميولك ورغبتك

مثلا البترول مافيها طب عكس بقية الجامعات .

انا عن نفسي أفضل جامعة الملك سعود لكثرة التخصصات فيها بالإضافة موقعها أفضل لي بالرياض وأيضا الدراسة فيها سهلة ..

فإنت شوف ميولك ورغبتك هل KFUPM تستاهل تروح لها او لا هل ترتاح بالظهران هل خدماتهم ممتازة اخر شيء سمعت عنها ان المطعم تبع الجامعة مشي حالك وان الغرف متصلة مع روميت ... الخ

وطبعا روح لها اذا جاك قبول ترى ماينقبل فيها الا الدافور (اللي معه درجات عالية) بس اول ماينقبل الدافور يقلب شاطور مع الكرف اول سنة بس بتتعود بعدين وبيصير الامر عادي جدا أهم شي نظم وقتك وخصص وقت للمذاكرة ووقت للمراجعة ...

كثير من الشركات كمان متعاقدة مع الجامعة وتاخذ طلابها للتدريب او للعمل فهذا شيء جدا ايجابي فيها ولها فرص مستقبل واعدة .. ماقد شفت خريج فيها عاطل الا قليل جدا وهذا مؤشر إيجابي
فالك التوفيق ان شاء الله

 

اعذرني اللي فوق كلامه مبني على انه يقرا بالنت مش حقيقي ١٠٠٪؜

الجامعة اسم ايه نعم تعقيد وصعوبه ايه نعم مخرجات ايه نعم بس حياه اجتماعية لك عليها ، علاقات خارجيه لك عليها .
وعشان تكون بالصورة الان اهم شيء معدلك .
انا طبقت بشركة من شركات ارامكو الموظفين من بترول ومن كليات الهيئة الملكية ومن جامعة سعود ومن جامعة عبد العزيز ومن امريكا وكلهم نفس الرواتب ونفس المكانه الوظيفية .
الرزق مو على جامعة وحده فقط
اذا بنصحك ادخل التخصص اللي تحبه بجامعة كويسه سمعتها وقريبه من اهلك افضل لك .

انا مادرست بجامعة سعود انا خريج الهيئة الملكية بس يوم اشوف شهادة محمد بن سلمان وكيف انه فعلاً قائد اتضح لي ان جامعة سعود مش هينة ولها مخرجاتها وثقلها التعليمي
ونفس الشيء بترول لها ثقلها وتعليمها طبعاً بس ماتستحق الغربة سنين عن اهلك اذا ان عندك بدائل قوية وكويسه بنفس الوقت
لو انك بتختار هندسة ممكن اقولك بترول قوية ومنفردة .

بس دامك ناوي حاسب وهالمجال ترى موجود بجامعات ثانيه وبمخرجات قوية وقريب منك ومن اهلك
والله الله بالمعدل لاتتخرج بدون مرتبه شرف .

بالتوفيق يارب

 

معاد الوضع زي اول يمكن بس ارامكو وشلمبر جير وكم شركة تنعد على الاصابع اللي تفضل خريجي البترول فالوقت الحالي

اهم شي المعدل العالي ثم المعدل العالي لو انك متخرج من جامعة الزقازيق

 

على الرغم من اني مادرست بالبترول .. إلا ان الجامعة سمعتها طيبة في كل مكان .. وهذا شي مشرف لكل من تخرج او لازال يدرس فيها.
اذا كان تخصصك تابع للهندسة بانواعها ومن ضمنها هندسة الحاسب + وضعك الاجتماعي يسمح لك بالدراسة فيها .. توكل ع الله وادرس ..
الصعوبة بالتدريس غالبا تكون فيه المخرجات مميزة بغض النظر عن المعدل لان المعدل ماهو مقياس ..
وفيه نماذج كثيرة من طلاب متخرجين بمعدلات +3 من جامعات عادية واقل .. ع الورق معدل عالي ولكن النتيجة 0 ..
حط في بالك لو تخرجت بمعدل عالي وانت مخرجاتك ضعيفة راح تتعب بالمقابلات .. بل ع العكس راح يكون المعدل العالي ضدك لان سقف التوقعات عالي ..
خريج 2.5 فاهم ومجتهد ومثابر افضل من خريج 3.5 ماشي بطرق ملتوية ..
ومن ناحية التفضيل نعم .. فيه تفضيل في شركات كثيره واولها ارامكو .. سامرف وصافولا (هذا اللي متاكد منهم)
التفضيل غالبا يكون قبل المقابلة .. بحيث خريج البترول مقدم ع غيره في الهندسة في شركات معينة مثل اللي ذكرتها وغيرها.
توكل ع الله اذا تقدر .. لن تجد افضل منها بالمملكة .. كلامي كله عن التخصصات الهندسية فقط.

 

انا كنت طالب بترولي سابق وحولت الى كلية الجبيل الصناعية تخرجت مهندس كيميائي ٣ رمضان والحمد لله توظفت قبل العيد وانا ما استلمت الشهادة باقي .
الارزاق بيد الله والتوفيق من عنده والوظايف يهمهم المعدل اسم الجامعة كان زمان حاليا معدلك غير كذا السستم يسوي تجاهل دايركت .

 

اذا جاك قبول فيها أنصحك تروح لها ..

هل لها أولوية في التوظيف ؟؟ نعم لكن على حسب
على سبيل المثال أرامكو نعم لها أفضلية حتى خلال تدريبي الصيفي في ارامكو لاحظت 3 مدراء ادارات كلهم من خريجي البترول مو اشخاص عاديين 3 مدراء ادارات وغير الموظفين الاخرين وموقع الجامعة المميز أيضا القريب من سكن الشركة والاحتكاك مع الموظفين والقطاع الصناعي بشكل عام .

يوم المهنة الأخير KFUPM Virtual career Fair اللي برأيي أفضل معرض توظيف صادق كان يومين للبترول خاص لهم واخر يوم لبقية الجامعات وكان هناك شركات كثيرة موجودة ومتعاقدة مع الجامعة وتعطي أفضلية لطلاب البترول .

الدراسة في البترول عشان اكون صريح معك ليست سهلة ولو تلاحظ اغلب الخريجين يتخرجوا منها بمعدلات قليلة يعني تقول هذا هامل لكنه خلاف ذلك وعكس سهولة بقية الجامعات .. يعني لاتفكر في المعدل هناك شد حيلك وبتحصل كل خير ان شاء الله اترك اللي يقلك تعقيد وكرف وتضحي بحياتك الإجتماعية واللي يقلك انا تركت الجامعة ووو سيبك منه شد حيلك ونظم وقتك وبتحصل كل التوفيق ان شاء الله .

اذا تفكر تدرس هندسة أنصحك فيها بشدة واذا تبغا إدارة او اي تخصص اخر صدقني ماراح تفرق روح لأي جامعة أخرى

عموما أتمنى لك كل التوفيق .. وكل الجامعات السعودية فيها الخير والبركة ولله الحمد وأهم شيء اثبت نفسك وبتحصل على الوظيفة بإذن الله وكثير من خريجي الجامعات اعرفهم سواء البترول او سعود او عبد العزيز توظفوا حتى قبل إستلام وثيقة التخرج وهذا بفضل الله تعالى وأتمنى الكل بنفس هذا المصير بإذن الله .

بالتوفيق

 

نصيحة إذا تبي مستقبل, و مقدم تدرج في أرمكو , روح و أنت مغمض, الباكلوريوس صار ما يأكل عيش, و من هنا لين واحد يتخرج كل صار راتب أعلى من خريج البترول في بعض الشركات. و لا تنسى المميزات.
و لو تحصل لك سابك ( مع أنه اللي أعرفه مقفلين ) روح بعد ولا تتردد.

يمديك تكمل بعدين إنتساب ولا بارت تايم , ولا حتى أون لاين, في ناس دخلت أرامكو و كملت بارت تايم في التقنية و غيرها و أبشرك كملو ماستر و على حساب أرامكو.

موفق يارب

 

على أي أساس قلت هذا الكلام ؟؟! ماتبغا الناس يدرسوا بالجامعة او يكملوا دراسة
هل تعلم الفرق بين متدرج ارامكو وخريج جامعة بارامكو
لماذا قلت هالكلام افيدنا من فضلك ..

وتقبل مروري . 112

 

على أساس أنه يضمن مستقبله، مو يتمرمط بالجامعة " كوزات و أسايمنتات و إختبارات بتطلع روحه يمكن ما يعدي حتى التحضرية " بعدين يروح بس شركة فلان على ٦٠٠٠ ريال ولا يحلم بأمه تخليه يتزوج. يعني بيتعب على فرصة قليلة جداً. الأول الشهادة حلوة اللحين أنت و غيرك ما يبونك. و دليل خريجين " و معدلات عالية " جالسين لهم أكثر من سنة ما توظفو. هل تقدر تنكر هالكلام ؟؟؟
هل الجامعة ساعدت هاللي تخرجو بفلوس مثلاً؟؟؟
ياخي اصبر شوي بتدفع على كل سمستر و بتكره الساعة اللي فكرت فيها تدرس و تقابل الدكاترة اللي رواتبهم خرافية و مستانسين يشوفوك تتعذب.

يروح شركة ضامن نفسه فيها و راتب بدايته ما يقل عن ٧٠٠٠ و أكثر و مميزات و برنامج تملك بيوت و ادخاري و غيرها. و تطوير.
و لو فكر يدرس يمديه و على الراحة و بفلوسه و الشركة تتحمل مصاريف الداسة بعد : )

أنا أقول رأيي مثل غيري. و شفت مجربين خلال ١٥ سنة اللي راحت.

الله يوفقك.